Mayanzame 22

1Paul angô mbe: Aneya, anye tétee yami, ôôkôni édué. Me nanônigôa éne éndéké n’ami. 2Vamookô oma mbe Paul avovo ôgie waô aAraméen, ahmaba na pôkepôke gôéôkô éne émavovo angô mbe:

3Me te Môjuif. Namabôtu gô Tarse gô tsenge ééndô mbe Cilicie. Ivô mbôkami émoongôga me te égô duégô gô Jérusalem. Môékédine wami te Gamaliel. Ameekéda me mabégô metso mamatsikéô we na peeye yasô n’anyô. Ene ééndanye deo noo gôéyanzéa Nzambé na ngudi yanyô yetso te éne émeendaka me. 4Me namakuana ngu na g’ôwa ane amakea gô nzéa éaKumu Jésus. Namatsôpa amôgôô n’ageto gôéaheengéda gô eba atsôgôô. 5Pene adeekedi adigondoku na dôta géômbé sapeeye andé mbangi yami. Nameetsô n’ahngô ésangô ébaé gôékea na gô Damas gôédigaa n’anee aTétee n’ami Ajuif. Nameetsô na ényanga gôétsôpa ane ameetsa Jésus mitémamie na gôékeda ahngô na gô Jérusalem mbe aketsundédu.

Paul amanigôa gamakoga angô

(Bono na Mayanzame 9:1–19, 26:12–18)

6Vamakea me gô nzéa, namawesea na gô Damas. Va ndéô étsakama kômbéne, tsina na tsina gévede gévôni gématana g’ôba na vandé me gô tsina. 7Namamesegea na gô tsina. Namookô ôgie ômasemba me mbe: Saul. ?Saul, éwe ôkuana me gôndé? 8Me namamôévôa mbe: ?Kumu, ône avovoni indaa? Angô amanigôa me mbe: Me te Jésus môsi Nazareth. Ewe Saul ôndé gôékuana me. 9Ane amabaka n’ami gô nzéa ahmeena gévedege ivô asiôkô ôgie one amavovo n’ami. 10Vane nameevôa Kumu mbe: ?Ah Kumu nangeenda nayee? Na Kumu Jésus amavovo n’ami mbe: Timôgaka. Kiaka na gô Damas. Gône ôngakebeendu mane manyôngéô Nzambé mbe ôéndéa angô. 11Obébayi agévedege géne gévôni ômeetsa me pogu. Akasô amabaka n’ami amatsôpa me g’ôgogo gôékea n’ami na gô Damas.

12Gô Damas gômabaka mômôgôô, inedi Ananias. Amaneegeda Nzambé na amagobeda mitôma na mige miasô n’anyô. Ajuif muetso agô Damas amamekeda Ananias. 13Amaviga na gôndé me na amavovo n’ami mbe: Muana aTétee n’ami Saul, te mbe miso moo manikéé éenéa. Ogie yadingani, mamanikéa éenéa na masibédô na pogu. Nameena Ananias. 14Amavovo n’ami mbe: Nzambé, ône aneegedu na peeye yasô n’oo amasevoa éwe va mbeego gômbe ôngeenda éne ényôngéô angô. Na mbe ôena angô Kumu étsimama. Na dôta mbe éwe ôôkô gavovo angô gô mônyedi amuene. 15Gôébégô éwe te mbangi éedi gôénigôa oma muetso éne émeenewe na éne émookô éwe. 16Tambô ômbiadinga. ?Oenéa ndé? Timôga. Buedi mbe ôétsô bateme na ôbambéa ina aKumu Jésus gôégôgédu ébévee éoo.

Paul amanigôa gamatômu angô na gôndé ane asaba Ajuif

17Paul amoomba énigôa mbe: Namanika na gô Jérusalem. Nyovo vamabaka me gô eba aNzambé gôévovo n’edi nameena ébégôe te nandé nani. 18Nameena Kumu na amatôma me mbe: Yavôga énôtôga gô môsengee aJérusalem ôdôô. Kumu yambôka asasinga ômbanzee wami ônigôa éwe. 19Me Paul namavovo mbe: Ivô Kumu ami, anguene kumu yambôka asabômu gamabaka me va mbeego. Nameengéa na gô yeba yewanyéô gôétsôpa ane ameetsa éwe mitémamie. Namabitéda ahngô na nameengéda ahngô na gô eba atsôgôô. Anguene asabômu. 20Na vamayôhu môyanzi oo Etienne, me namabaka te wangô. Namayôngéô ti nyôngéô. Namakenea ngoye yane amamôtumakani. 21Vane Kumu Jésus amoomba évovo n’ami mbe: Kiaka. Nagôtôma na gô dipo tungu yagôtongoni disibuéô na mbeego. Kiaka na gôndé mavo mongo masaba Ajuif.

Paul na môtômine agô Rome ahmanigôana

22Ebitie amatema na suii gôéôkô mane mamavovo Paul. Ivô vamatetangô ébégô éamavo mongo, oma ahmaadôngana mbe: Dimbanédani mômane ôdôô. Yôhani angô. Gôndé angô ésaba kuanakue gôéba na monyo. 23Ahmaamugana n’opisa. Amaduméda mikanda miaô gôékumua ébisie mbe: Tôsaba n’evamba n’one. 24Môtômine amigode, môsi Rome ameengéda Paul gô tsôgôô. Amabitéda angô mibitô miyekani buta mbe avovo éne éndé n’edi ékambôgéda angô omee. 25Vamakatô Paul gô éengô môtie gôébitô, amavovo na môgode mbe: ?Tambô anye nôndé n’enyanga gôébita môsi Rome, angô gétsundédu n’evovie-a? 26Vamookô môgode ébégôé éne, amatsapéô. Amakea na gôndé môtômi edi môvôni. Angô mbe: ?Tôénda nayee? Mômôgôô nône, te môsi Rome. 27Môtômine amakea na gôndé Paul gôémôévôa mbe: Beenda me. ?Ewe na gô pie te môsi Rome-a? Paul amaabéa mbe: Ii, me te môsi Rome. 28Môtômine amanigôa mbe: Me namavana ényangee éami éagô Rome ti n’osunu ôvôni. Paul amabika mbe: Enyangee éaRome éndé n’ami, namabôtu te gô éangô. 29Tsina na tsina ane amabaka mbe abita Paul buta mbe anigôa éne émabaka n’edi, amakôngama na gomo vandé angô. Buéyé n’amuene môtômine ameena gomo gômabangôangô mbe, te me namôkatédi gésengo, angô Môromain.

Paul amatsuaô na gôndé asi kundu épôni éAjuif

30Môtômine agô Rome amanyôngéô éôkô ébégôe émasunda Ajuif asunda Paul. T’ebandô n’ongôngôe ône amamôtsôbôa ésengoe. Amakôkanganéda tsesu yadeekedi adigondoku na muetso asi kundu épôni éAjuif. Amatemeda Paul va mbene aô.

Currently Selected:

Mayanzame 22: TSV

Highlight

Copy