Lukas 13

Ai ʄarraka walta jala enga lilokom

1Farisi Neɗana ata halaraɗage tabarai Yesus tutɗa kapirrana ata Galilea pahamatenai Pilatus, ɓatangraɗa ɓaɗa ropoyi ranga hamaarakaɗa tabarai Alla. 2Kole ɓana rangewe, malinagei Yesus tabaraɗa, “Ɗoukge pahangaɗamu raɗa ata Galilea ɓahamate tauɗadi, reihpoɗage doku-jalaɗa walta tangngaɗa ata Galilea waɗeka? 3Wale tauɗa ɗaꞌmage! Tabolo apewela: aim ʄarraɗami walta doku-jalam, tangkahami enga mate ʄalam, katauna ɗiɗa. 4Agalinaɗawe ɗiɗa kabul podopatana ata Yerusalem kamate ɓana ɓirakadi menara Siloam?#13.4 Neɗo menara hawaiwe ɓaʄawawe mono hatetwai. Napahawaumi tadanage yiɗɗa reihpoɗage doku-jalaɗa walta tangngana ata heka ka engana ta kota Yerusalem? 5Wale tauɗa ɗaꞌmage! Hadakkawal luG-gim: ɓa aim ʄarram walta doku-jalami, mi tangkahami enga mate ʄalami katauna ɗiɗa.”

Ata aika mourha ɗoukge hakab atenai Alla natuʄai puu yay aika wu

6Ɓaɓewe neɗoi Yesus nawaina wu lii-hatuʄa tannam kahanuwadi, ɓa aiɗa ʄarraka walta doku-jalaɗa Alla enga nahokudi. Malinage, “Ɗaan wu ata kapang pu yay ara ta oma anggurna. Ɗaage ɗiha laɗo ɓana kako mayegana wu ara ta puuna, tanyiɗuwe walna ʄamuꞌma langɓa wu waikana. 7Nyiwe, manahanewe tabarana ka urhanage omana, ‘Torrowe, baꞌ tal dauge ɓag maiwa mayegana wu ara na ta puuna, tabolo walegʄamuꞌmawa wuuna langka wuu waikana. Pogo ɗahoyi naɗa puu yayu! Ɓe awanage wee marha tana!’ 8Tanyiɗuwe naɗa ka urhanage omana nabaleha, ‘Nyammaton kana mourhatona ɗiha dauwal, ha ama. Nauwag kuarawe tana woletani mono taun pahadaukawaina. 9Ɓaraga wukaꞌna nim dau ta aro. Nyiɓa waleka, pogoꞌmoyi.’ ”

Yesus nahataggahayi wu lawai kabuuk ta laɗo ngah mono habayangɗa ata Yahudi

10Ɗaage ɗiha laɗo ngah mono habayangɗa ata Yahudi, Yesus nahanuwana ta umma hadau kangoteɗa ata Yahudi.#13.10 Umma hadau kangote ata Yahudi, yoɗa hadau bahhaɗage Jurata Lii-Kira Kamema, hadau kangote, hadau hanuwa-ha aka mono hadau pohta palakara. 11Neɗo ɗaan wu lawai kabaɗa kabul podopata dauna kabuuk, oroge ɓaɗaani wad japata ta tauna. Naɗa lawai nakabuuk mono walna ɗaꞌhingmana dede didara. 12Kolei Yesus ɓana etayi, Nyi nakamaikani malinage tabarana, “Inya, yau hoilawu!” 13Nyiwei Yesus na ijalai limma-Na ta pan kaɓedona naɗa lawai, mono neɗa mema nadede didara lohho naɗaikayi Alla.

14Naɗa kapala umma hadau kangote ata Yahudi nabaanin, orogei Yesus ɓana hataggaha ata ta laɗo ngah mono habayangɗa ata Yahudi. Nyiɗawe manahanewe taɓaraɗa raɗa ata, “Ɗaad an laɗo harayi ullawai. Mai ɗaɗumi ta jongadi raɗa laɗo kahataggahami, ila ta laɗo ngah mono habayang ɗalkaɗa ata Yahudi!”

15Nabalehawei Mori, “Mi nne koɓoy atem! Ta laɗo ngah mono habayangɗa ata Yahudi, mi enga pahala ʄalamidi haap waleka keledai walta gall mono pahuudi kataudi wee kaɗa enu. 16Ma nne ɓatauge ɗaan wu lawai wallanai Abraham, kabul podopata dauɓena moʄana ɓanakattini Kabalka. Aganaɗawe nyi walna ɗaɗiꞌmawe ɓapahalayi wal ɓakattin ta laɗo ngah mono habayangɗa ata Yahudi?”

17Nna balehanai Yesus rayinage hamake ɗangatakkaɗa gaɓɓa-Na; tabolo tangngaɗa ata waɗeka lagaharai ateɗa ɓaɗa etawe tangngadi kahekagaina harayinai Yesus.

