Matthieu 26

Peeye amavangéa Jésus gépangô

(Bono na Marc 14:1–2, Luc 22:1–2, Jean 11:45–53)

1Vamamana Jésus éongô aneengie ndongi, amavovo mbe: 2Anye nôsabômu mbe ngima amene te suetine ééndô mbe Pâque. Gô suetine, me Muana Amôma nangakabô gôébôkédu va gésumu sowa.

3Gô ndéô nene tsesu yadeekedi adigondoku na peeye yAjuif amawanya gô gétungu gô eba aCaïphe, angô pene adeekedi muetso adigondoku. 4Ahmavanga gépangô gôétsôpa Jésus v’esooe géenanô n’oma gôémôyôha. 5Ahngô mbe: Tôsangoongôa émôtsôpa gô tsina asueti mbe gôngaba môyungéda gôébégô oma andé ayekani gô suetine.

Môgeto môvo amasôga Jésus môyombo

(Bono na Marc 14:3–9, Jean 12:1–8)

6Jésus amabaka gô Béthanie gô eba aSimon, môsi ébeea éagega. 7Môgeto môvo amawesea na gôndé Jésus. Amatsua gévaa gémapakô n’etaé étetu mbe albâtre.#26:7 Te gatôénda mbe étaé éamikunduku Gévaa gémayôa na môyombo osunu ôvôni. Ameetéa môyomboe gô môtsé aJésus gôemôneegeda, andé digaa gôéaa môyakô. 8Vameena aneengie nane, ahsiene buedi na ameevôana mbe: ?Nayee abunza môyombo osunu ôvôni nane? 9Mbe ômasômbéduku ôsunu ôvôni, dodeye dine mbe dimeetsô misuga. 10Jésus asibômu éne émavovo aneengie na amasemba ahngô mbe: ?Nôyungéda môgeto noo môtémedi nane nayee? Ene ééndéyi angô me éndé ti éamôsôba. 11Misugamie mindéké n’anyô pitsi yetso. Géé me, tsangaba n’anyô. 12Môgeto noo amani ésôga me môyombo g’ôtôe wami gôékônza me madeo tsigunyu gô ngii. 13Nanôbeenda na gô pie mbe tsinane nyetso éngatsanzabana Tsangône Eami Eamôsôba, oma ahnganigôa dôta éne ééndi môgeto noo, gôékôngéda angô.

Judas amanyôngéô ékaba Jésus

(Bono na Marc 14:10–11, Luc 22:3–6)

14Vane môvo va gatse aneengie nzima n’abaé, inedi Judas Iscariote amakea na gôndé tsesu yadeekedi adigondoku. 15Amavovo n’ahngô mbe: Okô me nanôétsa Jésus ?anye dôta nôngeetsa me ndé? Amôgôôe ane amamôtangéa nzima ditatô yayabi yadode gôémôétsa. 16Bandôa nyoone, Judas amabuta ndéô éakuanakue gôéétsa Jésus na gôndé ahngô.

Jésus amaa sueti éaPâque n’aneengie

(Bono na Marc 14:12–21, Luc 22:7–14,21–23, Jean 13:21–30)

17Nyaa amapanga asueti éamôpemba ôsigésu levure, aneengie ahmabambéa Jésus mbe: ?Onyôngéô mbe tôkekônza suetine éasô n’anyô gôni? 18Jésus amatôma ahngô mbe: Kiakani na gô eba asimbe na bôkaye gô môsenge. Nôvovo n’edi mbe: Kumu asô eendi mbe ndéône éami ébuéyi. Nangaa sueti éaPâque, wa n’aneengie wami te gô eboo. 19Aneengie ameenda éne ématômu angô na Jésus. Amakônza môyakôe asuetine.

