लूका 7

हेक सूबेदारा चा विश्‍वास

(मत्ती 8:5–13)

1जिसे बेले ईशु लौका नु ये सारीया बाता केहती चुकला, तां कफरनहूम मां आला। 2ओठे कुई रोमी सूबेदार चा हेक दास जको ओचा प्यारा हुता, बिमारी लारे मरणे उपर हुता। 3ओणे ईशु ची चर्चा सुणती कर यहूदिया चे कई बङका नु ओकनु हा बिनती करने वास्ते ओचे गोढु भेज़ले कि आती कर माये दास नु ठीक कर। 4वे ईशु चे गोढु आले ओकनु बङी बिनती करती किहुं लाग़ले, “ओह ऐचे लायक छै कि तु ओचे उपर दया कर। 5कांकि ओ अम्चे लौका लारे प्रेम राखे ते ओणे ही अम्चे वास्ते प्राथनाघर बणाले।”

6ईशु वांचे लारे गेला, पर जब ओह घरा चे दूर कोनी हुता, तां रोमी सूबेदारा ने ओचे गोढु आपणे कई साथीया चे जरिये केहती भेज़ले, “हे प्रभु, ङोख ना चा, कांकि मैं ऐस लायक कोनी कि तु माई छत्ते तले आ। 7ये वजह मैं आपणे आप नु ऐस लायक वी कोनी समझले, कि दुधे गोढु आवे, पर वचन ही केहती ङे तां माया दास ठीक हुती जई। 8मैं वी प्रायधीन इन्सान छै, ते सिपाही माये अधीन छी, ते जब मैं हेके नु किहे, ‘जा,’ तां ओ चाह्‍ला जाये, ते ङुजे नु किहे, ‘आ,’ तां ओ आती जाये, ते जब आपणे कुई दासा नु किहे ‘ईं कर,’ तां ओ करे।”

9ईं सुणती कर ईशु नु अचम्भा हुला ते ओणे मुँह फेरती कर वे भीड़ नु जको ओचे भांसु आवे पलती, केहले, “मैं तम्हानु किहे पला कि मैं इस्राएल मां वी इसड़ा विश्‍वास कोनी ङेखला।”

10ते भेज़ले आले लौका ने सूबेदारा नु घरे जती कर ङेखले कि ओह दासा नु चंगाई मिड़ली।

बांढी चे पूता नु जीवन दान

11ऐचे तुरन्त बाद ईशु नाईन नांवा चे हेक शहरा मां गेला। ओचे चैले, ते बङी भीड़ ओचे लारे जाये पलती। 12जिसे बेले ओह शहरा चे दरवाजे चे गोढु पुज़ला तां लौक हेक मुड़दे नु ब़ाहर चली जई पलते। जको आपणी आई चा हिकड़ाता चा पूत हुता, ते वा बांढी हुती ते शहरा चे घणे सारे लौक ओचे लारे हुते। 13बांढी असतरी नु ङेखती कर प्रभु नु तरस आला ते ओणे केहले, “ना रो।” 14बल्ति ओचे गोढु आती कर अर्थी नु हाथ लाला ते मूंढा ङेणे आले रुकती गेले बल्ति ओणे केहले, “हे जवान, मैं तनु किहे ऊठ।” 15तब ऊं मुड़दे उठती ब़ेहले, ते ब़ोलु लाग़ले, ईशु ने ओनु, ओची आई नु सोंपती ङिले।

16ऐचे लारे सारा नु ङर पड़ती गेला, वे नरीकारा ची बढ़ाई करती कर किहुं लाग़ले, “अम्चे बीच मां हेक बङी भविष्यवाणी करने आला उजागर हुला, नरीकारा ने आपणे लौका उपर दया करली।”

17ते ईशु चे बारे मां हा बात सारे यहूदिया देशा मां ते आस-पास चे सारे इलाका मां फैलती गेली।

ईशु ते यूहन्‍ना बपतिस्मा ङेणे आला

(मत्ती 11:2–19)

18यूहन्‍ना नु ओचे चैला ने यां सारीया बाता चा समाचार ङिला। 19बल्ति यूहन्‍ना ने आपणे चैला महु ङुंहु जणा नु हकारती कर प्रभु ईशु कनु ईं पूछणे वास्ते भेज़ले, “का आणे आला तु ही छी, जा अम्ही कुई ङुजे ची बाट ङेखु?”

