Matthieu 22
22
Tsava éasueti époni éayômba
(Bono na Luc 14:15–24)
1Jésus amoomba égunya oma tsava gôéékéda ahngô. Angô mbe: 2Okumu aNzambé ôgono na môtômi atsenge akônzéa muanedi amômôgôô sueti éayômba. 3Amatôma ayanziedi gôéwanyéda ane amabambéôkôni. Ivô oma asinyôngéô éviga. 4Amoomba étôma avo ayanzie mbe: Kiakani nôkebeenda ane amabambéôni mbe: Okani môyakôe ôbéyi. Mandombo mami na mivangô miami mimayôhuni mimani ébea. Okani gô suetine éayômba. 5Ivô muetso ahmabambéôkôni asivigé. Ahmakea môvo môvo gô mayanza maô. Môvo na gô tsagedi. Môvo g’ôyôkô edi. 6Avo amatsôpa ane amatômukuni gôéabômôa na gôéayôha. 7Môtômine atsenge amaba n’opisa. Amatôma migode miedi gôéyôha dôta ane amayôha ayanzie wedi. Amatumba mbôka yaô. 8Môtômine atsenge amavovo n’avo ayanzi mbe: Môyakô asuetine éayômba ôbeyi, ivô ane amabambéôkôni asangaadô angô. 9Kiakani na gô mingômbémie miagô môsenge nôkebambéa muetso angadenga anye. 10Ayanzie amakea gô mingômbémie gôékôva muetso amadenganôni na ane abévani n’ane amisôba ngu na vamayôa tsongone émaakô suetine.
11Môtômi atsenge ameengéa na gô tsongo émabaka ane amakôvukuni. Amadenga môma môvo asiatéké maduani mokumaka asueti éayômba. 12Angô mbe: ?Waé nayee ôéngéyi na maduani gébé masueti? Môma nône asibubué. 13Môtômi atsenge amatôma ayanzie mbe: Katani angô makôdôme na mogome. Gunyani angô gô mbadi gô évitsie. Gône te gôngadéangô miéngé na gôngagéangô ngeko gô panda dienangô. 14Vamabambéô ahngô te ayekani. Vamasevôu ahngô ahsibé ayekani.
Depu émavanéda môtômi atsenge
(Bono na Marc 12:13–17, Luc 20:20–26)
15Apharisien amavanga gépangô gôétambéa Jésus pago na nyivô gôémôkubéda. 16Ahmatôma avo aneengie aô na avo ava géômbé saHérode gôévovo na Jésus mbe: Môékédi, tôsabômu mbe mane mavovo éwe te mapie matévo. Oékéda môdigédi apie ônyôngéô Nzambé. Gô meekédu moo ôsaba na ônzenze amôma. Ahmanyôngéôyee, ahsamanyôngéôyee, ébégôe te éanguene. 17Beenda we gookô éwe mitôma mimatsikéô we. ?Tôvanéa môtômi atsenge César depune vo tôsavana? 18Ivô Jésus asibômu buembee ôbévani ômaba n’ahngô. Na amaabéa ahngô mbe: ?Anye nôviga gôékanéga me nayee? Anye nôndé ti anyepi amiônya. 19Tubédani me dode divanôkô depu. Omee amamôétsa dodene. 20Jésus ameevôa ahngô mbe: ?Gégonige soso ége saanda? ?Na ina ématenduni éandaa? 21Ahmaabéa Jésus mbe: Eetso te éaCésar, môtômi atsenge. Vane Jésus amavovo n’ahngô mbe: Ene éndé éamôtômi atsenge, nikédani na gôndé angô. Ene éndé éaNzambé, nikédani na gôndé Nzambé.
22Vamookô angô mbikô nene, ahmasôbasôbana mbe: Oô môma aseebéôkôni. Na ahmamôtsika na ahmakea.