20Vameeda nyee, Jésus n’aneengi edi ahmadigaa gôéaa. 21Vamabakahngô gôéaa Jésus amapandôéda mbe: Nanôbeenda na gô pie mbe va gatse anyô nôaa n’ami, môvo angakaba me. 22Mitéma mianeengie mimadita. Ameevôa Jésus môvo mbe: ?Kumu, te me‐a? 23Jésus amaabéa ahngô mbe: One awanyéa n’ami gôétsuéta môpembee gépede gévo, te ône angakaba me. 24Na gô pie me, Muana Amôma nangawa mônongovo gamabeenda Matendeo MaNzambé mbe nangawa. Ivô ngeba épôni gô maguga mangeena ône angamôkabani. Mbe amabaka madeo asibôtu mbe émanyepa. 25Judas, ône amakaba Jésus amamôévôa mbe: ?Kumu, te me‐a? Jésus amamôaabéa mbe: Ebaké nane.

Môyakô eevamba na Kumu Nzambé

(Bono na Marc 14:22–26, Luc 22:15–20, 1 Corinthiens 11:23–25)

26Vamaakangô, Jésus amabongo môpemba. N’emana ékuméda Nzambé gô angô amoobukua. Ameetsa aneengi edi. Angô mbe: Bongoni. Aakani. Odôô te ôtôe wami. 27Vane amabongo gébungu sameba mamiônda. Vamamanangô ékuméda Nzambé gô sangô ameetsa aneengie. Amavovo n’ahngô mbe: Nyuakani muetso. 28Eédi te nzina yami. Te nzina divambéda oma na Nzambé dimaaga ngu na g’ôwa gôndé oma ayekani gôésingéa ahngô kokoo gô ébévee éaô. 29Me nanôbeenda na gô pie mbe me tsangadônyuadô mebame mamiônda éma ngu na vangoomba wa n’anyô émanyua gô tsenge éaTéta g’ôba. 30Vane amatôa mimbô masueti na amakea na gô môkôdi ôtetu mbe Olivier.

Jésus ameevéda gétônéô saPierre

(Bono na Marc 14:27–31, Luc 22:31–34, Jean 13:36–38)

31Jésus ameevéda aneengi edi mbe: Ti éne éngabuéa gôndé me na pitsine, anye nôngatsika me. Te gatôtanga gô Matendeo MaNzambé mbe: Môkeneyi amandombo angayôhu. Na mandombome mangapanzangana metso. 32Menyani mbe vangakunduga me nangoobégéa na gô Galilée. 33Pierre angô mbe: Béyé mbe akasô agôtsikéké, gôndé me tsangagôtsika. 34Jésus ameevéda angô mbe: Nagôbeenda na gô pie mbe na pitsine, tsôsône n’egékôkaka, éwe Pierre ôngatôna me kuka ditatô mbe: Me tsamenya ône. 35Pierre amoomba évovo mbe: Ti me gôégôtôna, viaa. Buéyé mbe ayôhéyee na me muetso, tsangoongôa égôtôna. N’akedi muetso amaabéa te mônongovo.

Jésus amavovo na Nzambé gô Gethsémané

(Bono na Marc 14:32–42, Luc 22:39–46)

36Jésus n’aneengi edi amabuéa gô tungu étetu mbe Gethsémané. Vane Jésus ameenda aneengie mbe: Digaakani éva. Me nakea na vane, nakevovo na Nzambé. 37Vane amabambéa Pierre n’ana abaé aZébédée gôékea n’edi. Môtémedi ômatuna na ômookô pievia. 38Jésus amavovo n’ahngô mbe: Môtémami ôena panda épôni ganakeewa. Sanéani éva. Bakani na géembemba n’ami géebogé. 39Amawesea amuene pesu na gô mbene. Amagudama na gô tsina. Amaduka Nzambé mbe: Ah Téta, gôndé éwe ôsadagéô ébégô. Nôtôa me gébunguge samaguga égé. Ivô béyé mbe nane, kaka éne ényôngéô me ééndôni ivo te éne ényôngéô éwe.

