लूका 24

ईशु चे जीते हुवणे

(मत्ती 28:1–10; मरकुस 16:1–8; यूहन्‍ना 20:1–10)

1पर हफ्ते चे पेहले ङिओ पुरा फुटले वे वां खुश्बुदार चीजा नु जको वाणे तियार करलीया हुतीया, चती कर कब्री उपर आलीया। 2वाणे पत्थरा नु कब्री उपर कनु लुढ़कला पला ङेखला। 3पर भीतर जती कर प्रभु ईशु ची लाश कोनी मिड़ली। 4जब वे ये बाते कनु चकराती गेलीया, तां ङेखा, ङोन मर्द झलकती ओढ़णी घाले हुले, वांचे गोढु आती भिले रेहले। 5जब वे ङरती गेलीया ते धरती सनु मुँह करली रेहलीया तां वाणे वानु केहले, “तम्ही जीते नु मरला आला महु का सोधा पलीया? 6#मत्ती 16:21; 17:22,23; 20:18,19; मरकु 8:31; 9:31; 10:33,34; लूक 9:22; 18:31–33ओ इठे कोनी, पर जीता हुती गेला। याद करा कि ओणे गलील मां रेहते हुले तम्हानु केहले हुते। 7‘जरुरी छै कि मैं इन्सान चा पूत पापीया चे हाथु पकड़वाला जाये, ते क्रूसा उपर चढ़ाला जाये, ते तीजे ङिओ जीता हुती जाये।’ ” 8तब ओचीया बाता वानु याद आलीया।

9ते कब्री कनु पुठे आती कर वाणे वां ग्यारा प्रेरितां नु, ते नेरा सारा नु, ये बाता केहती सुणलीया। 10जेह्णे प्रेरितां नु ये बाता केहलीया, वा मरियम मगदलीनी ते योअन्‍ना ते याकूब ची आई मरियम, ते वांचे लारे चीया नेरीया असतरीया वी हुतीया। 11पर वांचीया बाता वानु कहाणी जिसड़ी समझ लाग़ली, ते वाणे वांचा विश्‍वास कोनी करला। 12तब पतरस उठती कर कब्री सनु द्रोड़ला गेला, ते झुकती कर सेर्फ ओढ़णी पली ङेखली, ते जको कोच्छ हुले हुते ओकनु अचम्भा करता हुला आपणे घरे चाह्‍ला गेला।

इम्माऊस चा मार्ग़

(मरकुस 16:12,13)

13ओही ङिओ वांचे महु ङोन जणे इम्माऊस नांवा चे हेक गांवा मां जई ले पलते, जको यरुशलेम कनु कुई सात मील ची दूरी उपर हुते। 14ते वे यां सारीया बाता उपर, जको हुलीया हुतीया, आपस मां बातचीत करते जई ले पलते। 15ते जिसे बेले वे आपस मां बातचीत ते पूछताछ करी पलते, तां ईशु आप खौद्द आती कर वांचे लारे हुती गेला। 16पर वांचीया आंखी इसड़ीया बन्द करती ङिलतीया कि ईशु नु पिछाण ना सग़ो।

17ईशु ने वाकनु पूछले, “ये का बाता छी, जको तम्ही टुरते-टुरते आपस मां करा पले?”

वे उदास हुती भिले रेहती गेले। 18ईं सुणती कर वांचे महु क्लियोपास नांवा चे हेक शक्स ने केहले, “का तु यरुशलेम मां हेकला प्रदेसी छी, जको ना जाणी कि यां ङिहां मां ओचे मां का हुले?”

19ईशु ने वाकनु पूछले, “किसीया बाता?”

वाणे ओनु केहले, “ईशु नासरी चे बारे मां जको नरीकार ते सारे लौका चे गोढु काम ते वचन मां सामर्थी भविष्यवक्‍ता हुता। 20ते प्रधान याजका ते अम्चे सरदारा ने ओनु पकड़वाती ङिले, कि ओचे उपर मौत ची आज्ञा ङिली जाओ, ते ओनु क्रूसा उपर चढ़वाले। 21पर अम्हानु आस हुती कि हाओ इस्राएल नु छुटकारा ङिही, ते यां सारीया बाता चे सिवाय ये घटना नु हुले तीजा ङिओ छै। 22ते अम्चे महु कई असतरीया ने वी अम्हानु अचम्भे मां नाखती ङिले, जको बङे बेले कब्री उपर गेलीया हुतीया। 23ते जिसे बेले ओची लाश नी लाभली, तां ईं केहते हुले आलीया कि अम्ही स्वर्ग़दूता चा दर्शन ङेखला, जेह्णे केहले कि ओ जीता छै। 24तब अम्चे साथीया महु कहीं कब्री उपर गेले, ते जिंवे असतरीया ने केहले हुते, उसड़े ही वानु मिड़ले, पर ओणे ईशु नु कोनी ङेखले।”

25तब ईशु ने वानु केहले, “हे ना समझ, ते भविष्यवक्‍ता चीया सारीया बाता उपर विश्‍वास करने मां बन्द मतड़े! 26का जरुरी कोनी हुते कि मसीह ईं ङोख चती कर नरीकारा ची महिमा मां लंघती जाओ?” 27तब ओणे मूसा कनु ते सारे भविष्यवक्‍ता कनु शुरु करती कर सारे पवित्रशास्त्र महु, आपणे बारे मां लिखलीया बाता चा मतलब, वानु समझाती ङिला।

