YouVersion Logo
Search Icon

प्रेरितां चे काम 7

7
महासभा मां स्तिफनुस चा भाषण
1बल्ति महायाजक ने स्तिफनुस नु केहले, “का ये बाता सच्‍च छी?”
2ओणे केहले, “हे माये भऊ, ते ब़ा चे समान सुणा। अम्चा ब़ा अब्राहम हारान देशा मां बसणे कनु पेहले जिसे बेले मेसोपोटामिया मां हुता, तां महान नरीकारा ने ओनु दर्शन ङिला। 3ते ओणे केहले, ‘तु आपणे देशा ते आपणे कुणम्बे महु निकलती कर ओ देशा मां चाह्‍ला जा, जको मैं तनु ङिखाणी।’
4“बल्ति ओ कसदिया चे देशा महु निकलती कर हारान मां जती बसला, ते ओचे ब़ा ची मौत चे बाद नरीकारा ने ओनु उठु कनु ऐ देशा मां आणती कर बसाले जाये मां हमा तम्ही बसा पले, 5ते नरीकारा ने ओनु कोच्छ वी विरासत कोनी ङिली, बल्कि पग़्ग़ मेहलणे ची वी ओठे जग़हा कोनी ङिली, यानिकि ओ बेले ओचा कुई पूत वी कोनी हुता। फेर वी नरीकारा ने वायदा करला कि, ‘मैं हा देश दुधे ते दुधे बाद दुधे वंशा चे हाथा मां करती ङी।’
6“ते नरीकारा ने यूं केहले, ‘दुधी ऊलाद्धी चे लौक पराये देशा मां प्रदेसी हुवे, ते उठले लौक वानु दास बणावी ते चार साओ साला तक ङोख ङिये।’ 7बल्ति नरीकारा ने केहले, ‘जिसी जाति चे वे दास हुवे वानु मैं ङण्ड ङी ते ऐचे बाद वे निकलती कर येही जग़हा उपर माई सेवा करे।’
8“ते नरीकारा ने अब्राहम लारे खतने चा वायदा करला ते येही दशा मां इसहाक ओकनु पैदा हुला ते आठवें ङिओ ओचा खतना करला गेला ते इसहाक कनु याकूब ते याकूब कनु ब़ारहा कोल्‍लपत्ति पैदा हुले।
9“ते कोल्‍लपत्तिया ने यूसुफ लारे गैरत करती ओनु गुलाम बणने वास्ते मिस्र देशा मां जाणे आला चे हाथा मां बेचले, पर नरीकार ओचे लारे हुता। 10ते नरीकारा ने यूसुफ नु सारे क्लेशा कनु छुड़ाती कर मिस्र चा राजा फिरौन चे आग़ु अनुग्रह ते ब़ुध्दि ङिली, ओणे ओनु मिस्र देशा उपर ते आपणे सारे घरा उपर हाकिम ठहराले। 11बल्ति मिस्र ते कनान चे सारे देशा मां अकाल पड़ला, जाये मां तकड़ा क्लेश हुला, ते अम्चे पुरखा नु अन्‍न ना मिलता।
12“पर याकूब ने ईं सुणती कर कि मिस्र मां अन्‍न छै, ओणे आपणे पूता नु जको अम्चे ङाङा-ब़ा छी वानु पेहली वारी अन्‍न गेहणे चे वास्ते मिस्र मां भेज़ले। 13ते जिसे बेले वे ङुजी वारी अन्‍न गेहणे चे वास्ते गेले, यूसुफ ने आपणे आप नु आपणे भावां उपर उजागर करले कि, ‘मैं तम्चा भऊ छै’ ते यूसुफ ची जाति फिरौन राजे नु पता लाग़ती गेली। 14बल्ति यूसुफ आपणे ब़ा याकूब ते आपणे सारे कुणम्बे नु जको पिचत्तर जणे हुते मिस्र मां हकारती गेले। 15बल्ति याकूब मिस्र मां गेला ते ओठे ओ ते अम्चे पुरखे मरती गेले। 16बाद मां वांचीया लाशा शेकेम मां पुचालीया जती कर वे कब्री मां मेहलीया जानु अब्राहम ने चान्दी ङिती कर शेकेम मां हामोर ची ऊलाद्धी कनु मोल गेहली हुती।
17“पर जिसे बेले ओ वायदा पूरा हुवणे चा समय गोढु आला, जको वायदा नरीकारा ने अब्राहम लारे करला हुता, तां मिस्र मां अम्ची बन्दी बधती गेली ते ब़ोहत हुती गेली। 18बल्ति मिस्र मां ङुजा राजा हुला जको यूसुफ नु ना जाणता। 19ओणे अम्ची जाति लारे चलाकी करती कर अम्चे ङाङा-ब़ा लारे इठे तक बुरा बर्ताव करला, कि वानु आपणे ब़ाला नु भुकावणे पले कि वे जीती ना रिहो।