20वाणे ईशु चे गोढु जती कर केहले, “यूहन्‍ना बपतिस्मा ङेणे आले ने अम्हानु दुधे गोढु ईं पूछणे वास्ते भेज़ले, ‘का आणे आला तु ही छी, जा अम्ही कुई ङुजे ची बाट ङेखु?’ ”

21वे घड़ी ईशु ने ब़ोहत सारा नु बिमारीया ते ङुखीया ते दुष्ट आत्मा कनु छुड़ाले, ते जको अन्धे हुते, ङेखु लाग़ले अन्धा नु आंखी ङिलीया। 22ते ओणे वानु केहले, “जको कोच्छ तम्ही ङेखले ते सुणले छै, जती कर यूहन्‍ना नु केहती ङिया कि अन्धे ङेखी, लंगड़े टुरी-फिरी। कोहड़ी शोद्ध करले जई, बेहरे सुणी, मुड़दे जीते करले जई, ते कंगाला नु सुसमाचार सुणाला जाये। 23ते धन्‍न छी वे, जको माये उपर भरोसा करना ना छोड़ी।”

24जिसे बेले यूहन्‍ना चे भेज़ले आले लौक चाह्‍ले गेले तां ईशु यूहन्‍ना चे बारे मां लौका नु किहुं लाग़ला, “तम्ही बरब्यान मां का ङेखु गेलते? का हवाई लारे हलते हुले कान्‍नै नु? 25तां बल्ति तम्ही का ङेखु गेलते? का मुलायम ओढ़णी घाले आले बन्दे नु? ङेखा, जको भड़काऊ ओढ़णी घाली ते मौज मस्ती लारे रिही, वे राज़ भवना मां रिही। 26तां बल्ति का ङेखु गेलते? का कुई भविष्यवक्‍ते नु? हव्वे, मैं तम्हानु किहे पला बल्कि भविष्यवक्‍ते कनु वी बङे नु 27हा ओही छै, जाये बारे मां लिखले आले छै,

“ ‘ङेख, मैं आपणे दूता नु दुधे आग़ु-आग़ु भेज़े पला

जको दुधा मार्ग़ सिधा करी।’

28मैं तम्हानु किहे पला कि जको असतरीया कनु जमले , वांचे महु यूहन्‍ना कनु कुई बङे कोनी, पर जको नरीकारा चे राज़ मां छोटे कनु छोटा छै, ओ यूहन्‍ना कनु वी बङा छै।”

29 # मत्ती 21:32; लूक 3:12 ते सारे सिधे लौका ने सुणती कर ते चुंगी गेहणे आला ने वी यूहन्‍ना चा बपतिस्मा गेहती कर नरीकारा ची योजना नु मनती गेहले। 30पर फरीसी ते शास्त्री ओकनु बपतिस्मा ना गेहती नरीकारा ची मन्सा नु आपणे बारे मां टालती ङिली।

31“तां मैं ऐ युगा चे लौका ची तुलना काये लारे ङिये कि वे काये समान छी? 32वे वां ब़ाला चे समान छी, जको बजारा मां ब़ेहले आले हेके ङुजे नु साङ मारती कर किही,

“ ‘अम्ही तम्चे वास्ते बन्सरी बजाली,

ते तम्ही कोनी नचले,

अम्ही विलाप करला

ते तम्ही कोनी रोले।’

