Matthieu 9

Jésus amadôngéda môma amakata éeyo

(Bono na Marc 2:1–12, Luc 5:17–26)

1Jésus amapeka gô mbôngône gôénika éabôga mubue. Amanika na gô mbôkedi. 2Oma amamôtsuéa môbeene amakata éeyo andé yama gô gékakage. Vameena Jésus mbe omeaa asatsuma ngudi yami paga, amovovo na môbeene mbe: Ombiaba na mikebanganô. Suméda môtémee muanami. Ebévee éoo ésingéyiô kokoo. 3Vane avo anigôi amige miaNzambé amatasa gô mitéma miaô mbe: Môma noo eenza Nzambé te eenzaga. 4Jésus amamenya mane mamatasahngô gô mitéma miaô na ameevôa ahngô mbe: ?Anye nayee nôndé na mônongo amatasa mabévani? 5Okô neendi mbe, ébévee éoo ésingéyiô kokoo vo neendi mbe, timôga kiaka na makôdô moo. ?Gô mabégôme mane mabaé éne ésadaga évovoni yeeni? 6Ivô nanyôngéô étubéda anye mbe me, Muana Amôma nandé n’enyanga va tsina gôésinga oma kokoo gô ébévee éaô. Vane Jésus amatôma môbeene mbe: Timôga. Bongo gétava soo. Kiaka na gô eboo.

7Mômôgôô nône amatimôga na amakea na gô ebedi. 8Vameena géômbége éne émayanza Jésus, muetso amasôbasôbana na gomo na ahmakuméda Nzambé gô ényangee éedi évôni émeetsô gôndé oma.

Jésus amabambéa Matthieu

(Bono na Marc 2:13–17, Luc 5:27–32)

9Vamakea Jésus oota nani, ameena mômôgôône atetu mbe Matthieu, andé digaa gô tsongo émavanô dode yadepu. Jésus amamôbambéa mbe: Oka nzéepo n’ami. Matthieu amatimôga na amakea géômbé gévo na Jésus.

10Jésus amabaka gôéaa va tabudé gô eba aMatthieu. Abongi ayekani adepu, n’avo oma aminongo mibévani amaviga gôéaa va tabudé émaa Jésus n’aneengi edi. 11Apharisien ameena gômaa Jésus na ahmeevôa aneengi edi mbe: ?Môékedine wanyô nayee angô aa tabudé épo n’abongi adepu na oma amookanô mbe abévani? 12Vamookô Jésus ahngô avovo nane, amaabéa ahngô mbe: Ane asabeeani ahsookô tsôvé éamôbôgani. Te abeeyi ookô angô tsôve. 13Kiakani nôkeékédu éne étôtanga gô Matendeo MaNzambé mbe: Me nanyôngéô te asi ngeba. Tsabuta ane eetsa digondoku yanyama. Me Jésus tsiviga gôébambéa ane anyepani, ivô namaviga gôébambéa abévie gôékoa mitéma miaô.

Jésus anigôa ébegô éekina môyakô gôévovo na Nzambé

(Bono na Marc 2:18–22, Luc 5:33–39)

14Aneengi aJean‐Baptiste amaviga na gôndé Jésus na amamôévôa mbe: We na Apharisien tôkina môyakô kuka yetso gôévovo na Nzambé. ?Nayee aneengie woo asakina‐a? 15Jésus amaabéa ahngô mbe: ?Géômbé sasueti ayômba géngaba na mitéma miditani amuene mômôgôô, kumu ayômbaye andé digaa n’ahngô gô suetine‐a? Asangaba na mitéma miditani. Gô ndéône ésangaba kumu ayômba vangô, géômbége sedi géngakina môyakôe te nyoone.

16Epôdéké éangoyi émabooni ésananôkô gébambô samôkanda edôngé. Gébambôge sedôngé gésusuga gôvôu sangô na gékaka ngoyine ébooéni. N’epôdékée ébaki égegé te éka vembe na memba. 17Môma asoongôa éetéa maduku mamiduengi gô géetéô sedi sagégôbôkô sanyama gémagasani. Vatogo madukume gégôbôkôge gémagasani gésavutuga na sangô géatéga. Na géetéôge na madukume ébungana. Ivô môma eetéa maduku mamiduengi gô gégôbôkô gédeedani, na madukume na géetéôge éetso éngaba te éamisôba.

