लूका 22

ईशु चे विरोध षड़यंत्र

(मत्ती 26:1–5; मरकुस 14:1,2; यूहन्‍ना 11:45–53)

1अखमीरी रोटी चा तेंहवार जको फसह किहवावे, गोढु हुता, 2ते प्रधान याजक ते शास्त्री ये बाते ची खोज मां हुते कि ओनु किवें मारती नाखु, पर वे लौका कनु ङरते।

ईशु नु पकड़ावणे वास्ते यहूदा तियार हुला

(मत्ती 26:14–16; मरकुस 14:10,11)

3तब शैतान यहूदा मां समाला, जको इस्करियोती किहवाता ते ब़ारहा चैला मां गिणला जता। 4ओणे जती कर प्रधान याजका ते मन्दरा ची रखवाली करने आले सरदारा लारे बातचीत करली कि ओनु किवें करती वांचे हाथ पकड़वाओ। 5वे खौश हुले, ते ओनु रुपये ङेणे चा वचन ङिला। 6ओणे मनती गेहले, ते मौका सोधु लाग़ला कि जिसे बेले भीड़ ना हो तां वांचे हाथ पकड़वाती ङियो।

ईशु चा आखरी फसह चा भोज़ प्रेरितां लारे

(मत्ती 26:17–25; मरकुस 14:12–21; यूहन्‍ना 13:21–30)

7तब अखमीरी रोटी चे तेंहवारा चा ङिओ आला, जाये मां फसह चे मैमणे बलि करने जरुरी हुते। 8ईशु ने पतरस ते यूहन्‍ना नु ईं केहती कर भेज़ले, “जती कर अम्चे खाणे चे वास्ते फसह तियार करा।”

9वाणे ओकनु पूछले, “तु किठे चाहवी कि अम्ही ऐनू तियार करु?”

10ईशु ने वानु केहले, “ङेखा, शहरा मां घिरते ही हेक बन्दे पाणीया चा घड़ा चले हुले तम्हानु मिली, ते ओ जिसे घरा मां जाये तम्ही ओचे भांसु हुती पड़जा, 11ते ओ घरा चे मालिका नु केहजा, ‘गुरु किहे पलता कि मेहमान खाने किठे छै जिठे मैं आपणे चैला लारे फसह चा भोज़ खई?’ 12ओ तम्हानु हेक सजला सजाला बङा चौब़ारा ङिखाणती ङी, उठी तियारी करा।”

13वाणे जती कर जिंवे ओणे वानु केहले हुते, उसड़े ही ङेखले ते फसह चा भोज़ तियार करला।

प्रभु-भोज

(मत्ती 26:26–30; मरकुस 14:22–26; 1 कुरिन्थियां 11:23–25)

14जिसे बेले घड़ी आती पुज़ली, तां ईशु प्रेरितां चे लारे खाणे खऊं ब़ेहला। 15ते ईशु ने वानु केहले, “मनु बङी लालसा हुती कि ङोख भोग़णे कनु पेहले हा फसह चा भोज़ तम्चे लारे खाये। 16कांकि मैं तम्हानु किहे कि जब तक ओ नरीकारा चे राज़ मां पूरा ना हुती जई तब तक मैं ऐनू कङी वी नी खई।”

17बल्ति ईशु ने मुंगर चती कर धन्यवाद ङिला ते केहले, “ऐनू गिहा ते आपस मां बांटती गिहा। 18कांकि मैं तम्हानु किहे पला कि जब तक नरीकारा चा राज़ ना आवी तब तक मैं अंगूरा चा रस हमा कनु कङी नी पिही।”

19बल्ति ईशु ने रोटी चली, ते धन्यवाद करती भांली, ते ईं केहते हुले वानु ङिली, “हा माई देह छै जको तम्चे वास्ते ङिली जाये, माई याद मां यूंही करले करा।”

20यूं करती खाणे चे बाद मुंगर वी चला ते केहले, “हा मुंगर माये ओ लुहींया मां जको तम्चे वास्ते बाहले जाये नवीं वाचा छै। 21पर ङेखा, माये पकड़ावणे आले चा हाथ माये लारे मेजा उपर छै। 22कांकि मैं इन्साना चा पूत जिसड़े माये वास्ते ठहराले गेले, जाये ही पला, पर ओ इन्साना उपर हाय जाये जरिये ओ पकड़वाला जई!”

23बल्ति वे आपस मां पूछताछ करु लाग़ले, “अम्चे महु कूण छै, जको ईं काम करी।”

अम्चे महु बङे कूण छै?

