Romains 7
7
Otômu amige ôgonedu n’otômu ayômba
1Ana aTétee asi mbumu éaNzambé, nômani éôkô éne énganigôa me anye éva gôébégô anye nôsabômu mabégô mamige mikitsiôni. Ndongi na mitôma na mige mindé n’otômu gôndé môma te vadôngangô. 2Tôkanéga te n’edué. Môgeto amabaaôni andé gô tsina otômu amômiedi gô yômbaye dimabaanahngô ngu na vangawa mômiedi. Okô mômiedi awéyi, môgetone asabadô g’ôtômue ayômba, andé amatsikôni. 3Okô môgetone akea akeabaaô na muene mômôgôô, mômiedi agédôngaka, angeendô mbe môkeyi agésasô. Ivô ôkô mômiedi awéyi amatsikô, asabadô n’edi gô yômba. Na vane buéyé mbe abaaôkô na muene mômôgôô asangeendô mbe môkeyi agésasô. 4Gôndé anye te mônongovo ana aTétee. One amatôma anye va mbeego te mige miaNzambé. Ivô nômawa gô ôtô aChrist va gésumu sowa. Gômawa anye, évambee éanyô na mige miaNzambé ésabadô na ngudi gôénôtôma. Nôka môvo na ône amakundugani gômbé gô évambee éndé anye n’edi nôngayanza mane manyôngéô Nzambé. 5Endé te nane. Vamadigaanye gô ésimee éanyô éambeego gôédugéda mane mabévani mamanyima yôtô yanyô, nômayanza te mane mamadékéda Nzambé mbe: Nômbienda. Nôsiôngôé ékina mane mabévani makeda môma na g’ôwa. 6Ivô ndéô nedué, tôsabadô gô tsina otômu amige miaNzambé. Gôébégô tômani éwa na tômatsika éne émakataka we ga tôndé gô tsôgôô. T’ebandô tôyanzéa Nzambé wene mônongo. N’atsatsee tôyanza gô tsina otômu aGédidi sedi. Géé mbeego tômayanza gô tsina otômu amige miedi mimatenduni.
Ebégô éamige miaNzambé na mabégô mabévani
7?Tongeenda nayee? ?Mige na mitôma miaNzambé, tambô mibéva-a? Aé, kaka nane. Te miangô mimamenyéda me mane meenda Nzambé mbe: Ebévee. Mbeka môge ôbeenda mbe: Ombianyima sôma sagébé soo, me mbe tsimenya mbe ényima éndé n’ami ésanyepa. 8Vamookô me môge ône, ébéva éámôtémami émayungéda me gôényima sôma sagébé sami. Ebéva éamôtémami éndé ga nzumbi gébé na ngudi, buétsé te édékédu na mige. 9Va mbeego, mige miaNzambé madeo misikitsô me namabaka na ngudi, na namadônga. Ivô vamatsiga migemie te ébévee émadiia ngudi. 10Na me namasanéa gébé na ngudi ga nzumbi. Namamenya mbe mige miaNzambé mingeetsa me monyo, tambô. Miangô mikeda me na g’ôwa. 11Mabégô mabévani mamabômédu me. Te mangô meeséda me gô mige na mitôma miaNzambé na mameetsa me tsôgôô éowa.
12Ivô migemie mindé mietsimama éaNzambé amuene. Na mitômamie misapengana na minyepa. 13Tambô éne ényepani ?éôngôa ékoga éka ébégôe éowa gôndé me-a? Aé, ésangoongôa ékoga. Ebandôe eebégôe te ébéva ámôtéma amôma. Minongomie mietso mibévani mindé na mabégô mabévani mienanô gôwanya mabégôme na mige. Mabégô mabévani mamabévéda ényepa émabaka na mige miaNzambé gôétsigéda me na g’ôwa. Ebéva éamôtéma amôma ébévéda ti v’ekôdéô abévaga.
Môma andéké gô tsina ebéva
14Tôsabômu mbe mige miaNzambé misapengana na minyepa. Ebévee éndé na me, môma ava tsina. Namabôtu môvéga amabégô mabévani. 15Me tsamenya éne éénda me. Na gô pie nanyôngéô éénda te éne éamôsôba ivô, tsaba na ngudi yeenda éangô. Na éne ébévani ésanyôngéô me éénda ta na pesu, neenda te éangô. 16Okô me tsanyôngéô éénda éne éénda me, tsabômu mbe nanyôngéô édékédu éangô na môge gôébégô migemie minyepa. 17Tambô kaka me neenda éne ésanyôngéô me, ivô te ébévee éndéké gô môtemami étinda me. 18Tsabômu mbe gô môtémami gôsaba ta n’ebégô évo éamôsôba te gôndé me môma ava tsina. Endé te nane. Buéyé mbe nookô tsôvé éamane mamisôba, tsoongôa éénda mangô. 19Tsoongôa éénda mane mamisôba manyôngéô me, ivô neenda te mane mabévani masanyôngéô me éénda. 20Okô me neenda mane masanyôngéô me éénda, tambô kakadô me, ivô te ébévee éndéké gô môtémami étinda me.
21Gô môtémami gôndéké ébégô éagéndégégé édékéda me gôékina éénda mane mamisôba mbe neendaka te mane mabévani. 22Gô tsina amôtémami nanyôngéô mige miaNzambé ti nyôngéô. 23Buéyé mbe namenya mane manyôngéô Nzambé mamisôba, g’ôtô ami gôndéké yene ébégô éagéndégégé égenya na mane mamenya me. Na éangô ékata me gô ésengo éedi mbe nayanza te mabévani matévo gatômu me na ôtô ami. 24Gétséké samôma gandé me ?ône angayuua me g’ôtôe ôdôô ôkeda me na g’ôwa, indaa? 25Tôkumédékéni Nzambé gô ina aKumu asô n’anyô Jésus-Christ.
Buéyé mbe g’ôtô ami amôma nandé gô tsina otômu amane mabévani, ivô gô môtémami nandé gô tsina otômu aNzambé.
Currently Selected:
Romains 7: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
