Marc 13
13
Jésus ameevéda gépanzédéô seba aNzambé
(Bono na Matt. 24:1–2, Luc 21:5–6)
1Vamakusa Jésus gô eba aNzambé, môneengi môvo amasôbasôbana mbe: Môékédi, bonoko ganyepa yeba yedi. Gamasaô yangô. Na gavunda yangô. Ti ôô mônongo ayeba. 2Jésus amaabéa angô mbe: ?Oeni yeba yedi dipôni‐a? Veena éwe vane gôsangasanéa ta n’etaé évo gô ngongo amôkedi. Metso mangapanzô.
Maguga mapitsi yamôyusumédu
(Bono na Matt. 24:3–14, Luc 21:7–19)
3Jésus amadigaa va ngongo amôkôdi ôtetu mbe Olivier. Môkôdie ône ôndé tsényé na tsényé na eba aNzambé. Avo aneengi te Pierre, na Jacques na Jean na André ahmabaka n’edi. Ahngô anguene gébé na muene môma ahmabambéa Jésus v’esooe mbe: 4Beenda we ndéône éngabuéa ébégô évovi éwe éne. ?Gémbégéa ndé géngatubéda we mbe ndéône éka gôpégôpé gôébuéa‐a?
5Vane Jésus amanigôa ahngô. Amakeneda ahngô mbe: Nôwema kabaga anye nôbômédu n’ene oma. 6Oma angaviga atsua inami na angapata anguene mbe: Me te Christ. Ahnga bôméda oma ayekani. 7Nôngookô nzongodi yamabadi mandé gôpégôpé n’anyô, na tsangô yamabadi magôdagôda n’anyô. Nômbieena gomo. Mabadi mema mangabuéa. Ivô ésangaba ékôdéô éatsenge. 8Eongo évo éngagenya na évo éongo. Tsenge épo éngagenya na épo tsenge. Tsina éngatatéa gô dipo tsenge disitaté yangô na mbeego. Ayekani ahngookô nzaa gôsangabahngô na môyakô. Te gandé gégôngôta géôkô môgeto gébeenda mbe: muanee amahviga.
9Ivô anye bakani n’eodo gôndé anyene. Oma ahngakeda anye na gô yeba yamisoso. Ahnganôbômôa gô yeba yewanyéô. Nôngabuédu gô inami va mbene ane atômani, na va mbene amuene kumu éatsenge. Angookô inami vanganigôanye ahngô ômbanzanyô apie. 10Buedi mbe Tsangô Eami Eamôsôba épangé éékédu gôndé oma muetso. 11Vangatsôpu anye na gôndé atsundédi, nômbiapanga ékebangana éne éngaba n’anye gôévovo. Vangaba anye va mbene atsundédi, vovoni éne éngabeendu anye na Nzambé. Esangavovo anye éngavovo te Gédidi SaNzambé. 12Oma ahngakaba anayaô gôéahyôhéda. Tétee ahngakaba anaô te mônongovo. Anee ahngakoga aka avingi atétaô na ayaô na ahngahyôhéda. 13Oma muetso ahngavinga anye gôébégô nôndéké omami. One angasipa gô gékuanô ngu na v’ekôdéô, angoobou.
Ebégô éaSôma Géôtéa Ebévani
(Bono na Matt. 24:15–28, Luc 21:20–24)
14Nôngeena ône atetu mbe, Sôma géôtéa Ebévani angatemedu va tungune ésaba yedi éedigaa. (One atangani aditégé ébégô édué.) Vane ane ahngaba gô Judée abusuga na gô ngongo amikôdi. 15One angaba gô ngongo eba, vasutuméa ahngô gôébusuga aseengéa na gô ebedi gôébongo éômedi gôétsua éangô na gôkeangô. 16Na ône angaba gô tsaga éedi asanika na gô mbôka gôébongo ngoyine éedi. 17Te ngeba épôni gô panda dingeena ageto pitsiye dine, ane ahngadenganô andé na mimé, na ane angadenganô anyuéséda ana. 18Dukani Nzambé mbe mabégô mema masangabuéa va ndéône éasodi gévôni. 19Gôébégô gô pitsiye dine oma ahngeena maguga mamootéani. Ti mônongo amaguga madeo masienanôni g’ekanéa Nzambé tsina n’oba, madeo gôsienanô mene maguga ga mane. Na gôsavienanô mene ga mane. 20Mbeka mbe Kumu amatasa mbe: Nasusué pitsiye, mbe gôsangasanéa môma adôngani. Ivô Kumu angasusua pitsiye te gôndé omedi amasevôa angô.