24 # मत्ती 18:1; मरकु 9:34; लूक 9:46 वांचे मां हा बहस वी हुली कि वांचे महु बङे कूण समझले जाये। 25ईशु ने वानु केहले, “नेरीया जातिया चे राजे वांचे उपर प्रभुता करी, ते जको वांचे उपर अधिकार राखी, वे ऐहसानमन्द किहवावी। 26#मत्ती 23:11; मरकु 9:35#मत्ती 20:25–27; मरकु 10:42–44पर तम्ही इसड़े ना हुजा, बल्कि जको तम्चे मां बङा छै, ओ छोटे आलीकर ते जको प्रधान छै, ओ सेवक आलीकर बणो। 27#यूह 13:12–15कांकि बङे कूण छै, ओ जको खाणे खाये ब़ेहला, जा ओ जको सेवा करे? का ओ कोनी जको खाणे खाये ब़ेहला? पर मैं तम्चे बीच मां सेवक चे समान छै।

28“तां तम्ही वे छिवा, जको माई परीक्षा मां लगातार माये लारे रेहले, 29ते जिंवे माये ब़ा ने माये वास्ते हेक राज़ ठहराला, यूंही मैं वी तम्हानु राज़ ङिये पला, 30#मत्ती 19:28कि तम्ही माये राज़ मां माये मेजा उपर खावा पीया, बल्कि सिंहासना उपर ब़ेसती कर इस्राएल चे ब़ारहा गोत्रा चा न्यां करा।

पतरस चे मुकरने ची भविष्यवाणी

(मत्ती 26:31–35; मरकुस 14:27–31; यूहन्‍ना 13:36–38)

31“शमौन, हे शमौन! ङेख, शैताना ने तनु मांगती गेले कि कणकी आलीकर छंडको। 32पर मैं दुधे वास्ते बिनती करली कि दुधा विश्‍वास जता ना रिहो, ते जिसे बेले तु फिरी, तां आपणा भावां नु विश्‍वास मां मजबूत करियो।”

33पतरस ने ओनु केहले, “हे प्रभु, मैं दुधे लारे बन्दीग्रह मां जाणे, बल्कि मरणे चे वास्ते वी तियार छै।”

34ईशु ने केहले, “हे पतरस, मैं तनु किहे पला कि आज़ कूकड़ा बांग नी ङिही, जब तक तु तीन वारी माया इन्कार नी करती गिहे कि तु मनु ना जाणी।”

ब़टुवा, झोली ते तलवार

35 # मत्ती 10:9,10; मरकु 6:8,9; लूक 9:3; 10:4 ते ईशु ने वानु केहले, “जिसे बेले मैं तम्हानु ब़टुवा, ते झोली, ते बिना जुत्तीया चे तम्हानु भेज़ले, तां का तम्हानु कुई चीजी ची कमी हुली?”

वाणे केहले, “कुई चीजी ची कोनी।”

36ईशु ने वानु केहले, “पर हमा जाये कनु ब़टुवा हो, ओ ओनु चती गिहो, ते यूंही झोली वी, ते जाये कनु तलवार ना हो ओ आपणी ओढ़णी बेचती कर हेक मोल गेहती गिहो। 37कांकि मैं तम्हानु किहे पला कि ईं जको धर्मशास्त्र मां लिखले पले, ‘ओ अपराधीया चे लारे गिणला गेला,’ ओचे माये मां पुरे हुवणे जरुरी छै, कांकि माये बारे मां लिखलीया बाता पुरीया हुवणे उपर छी।”

38वाणे केहले, “हे प्रभु, ङेख, इठे ङोन तलवारा छी।”

ओणे वानु केहले, “ब़ोहत छी।”

जैतून पहाड़ा उपर ईशु ची प्राथना

(मत्ती 26:36–46; मरकुस 14:32–42)

39बल्ति ईशु ब़ाहरु निकलती कर आपणी रीति चे अनुसार जैतून पहाड़ा उपर गेला, ते चैले ओचे भांसु टुरती पले। 40वे जग़हा पुज़ती कर ओणे वानु केहले, “प्राथना करा कि तम्ही परीक्षा मां ना पड़ा।”

41ते ईशु आप वाकनु अलग़ हेक भेक्‍क भुकावणे ची दूरी उपर गेला, ते गोङे टेकती कर प्राथना करु लाग़ला, 42“हे ब़ा, अगर तु चाहवी तां ऐ मुंगरा नु माये कनु हटाती गे, तां वी माई ना बल्कि दुधी ही इच्छा पुरी हो।” 43तब स्वर्ग़ा कनु हेक दूत ओठे ङिसला जको ओनु ताकत ङिता। 44ते ओ होर ज्यादा संकट मां बैचेन हुती कर ते देल लाती प्राथना करु लाग़ला, ते ओचा पसीना मना लुहींया चा बङीया-बङीया फेंगा आलीकर भोंये उपर ढी पलतीया।

45तब ईशु प्राथना कनु खड़ा हुला, ते आपणे चैला चे गोढु आतीकर वानु उदासी चे मारले नूहले आले ङेखले। 46ते वानु केहले, “कां नूहले पले? ऊठा, प्राथना करा कि तम्ही परीक्षा मां ना पड़ा।”

ईशु नु धोक्‍के लारे पकड़ले

(मत्ती 26:47–56; मरकुस 14:43–50; यूहन्‍ना 18:3–11)

47ईशु ईं किहे ही पलता कि हेक भीड़ आली, जको वां ब़ारहा चैला महु हेक जाये नां यहूदा हुते वांचे आग़ु-आग़ु आवे पलता। ओ ईशु चे गोढु आला कि ओनु मिठ्ठी ङियो। 48ईशु ने ओनु केहले, “हे यहूदा, का तु मिठ्ठी ङिती कर मैं इन्सान चे पूता नु पकड़वावे?”

