प्रेरितां चे काम 13

बरनबास ते शाऊल चे भेज़ले जाणे

1अन्ताकिया शहरा ची कलीसिया मां कई भविष्यवक्‍ता ते उपदेशक हुते, बरनबास, ते शमौन जाये ङुजे नां नीगर हुते, ते लूकियुस कुरेनी, ते मनाहेम जको चौथाई देश चे राजा हेरोदेस चा मित्र हुता, ते शाऊल। 2जिसे बेले वे उपवास मां प्राथना करी पलते ले, ते पवित्र आत्मा ने वानु केहले, “माये वास्ते बरनबास ते शाऊल नु वे सेवा वास्ते अलग़ करा जाये वास्ते मैं वानु हकारले।”

3बल्ति वाणे उपवास ते प्राथना करने बाद बरनबास ते शाऊल उपर हाथ मेहले ते सेवा वास्ते भेज़ती ङिले।

पौलुस ची पेहली प्रचार-यात्रा

4बल्ति वे पवित्र आत्मा लारे सिलूकिया शहरा सनु भेज़ले गेले, ते उठु कनु जहाजा उपर चढ़ती कर साइप्रस टापू चे उपर चाह्‍ले गेले। 5ते सलमीस शहरा मां पुज़ती कर, नरीकारा चा वचन यहूदिया चे प्राथनाघरा मां सुणाला ते यूहन्‍ना वांचा सेवक हुता।

6ते ओ सारे टापू मां हुती कर, पाफुस शहरा मां पुज़ले। ओठे वानु बार-यीशु नांवा चा हेक जादूगर मिड़ला, जको यहूदी ते कूड़ा भविष्यवक्‍ता हुता। 7ओ हाकिम सिरगियुस पौलुस चे लारे हुता, जको समझदार जवान हुता। ओणे बरनबास ते पौलुस नु आपणे गोढु हकरवाती कर नरीकारा चा वचन सुणने चाहवे ला। 8पर बार-यीशु जानु एलीमास जादूगर वी केहते, वांचा विरोध करता रेहला, ओची कोशिस हाकिमा नु विश्‍वास करने कनु रोकणे ची हुती। 9हमा शाऊल ने आपणे आप नु पौलुस किहुं लाग़ला, पवित्र आत्मा लारे भरीती कर ओचे सनु ङेखती कर केहले कि, 10“हे सारे कप्पट ते सब चतराई लारे भरले आले शैताना, ची ऊलाद्ध, समुचे धर्मा चे दुश्मन। का तु प्रभु चे सिधे मार्ग़ा नु टेढे-मेढे करने नी छोड़े? 11हमा ङेख प्रभु ची मार दुधे पे आती पड़ली, ते तु कोच्छ समय तक अन्धा रिहे ते सूरजा नु नी ङेख सग़े।”

बल्ति ओही बेले ओचे उपर धुन्धलापन ते अन्धारे छात्ती गेले ते, ते ओ इंगे-ऊंगे टटोलु लाग़ती गेला कि कुई ओचा हाथ पकड़ती कर गेहली चालो। 12बल्ति हाकिम ने जको कोच्छ हुले हुते, ङेखती कर ते प्रभु चे उपदेश कनु हैरान हुती कर विश्‍वास करला।

पौलुस ते बरनबास ची साइप्रस कनु रवानगी

13पौलुस ते ओचे साथी पाफुस शहरा कनु जहाज खोलती कर पंफूलिया प्रदेस चे पिरगा शहरा मां आले, ते यूहन्‍ना वानु छोड़ती कर यरुशलेम सनु पुठा चाह्‍ला गेला। 14ते पिरगा कनु हुते हुले पिसिदिया इलाके चे अन्ताकिया शहरा मां पुज़ले।

ते सब्त चे ङिओ यहूदी प्राथनाघरा मां जती कर ब़ेसती रेहले, 15व्यवस्था ते भविष्यवक्‍ता चा किताबा महु पढ़ने चे बाद प्राथनाघरा चे सरदारा ने वानु केहले, “हे माये भऊ, अगर लौका वास्ते तम्चे कनु उपदेश ङेणे वास्ते कुई वचन छी तां तम्ही सुणावा।”

