यूहन्ना 9
9
जनमा चे अन्धे नु ठीक करले
1ईशु ने जते बेले, हेक बन्दे नु ङेखले जको जनमा कनु अन्धा हुता। 2चैला ने ईशु कनु पूछले, “हे गुरु जी, केहणे पाप करला हुता, कि हा अन्धा जमला ऐ बन्दे जा ऐचे आई-ब़ा ने?”
3ईशु ने केहले, “ना तां ऐणे पाप करला ना ही ऐचे आई-ब़ा ने, पर ईं ऐवास्ते हुले कि नरीकारा चे काम ओचे उपर प्रकट हो। 4जेह्णे मनु भेज़ले अम्हानु ओचे काम ङिओ रेहते ही करने जरुरी छै, वा रात आणे आली छै, जाये मां कुई काम ना कर सग़ी। 5#मत्ती 5:14; यूह 8:12जब तक मैं दुनिया मां छै, तब तक मैं दुनिया चे सोज़ले छै।”
6ईं केहती कर ओणे भोंये उपर थूकले, ते ओ थूका लारे माटी लोली, ते वा माटी अन्धे ची आंखीया उपर लाती कर, 7ओनु केहले, “जा, शिलोह चे कोण्ड मां धोती गे ” (शिलोह चा मतलब भेज़ला आला)। ओणे जती कर धोले, ते ङेखता आला वापिस आला।
8बल्ति पड़ोसी ते जेह्णे पेहले ओनु भीख मांगते ङेखले हुते किहुं लाग़ले, “का हा ओही कोनी जको ब़ेसती कर भीख मांगता?”
9कोच्छ लौका ने केहले, “हा ओही छै,” ङुजा ने केहले, “कोनी, पर ओचे जिसड़ा छै।”
जको ठीक हुला ओणे केहले, “मैं ओही छै।”
10बल्ति वे ओकनु पूछु लाग़ले, “दुधीया आंखी किवें खुलती गेलीया?”
11ओणे केहले, “ईशु नांवा चे शक्स ने माटी लोती कर माया आंखीया उपर लाती कर केहले, ‘शिलोह कोण्ड मां जती कर धोती गे।’ तां मैं गेला धोलीया, ते ङेखु लाग़ला।” 12वाणे ओकनु पूछले, “ओ किठे छै?”
ओणे केहले, “मनु कोनी पता।”
फरीसिया ने चंगाई ची पड़ताल करली
13लौक ओ बन्दे नु जको पेहले अन्धा हुता फरीसिया चे गोढु गेहती गेले। 14जिसे ङिओ ईशु ने माटी लोती कर ओची आंखीया खोड़लीया ओ सब्त चा ङिओ हुता। 15बल्ति फरीसिया ने ओकनु पूछले कि ओची आंखीया किवें खुड़लीया। ओणे वानु केहले, “ओणे माई आंखीया उपर माटी लाली, बल्ति मैं धोलीया, ते हमा मनु ङिसे।”
16हा ङेखती कर नेरे फरीसी किहुं लाग़ले, “ऊं बन्दे नरीकारा ची तरफा कनु कोनी, कांकि ओह सब्त चा ङिओ ना मनी।” ङुजा ने केहले, “पापी बन्दे इसड़े चैन्ह किवें ङिखाण सग़े?” वांचे मां फूट पड़ली गेली।
17वाणे ओह बन्दे नु बल्ति केहले, “ओणे दुधीया आंखी खोड़लीया, तु ओचे बारे मां का किही?”
ओणे केहले, “हव्वे ओ भविष्यवक्ता छै।”
18पर यहूदी नेता नु विश्वास कोनी आला कि ओ अन्धा हुता ते हमा ङेखे जब तक वाणे अन्धे चे आई-ब़ा नु हकारती कर, 19वाकनु पूछले, “का ओह तम्चा पूत छै जानु तम्ही किहा कि ओ अन्धा जमला हुता? बल्ति हमा किवें ङेखे?”
