Esiteli 9
9
Bayudayo bavutula ndinda
1Mu ngonda kumi zole, mu ngonda Adali, mu lumbu kumi tatu, kifueti tumumunu phova ntinu ayi nsiku andi, lumbu kivingulu kudi mintatu mi Bayudayo mu kubalutila ngolo, kuyiza ba tsekokolo bila Bayudayo baluta ngolo ayi bobo babalenda. 2Bayudayo bakutakana mu mbanza ziawu, mu bizunga biawu bibio bi luyalu lu ntinu Kizelisesi mu nuanisa bawu babo batomba mu kubavanga mbi, kuisi ba ko kadi mutu wukubatedimina, bila wonga wu Bayudayo wubua va batu babo. 3Minyadi mimio mi bizunga bi luyalu, zimfumu zi luzitu zi ntinu, zimfumu zi bizunga ayi bisadi mu nzo ntinu bayiza buela mioko kudi Bayudayo, bila wonga wu Molodokayi wubua va bawu. 4Bila Molodokayi wuyika mutu wunene mu nzo ntinu, ayi kumu kiandi kimuangana mu bizunga bibio bi luyalu, mutu wowo Molodokayi wutunda thangu zizio.
5Bayudayo bavanga boso bubazodila bawu baba kubalendanga, bavonda mintatu miawu, yiba phondolo ayi mbungulu yinene. 6Mu Suze, mbanza yisiama, Bayudayo bavonda ayi babunga khama tanu zibabakala. 7Ku ndambu yinkaka, Palasandata, Dalafoni, Aspata, 8Polata, Adalia, Alidata, 9Palamaseta, Alizayi, Alidayi ayi Vayizata, 10kumi dibana ba Hamani, muana wu Hamedata, wukimonisa nyamisi wu Bayudayo, babavonda, vayi basi lambula mioko miawu mu tana ko.
11Mu lumbu kina, thalu yi bawu bavondo mu Suze, mbanza yisiama, yiwakana kudi ntinu. 12Buna ntinu wukamba kudi Esteli, nketo ntinu: «Mu Suze, Bayudayo bavondidi ayi babungidi khama tanu zibabakala ayi kumi dibana babakala ba Hamani. Mu bizunga bi luyalu bisidi, muna babakua bavondidi! Vayi ti tidi lomba diaka kima, fuiti kuvana kio, fuiti vanga luzolo luaku.» 13Buna Esteli wuvutula: «Ti mu kedika di monikini dimbote kudi ntinu, bika mbazi phe divanu nsua kudi Banyudayo mu vanga boso buididi nsiku wu lumbu kiaki ayi bika kumi di bana ba babakala ba Hamani baledoko#9.13 Bavondo mu buku 12, vayi mu monisa tsoni ayi mvuezolo awu, bafuiti ledoko. va nti.» 14Buna ntinu wukamba ti bu bela bobo. Buna nsiku wusamunu mu Suze, ayi kumi di bana ba babakala ba Hamani baledoko. 15Buna Bayudayo baba mu Suze bakutakana diaka mu lumbu kumi ya mu ngonda Adali ayi banunga vonda mu Suze khama tatu zibabakala vayi basi tula mioko miawu ko mu tana. 16Vayi ndambu Bayudayo baba mu bizunga bi luyalu lu ntinu, bakutakana mu tabila mioyo miawu, bavutudila mintatu miawu ndinda ayi mu bawu babekubalendanga bavonda lusambudi ayi mafunda matanu ma batu vayi basi tula ko moko mawu mu tana. 17Mu lumbu ki kumi tatu mu ngonda Adali. Kuba luvundulu mu lumbu ki kumi ya mu ngonda ayi bavanga lumbu ki ndambisa ayi ki kiese. 18Vayi Bayudayo baba mu Suze, bakutakana mu lumbu ki kumi tatu ki ngonda ayi mu lumbu ki kumi ya mu ngonda, kuba luvundulu mu lumbu ki kumi tanu mu ngonda ayi bavanga lumbu ki ndambisa ayi ki kiese. 19Diawu Bayudayo ba mala babekalanga mu zimbanza zi bizunga biba thama batula lumbu ki kumi ya mu ngonda Adali lumbu ki ndambisa ayi ki kiese, lumbu kinyengo, lumbu babevanasananga minkayilu.