16बल्ति पौलुस ने भिले रेहती कर ते हाथा लारे इशारा करते हुले। केहले कि, “हे इस्राएली, ते नरीकारा कनु ङरणे आले, सुणा। 17यां इस्राएली लौका चे नरीकारा ने अम्चे पुरखा नु चुणले, ते जिसे बेले ये मिस्र देशा मां गुलामी मां रेहते, ते वांची बढ़ोतरी वास्ते, नरीकार आपणी ताकती लारे वानु उठु काढ़ती आला। 18ते नरीकार ने चाह्‍ली साला तक बरब्यान मां वांची ङेखभाल करता रेहला। 19ते कनान देशा मां सात जातिया नु नाश करती कर, वांचा देश लगभग साढे चार साओ साला मां आपणे लौका नु विरासत मां ङिती ङिला।

20“ऐचे बाद शमूएल भविष्यवक्‍ता चे आणे तक वांचे वास्ते न्यां करने आले ठहराता आला। 21ओचे बाद वाणे हेक राजा मांगला, बल्ति नरीकारा ने चाह्‍ली साला वास्ते बिन्यामीन चे कुणम्बे महु हेक जवान यानिकि कीश चा पूत शाऊल नु वांचे वास्ते राजा ठहराला। 22बल्ति नरीकारा ने शाऊल नु हटाती कर, दाऊद नु वांचा राजा बणाला, जाये बारे मां ओणे ग़वाही ङिली कि, ‘मनु हेक इन्सान, यिशै चा पूत दाऊद, माये मना चे अनुसार मिलती गेला। ओ माई सारी इच्छा पुरी करी।’

23“दाऊद चे वंश महु नरीकारा ने वायदे चे मुताबिक इस्राएल कनु हेक उद्धारकर्ता, मसीह ईशु नु भेज़ले। 24#मरकु 1:4; लूक 3:3जाये आणे कनु पेहले यूहन्‍ना ने सारे इस्राएलीया नु मन फिरावणे चे बपतिस्मे चा प्रचार करला। 25#यूह 1:20; मत्ती 3:11; मरकु 1:7; लूक 3:16; यूह 1:27ते जिसे बेले यूहन्‍ना आपणी सेवा पुरी करने आला हुता, तां ओणे केहले, ‘तम्ही मनु का समझा? मैं ओ कोनी। पर ङेखा, माये बाद मां हेक आणे आला छै, जाये ब़ूटा चा तणिया खोलणे चे मैं लायक कोनी।’

26“हे माये भऊ, तम्ही जको अब्राहम ची ऊलाद्ध छिवा ते जको नरीकारा कनु ङरा, तम्चे गोढु हाओ उद्धार चा वचन भेज़ला गेला। 27कांकि यरुशलेम मां रेहणे आले ते वांचे सरदारा ने ईशु नु कोनी पिछाणले, ते ना ही भविष्यवक्‍ता चा बाता समझलीया, ते जको हर सब्त चे ङिओ मां पढ़लीया जई, ऐवास्ते ईशु नु दोषी ठहराती कर वानु पुरे करले। 28#मत्ती 27:22,23; मरकु 15:13,14; लूक 23:21–23; यूह 19:15हालांकि मारती नाखणे चा दोष ओचे मां कोनी मिड़ला, बल्ति वी पिलातुस कनु विनती करली कि ओ मारला जाओ।

29 # मत्ती 27:57–61; मरकु 15:42–47; लूक 23:50–56; यूह 19:38–42 “ते जिसे बेले ओचे जरिये करलीया गेलीया भविष्यवाणीया नु वां लौका ने पुरे करती गेहले, ते ओनु क्रूसा कनु तले उतारती कर गुफा आली कब्री मां मेहलती ङिले। 30पर नरीकारा ने ओनु मरला आला महु दोबारा जीते करले, 31#प्रेरि 1:3ते वे जको गलील कनु यरुशलेम तक ओचे लारे आले हुते ओ वानु घणा ङिहां तक ङिसता रेहला। ते लौका चे सामणे हमा वे ही ओचे ग़वाह छी।

32“ते अम्ही तम्हानु ओ वायदे चे बारे मां जको नरीकारा ने अम्चे पुरखा लारे करला हुता, हा सुसमाचार सुणाऊं पले। 33कि नरीकारा ने ईशु नु जीते करती कर, ओही वायदा अम्ची ऊलाद्धी वास्ते पूरा करला, जिसड़े भज़न संहिता मां वी लिखले पले,

“ ‘तु माया पूत छी,

आज़ मैं ही तनु पैदा करले।’

34ते ओची ये रीति लारे मरले आला महु जीते करने बारे मां वी, कि ओ कङी ना सड़ो, ओणे यूं केहले कि,

‘मैं दाऊद आली पवित्र ते अटल दया तम्चे उपर करी।’