Muanamôgeto amôma môvôni, na môvo môgeto ahmadôngéduni

(Bono na Marc 5:21–43, Luc 8:40–56)

18Vamabaka Jésus gôéékéda, môtômi môvôni Ajuif amaviga. Amasiba mabongo medi va mbene aJésus na amavovo mbe: Muanami amôgeto awéyi ti n’atsatsee. Viga ôvibanda angô n’ogogoe woo, buta mbe adônga. 19Jésus n’aneengie ahmatimôga ahmakea n’edi.

20Vamabaka môgeto môvo amabeea môvôva, môsingi nzima ema n’ema ébaé. Amawesea na va ngima aJésus gôémôbanda gô géondoge samôkanda ômaatangô. 21Amatasa gô môtémedi mbe: Okô me naka nakébanda angô pengo gô môkandee, nangadônga. 22Jésus amanikéda miso medi na gô ngima na ameena môgetone. Amavovo na môgetone mbe: Suméda môtémee muanami. Odôngi gôsitsuma éwe ngudi yami paga. Ogi yadingani môgeto nône amadônga.

23Vamabuéa Jésus gô eba amôtômine ameena agobi angombi andé mitie akea na gôgunyu nzumbine. Ameena na géômbé gégunyéga na va tsina na mindônga. 24Jésus amatôma ahngô mbe: Kusani meutso. Muanamôgeto ôdôô asiwa, ivô andé gô vio. Oma amaseka Jésus. 25Vamakusédu géômbége na gô môkii, Jésus ameengéa na gô tsongone émabaka muanee. Jésus amatsôpa ôgogoe amuanee na angô amamôtimôa. 26Tsangône émapaa gô tsengene nyetso.

Jésus amadôngéda asi pogu abaé

27Jésus amanôtôga wangô gôékea na gô nyene tungu. Gômakeangô asi pogu abaé amaanda angô va ngima na amaadôngana mbe: Ewe, Muana aDavid eena we ngeba. 28Vamatsiga Jésus gô eba, asi pogu amawesea na vandé angô. Jésus ameevôa ahngô mbe: ?Anye nômenya na gô pie mbe nangoongôa énôdôngéda‐a? Ahngô abaé amaabéa mbe: Ii, môékédi asô. 29Vane Jésus amabanda ahngô gô misome na amavovo mbe: Diiani éne ésitsumanye paga mbe nanganôéndéa éangô. 30Miso maô mameenéa. Vane Jésus amakangéa ahngo mbe: Tsanyôngéô mbe ébégôé édué émenyanganô. 31Ivô ahngô abaé amadôngéduni amakea na tsangône éaJésus gô tsengene yaô nyetso.

Jésus amadôngéda môsi ôbôbô

32Vamakea asi pogu amadôngéduni, oma amaviga na gôndé Jésus na môma asiôngôe évovoni. Angô amabaka na gédidi gébévani. 33Vamapatsa Jésus gédidige géne, môsi ôbôbô amabandôa évovo. Géômbége setso gémasôbasôbana mbe: We gô tsengene nyetso éaIsraël, madeo tôsiena nani. 34Ivô Apharisien amanigôa mbe: One eetsa angô ngudi gôékuséda édidie ébévani gôndé oma te Môtômine eédidi ébévani.

Jésus ameena oma ngeba

35Jésus amakea éva n’eva amoota gô mbôkaye yetso na gô misengemie mietso. Ameekéda gô yeba yaô yewanyéô na amanigôa Tsangô Eamôsôba éokumu aNzambé. Amadôngéda minongo mietso miamabeea na miadipôpéa. 36Môtémedi ômayôa na ngeba gômeena angô éômbé évôni émagogoni na émabaka na mitéma miditani. Ameena ahngô ti ga mandombo masaba na môkeneyi. 37Jésus amavovo na aneengi edi mbe: Gôndéké éyanza évôni gôéengéda éne émagaabôkôni, ivô gôsaba ayanzi ayekani gôéengéda. 38Tambô dukani kumu atsagane mbe angakudéga ayanzi gôéengéda éne émagaabôkôni.

Currently Selected:

Matthieu 9: TSV

Highlight

Copy