Lukas 14

Yesus nahataggaha piwal ata kalawara ta laɗo ngah mono habayangna ata Yahudi

1Hadaka ta laɗo ngah mono habayangɗa ata Yahudi, Yesus nakako yaa ta ummana wu ha ama walta kalibbo Farisi. Raɗa ata kaɗaana neɗo ɗahamatara hatidini Yesus. 2Ai pahawau ɗaan wu ata kalawara wuddu kabaa leꞌna mono limmana kadede ta aronai Yesus. 3Nyiwei Yesus mana matutra tabaraɗa gurr agama ata Yahudi mono ata walta kalibbo Farisi kaɗaana neɗo, “Ɓaɗoukɗage uk-pata agamada yitta, naɗaꞌkaꞌwe ɓada hataggahay ata kalawara ta laɗo ngah mono habayangda, nyiɓa waleka?”

4Tanyiɗuwe raɗa gurr agama mono ata walta kalibbo Farisi kaɗanna heɗage. Maɓeggei Yesus nanaronan limmana naɗa ata mana hataggahayi, mono nahaleway hagga. 5Ɓewe neɗoge linagei Yesus tabaraɗa raɗa ata, “Nyiɓaɗaaka wu ata walta jongami kapang anana waleka kapang wu haapna ɓana mounka ta matawe hakoja ta laɗo ngah mono habayangɗa ata Yahudi, langka agalinahingkawe mi enga geha tinguyi pahuun naɗa lakawa waleka naɗa haapna ta laɗo neɗo ʄala?”

6Tanyiɗuwe wale laꞌhingmana wu ak ata kabaleha tutge nna hatak-Na.

Yesus nahanuwana ata tannam kaɗa liɓawa ate mono baige yii

7Ta ummana naɗa ata walta kalibbo Farisi, Yesus na etayi raɗa kulla ɓaɗa pedena hadau kahadda dahha. Nyiɗawe manayiidi hanuwa waini naɗe lii-hatuʄa tabara tangngaɗa, 8“Nyiɓaɗaaka kaleehgim tut woleka ha ummana, ilam kakom ngoɗo ta hadau kahadda manadana. Oroge ɓaragga ɗaaɗaho ata waɗeka kareih paha aka wal tabaram haleeh ʄala. 9Maɓegge naɗa mor umma kaleehgimi, manamai tabaram mono nahanewe, ‘Oha akim, nne hadauge pahaganaɓey tutna naɗe kulla.’ Ma wale anaꞌmanage makkem huphadage makakomige ngoɗo ta hadau kahadda ta lira. 10Nyiɗawe, ɓaɗaaka kaleehgim, pedeɗana hadau kahadda ta lira, tannam mor umma enga amin mono malinage tabaramu, ‘Oleɓai, mai ngoɗo ta hadau kareih dahha.’ Nyiɓatauɗaɗuge mi ɗataugim hiim ta aroɗa tangngaɗa kulla waɗeka. 11Oroge tangngana ata kahamadehta wikna engage ɓahaɓawayi, tauɗaʄalage ɓaɗaaka kahaɓawa wikna engage ɓahamadehtayi.”

12Lohho malinage Yesus tabarana mor umma, “Nna ɓam kaleehna ata tut woleka yaa laɗo mono yaa gaɗi, ilam kaleehɗadi olemu, ai waleka oleɓaimu mono ɗuwum, nyiɓawaleka naɗa olebara ummam kapote. Oroge nimla ɗiɗa enga ɗaleeh ʄalagu, tauɗaɗage lage ɓam hibawe jelge nna harayimu. 13Tanyiɗuwe ɓam rayikage woleka, kaleehɗadi ata kamilla, ata kabeko, ata kalikku, ata kamoro. 14Yaulage engage ɓahamaringiwu, oroge raɗa ata wale ɗatauꞌmaguge gaɓɓage nna dahham. Alla enga natauguge gaɓɓage tangngage dahham, ta rahge raɗa ata katena ɓa hamourha haggay walta jonga dalara ata mate.”

Alla nakaleehna ata buta tannam kaɗa ɗaꞌ ana-huhu-Gu tanyiɗuwe waleɗa auꞌma

(Mat 22ː1-10)

15Kole harangewe hataknai Yesus, wu ata kayaa ɗangani Yesus, linage, “Maringkana ata kangoɗo yaa ɗangani Alla ta rahge ɓana mai hareha ɗaꞌ Raja!”