35ऐवास्ते ओणे हेक नेरे भज़ना मां वी केहले,

‘तु आपणे पवित्र जणा नु सड़ु नी ङिये।’

36“कांकि दाऊद तां नरीकारा ची इच्छा चे अनुसार आपणे समय मां सेवा करती कर मरती गेला, ते आपणे पुरखा मां जती कर मिलती गेला, ते सड़ती वी गेला। 37पर जानु नरीकारा ने मरला आला महु जीते करले, ओ सड़ला कोनी।

38“ऐवास्ते, हे माये भऊ, तम्ही जाणती गिहा कि ईशु चे जरिये पापा ची माफी चा सुसमाचार तम्हानु ङिला जाये पला। 39ते जिसीया बाता लारे तम्ही मूसा ची व्यवस्था चे जरिये बेकसूर ना ठहरले, ऐवास्ते ईशु उपर हर हेक जणा जको विश्‍वास करने आला छै ओही निर्दोष ठहरी। 40ऐवास्ते चौकस रिहा, इसड़े ना हो कि, जको भविष्यवक्‍ता चा किताबा मां लिखले आले छै, तम्चे उपर आती पड़ो,

41“ ‘हे निन्दा, करने आले ङेखा,

ते हैरान हुवा, ते मिटती जावा,

कांकि मैं तम्चे ङिहां मां हेक काम इसड़े करी,

कि अगर कुई तम्हानु ओची चर्चा करे, ते तम्ही कङी विश्‍वास नी करा।’ ”

42जब पौलुस ते बरनबास यहूदी प्राथनाघरा चे ब़ाहरु जते बेले लौक वांचे कनु विनती करु लाग़ले कि, “आग़ले सब्त चे ङिओ ये बाता अम्हानु बल्ति सुणलीया जाओ।” 43ते जिसे बेले प्राथनाघरा मां सभा खत्तम हुती गेली ते यहूदी ते यहूदी मत्त महु आले हुले भग़ता महु ब़ोहत से पौलुस ते बरनबास चे भांसु टुरती पले, ते वाणे बाता करती कर वानु समझाले, कि नरीकारा चे अनुग्रह मां बणले रिहा।

44आग़ले सब्त चे ङिओ शहरा चे सारे लौक नरीकारा चे वचना नु सुणने वास्ते भेले हुती गेले। 45पर यहूदी भीड़ नु ङेखती कर गैरती मां भरीती गेले, ते निन्दा करते हुले पौलुस चीया बाता चे विरोध मां ब़ोलु लाग़ती गेले।

46बल्ति पौलुस ते बरनबास ने बेखौफ हुती कर केहले, “जरुरी हुते, कि नरीकारा चा वचन पेहले तम्हानु सुणाला जईया, पर जबकि तम्ही ओनु मना ही ना, ते आपणे आप नु अनन्त जीवन चे लायक ना ठहरावा, तां हमा, अम्ही नेरीया जातिया सनु फिरु पले। 47कांकि नरीकारा ने अम्हानु हा आज्ञा ङिली कि,

“ ‘मैं तनु नेरीया जातिया चे वास्ते सोज़ले ठहराले,

कि तु धरती चे ओड़ा तक उद्धार चे दरवाजे हो।’ ”

48ईं सुणती कर नेरीया जातिया आले खौश हुले, ते नरीकारा चे वचना ची बढ़ाई करु लाग़ले, ते जितने अनन्त जीवन वास्ते ठहराले गेले हुते, वाणे विश्‍वास करला।

49बल्ति प्रभु चा वचन ओ सारे देशा मां फैलु लाग़ला। 50पर यहूदिया ने शहरा चा भलीया, ऊंचे कोल्‍ल चीया असतरीया नु ते शहरा चा खास बन्दा नु भड़काती नाखले, ते पौलुस ते बरनबास उपर दोष लवाती कर वानु आपणी हद्दी कनु ब़ाहरु कढ़वाती छोड़ले। 51#मत्ती 10:14; मरकु 6:11; लूक 9:5; 10:11बल्ति पौलुस ते बरनबास वांचे सामणे आपणे पग़्ग़ा ची धूड़ झाड़ती कर इकुनियुम शहरा नु चाह्‍ले गेले। 52पर अन्ताकिया शहरा चे विश्‍वासी ब़ोहत खुशी लारे ते पवित्र आत्मा लारे भरीते गेले।

Currently Selected:

प्रेरितां चे काम 13: ODR

Highlight

Copy