लूका 15

गार हुली आली भेङे ची मिसाल

(मत्ती 18:12–14)

1 # लूक 5:29,30 सारे चुंगी गेहणे आले ते पापी ईशु चे गोढु आते रेहते ताकि ओचीया सुणो। 2पर फरीसी ते धर्मशास्त्री बुड़कती कर किहुं लाग़ले, “हा तां पापीया लारे मिले ते वांचे लारे खाये वी।”

3बल्ति ईशु ने वानु हा मिसाल ङिली, 4“तम्चे महु कूण छै जाया साऔ भेङा हो, ते वांचे महु हेक गार हुती जाओ, तां निन्याणवे नु बरब्याना मां छोड़ती कर, वे गार हुली आली नु जब तक लाभती ना जाओ विनु सोता रिही? 5ते जब लाभती जाओ, तब ओ बङी खुशी लारे विनु मुंढे उपर चती गिहे, 6ते घरे आती कर सज़्ज़णा ते पड़ोसीया नु भेले करती कर किहे, ‘माये लारे खुशी मनावा, कांकि माई गार हुली आली भेङ लाभती गेली।’

7“मैं तम्हानु किहे पला कि यूंही करती कर हेक मन फिरावणे आले पापीया चे बारे मां वी स्वर्ग़ा मां इतनी ही खुशी हुवी, जितना कि वां निन्याणवे इसड़े धर्मीया चे बारे मां नी हुवी, जानु मन फिरावणे ची जरुरत कोनी।

गार हुले आले सिक्‍के ची मिसाल

8“जा कूण इसड़ी असतरी हुवी जाये कनु ङस सिक्‍के हो, ते वांचे महु हेक गार हुती जाओ, तां वा ङीवा ब़ालती कर ते घर छंडकती-ब़ुहारती, जब तक मिलती ना जाओ जी लाती सोती ना रिहो? 9ते जिसे बेले लाभती जाये, तां वा आपणीया सेहलीया ते पड़ोसणीया नु भेले करती किहे, ‘माये लारे खुशी मनावा, कांकि माया गार हुला आला सिक्‍का लाभती गेला।’ 10मैं तम्हानु किहे पला कि यूंही हेक मन फिरावणे आले पापी चे बारे मां नरीकारा चे स्वर्ग़दूता चे सामणे खुशी हुवे।”

उज़ाड़ु पूता ची मिसाल

11बल्ति ईशु ने केहले, “कुई बन्दे चे ङोन पूत हुते। 12वांचे महु छोटे ने ब़ा नु केहले, ‘हे पिताजी, जायजाती महु जको हेंस्सा माया हो ओ मनु ङिती ङे।’ ओणे वानु आपणी जायजात बांटती ङिली। 13घणी ङिहें कोनी हुली हुती कि छोटा पूत सब कोच्छ भेले करती हेक दूर देशा मां चाह्‍ला गेला, ते ओठे उल्टे कर्मा मां आपणी जायजात उज़ाड़ती ङिली। 14जिसे बेले ओ सब कोच्छ खर्च करती चुकला, तां ओ देशा मां ब़ोहत बङा अकाल पड़ला, ते ओ परेशानी मां पड़ती गेला, कांकि ओ कंगाल हुती गेला। 15ऐवास्ते ओह ओ देशा चे रेहणे आला महु हेक चे इठे जती रिहुं लाग़ला। ओणे ओनु आपणे खेता मां सूअर चराणे वास्ते भेज़ले। 16ते ओ चाहता कि वां फलीया महु जानु सूअर खाते, आपणे ढेड्ड भरो, ते ओनु कुई वी कहीं कोच्छ ना ङिते।

17“जिसे बेले ओ आपणे आपे मां आला तब किहुं लाग़ला, ‘माये ब़ा चे कितने मजदूरा नु खाणे कनु ज्यादा रोटी मिले, ते मैं इठे भुक्‍के मरे पला। 18मैं हमा उठती कर आपणे ब़ा चे गोढु जई ते ओनु किही कि पिताजी, मैं स्वर्ग़ चे विरोध मां ते दुधी नजरी मां ते नरीकार ची नजरी मां पाप करला। 19हमा मैं ऐस लायक कोनी रेहला कि दुधा पूत किहवावे, मनु आपणे हेक मजदूरा आलीकर राखती गे।’ 20बल्ति ओह उठती कर, आपणे ब़ा चे गोढु गेला,

“ओ हालि दूर ही हुता कि ओचे ब़ा ने ओनु ङेखती कर तरस आती गेला, ते द्रोड़ती कर ओनु गेले लाले, ते घणीया मिठ्ठीया ङिलीया। 21पूता ने ओनु केहले, ‘पिताजी, मैं स्वर्ग़ा चे विरोध मां ते दुधी नजरा मां पाप करला, ते हमा मैं ऐ लायक कोनी रेहला कि दुधा पूत किहवावे।’ 22पर ओचे ब़ा ने आपणे सेवका नु केहले, ‘जल्दी आच्छे कनु आच्छी ओढ़णी चती कर ओनु घलावा, ते ओची आंगली मां मुंदरी ते पग़्ग़ा मां जुत्तीया घलावा। 23मंहगा ताजा ते मोटा जानवर आणती कर बाढा ते खावा ते खुशीया मनावा। 24कांकि माया हा पूत मरती गेलता, हमा जीता हुती गेला, गार हुती गेलता ओ लाभती गेला।’ ते बल्ति वे खुशीया मनाऊं लाग़ले।

25“पर ओचा बङा पूत खेता मां हुता ते जिसे बेले ओ घरा चे गोढु पुज़ला तां ओनु गाणे बजाणे ते नचणे ची अवाज सुणली, 26ओणे हेक सेवका कनु पूछले, ‘इठे का हुवे पले?’ 27सेवका ने ओनु केहले, ‘दुधा भऊ आला, ते दुधे ब़ा ने मंहगा ताजा ते मोटा जानवर रुसवाला, ऐवास्ते कि ओनु ठीक-ठाक ङेखले।’

28“ईं सुणती कर ओ गुस्से लारे भरीती गेला ते भीतर कोनी जाणे चाह्‍ले, पर ओचा ब़ा ब़हार आती कर ओनु मनाऊं लाग़ला। 29ओणे ब़ा नु केहले, ‘ङेख, मैं इतने साला कनु दुधी सच्‍चे मना लारे सेवा करता आला, ते कङी वी मैं दुधी आज्ञा कोनी टाड़ली, तां वी तु मनु कङी हेक ब़ाकरी चे ब़च्‍चे तक वी कोनी ङिले कि आपणे दोस्ता लारे खुशीया मनावे। 30जिसे बेले दुधा हा पूत जेह्णे आपणी सारी धन दौलत वेश्या मां उज़ाड़ती ङिली, ते ओचे वास्ते तां ताजा मोटा ते मंहगा जानवर बढवाला।’

31“ब़ा ने ओनु केहले, ‘पूत, तु सदा माये लारे छी, ते जको कोच्छ माये छै, ऊं सब कोच्छ दुधे ही छै। 32पर हमा खुशीया मना ते मगन हो कांकि दुधा भऊ मरती गेलता बल्ति जीता हुती गेला, गार हुती गेलता हमा लाभती गेला।’ ”

Currently Selected:

लूका 15: ODR

Highlight

Copy