16Taboloi Yesus nawain wu lii-hatuʄa tabarana naɗa ata, malinage, “Hadaka rahi ɗaan wu ata karayige woleka madakka mono nakaleehna ata buta. 17Kole ɓaɗikge rahge ɓahalegewe woleka, naɗa ata nahaleway ata pahalewana kako tabaraɗa raɗa haleehna mono natakwe, ‘Maimge, ngaradukadi namaganaɓeyi!’ 18Tanyiɗuwe ngaradukaɗa, ɗiha ata ɗiha ata ɓaankagama liɗage. Naɗa hawunga ɗikna nahanewe tabarana naɗa ata pahalewa, ‘Nauwa abhiguge ɗiha hadau tana, mono kakohowa lo torrowe. Baankaga.’ 19Waɗeka linage, ‘Nauwa abhigudi kabul haap, kag kamatodi ta lima lukug. Baankaga.’ 20Waɗewal linage, ‘Nauwa abɓegu paha ummana, mono waleg kakoꞌmawa.’

21Naɗa ata pahalewa nahagga mono nahaɗikge tabara morna. Ma naɗa mornage nabaantakka, malinage tabarana naɗa ata pahalewana, ‘Kakow geha ta lara haliɗa ata buta mono lara kalla ta kota. Marangadi nim ata kamilla, ata kabeko, ata kamoro, ata kalikku.’ 22Ma naɗa ata pahalewa linage, ‘Mori, hareham mori hakakoɓewe, tabolo hadau butahoyi.’ 23Malinage naɗa mourna, ‘Kakow ta kangal tana mono ta kajanga lara ta bal kota, mono kamɗikid ata kaɗa mai, tannam ummag kana ban ge. 24Apewela! Ata haleehɓegu aika mai ta wolekag, walaꞌma wu ak walta jongaɗa kapaɗagad dahhad raɗe hayaa ta wolekagu!’ ”

Ɓaɗoukani Yesus pahallaɗahoyi tangngad hamaꞌ

(Mat. 10:37-38)

25Buta takka ata kaɗokuni Yesus. Yesus nagilaka mono nahanewe tabaraɗa, 26“Ɓa iyai ata kakab atege ɗouk-Ga, namanawara ɗaho-Ga reih walta ɓana manawarad inyana, amana, ole ummana, anana, angwuna mono wattona, lohho tau ɗauna. Ai tauɗaɗage, nyi walena ɗaɗiꞌmawe ɓana ɗouk-Ga. 27Ata kabaige ɗouk-Ga, natanna ɗahodi tangngadi hamaꞌna. Mono na auɗaho hibawe mayilla lohho mate, oroge ɓana yii wik hakitana ɗoukge hakab ate-Gu. 28Ɓaɗaaka wu ata walta mi kakab atege hadede bat umma kapang tokona, na ngoɗoletohoge ɓana yapud ngaradukad hawai tannam katadawe ɓana tutuy mono aina tutuy amaha kahha ɓaɓewe nna umma kapang tokona. 29Oro nna hadau umma baɗa ɓeɓenage ɓana halijakawe, tanyiɗuwe walena halodoꞌmage rayige, tangngana ata ka etanage ha ullana enga ɗamaalhan. 30Raɗa ata enga liɗani, ‘Yeih, naɗe ata narayina umma, tanyiɗuwe walna ɓeꞌmaweǃ’ 31Ɓaɗaaka wu raja kabul ratana tentara kakako hatau, gaɓɓan naɗa raja heka kaɗobul ratana tentara, naɗa raja enga ɗahoge ɓaɗa ngoɗoge, ɓaɗa haɓaja ulge natutkaꞌwe kulha ɓa gaɓɓad raɗa muhna. 32Ɓana tada wikna aina kulha, ɓana etayi muhna ɓaɗa marauho, enga halewanage ata karaiwe moli. 33Tauɗa ʄalanage ɗimi. Ɓa iyai walta mi kabaige ɗouk-Ga, nahangaɗa dahha ɗahoge mono napahallaɗahoyi tangngadi hamaꞌna.”

Mahh kakaɓɓa

(Mat. 5:13; Mrk. 9:50)

34“Nna mahhi nadahhawe, tabolo kole ɓana kaɓɓawe, na ɗaꞌkaɗuwe ɓahamahh haggage? 35Langɓataukawe ta oma waleka ɓaha li pupukge, wale laꞌma gauge. Ɓaitage nyimowe. Ɓa iyaɗuyi kapang katilna, rangewe!”

Currently Selected:

Lukas 14: lmy

Highlight

Copy