Nyengo wu Pulimi
20Buna Molodokayi wusonika mambu momo ayi wufidisa minkanda kudi Bayudayo babo baba mu bizunga bi luyalu bibio bi ntinu Kizelisesi, bobo baba bafikama evo baba thama, 21mu kubakomina khomono mu kembilananga thangu zizio lumbu ki kumi ya mu ngonda ayi ki kumi tanu, mvu ka mvu, 22boso bubela bilumbu Bayudayo bavunda mu mintatu miawu ayi ngonda mu ngonda yoyo, ba kiadi kiawu kikituka kiese. Ayi lumbu kimfuilu kikituka lumbu ki mayangi, muingi bakembilanga kio banga lumbu ki ndambisa ayi ki kiese, banga bilumbu bibamvanasana minkayilu ayi bibamvana minkayilu kudi baphutu.
23Ayi Bayudayo balandakana zitsikudukusu zi Molodokayi ayi nyengo wukembolo mu khumbu yithete, wuyiza ba fu kiawu.
24Bila Hamani, muana wu Hamedata, mu nkuna Angangi, nionio wukimonisa nyamisi wu banyudayo babo, wukana mu bunga Bayudayo ayi wuta wadi yintedolongo Pulimi, mu zenga lumbu ki kubatula mu zengele zengele ayi kubabunga . 25Vayi Esteli bu kayiza va ntuala ntinu, buna ntinu wutuma mu nkanda mu vutudila Hamani mambi makakanina Bayudayo, diawu Hamani ayi bana bandi ba babakala baledoko va nti. 26Diawu batedila bilumbu biobio Pulimi, banga zina di Pulimi.
Bayudayo batumamana thumunu yi nkanda wu Molodokayi, mu mumo mabamona, ayi mababuila. 27Bayudayo bakikomina khomono ayi bakikinina yawu kudi bawu ayi kudi nkuna awu ayi kudi babo bakukitula Bayudayo, muingi dibika vioka, mu kembilanga thangu zizio lumbu biole banga masonama mu diambu diawu ayi mu thangu awu yizengo, mvu ka mvu. 28Ayi bilumbu beni, bafuiti bambukila bio moyo ayi kubikembilanga mu mbandu ka mbandu, mu dioso kanda, koso zunga ki luyalu ayi yoso mbanza. Ayi bilumbu bi Pulimi bilendi kubuka ko mu Bayudayo ayi mbambukulu moyo awu yilendi suka ko mu nkuna awu.
29Buna Esteli, nketo ntinu, muana wunketo wu Abihayili ayi Molodokayi, Nyudayo, basonika mu ngolo ziawu zizio mu siamisa nkanda wowo wunzole wu Pulimi. 30Ayi wufidisa minkanda kudi Bayudayo babo mu khama mosi makumi mole ayi bizunga tsambudi bi luyalu lu Kizelisesi. Mu minkanda musonama mambu ma yenge ayi ma kedika, 31mu siamisa bilumbu biobio bi Pulimi mu thangu ziawu zizengo, boso Molodokayi ayi Esteli, nketo ntinu, babakomina biawu, ayi boso bakomina biawu kudi bawu veka ayi kudi nkuna awu, mambu matadidi zimbinunu nsoki ayi mu thombolo awu yi lusadusu. 32Buna zithumunu zi Esteli zisiamisa nyengo wu Pulimi ayi wusonama mu buku.
Currently Selected:
Esiteli 9: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