20“ओ समय मूसा पैदा हुला, ते ओ नरीकारा ची नजरी मां ब़ोहत ही सोणा हुता, ते ओ तीन मेहना तक आपणे ब़ा चे घरा मां पाड़ला गेला। 21पर जिसे बेले मूसा ब़ाहर छोड़ती ङिला गेला तां फिरौन ची धूवे ने ओनु चती गेले ते आपणा पूत करती पाड़ला। 22ते मूसा नु मिस्रीया ची सारी विधि सिखाली गेली, ते वचना मां ते कामा मां ताकतवार हुता।
23“जिसे बेले ओ चालीस साला चा हुला, तां ओचे मना मां आले आपणे इस्राएली भावां लारे मुलाकात करो। 24ते मूसा ने ङेखले कि हेक इस्राएली बन्दे लारे मिस्री बुरा बर्ताव करे पला, ओनु बचाले ते मिस्रीया नु मारती कर सताले आले चा बदला गेहला। 25मूसा ने सोचले कि ओचे भऊ समझे कि नरीकार ओचे हाथा कनु वांचा उद्धार करी, पर इसड़े हुले कोनी।
26“ङुजे ङिओ जिसे बेले इस्राएली आपस मां भीड़ी पलते, तां ओ ओठे जती पुज़ला, ते ईं केहती कर वानु मेल-मिलाप करने वास्ते समझाले कि, ‘हे जवान तम्ही तां भऊ-भऊ छिवा हेके ङुजे उपर कां अन्याय करा?’ 27पर जको आपणे पड़ोसीया उपर अन्याय करे पलता, ओणे ओनु ईं केहती कर हटाती ङिले, ‘तनु केहणे अम्चे उपर अधिपति ते न्यायधीश ठहराले? 28का जिंवे करती तु मिस्रीया नु मारती नाखले मनु वी मारती नाखणे चाहवी?’ 29हा बात सुणती कर मूसा द्रोड़ला ते मिधान देशा मां प्रदेसी हुती कर रिहुं लाग़ला ते ओठे ओचे ङोन पूत पैदा हुले।
30“जिसे बेले पुरे चालीस साल बीतती गेले, तां हेक स्वर्ग़दूता ने सीनै पहाड़ा चे बरब्यान मां ओनु ब़लती हुली झाड़ी ची ज्वाला मां दर्शन ङिला। 31मूसा ओ दर्शन ङेखती कर हैरान हुला, ते जिसे बेले ङेखणे वास्ते गोढु गेला, तां प्रभु ची हा अवाज आली, 32‘मैं दुधे ङाङा-ब़ा, अब्राहम, इसहाक ते याकूब चा नरीकार छै।’ तब तां मूसा कांपु पड़ती गेला इठे तक कि ओनु ङेखणे ची हिम्मत ना रेहली।
33“बल्ति प्रभु ने ओनु केहले, ‘आपणे पग़्ग़ा महु जुत्ती उतारती गे, कांकि जिसी जग़हा उपर तु भिला ला वा पवित्र भोंये छै। 34मैं सच्‍चमां आपणे लौका ची बेहालती नु जको मिस्र मां छी ङेखली ते वांचीया ङुसकीया ते वांचे रोवणे सुणती गेले। ऐवास्ते वानु छुड़ावणे वास्ते उतरला छै। हमा आ, मैं तनु मिस्र मां भेज़ी।’
35“जिसे मूसा नु वाणे ईं केहती कर नकारले हुते, ‘तनु केहणे अम्चे उपर अधिपति ते न्यायधीश ठहराले?’ ओनु ही नरीकारा ने अधिपति ते छुड़ावणे आला ठहराती कर, ओ स्वर्ग़दूता चे जरिये जेह्णे ओनु झाड़ी मां दर्शन ङिला हुता, भेज़ले। 36हा ओही मूसा छै जको मिस्र ते लाल समुन्दर महु बन्दा नु काढ़ती कर बरब्यान मां चालीस साला तक अदभोत काम ते चैन्ह ङिखाणता रेहला।
37“हा ओही मूसा छै, जेह्णे इस्राएलीया नु केहले, ‘नरीकार तम्चे भावां महु तम्चे वास्ते माये सिरखरा हेक भविष्यवक्‍ता खड़ा करी।’ 38हा ओही छै, जको बरब्यान मां अम्चे इस्राएली पुरखा लारे हुता। नरीकारा ने स्वर्ग़दूता नु भेज़ले ओणे मूसा लारे सीनै पहाड़ा उपर बाता करती जीते वचन ङिले, कि अम्चे तक पुचाओ।
39“पर अम्चे ङाङा-ब़ा ने मूसा चीया बाता कोनी मनलीया, वाणे मूसा नु ठुकराती ङिले, वे मिस्र देशा सनु जाणे चाहवे ले, 40ते हारुन नु केहले, ‘अम्चे वास्ते इसड़ा देवता बणा जको अम्चे आग़ु-आग़ु चलो कांकि हा मूसा जको अम्हानु मिस्र देशा महु काढ़ती आला अम्ही ना जाणु ओनु का हुले।’ 41वां ङिहां मां वाणे हेक बछड़े बणाती कर ओची मूर्ति चे आग़ु बलि चढ़ाली ते आपणे हाथा चे कामा मां मगन हुं लाग़ले। 42यानिकि नरीकारा ने मुँह फेरती कर वानु छोड़ती ङिले, कि आकाशगण नु पूजो, जिंवे भविष्यवक्‍ता ची किताबे मां लिखले पले,
