1 कुरिन्थियां 2
2
क्रूसा उपर चढ़ले मसीह चे बारे मां सनेसा
1हे माये भऊ, मैं नरीकारा चा भेद सुणाता आला तम्चे गोढु आला, तां ना बङीया-बङीया करु आला ते ना ही बङा ज्ञान ङिखाणने वास्ते आला। 2कांकि मैं मना मां सराती गेलते, कि तम्चे मां ईशु मसीह, बल्कि क्रूसा उपर चढ़ाले हुले मसीह नु छोड़ती नेरी किसी बाते नु ना जाणे। 3#प्रेरि 18:9ते मैं कमजोर ते खौंफा लारे, ते घणा कांपता हुला तम्चे लारे रेहला। 4ते माये वचन, ते माये प्रचार मां ज्ञान ची लुभावणे आलीया बाता कोनी, पर पवित्र आत्मा ते सामर्थ चा सबूत हुता। 5ऐवास्ते कि तम्चा विश्वास इन्साना चे ज्ञान चे उपर ना हो, पर नरीकारा ची सामर्थ चे उपर निर्भर हो।
नरीकारा चा ज्ञान
6फेर वी मैं वानु, जको मजबूत छी, ज्ञान भरला सनेसा ङिये पर हा ज्ञान ना ऐ युगा चा ते ना ऐ युगा चे हाकिमा चा, जाया नाश हुवणे तय छै। 7पर अम्ही नरीकारा चा गुप्त ज्ञान, भेद ची रीति चे अनुसार बावड़ु, जको नरीकारा ने युगा कनु पेहले अम्ची महिमा वास्ते तय करला हुता। 8ओ ज्ञान नु ऐ युगा चे कुई वी राजा ने कोनी जाणले कांकि अगर वे जाणती जईया, तां प्रभु नु क्रूसा उपर ना चढ़ावीया। 9पर जिंवे पवित्रशास्त्रा मां लिखले पले,
“जको आंखीया ने नी ङेखली,
ते काना ने नी सुणली,
ते जको बाता इन्साना चे चेत्त मां कोनी चढ़लीया वे ही छी,
जको नरीकारा ने आपणे प्रेम राखणे आला वास्ते तियार करलीया छी।”
10ईं सब नरीकारा ने अम्चे उपर आपणी आत्मा चे जरिये लारे प्रकट करले।
कांकि हा आत्मा सारीया बाता, इठे तक कि नरीकारा चीया गूढ बाता नु वी परखे गेहती। 11इन्साना महु कूण कुई इन्साना चीया बाता जाणे? सेर्फ इन्साना ची आत्मा जको ओचे मां छै। यूंही नरीकारा चीया बाता वी कुई ना जाणी, सेर्फ नरीकारा चा आत्मा। 12अम्ही संसारा ची आत्मा कोनी, पर वा आत्मा गेहली छै, जको नरीकारा चे तरफु छै कि अम्ही वां बाता नु जाणु, जको नरीकारा ने अम्हानु ङिलीया।
13अम्ही वांचे वास्ते, जको आत्मिक छी, आत्मिक बाता ची व्याख्या इन्साना चे ज्ञान चे शब्दा चे जरिये ना पर आत्मिक शब्दा मां करु। 14पर शरीरिक इन्सान नरीकारा ची आत्मा ची बाता स्वीकार ना करी, कांकि वे ओची नजरी मां बेवकूफी चा बाता छी, ते ना ओ वानु जाण सग़े कांकि वांची परख आत्मिक रीति लारे हुवे। 15सेर्फ ओ, जको आत्मिक छै, हर हेक बाते ची परख करे, पर ओ आप काये कनु परखला ना जई। 16कांकि पवित्रशास्त्रा मां लिखले पले,
“प्रभु चे मन केहणे जाणले कि ओनु सिखाओ?”
पर अम्चे मां ईशु मसीह चे मन छै।
Currently Selected:
1 कुरिन्थियां 2: ODR
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
