Johannesi 11
11
Yifa yaLasarusi
1Murume ghodina dyoLasarusi, gha korwire. Gha karire muBetaniya, mudighumbo di gha tungire Maria naminendi Marta. 2Oyu Maria ne, yomukamadi yu gha wethire mapadhi ghaFumu nomunde, no gha gha kuyurire nohuki dhendi. Mukatjitju Lasarusi ne mukurwendi. 3Han̂amba wa, ha tumine ghumweya kwaJesusi gha ka mu tongwere eshi: “Fumu, muhakwa ghoye ne tjitju.”
4Apa gha yi yuvire Jesusi gha ningire eshi: “Yikorwa yi ne mbadi yina kutamba kukufa, ne yina kuhokora ngcamu dhaNyambi, no mo sho gha pwere kufumaneka Mwana Nyambi.”
5Na Jesusi, gha hakire haMarta naminendi naLasarusi. 6Shime gha yuvera kenge yo eshi Lasarusi ne tjitju, ha kara kwendi shime mayuwa mawadi, mudyango dyodyo gha karire. 7Munyima gha tongwerire hakathishongero wendi eshi: “Mu tu yende tu huke kuJudeya.”
8Hakathishongero ha ningire kukwendi eshi: “Muruti, popano pashan̂anyi‐n̂anyi nga shana kukupagha Hajuda, ho ghuna kushana kuhuka ko karo?”
9Ha hutha Jesusi eshi: “Nane, mbadi gha kara maviri dikumi nomawadi mudiyuwa ndi? Ngeshi ha yendi ghumweya pamutenyamwiru, mbadi ghana kupundaghuka, yoyishi kumona ghana kumona munyenge ghokaye kano. 10Ene ngeshi ha yendaghura ghumweya mughuthiku, ghana kupundaghuka, yoyi ghana piri munyenge.” 11Ndani ghana kuwatongwera eshi: “Muhakwa wetu Lasarusi ne ghana rara, kuyenda na kuyenda ni ka mu pinduthe.”
12Hakathishongero ha mu tongwerire eshi: “Fumu, ngeshi kurara ghana rara, n̂anyi gha ka kare ndjewa‐ndjewa.”
13Ene Jesusi, gha ghambire yoyifa yaLasarusi, awo ha ghayarire eshi, yoturo vene ghana kughamba. 14Ko kuyiwatuywera Jesusi eshi: “Lasarusi ne ghana fu. 15Ene kuyihima yenu, na shamberera yoyishi na piri po, ndani po sho mu kone kutawa mumwange. Ene mwiye tu yende kukwendi.”
16Tomasi oyu ha toyire karo eshi, Mwana-ghomayovu, gha ningire kwawakathishongero hamweya eshi: “Mu tu yende tu ka fe nendi.”
Jesusi kwawaMarta naMaria
17Apa gha ka kumine ko Jesusi, gha ka wanine eshi Lasarusi ne mayuwa mane ghana kara mumbira. 18Betaniya gha karire pepi naJerusalema, ngwa muhanyamo ghomakilometeri mahatu. 19No wingi wa Wajuda heyire kwaMarta na Maria, na ha wa hengaghure kuyifa yamukurwawo.
20Pakuyuva Marta eshi Jesusi ne ghana kumu, ko kumutjingawera. Maria, gha thigharire mundhugho. 21Marta gha ningire kwaJesusi eshi: “Fumu, ngo po wa karire pano, ngo mbadi gha fire mukurwange. 22Ene na dimuka nothinda eshi, Nyambi ghana kukupa yoyihe eyi sho mu kumbere.”
23Jesusi gha mu huthire eshi: “Mukuroye ghana kuvumbuka mwawafu.”
24Marta gha mu tongwerire eshi: “Na yi dimuka eshi mbo ghana vumbuka mudiyuwa dyoghuhura.”
25Ha mu tongwera Jesusi eshi: “Yame muvumbukero no moyo. Oyu ghokutawa muMwange, mbo ghana para ngambi ha fu. 26No yomuhe ghokupara no kutawa muMwange, mbadi mbo gha fa kuroruheya. Ghuna yi tawa ndi?”
27“Kemo Hekudyange,” dyo gha mu huthire: “Na tawa shemwa eshi yowe Kristusi, ghoMwana Nyambi oyu gha yuka pithendi eshi mbo gheye mukaye.”
28Apa gha manine kughamba yi, gha yendire gha kethe minendi Maria ghu mu hohotera eshi: “Muruti ne po gha di pano, yowe ghana kwitha.” 29Pakuyiyuva, ko kumatuka kwendi wangu gha yende kukwendi. 30Jesusi mbadi ghengenine shime mudighumbo, gha karire shimwe popo padyango gha mu hanganine Marta. 31Apa ha yi monine Hajuda wa ha karire mudhugho kwaMaria, ha mu hengaghure no ghana matuka wangu gha shwaghe, ha mu kuthire munyima dhendi yoyi ha ghayarire eshi, ghana piti kumbira gha ka dire.