40Jésus amoomba énika na vandé aneengie atatô. Amadenga ahngô ahndé gô vio. Amavovo na Pierre mbe: ?Simon, ôeboga vio? ?Osoongôa ésipa n’ami géebogé ta na pesu andéô‐a? 41Bakani misiki géebogé. Vovoni na Nzambé anye muetso kabaga nôkuba vakanégu anye gô mabégô mabévani. Gédidi samôma gényôngéô éénda mane manyôngéô Nzambé ivô ôtôe ôdeeda.

42Ene éamôbaé Jésus amoomba étsika aneengie na amavovo na Nzambé mbe: Ah Téta, ôkô mbe gébunguge egé ôsagémôtôa gôndé me ta madeo tsipanga égényua, ébaké te ganyôngéô éwe.

43Amoomba énika na vandé aneengie. Amadenga ahngô ahndé gô vio. Miso maô mamabaka na ndondinda na viovie. 44Jésus amoomba étsika ahngô éne éamôtatô na amavovo na Nzambé ébégôé te évo. 45Vane amanika na vandé aneengie na amavovo mbe: ?Nôombi te éebogaa? ?Nôdigééi‐a? ?Nôgogi‐a? Nôeni, ndéône ébuéyi. Me Muana Amôma namani ékabô na gôndé oma abévani. 46Timôgani. Okani. Nôeni, ône akabi me avigi.

Jésus amatsôpu

(Bono na Marc 14:43–50, Luc 22:47–53, Jean 18:3–12)

47Vamaba Jésus agévovoko, Judas amabuéa. Judas amabaka g’ôtangô anzima n’aneengie abaé. Ahmaviga na géômbé gévôni gématsua ékeeyi te makongo na mabaga na événzô. Ahngô muetso ahmatômu na tsesu yadeekedi adigondoku na peeye yAjuif. 48Judas, môkabine aJésus amabeenda géômbége gémbégéage géngatubéda angô. Angô mbe: One angasambanéa n’ami na sambaa, te ône abuta anye. Tsôpani angô. 49Judas amayavôga ékea na vandé Jésus. Angô mbe: Sambaa. Kumu ami. Amasambanéa na Jésus. 50Jésus amamôbeenda mbe: Wee ami, ébaké mônogovo gavigi éwe gôéénda. Na vane avo ahmatsôpa Jésus gôékea n’edi. 51Môvo amadenganô vangô amayuua yengedi gô kôtô. Na amakitsa éatô éamôyanzine éapene éadeekedi adigondoku. 52Jésus amadékéda angô mbe: Nikéda yengane éoo gô kôtô. Menyaka mbe muetso asumbéda yenga angawa te na yangô. 53?Tambô ôsamenya mbe nandé na ngudi yeduka Téta gôésungéa me‐a? Okô naduki, tsina na tsina mbe angavigéda mitônisa na mitônisa miasi g’ôba na gôndé me. 54Okô neendi nane, tambô mane mabeenda Matendeo MaNzambé masangeenanô. Matendeo matônigôa mbe mabégôme mangabuéa te geenanye mangô mabuéa nani.

55Jésus amavovo na géômbége mbe: Anye nôviga gôétsôpa me na mabaga na péndé. ?Nômenya mbe me môsi môkôbé‐a? pitsi yetso namabaka n’anyô gô eba aNzambé gôéékéda anye, n’anye nôsitsôpé me. Tambô me, kaka môsi môkôbé. 56Mabégôme metso éma te mane mookanô gô Matendeo MaNzambé mbe éngaba te nane gamavovo apandôédi ambeego amatasa maNzambé.

Aneengie muetso amabusuga amatsika Jésus amuene.

