1 Mose 10

Kikhulu ki bana ba Nowa

1Tala kikhulu ki nsamu wu bana ba Nowa, Semi, Hami ayi Yafeti. Landila khuka nlangu, bawu babuta bana ba babakala . 2Bana bababakala ba Yafeti: Ngomeli, Mangongi, Madayi, Yavani, Tubali, Meseki ayi Tilasi. 3Bana ba Ngomeli baba: Askenasi, Lifati ayi Tongalama. 4Bana ba Yavani baba: Elisa, Talasi, Kitimi ayi Dodanimi#10.4 Talasisi diyikidi dizina di mbanza yidi mu disimu di mbu meditelani yi Esipania, kitimi kidi phe zanga ki Kipelo ayi Lodami zanga ki Ngeleke yi Lodesi (minkanda minkaka bantangilanga Dodanimi).. 5Mu bawu muba batu bamuangana mu zitsi zizio zidi mu bisanga bi mbu. Bavasana mu zi tsi banga bubela ndinga ziawu, ayi phe bavasana makanda makanda banga bubela zi mvila ziawu.

6Bana ba Hami: Kusi, Misilayimi#10.6 Misilayimi: Zina dinkaka di Ngipiti mu ki Ebeleo, tala buku 13 evo basi Ngipiti, tala buku 13, Puti ayi Kanani. 7Bana ba Kusi: Seba, Havila, Sabata, Lama ayi Sabateka. Bana ba Lama: Seba ayi Dedani. 8Kusi wubuta Nimilodi. Yandi mutu wuthete wutona yadila batu bankaka va ntoto. 9Yandi wuba mveti wu makumbu va meso ma Yave, diawu batu bantubilanga: «Widi mveti wu makumbu banga Nimilodi va meso ma Yave.» 10Wuyala thete mu Babeli, Eleki, Akadi ayi Kalane mu tsi yi Sineyali. 11Nimilodi wutotuka mu tsi yoyo, wuyenda ku Asilia. Wutunga Ninive, mbanza Lehobotili ayi Kala, 12ayi Leseni, va khati Ninive ayi Kala, mbanza yinene.

13Misilayimi wuba nkulu wu ba Ludi, ba Anamimi, ba Lehabimi, ba Nafatuhimi, 14ba Patalusimi, ba Kasaluhimi, mu bawu mutotukila ba Filisiteya ayi ba Kafatolimi.

15Kanani wubuta Sidoni, muana andi wuthete, ayi Heti phe, 16nkulu wu ba Yebusi, ba Amoli, ba Ngilingasi, 17ba Hivi, ba Alakite, ba Sini, 18ba Alavadi, ba Semali, ayi ba Hamati. Landila dio, makanda ma ba Kanani mamuangana. 19Ndilu yi ba Kanani yiyenda tona ku Sidoni, vioka Ngelali ti ku Ngasa bosi vioka Sodoma, Ngomola, Adima, ayi Seboyimi ti ku Lasa. 20Bawu baba bana ba Hami, banga bubela makanda mawu ayi ndinga ziawu, mu tsi ziawu ayi mu mvila ziawu.

21Semi, khomba yi nkulutu wu Yafeti, wubuta phe bana ba babakala. Yandi nkulu wu Ebeli#10.21 Mu zina di Ebeli mutotukidi zina di Ebeleo. ayi babo babutuka mu yandi. 22Bana ba Semi: Elami, Asuli, Alapakasadi, Ludi ayi Alami. 23Bana ba babakala ba Alami: Usi, Huli, Ngeteli ayi Masi. 24Alapakasadi wubuta Sela ayi Sela wubuta Ebeli. 25Bana bole ba babakala babutu kudi Ebeli. Wuthete, zina diandi Pelengi, diambudi mu thangu andi batu ba ntoto bakabuka ayi zina di khomba andi diba Yokotani. 26Yokotani wubuta Alamodadi, Selefi, Hasalamaveti, Yala, 27Hadolami, Usala, Dikila, 28Obali, Abimaeli, Seba, 29Ofili, Havila ayi Yobabi. Bawu babo bana ba Yokotani. 30Tsi awu yiba tona ku Mesa nate ku tini ki tsi ki mongo wu Sefali ku ntotukilanga thangu. 31Bobo bana ba Semi banga bubela makanda mawu, ndinga ziawu, mu tsi ziawu banga buididi zimvila ziawu.

32Momo makanda ma bana ba babakala ba Nowa, banga buididi thonono awu ayi banga bubela zi mvila zi makanda mawu. Tona mu bawu makanda mamuangana va ntoto landila khuka nlangu.

Currently Selected:

1 Mose 10: YOM-CD

Highlight

Copy