Matthieu 15

Meekédu mamatsika asi mbeego

(Bono na Marc 7:1–13)

1Apharisien na anigôi amige miaNzambé amaviga gô Jérusalem gôédenga Jésus. Ahmamôévôa mbe: 2Aneengie woo asagobeda ésôgee ématsikéô ahngô na peeye yaô ?nayee? Asuméa éaa môyakô ahngô géôvôé mogome gatôénda gô ésôgee ?nayee? 3Jésus ameevôa ahngô dôta nyivô mbe: Anye nôsagobeda mige na mitôma miaNzambé ?nôgobedaka te mine mianyene nayee? 4Nzambé amatôma mbe: Godeba yoo na tétoo. Nzambé amoomba mbe: One eenza yeedi na tétedi, buedi mbe asisédu ngu na g’ôwa. 5Géé anye, nôékéda ana mbe asawedéa iyee yaô na tétee yaô. Nôétsa angô ôtômu gôévovo mbe: Okabô ôndé n’ami mbe nagôwedéa te ôkabô ômakôkégu gôéétsa Nzambé. 6Te gakina anee wanyô égobeda iyee yaô na tétee yaô. Gô éne nôbunzéda ôgi aNzambé na nôgobeda te mane manyene. 7Anye te anyepi amiônya. Esaïe amavovo kuanakue gôndé anye vamapandôéda angô mbe:

8Nzambé amavovo mbe: Omee adua ahneegeda me te na mavovia.

Mitéma miaô mindé gôdagôda n’ami.

9Géneega gétubédu me na omeaa gésaba na tsoongo.

Gôébégô ahngô éékéda ndongi yaô yanguene, ahngô mbe te ndongi yaNzambé, tambô.

Mane makoa môma aka môbévani

(Bono na Marc 7:14–23)

10Va mbene amane Jésus amabambéa géômbége. Angô mbe: Oôkéôni me, anye muetso vôtanganôni édué. 11Kaka éne éengéa gô mônya amôma émôbévédani. Ivô te éne ékusa gô mônyedi émôbévédani.

12Vane aneengi aJésus amaviga na vandé angô na amamôévôa mbe: ?Kumu ômenya mbe Apharisien amanyôngéô gamavovo éwe nane‐a? Asinyôngéô. Ahmookô ti tsoyi. 13Jésus amaabéa ahngô mbe: Géétété setso gésigaabô na Téta ône andé g’ôba, géngayuu. 14Tsikani omee ane, ahngô te asi pogu atôma akaô. Okô môsi pogu akedi môkedi môsi pogu, muetso abaé angakuyaméa gô éduku. 15Pierre amabambéa Jésus mbe: Timbôanédéa we tsava nene. 16Jésus amasemba ahngô mbe: ?Ti n’anye nôsookô mabégô mema‐a? 17?Tambô anye nôsamenya mbe metso meengéa gô mônya amôma, moota na gô ébuyi edi, na vane makusa g’ôtô edi? 18Ivô mane makusa gô mônya amôma maviga gô môtémedi, na te mangô mabévéda môma. 19Mangô matubéda matasa mabévani makeda môma gôéyôha môkedi, na mbe akea gésasô, na adigaa sagôsagô, na eesua, na apata, na atsuava akedi. 20Nôeni mane makoa môma aka môbévani te mangô éma. Môma asoongôa ébévédu na môyakô ôaa angô buéyé mbe asôvôyée mogome ga ovôu mangô gô ésôgee.

Môgeto amôgenda ameetsa Jésus môtémedi

(Bono na Marc 7:24–30)

21Vane Jésus amatimôga va tungune émabakangô na amakea na gô tsenge éndéké misenge mibaé, te Tyr na Sidon. 22Gômabaka môgeto, môsi Canaan amadigaa g’ôgenda gô tsenge nene. Môgeto nône amaviga na gôndé Jésus gôémôgondo mbe: Môékédi, éwe Muana aDavid, eena me ngeba. Muanami amôgeto asaba buedi, andé na gédidi gébévani. 23Ivô Jésus asimôbiké ta na mbikô épo. Vane aneengi edi amavovo na Jésus mbe: Patsa môgeto nône. Angô atôaanda na aamugana mindônga. 24Jésus amaabéa mbe: Me namatômu na gôndé asi mbumu éaIsraël. Agono na mandombo mamadimbanani. 25Ivô môgetone amaviga gôésiba mabongo medi va mbene aJésus gôémôgondo mbe: Môékédi wedéa me. 26Jésus amabeenda angô mbe: ésanyepa gôéwata ana môyakô, gôéétsa angô inzua. 27Môgeto mbe: Na gô pie, môékédi éndé te nane. Ivô buéyé inzuaye diaa tseseye diaaga gô tabudé diaa kooko yaô. 28Vane Jésus amamôsénga mbe: Te ti nane môgeto. Tambô éwe ôôtéa éétsa me môtémoo gétsumé ngudi yami paga. Ongadiia éne éduki éwe me. Emabaka te nane, môgetone agébaka gôévovo na Jésus, muanedi amadônga.

Jésus amadôngéda abeeyi ayekani

29Jésus amanôtôga gône gôékea na gô kôbangô amubu ôéndô mbe Galilée. Amabata môkôdie na amadigaa. 30Oma ayekani amaviga na gôndé Jésus, ahmatsuéa angô ékonzo, na asi pogu, na asi dipôpéa, n’asi dibôbô, n’abeeyi aminongo mietso. Amaadigéda va mbene edi na Jésus amaadôngéda. 31Oma amatsapéô vameenahngô asi dibôbô avovo, na asi dipôpéa aka na ngudi, n’ekonzo akea anguene, n’asi pogu eena. Muetso amakuméda Nzambé, môkenene aIsraël.

Jésus amayekédéa mitônisa minayi mioma môyakô

(Bono na Marc 8:1–10)

32Jésus amabambéa aneengi edi na amanigôa ahngô mbe: Neena omeaa ngeba. Aanakani. Pitsi ditatô dikahngô n’ami ahsaba na môyakô. Okô me nakeda ahngô na gô mbôka yaô gébé na môyakô, yôtô yaô dingaba dimadeedani na angakuéa na nzaa gô mbene anzéa. 33Aneengie ameevôa angô mbe: gôéngutéda omeaa muteso ?Tôngadenga éne éaakôni nayee gô tsenge émagasani égô? 34Jésus ameevôa angô mbe: ?Nôndé na mipemba mikee? Ahngô mbe: Tôndé na tsambué, na tôvo tônyama tagô mbéyi. 35Na vane Jésus amatôma géômbége mbe: Digaani va tsina. 36Amabongo mipemba tsambué na tônyamate. Amakuméda Nzambé gô éangô. Amabukua éangô. Ameetsa aneengie. Aneengie dôta amakabanéa éangô na géômbége. 37Muetso ahmaa ahmanguta. Aneengie ahmatsua tsaô tsambué diamayôa n’ebéndéké émasanéakani. 38Ane amaakani amabaka mitônisa minayi miamôgôô gétangé ageto n’ana. 39Jésus amapanzanganéda géômbége n’angô amapeka gô mbôngône gôébuéa na gô tsenge ééndô mbe Magadan.

Currently Selected:

Matthieu 15: TSV

Highlight

Copy