33कांकि यूहन्‍ना बपतिस्मा ङेणे आला ना रोटी खाता आला, ना दाखरस पीता आला, ते तम्ही किहा, ‘ओचे मां दुष्टात्मा छै।’ 34मैं इन्साना चा पूत खाता-पीता आला, ते तम्ही किहा, ‘ङेखा, पेटु ते पियक्‍कड़ बन्दे, चुंगी गेहणे आला चा ते पापीया चा मित्र छै।’ 35पर नरीकारा चा ज्ञान आपणी सारी ऊलाद्धी चे जरिये सच्‍चा ठहराला गेला।”

फरीसी चे घरा मां पापी असतरी नु माफी

36बल्ति कुई फरीसी ने ईशु ची बिनती करली कि माये लारे भोज़न कर तां ईशु फरीसिया चे घरा जती कर भोज़न करु ब़ेहला। 37#मत्ती 26:7; मरकु 14:3; यूह 12:3ओ शहरा ची हेक पापी असतरी ईं जाणती कर कि ईशु फरीसी चे घरा मां रोटी खाणे वास्ते ब़ेहला, संगमरमर चे ठांवा मां इत्र आणला। 38ते ओचे पग़्ग़ा चे गोढु, भांसु भिली रेहती, रोती हुली, ओचे पग़्ग़ा नु हींजवा लारे भेंवणे ते आपणे ठोङा चे माला लारे लुंह लाग़ली, ते ओचे पग़्ग़ बार-बार चूपती कर वांचे पर इत्र मसड़ला।

39ईं ङेखती कर, ओह फरीसी जेह्णे ओनु हकारले हुते आपणे मना मां सोचु लाग़ला, “अगर हा भविष्यवक्‍ता हुवीया तां जाणती गिहा कि जको ओनु हाथ लावे पली, वा कूण ते किसड़ी छै कांकि वा तां पापेण छै।”

40ईशु ने ओचा उत्तर ङिला, “हे शमौन मनु तनु कोच्छ केहणे।”

ओह ब़ोला, “हा गुरु, केह।”

41“कुई महाजन चे ङोन ङेणदार हुते, हेक कनु पाँच साऔ ते ङुजे कनु पंजहा चान्दी चे सिक्‍के गेहणे हुते। 42जबकि वांचे कनु ङेणे वास्ते कहीं कोनी रेहले तां ओणे वा ङुंहु नु माफ करती ङिले। तां वांचे महु कूण ओचे लारे ज्यादा प्रेम करे?”

43शमौन ने उत्तर ङिला, “माई समझी मां तां ओ, जानु ज्यादा छोड़ती ङिले।”

ईशु ने ओनु केहले, “ते सही सोचले।” 44ते वे असतरी ची तरफ घूमती कर ओणे शमौन नु केहले, “का तु ये असतरी नु ङेखी पला? मैं दुधे घरे आला, पर ते माये पग़्ग़ धोवणे वास्ते पाणी कोनी ङिले, पर यिणे माये पग़्ग़ हींजवा लारे भेले, ते आपणे माला लारे लुहले। 45ते मनु मिठ्ठी कोनी ङिली, पर जिसे बेले कनु मैं आला ओ बेले कनु यिणे माये पग़्ग़ा नु चूपणे ना छोड़ले 46तें माये ठोङा उपर तेल कोनी मसड़ले, पर यिणे माये पग़्ग़ा पर इत्र मसड़ला। 47ऐवास्ते मैं तनु किहुं पला, कि यिचे पाप जको घणे हुते माफ हुले, कांकि यिणे ब़ोहत प्रेम करला, पर जाये थोड़े पाप माफ हुले, ओह थोड़ा प्रेम करे।”

48ओणे असतरी नु केहले, “दुधे पाप माफ हुले।”

49बल्ति जको लौक ओचे लारे भोज़न करने वास्ते ब़ेहले हुते, वे आपणे आपणे मना मां सोचु लाग़ले, “हा कूण छै, जको पापा नु वी माफ करे?”

50पर ईशु ने असतरी नु केहले, “दुधे विश्‍वास ने तनु बचाती गेले, शान्ति लारे चाह्‍ली जा।”

Currently Selected:

लूका 7: ODR

Highlight

Copy