Nyivô éagékundugéô sowa
(Bono na Marc 12:18–27, Luc 20:27–40)
23Nyoone, avo Asadducéen ahmaviga na gôndé Jésus. (Asadducéen te asi gésôgage géékéda mbe ane amawani asangakunduga.) Ahmeevôa Jésus mbe: 24Môekédi ôôkô ébégô édué. Ndongi dimatendéô we na Moïse dibeenda we mbe: Okô muanayoo amômôgôô awéyi atsika môgayedi gékômba, ôviagana môkuée. Obôta n’edi ana gô ina amuanayoo amawani. 25Gô mbôkasô gômabaka anamôgôô tsambué, aneyee. Pene amabaa môgeto. Na amawa amatsika môgayedi gébé na muana. Môdimine amaviagana môkuée. 26Gôndé ôné amôbaé émabaka te nane. Na ône amôtatô, na ahngô muetso tsambué te mônôngovo. 27Gô ngima amôgôôe muetso na môgetone amawa. 28?Gô nyee ôngakunduga ane amawani, môgeto nône angaba waanda? Bonoko, muetso tsambué amamana émôbaa.
29Jésus amaabéa ahngô mbe: Anye nôbômu te gôsamenyanye Matendeo maNzambé na gôsamenyanye ngudi yaNzambé. 30Bangôani mbe vangakunduga ane amawani amôgôô n’ageto, gôsangaba yômba. Angadigaa gadigaa asi g’ôba ayanzi aNzambé. 31?Gôébégô éagékundugéô sowa anye madeo nôsitanga éne émavovo Nzambé‐a? Angô mbe: 32Me te Nzambé éneegeda Abraham na Isaac na Jacob. Nzambé te Nzambé ane adôngani, kaka Nzambé ane amawani.
33Géômbégé gémadenganô v’angô gématsapéô na meekédu medi.
Môtômee ôôtéa mietso
(Bono na Marc 12:28–34, Luc 10:25–28)
34Apharisien amookô mbe Jésus amatseda Asadducéen. Na asadducéen asibubuédô miônya miaô. Vane te Apharisien amavanga pangô. 35Môvo v’Apharisien, gévovige, amanyôngéô ékanéga Jésus gô nyivô mbe: 36Môékédi, gô migemie mietso na mitômamie mietso ?ébégôe éôtéa évôni yeni? 37Jésus amamôaabéa mbe: Nyôngéô Kumu Nzambé éôô na môtémoo wetso, na gédidi soo setso na matasa moo metso. 38One te môtôma ôvôni amapanga. 39Oeni môtômee ôaandani ôgono n’one amapanga. Nyôngéô môkoo ganyôngéô éwe ôtô omuene. 40Mige mietso mimatsika Moïse na meekédu metso mamatsika apandôéndi amatasa maNzambé, ébandôe éaô te mitômamie mibaé émi.
Ebégô éaChrist na David
(Bono na Marc 12:35–37, Luc 20:41–44)
41Vameena Jésus mbe Apharisien muetso te anguaa, ameevôa ahngô nyivô mbe: 42Gôébégô éaChrist, ône angatômu na Nzambé ?anye nôtasa nayee? ?Angô vita muana andaa? Apharisien amaabéa mbe: Angô te muana aDavid. 43Jésus amanigôa mbe: Okô mbe éndé nane ?nayee amuene David amatévédu na Gédidi SaNzambé amateta Christ mbe: Kumu ami? Nôsabômu éne émavovo David. Angô mbe:
44Kumu Nzambé amavovo na Kumu ami mbe:
Ewe digaa gô géeyo sami gémôgôô,
na me nangagudaméda adudeoe woo gô tsina amakôdô moo.
45Jésus angô mbe: Amuene David amateta môma nône mbe: kumu ami. ?Mbe muanedi nayee angamôénda mbe Kumu ami?
46Gôsibé môma amabubua ta n’ogi ôvo. Bandôa nyoone oma asiyeegedô émôévôa nyivô.
Currently Selected:
Matthieu 22: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