“ ‘हे इस्राएल चे सारे घराणे,
का तम्ही बरब्यान मां चालीस साल रेहती कर बलिया ते चढ़ावे मनु ही कोनी चढ़ाते रेहले?
43ते तम्ही मोलेक चा तम्बू ते आपणे
रिफान देवते चे तारे गेहली फिरते,
यानिकि वां मूर्तिया नु जानु तम्ही पूजा करने वास्ते जोड़ले हुते।
तां मैं तम्हानु बेबीलोन चे परू गेहली जती कर बसावी।’
44“साक्षी चा तम्बू बरब्यान मां अम्चे पुरखा चे आधे मां हुता, जिसड़े ओणे ठहराले जेह्णे मूसा नु केहले, ‘जको आकार तु ङेखला, ओचे मुताबिक ऐनू बणा।’ 45ओ तम्बू नु अम्चे पुरखा ने पुराणे बेले कनु गेहती कर यहोशू चे लारे इठे गेहती आले जिसे बेले कि वाणे वां नेरीया जातिया उपर अधिकार गेहला, जानु नरीकारा ने अम्चे पुरखा चे सामणे काढ़ती छोड़ले ते ओ दाऊद राजे चे बेले तक रेहला। 46दाऊद उपर नरीकारा ने अनुग्रह करला, ते ओणे विनती करली, ‘कि मैं याकूब चे नरीकारा वास्ते आसण बणावे।’ 47पर सुलैमान ने नरीकारा वास्ते घर बणाले।
48“पर परमप्रधान हाथा चे बणाले घरा मां ना रिही, जिंवे कि भविष्यवक्‍ता ने केहले,
49“ ‘प्रभु किहे,
स्वर्ग़ माया सिंहासन छै,
ते धरती माये पग़्ग़ा तले ची चौकी छै।
माये वास्ते तम्ही किसड़े घर बणावा?
जा माये रेहणे ची जग़हा किठे हुवी?
50का ये सारीया चीजा माये हाथा चीया बणालीया कोनी?’
51“हे जिद्दी लौक, ना तां तम्ही काना लारे सुणने चाहवा, ते ना ही तम्ही समझणे चाहवा, तम्ही सदा पवित्र आत्मा चा विरोध करा। जिंवे तम्चे पुरखा करते, यूंही तम्ही वी करा। 52का कङी वी कुई इसड़ा भविष्यवक्‍ता हुला जानु तम्चे पुरखा ने सताले ना हो? इठे तक कि वाणे वा भविष्यवक्‍ता नु वी मारती नाखले हुते, ते जेह्णे ओ धर्मी इन्साना चे आणे ची पेहले ही कनु भविष्यवाणी करली हुती। तम्ही ओही मसीह नु धोक्‍के लारे पकड़वाती कर मरवाती नाखले। 53तम्ही स्वर्ग़दूता चे जरिये ठहराली गेली व्यवस्था तां गेहली, पर विचा पालन कोनी करला।”
स्तिफनुस ची हत्या
54ये बाता सुणती कर महासभा चे लौक ब़लती गेले ते स्तिफनुस चे उपर ङांत पीसु लाग़ती गेले। 55पर स्तिफनुस पवित्र आत्मा लारे भरीती कर स्वर्ग़ा सनु ङेखले ते नरीकारा ची महिमा नु ते ईशु नु नरीकारा चे सज़्ज़े पासु भिले ङेखती कर केहले, 56“ङेखा, मैं स्वर्ग़ा नु खुड़ले आले, ते मैं इन्साना चे पूता नु नरीकारा चे सज़्ज़े पासु भिले आले ङेखे पला।”
57बल्ति वाणे बङी अवाजी लारे चीकती कर कान बन्द करती गेले ते हेक मन हुती कर ओचे उपर झट मारली। 58ते ओनु वे शहरा चे ब़ाहर काढ़ती कर ओचे उपर पत्थराव करु लाग़ले। ग़वाह ने आपणे खेस चादरा शाऊल नांवा चे हेक जवाना चे पग़्ग़ा चे गोढु उतारती कर मेहलती ङिले।
59वे स्तिफनुस चे उपर पत्थराव करते रेहले, ते ओ ईं केहती कर प्राथना करता रेहला, “हे प्रभु ईशु, माई आत्मा नु स्वीकार कर।” 60बल्ति गोङे टेकती कर ऊंची अवाजी लारे ईं केहले, “हे प्रभु, हा पाप वांचे उपर ना लायो।” ते ईं केहती कर नूहती रेहला। शाऊल ओची मौत मां सहमत हुता।

Highlight

Share

Copy

None

Want to have your highlights saved across all your devices? Sign up or sign in