21Okô nôbeendiô mbe: Bononi, Christ ône amatômu na Nzambé te angôô, vo Christ te angôône. Nômbiookô mane. 22Gôngaviga eekédi adiboe angapata mbe: Me te Christ. Avo dôta angapata mbe: Me te môpandôédi amatasa maNzambé. Ahngatubéda émbégéa na angayanza mabégô manganyônganéôni masoongôa môma ésupua. Eetso éne gôébôméda oma. Buéyé ti na ane ahmasevôu na Nzambé. 23Tambô anye, bakani n’ekena. Namani éevéda anye mabégô mema madeo masibuéa.
Génikéô saMuana Amôma
(Bono na Matt. 24:29–31, Luc 21:25–28)
24Gô pitsiye dine, va mbene andéône éamaguga, kômbéne éngeemédu na ngondene ésangadôétsigéda midanga. 25Minangamie mingaaga g’ôba na bobokoboboko. Ane ahtôma ngudiye yava gatse atsina n’oba ahngatatéa. 26Vane nôngeena me, Muana Amôma natsutsuga va gatse adibôngé yag’ôba. Nangaviga na ngudi dipôni n’obébayi ondômbami. 27Nangavigéda ayanzi aNzambé asi g’ôba gôékôkéga muetso ane ahmasevôu na Nzambé. Ahngaviga gôtsiga kômbéne na gô pénda yangô na gésa na gésa.
Meekédu mag’ôfiguier
(Bono na Matt. 24:32–35, Luc 21:29–33)
28Menyani gémbégéage gétubéda géétété gééndô mbe ôfiguier. Mitabé miedi mibandôa égeenya na yabiye dipunzua, nôsabômu mbe mbuuaye dimoba. 29Te mônongovo veenanye mabégôme metso ema mabuéa, menyani mbe amuene aka gôpégôpé. Asabadô gôpégôpé, aka ti v’ombaa. 30Me nanôbeenda na gô pie mbe muetso ahndé adôngani asangawa mbe mabégô mema masatsigaka. 31Diôba na tsina dingoota na dingadimbana. Ivô Mabégô mami te môgunanza.
Nzambé amuene asabômu pitsiye
(Bono na Matt. 24:36–44)
32Gôsaba môma angoongôa émemya pitsi vo ndéô éngabuéa mabégô mema ivô te gô mbene n’okendô. Béyé n’asi g’ôba ayanzi aNzambé asamenya. Na me, Muana ANzambé tsamenya. Te amuene Téta asabômuni. 33Nôwema. Bakani géembemba géebogé. Nôsamenya nyee ôngabuéa mabégô mema. 34Jésus angô mbe: Te gandé môma akea môtôô. Atsika ebedi na ayanzi edi. Eetsa ahngô ényangee. Atsikéa môma na môma n’edi éyanza. Avovo na môkenene ombee mbe: Ombieeboga vio. 35Tambô anye bakani misiki nôsamenya ndéône éngaviga kumu eba. Anganika, buétsé na dikoo, buétsé va gatse apitsi vo va tsôsône éamapanga, vo n’ongôngôe wetso. 36Nôwema kabaga aviga tsina na tsina anôdenga nôndé gô vio. 37Ene évovo me n’anye navovo te n’oma muetso mbe: Bakani n’ebagé géebaé.
Currently Selected:
Marc 13: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