Lii-hatuʄa tut wat sesawi

(Mat. 13:31-32; Mrk. 4:30-32)

18Yesus nahanewe, “Aganaɗawe ɗaꞌge, Alla ɓana halegeɓewe hareha ɗaꞌ Raja? Agaɗahona pahamera ɗangawai Guge? 19Nyi katauna naɗe lii-hatuʄa. Wu wat kahadda marraha ngarana wat sesawi.#13.18 Halinaɗanai Yesus ta mata Jurata nne, wat walta wu puu yay katum ta tana Palestina, madehtana kahha tauɗa metera. Nyiꞌwe nne mawoge tutge Alla ɓana harehaɓe ɗaꞌ Raja ta pan-tana nakapuɗage wal kapirrakina ata tanyiɗuwe na tumwe mono naɗaꞌ buta ata. Nangalayi wu ata mono natadoni ta omana. Naɗa wat sesawi natumu lohho naɗaꞌ puu yayu, mono kawurna rayiɗage haꞌɗa ta kahangana naɗa puu yayu.”

Lii-hatuʄa tut bibit roti

(Mat. 13:33)

20Mono linapiwalgei Yesus, “Agaɗahona pahamerawai Gu-ge tutgei Alla ɓana halegeɓewe hareha ɗaꞌ Raja? 21Nyi nahameraɗawe kahoꞌkina bibit roti hangalana wu lawai lohho nahakila waige tepung kabuta, kahha ɓana pannewe tangkahage.” Nyiɗawe raɗa ata kahatena ta puge hoɗiki tanyiɗuwe kii-kii namoʄage ɗama taba buta oronage hanuwa hatenaɗa yiɗɗa.

Kahikge ɓinna ka aro ta mourha aika mandukana

(Mat. 7:13-14, 21-23)

22Yesus nakako hakitana aro ta kota Yerusalem, hagapege ɓana hanuwana ata ta kota mono harona hapallakana. 23Ma ɗaan ata kanuka tabara-Na, “Mori, hoꞌtakkahe ata pahamanemara?”

Nabalehawei Yesus, 24“Run takkagela tannam kana ɗaꞌwe ɓam tama ta hareha Rajanai Alla ledege ɓinna sorga kahikna. Oro ɓatauɗage, apewela! Buta ata karun-ge tama tanyiɗuwe walna ɗaɗiꞌmawe. 25Ta rahge naɗa mor umma ɓana kaɗe mono tounwe ɓinna-na, mi dedemige ta ɓalhaꞌ mono kaladmige mono limge, ‘Mori, ɓugeragama ɓinna!’ Nyi nabalehami, ‘Nauwa waleg tadaꞌmam ɓa iyam!’ 26Mi enga baleham, ‘Nami ma yaa-enu ole ɗangaɓe-Gu mono hanuwa ʄalaɓegama ta lara kalla ta kotama!’ 27Tabolo naɗa mor umma linawalge, ‘Nauwa waleg tadaꞌmami ɓa iyam. Yelana wal nne, mi ata karayinagim kajapata!’ 28Nim mi enga etamidi weɗa-waikam Abraham, Isak monoi Yakub mono tangngaɗa lede-liinai Alla ɓaɗa lagahara ta rahgei Alla ɓana halegeɓewe hareha ɗaꞌ Raja. Tabolo mi enga wale anaꞌmanage mayillam mono hoomige oroge mi ɗau wugam ta balhaꞌ! 29Ata enga ɗamai walta hagala pan-tana, enga ɗalagahara yaa-en ɗangani Alla lar ta hareha-Na. 30Katautakkanage ata kareih paha aka ɓatauge enga ɗaꞌ ata kahadda dau ɓawa, mono ata kahadda dau ɓawa ɓatauge enga ɗaꞌ ata kareih paha aka.”

Yesus namolungwe ate-Na tutge kota Yerusalem

(Mat. 23:37-39)

31Tangranai Yesus ɓaɗaahon ta bat harona, ɗaad kapirrana ata walta kalibbo Farisi kamai tabarai Yesus mono liɗage, “Ilam engana nehe! Kakow yelage nne hadau, oroge Herodes kag hamateyi linagu.”

32Nabalehai Yesus, “Kakow taknagei Herodes ata kaɓokala mono kamalameha#13.32 Ata Yahudi ɗatadawe naɗa ranga ‘rubah’, ranga kabaige hegaradi hamula mono aikapang gauna. kanogona katauɗana ɓagga utta kabaani, ‘Nehe laɗo mono koka Nauwag wugayi wad japata mono hataggahay ata kalawara, tabolo ta laɗo hatauɗawai Nauwa enga ɓeguge ha ulla-Gu.’ 33Nyiwe nehe laɗo, koka mono ɗo gaꞌ, Nauwa hakitaɗahona hakakowe ha ulla-Gu kahha ɓag ɗikwa ta kota Yerusalem. Oroge lede-liinai Alla hamateɗahoyi ta kota Yerusalem wale ta hadau waɗekaꞌma. Tauɗa ʄalage Nauwa mateɗahowa ta kota Yerusalem.

34Oha amge ata Yerusalem! Butaɓe lede-liinai Alla pahamatemi! Mono butayi ata pahalewanai Alla hataum watu kahha ɓaɗa mate! Baɗa pirrawudaɓege Nauwa kamaꞌge auhadi tangngana ata katauna ɓai man ka auhad anana ta kab kapana, tabolo mi walem auꞌma! 35Oro ɓatauɗage Alla walna hil oleꞌmagu. Kamtadawela, walna ɓatauge yau walem hil eta ɗaꞌmawa Nauwa, kahha yau ɓam takwe, ‘Namaringkana, Nyi kamai waige ngaranai Mori.’ ”

Currently Selected:

Lukas 13: lmy

Highlight

Copy