Matthieu 7

Nômbieeséda akanyô

(Bono na Luc 6:37–38,41–42)

1Nômbieeséda akanyô kabanga anye nôesédu na Nzambé. 2Gôébégô Nzambé anganôeséda gô mônongoe ôesédanye akanyô. G’ôkanee ôkanéganye akanyô, na Nzambé anganôkanéga te mônongovo. 3?Nayee ôena tsengesengene éndé gô ésoe amôkoo na éwe ôseena éengôe éndé gô ésoe yoo? 4Ewe ôndé n’eengô gô ésoe yoo ?nayee ôôngôa évovo na môkoo mbe: Wee ami, singéa me nagônôtôa tsengesengene éndé gô ésoe yoo? 5Ewe te môma enyepa éamônya. Panga énôtôa éengôe éndé gô ésoe yoo. Vane ôngeenéa na vede gôénôtôa tsengesengene éndé gô ésoe éamôkoo.

6Nômbieetsa inzua yôma éamisôba kabaga digéngôga gôénômbata na gôébunzéa anye. Nômbiagunya sôma soo sosunu ôvôni na vandé ngudu, kabaga diyeta sangô va tsina.

Dukani, butani, bôkédani v’okuké

(Bono na Luc 11:9–13)

7Dukani na môvinéné, na nôngeetsô. Butani na môvinéné, na nôngadenga. Bôkédani v’okuké na môvinéné na nôngakukuéô. 8Muetso aduka no môvinéné angadiia. Muetso abuta na môvinéné angadenga. Muetso abôkéda na môvinéné angakukuéô ôkuké. 9?Môma ndé va gatse anyô angeetsa muanedi étaé ôkô amôduki môyakô? 10Okô muana amôduki nyama yagô mbéyi ?tétedi angamôétsa nyongoo‐a?#7:10 G’ôgi aGrec amateta nyogo gôébégô gôndé Ajuif ésaakô. 11Buéyé anye oma abévani, nômenya éétsa ananyô yôma éamisôba ?tambô na Tétanyô ône andé g’ôba, asangootéa éétsa anye yôma éamisôba gôndé anye nômôdukani‐a?

12Indakani akanyô éne ényôngéô anye mbe akanyô anôéndéa. Amuene Moïse amatôtôma te nane. Na apandôédi amatasa maNzambé amavovo te nane.

Meekédu mokuké ôgeôge

(Bono na Luc 13:24)

13Ingéani v’ombaa ôgeôge. Gôébégô ômbee ôvôni na nzéane épôni ékeda môma na gôébungana. Oma ayekani akea gô yangô. 14Ivô ômbee ôgeôge na nzéane ékeke, te yangô ékeda môma na gô monyo. Gôsaba oma ayekani akea gô yangô.

Meekédu magéétété na miônda miedi

(Bono na Luc 6:43–44)

15Wemai gôndé eekédi adiboe. Aviga na va gatse anyô ga mandombo, tambô gô mitéma miaô te ga nzego. 16Anye nôngamenya angô te gô ésima éaô. ?Môma anenga masagu gô minzembe‐a? ?Na môma abénza mbida gô gétsagaa‐a? 17Géétété samôsôba gébôta te miônda miedi miamisôba. Na géétété gébévani gébôta te miônda miedi mibévani. 18Géétété samôsôba gésoongôa ébôta miônda mibévani na géétété gébévani gésoongôa ébôta miônda miamisôba. 19Eétété éetso ésabôta miônda miamisôba éngawangô na éngabéku gô soto. 20Anye nôngamenya eekédi adiboe gô ésima éaô.

Me tsanômenya ta na pesu

(Bono na Luc 13:25–27)

21Kaka muetso ateta me mbe: Kumu, Kumu, angeengéa gô tsenge éami éag’ôba. Ivô ane eenda éne ényôngéô Téta ône andé g’ôba, te ahngô angeengéani. 22Gô nyee ône, ayekani angavovo n’ami mbe: Kumu, Kumu, gô inoo tômapandôéda ndongi dimeetsô we na Nzambé. Tômakuséda édidi ébévani gôndé oma te gô ngudi yainoo. Na dôta tômayanza émbégéa évôni na éyékani te gô ngudi yainoo. 23Vane nangavovo n’ahngô v’ekanga mbe: Me tsanômenya ta na pesu. Nôtôgani na gôdagôda n’ami, anye eendi amabégô mabévani.

Meekédu mayeba dibaé

(Bono na Luc 6:47–49)

24Muetso ookéô mabégôme mavovo me na agobeda mangô andé ga môma eodo amasaa ebedi gô tungu éndé toto na mataé. 25Mbuuane émanyogo. Géningôge gémaviga. Ekunga émakungéda na ématinda ebee. Ivô ebee ône ôsikuéé gôébégô ômasipa gô tungu éamataé na toto. 26Ivô ône ookô mabégô mavovo me na angô asagobeda mangô andé ga mômane apaga, amasaa ebedi va tungu éamisige. 27Mbuuane émanyogo. Géningôge gémaviga. Ekungee émakungéda na ématinda ebee. Ebee ône ômakuéa na ômapanzéga.

Enyangee éndé na Jésus

28Vamamana Jésus évovo mabégô mema, oma muetso amasôbasôbana na amatsapéô gô meekédume mameekédangô. 29Asiikédé mônongovo gameekéda eekédie waô anigôi amige mia Nzambé. Ivô Jésus ameekéda n’enyanga évôni.

Currently Selected:

Matthieu 7: TSV

Highlight

Copy