49ओचे साथीया ने जिसे बेले ङेखले कि का हुवणे आले छै, ते केहले, “हे प्रभु, का अम्ही तलवार चलाऊं?” 50ते वांचे महु हेके ने महायाजक चे दासा उपर तलवार चलाती कर ओचा सज़्ज़ा कान उङारती नाखला।

51ऐचे उपर ईशु ने केहले, “हमा ब़स करा।” ते ओचे कान छूती कर ओनु ठीक करती ङिले।

52तब ईशु ने प्रधान याजका ते मन्दरा चे पाहरेदारा चे सरदार ते बङका नु, जको ओचे उपर चढ़ाई करती आलते, केहले, “का तम्ही मनु ङाकु जाणती कर तलवारा ते ङांगा चती कर निकड़ले छिवा? 53#लूक 19:47; 21:37जब मैं मन्दरा मां हर ङिओ तम्चे लारे हुता, तां तम्ही मनु हाथ कोनी लाला, पर हा तम्ची घड़ी छै, ते अन्धकार चा अधिकार छै।”

पतरस चे मुकरने

(मत्ती 26:57,58,69–75; मरकुस 14:53,54,66–72; यूहन्‍ना 18:12–18,25–27)

54बल्ति वे ईशु नु पकड़ती कर गेहती टुरले, ते महायाजक चे घरे गेहती आले, पतरस दूर ही दूर ओचे भांसु-भांसु आवे पलता। 55ते जिसे बेले वे बेहड़े मां जाखते ब़ालती कर बच्‍चड़ ब़ेहले, तां पतरस वी वांचे बीच मां आधे मां ब़ेसती रेहला। 56तब हेक दासी पतरस नु जाखते चे सोज़ले मां ब़ेहले ङेखती कर, ते ओची तरफ तकती कर किहुं लाग़ली, “हा वी तां ओचे लारे हुता।”

57पर पतरस ईं केहती कर इन्कार करला, “हे नारी, मैं ओनु ना जाणी।”

58थोड़ी देर बाद कुई नेरे ने ओनु ङेखती कर केहले, “तु वी तां वांचे महु छी।”

पतरस ने केहले, “हे भले मानस, मैं कोनी।”

59कुई घण्टे भर चे बाद हेक नेरे इन्साना ने बङी मजबूती लारे केहले, “सच्‍चमां हा वी तां ओचे लारे हुता, कांकि हा गलीली छै।”

60पतरस ने केहले, “हे भले मानस, मैं ना जाणी कि तु का किही पला!” ओ ईं किहे ही पलता कि तुरन्त कूकड़े ने बांग ङिली। 61तब प्रभु ने घूमती कर पतरस ची तरफ ङेखले, ते पतरस नु प्रभु ची वा बात याद आली जको ओणे केहली हुती, “आज़ कूकड़े चे बांग ङेणे कनु पेहले, तु तीन वारी माया इन्कार करे।” 62ते ओ ब़ाहर जती कर तकड़ा रोला।

ईशु चा अपमान

(मत्ती 26:67,68; मरकुस 14:65)

63जको इन्साने ईशु नु पकड़ली भिलती, वे ओनु मखोला मां उङारती कर कोटु लाग़ले। 64ते ओचीया आंखीया ढकती कर ओकनु पूछले, “भविष्यवाणी कर ते बावड़ तनु केहणे मारले?” 65ते वाणे ब़ोहत सारीया नेरीया वी निन्दा चा बाता ओचे विरोध मां केहलीया।

बङी सभा मां ईशु

(मत्ती 26:59–66; मरकुस 14:55–64; यूहन्‍ना 18:19–24)

66जिसे बेले ङिओ उभरला तां लौका चे बङके ते प्रधान याजक ते शास्त्री भेले हुले, ते ईशु नु आपणी महासभा मां आणती कर पूछले, 67“अगर तु मसीह छी, तां अम्हानु केहती ङे!”

ओणे वानु केहले, “अगर मैं तम्हानु किहे, तां विश्‍वास नी करा। 68ते अगर पूछे, तां उत्तर नी ङिया। 69पर हमा कनु मैं इन्साना चा पूत सर्वशक्‍तिमान नरीकारा चे सज़्ज़े पासु ब़ेहला रिही।”

70ऐचे उपर सारा ने केहले, “तां का तु नरीकारा चा पूत छी?”

ओणे वानु केहले, “तम्ही आप ही किहा पले, कांकि मैं छै।”

71तब वाणे केहले, “हमा अम्हानु ग़वाही ची का जरुरत छै? कांकि अम्ही आप ही ओचे मुँहा कनु सुणती गेले।”

Currently Selected:

लूका 22: ODR

Highlight

Copy