28इतने मां वे ओ गांवा चे गोढु पुज़ले, जिठे वे जई पलते, ते ईशु चे ढंगा कनु इसड़े जाणले गेले कि ओ आग़ु जाणे चाहवे। 29पर ईशु नु ईं केहती कर रोकले, “अम्चे लारे रेह, कांकि आथण हुते जाये ले, ते ङिओ हमा ब़ोहत ढलती गेला।” बल्ति ओ वांचे लारे रेहणे वास्ते भीतर गेला।

30जिसे बेले ओ वांचे लारे खाणे खऊं ब़ेहला, ते ओणे रोटी चती कर धन्यवाद करला, ते विनु भान्ती कर वानु ङिऊं लाग़ला। 31तब वांचीया आंखी खुलती गेलीया, ते वाणे ईशु नु पिछाणती गेहणे, ते ओ वांचीया आंखी कनु लुकती गेला। 32वाणे आपस मां केहले, “जिसे बेले ईशु अम्चे लारे मार्ग़ मां बाता करता आला, ते पवित्रशास्त्र चा मतलब समझाता आला, तां का अम्चे मना मां जोश कोनी पैदा हुला?”

33वे ओही बेले उठती कर यरुशलेम सनु पुठे चाह्‍ले गेले, ते वां गियारा ते वांचे साथीया नु भेले हुले ङेखले। 34भेले हुले आला ने केहले, “प्रभु सच्‍चमां जीता हुती गेला, ते ओ शमौन नु ङिसला।” 35बल्ति वाणे ङोन जणा ने वी इम्माऊस चे मार्ग़ ची बाता वानु बावड़ती ङिलीया, ते ईं वी कि वाणे ईशु नु रोटी भान्ते समय उपर किवें पिछाणले।

ईशु चे आपणे चेला चे सामणे प्रकट होणे

(मत्ती 28:16–20; मरकुस 16:14–18; यूहन्‍ना 20:19–23; प्रेरितां चे काम 1:6–8)

36वे ये बाता किही ही पलते कि ईशु आप ही वांचे आधे मां आती भिला रेहला ते वानु केहले, “तम्हानु शान्ति मिलो।”

37पर वे घब़राती गेले ते ङरती गेले, ते वाणे समझले कि अम्ही कुई भूता नु ङेखु पले।

38ईशु ने वानु केहले, “कां घब़रावा पले? तम्चे मना मां का शक्‍क हुवे पला? 39माये हाथा ते पग़्ग़ा नु ङेखा कि मैं ओही छै, मनु हाथ लाती कर ङेखा। कांकि आत्मा ची हङी मांस ना रिही जिंवे माये मां ङेखा पले।”

40ईं केहती कर ईशु ने वानु आपणे हाथ पग़्ग़ ङिखाणले। 41जब खुशी चे मारले वानु विश्‍वास कोनी हुला, ते वे अचम्भा करी पलते। तां ईशु ने वाकनु पूछले, “का इठे तम्हा कनु कहीं खाणे वास्ते छै?” 42वाणे ओनु भूंली आली माछली चे टुकड़े ङिले। 43ओणे चती कर वांचे सामणे खाले।

44बल्ति ईशु ने वानु केहले, “ये माया वे बाता छी, जको मैं तम्चे लारे रेहते हुले, तम्हानु केहलीया हुतीया, कि जरुरी छै, कि जितनीया बाता मूसा ची व्यवस्था, ते भविष्यवक्‍ता ते भज़ना चीया किताबा मां, माये बारे मां लिखलीया आलीया छी, सारीया पुरीया हुवणे जरुरी हुतीया।”

45तब ईशु ने वांची समझ खोलती ङिली कि वे पवित्रशास्त्र नु समझो। 46ते वानु केहले, “यूं लिखले आले छै, कि मसीह ङोख चवी, ते तीजे ङिओ मरला आला महु जीता हुती जई। 47ते यरुशलेम कनु लाती कर सारे लौका नु मन फिराव चा ते पापा ची माफी चा प्रचार, ओचे नांवा लारे करला जई। 48तम्ही यां सारीया बाता चे ग़वाह छिवा। 49#प्रेरि 1:4ते ङेखा, जको वायदा माये ब़ा ने करला, मैं ओनु तम्चे उपर उतारी। ते जब तक स्वर्ग़ कनु सामर्थ ना गिहा, तब तक तम्ही ऐह शहरा मां रुकले रेहजा।”

ईशु चे स्वर्ग़ मां जाणे

(मरकुस 16:19,20; प्रेरितां चे काम 1:9–11)

50 # प्रेरि 1:9–11 बल्ति ईशु वानु बैतनिय्याह तक ब़ाहरु गेहती गेला, ते आपणे हाथ चती कर वानु आशीष ङिली, 51ते वानु आशीष ङिते हुले ईशु वांचे कनु अलग़ हुती गेला ते स्वर्ग़ा उपर चती गेहला गेला। 52ते वे ओनु ङण्डवत करती कर बङी खुशी लारे यरुशलेम सनु वापिस चाह्‍ले गेले। 53ते वे लगातार मन्दरा मां हाजिर हुती कर नरीकारा ची स्तुति करते रेहते।

Currently Selected:

लूका 24: ODR

Highlight

Copy