Jésus ameesédu n’asi kundu épôni éAjuif

(Bono na Marc 14:53–65, Luc 22:54–55,63–71, Jean 18:13–14,19–24)

57Ane amatsôpa Jésus amakea n’edi na gôndé Caïphe pene éadeekedi adigondoku. Gône amadenga anigôi amige na peeye yAjuif andé wangô. 58Pierre amaanda Jésus gô ngima aka gôdagôda. Amabuéa gô môkii gô tunga eba apene éadeekedi adigondoku. Amadigaa na migode gô môkii gôéena gangakôdéa ébégôe.

59Tsesu yadeekedi adigondoku n’asi kundu épôni éAjuif ahmadigaa gôébuta ébégô, buéyé mbe éapataga, gôéeséda Jésus gôémôyôha. 60Ivô ahsidenge ébégô, buéyé gamaviga ayekani na mitangô miaô gôépatéa Jésus. Mbangi dibaé dimaviga môyusumédue. 61Amatuba mbe: Mômôgôône ôdôô amavovo mbe: Me nandé na ngudi yepanzéda eba aNzambé. Nangasaa wene gô pitsi ditatô.

62Pene amatema gôéévôa Jésus nyivô mbe: ?Ewe ôsasiia gôvovo akoo‐a? ?Osookô gasunda omeaa éwe‐a? 63Jésus asibubué. Asisiié ta n’ogi. Pene amoomba évovo n’edi mbe: Gô ina aNzambé amonyo, nagôévôa mbe ti éwe ôaabéa me. ?Ewe te Christ ône amatômu na Nzambé‐a? ?Ewe te Muana ANzambé‐a? 64Jésus amamôaabéa mbe: Te gavovi éwe. Na me nanôpandôéda mbe bandôa deo noo, nôngeena Muana Amôma digaa gô géeyo gémôgôô saNzambé Kumu angudi yetso. Nôngeena dôta Muana Amôma aviga va gatse adibôngé yag’ôba. 65Pene, n’opisa ôvôni amakaka ngoyine éamuene. Angô mbe: Mane mavovi angô eenza Nzambé. Wedô tôsabutadô mbangi. Anye nôôkiô gaabéyi angô eenza Nzambé. 66?Nônyôngéô nayee? Na muetso amaabéa mbe: G’ôési edi ôvôni awa te wakaga.

67Avo amakisuéa Jésus mate v’oso, na amamôbômôa égaaba. Avo dôta amamôbômôa ébôdé. 68Amavovo n’edi mbe: Ewe ômatômu na Nzambé, beenda we ône abômôyi éwe ébôdé ?indaa?

Pierre amatôna Jésus

(Bono na Marc 14:66–72, Luc 22:56–62, Jean 18:15–18,25–27)

69Pierre amabaka digaa gô môkii. Môgeto môvo, môyanzine apene, amawesea na gôndé Pierre na amavovo n’edi mbe: N’ewe, ômabaka na Jésus mômôgôône agô Galilée. 70Ivô Pierre amatôna va mbene oma muetso mbe: Me tsamenya mane. Tsookô éne évovo éwe. 71Vane Pierre amanôtôga vamabakangô amakea na v’ombaa amôgômba. Môvo môyanzi amamôena na amanigôa ane amabaka vangô mbe: Odôô amabaka na Jésus, môsi Nazareth. 72Pierre amoomba étôna mbe: Kaka me. Nanôbeenda na gô pie tsamenya angô. 73Géyéngéyéngé, ane ahmadenganôni ahmavovo na Pierre mbe: Na gô pie éwe môvo môsi géômbége géne. Ovovédie woo ôbangôéda we gôvigewe. 74Pierre amasongéa mbe: Ti me, ôkô napati, Nzambé asoséda me. Me nanôbeenda mbe me tsamenya mômôgôô nône. Tsina na tsina tsôsône émakôka. 75Na Pierre amakôngéda mane mamavovo Jésus n’edi mbe: Tsôsône n’egékôkaka ôngatôna me kuka ditatô mbe: Me tsamenya ône. Pierre amakusa adéa gégeto.

Currently Selected:

Matthieu 26: TSV

Highlight

Copy