20ओचे आई-ब़ा ने केहले, “हा अम्चा पूत छै, ते अन्धा जमला हुता। 21पर अम्ही ना जाणु, कि हमा ऊं किवें ङेखे ते ओचीया आंखीया केहणे खोड़लीया। ऊं सियाणे छै, ओकनु पूछती गिहा, ऊं आपणे बारे मां आप केहती ङी।” 22ये बाता ओचे आई-ब़ा ने ऐवास्ते केहलीया कांकि वे यहूदी नेता कनु ङरते, कांकि यहूदी ऐका करती चुकले हुते कि अगर ईशु नु कुई मसीह किहो तां प्राथनाघरा महु काढ़ले जाओ। 23ऐह वजह कनु ओचे आई-ब़ा ने केहले, “ऊं सियाणे छै, ओकनु पूछती गिहा।”
24यहूदी नेता ने ओ बन्दे जको अन्धा हुता बल्ति ङुजी वारी हकारती केहले, “तु ठीक हुला ओची महिमा नरीकारा नु ङे, ओ बन्दे नु ना। कांकि अम्हानु पता छै ऊं बन्दे पापी छै।”
25ओणे केहले, “ओ पापी छै जा कोनी, मनु पता कोनी। मनु हेकी बाते चा पता छै। कि मैं अन्धा हुता ते हमा ङेखे।”
26वाणे ओनु केहले, “ओणे दुधे लारे का करले? किवें दुधीया आंखीया खोड़लीया?”
27ओणे वानु केहले, “मैं तां तम्हानु केहती ङिले ते तम्ही कोनी सुणले। हमा ङुजी वारी कां सुणने चाहवा? का तम्ही वी ओचे चैले हुवणे चाहवा?”
28बल्ति वे ओनु बुरा-भला केहती कर ब़ोले, “तु ही ओचा चैला छी! अम्ही तां मूसा चे चैले छिऊं। 29अम्हानु पता छै कि नरीकारा ने मूसा लारे बाता करलीया, पर अम्ही ना जाणु कि ऊं बन्दे किठले छै।”
30ओणे केहले, “हा तां अचम्भे ची बात छै कि तम्ही ना जाणा कि ओह किठला छै, तां वी ओणे माया आंखी खोलती ङिलीया। 31अम्हानु पता छै कि नरीकार पापीया ची ना सुणी। अगर कुई नरीकारा चा भग़त हो ते ओची मर्जी उपर चले तां ओ ओची सुणे। 32दुनिया ची शुरुआत कनु ईं कङी कोनी सुणले कि किह्णी जनमा चे अन्धे चीया आंखी खोड़लीया हो। 33अगर ऊं बन्दे नरीकारा ची तरफा कनु ना हुवीया, तां कोच्छ वी ना कर सग़ीया।”
34वाणे ओनु केहले, “कि तु तां बेलकोल पापा मां जमला छी, तु अम्हानु का सिखावी?” वाणे ओनु ब़ाहर काढ़ती छोड़ले।
आत्मिक अन्धापन
35ईशु ने सुणले कि वाणे ओनु ब़ाहर काढ़ती छोड़ले, ते जिसे बेले ओनु मिड़ला, ते केहले, “का तु मैं इन्साना चे पूता उपर विश्वास करी?”
36ओणे केहले, “हे गुरु जी, ओह कूण छै कि मैं ओचे उपर विश्वास करे?”
37ईशु ने ओनु केहले, “तु ओनु ङेखले वी ते जको दुधे लारे बात करे भिला ओह ओही छै।”
38ओणे केहले, “हे प्रभु, मैं विश्वास करे,” ते ओणे गोङे टेकती स्तुति करली।
39बल्ति ईशु ने केहले, “मैं ये दुनिया मां न्यां करने वास्ते आला, कि जको अन्धे छी वे ङेखो ते जको ङेखी वे अन्धे हुती जायो।”
40जको फरीसी ओचे लारे हुते वाणे ईं सुणती कर ओनु केहले, “का अम्ही वी अन्धे छिऊं?”
41ईशु ने वानु केहले, “अगर तम्ही अन्धे हुवा हा, तां पापी ना ठहरा हा, पर हमा किहा कि, ‘अम्ही ङेखु,’ ऐवास्ते तम्चा पाप बणला रिहे।”
Currently Selected:
यूहन्ना 9: ODR
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