32Pakukuma Maria padyango di gha karire Jesusi no pakumumona, ha ghu kwendi kumapadhi ghendi no gha ningire eshi: “Fumu, ngo po wa karire pano, ngo mbadi gha fire mukurwange.”
Jesusi ghana kuvumbura Lasarusi mwawafu
33Pakuyimona Jesusi eshi, Maria naWajuda wa heyire nendi, kudira hana kudira, ko kuyumbuka kwendi thikuma no gha ndundumenine. 34Hepura kwendi eshi: “Kupi ku nga mu muvumbeka?”
Awo ha mu huthire eshi: “Fumu, wiye no mone.”
35Jesusi gha dirire. 36Hajuda ha ghambire eshi: “Mu mone eshi ngepi di gha mu hakire!”
37Hamweya hopapawo ha ningire eshi: “Aye yu gherukithire meho ghamukunga ne, ngo mbadi gha konine kutenda eshi, murume no ne mbadi gha kona kufa ndi?”
38Jesusi gha yumbukire karo thikuma, apa gha kumine kuthipiro. Tha karire thipiro thodingurungoma no ha yeghekire kuthero diwe. 39Ha ningi Jesusi eshi: “Mu gharumune ko diwe.”
Marta ghomina mufu gha ningire eshi: “Fumu, kare ngoro. Yoyishi dino ne dyodiyuwa dyoghune.”
40Jesusi gha ghambire kukwendi eshi: “Mbadi na mana kuyikutongwera eshi ngeshi ghu tawe, ghuna kumona ngcamu dhaNyambi muthitunumeho ndi?”
41Munyima ha tundithire diwe. Ha kambuka Jesusi kuwiru no gha ningire eshi: “Tate na kukutumera yoyi ghuna ni yuverera. 42Na dimuka eshi wa ni yuvereranga roruheya, eyi na kuyighambera ne pamurandu ghombunga dhawanu edhi dhina kudhingi pano, no dhi kone kutawa eshi yowe wa ni tumine.”
43Apa gha manine kughamba kemo, ko kukugherera kwendi nodiywi dyodikuru eshi: “Lasarusi, shwaghe kuno!” 44Mufu ne ko kushwagha. Moko ghendi no mapadhi gha pwa kudhingera nomahina ghothipiro, no mutwi wendi wa pwa kudhingera notuku. Ha ningi Jesusi kwawanu eshi: “Mu yi mu shuture gha kone kuhuka kudighumbo.”
Hapanguri waWajuda hana kukunungathana ha paghe Jesusi
(Mat 26:1–5; Mark 14:1–2; Luk 22:1–2)
45Wingi waWajuda awa heyire kwaMaria no kumona eyi gha tendire Jesusi, ha tawire mumwendi. 46Ene hamweya hopapawo ha yendire kwaWafarasayi, no ha wa thimwetwedherire eyi gha tendire Jesusi. 47Hapristeri hohakuru naWafarasayi, ha kongwedhire hakamuragho waWajuda no ha ningire eshi: “Nye sho tu tende, yoyishi murume yu, yitetukitho yoyingi ghana kutenda. 48Ngeshi tu mu thigherere kemo, gho ha tawe hanu wahe mumwendi, no mbo di neya didhongera dyaWaromayine mudyango dino dyokupongoka, no kudhimitha rudhi rwetu.”
49Yofotji ghopapawo Kayifasi oyu gha karire mupristeri shokuru mumwaka ghu, gha wa tongwerire eshi: “Mbadi muna kutjwathana nokamanana temba. 50No mbadi muna kughayara eshi, hasha kukwenu kufa munu yofotji mudiko, kadi wa kuyongarera diko dyodihe.” 51Mbadi gha kughamberire thinda, yoyishi gha karire mumwaka ghu mupristeri shokuru, no gha pumbire eshi Jesusi ne yo sho gha fere diko. 52Ene Aye mbadi gha himine kufera diko keho, gha hakire kupakerera nohana Nyambi awa ha mwaghadhara pamuve ghoghuhe, no gha wa tende diko dyofotji.
53Kutunda mudiyuwa di, ko kunyandera kwawo dighano eshi ha paghe Jesusi. 54Yo gha dhirerire Jesusi kuyendaghura kuthitunumeho thaWajuda. Kutunda popo ho gha yendire kuthiko thopepi nomamboreya, kudighumbo dyodina dyoEfraghimu. Ko gha ka karire nawakathishongero wendi kamanana.
55Paska waWajuda gha kokerire. No hengi hanu ha tundire mumikunda kughutho ghoPaska, ha yende kuJerusalema ha ka kukongore. 56Nawo ha mu shanine Jesusi, oku shime hemanena mutembeli no ha ghambathanine eshi: “Nye muna kughayara mwe, shemwa n̂anyi gha kwiye kudifeste, endi ngepi?” 57Ene hapristeri hohakuru naWafarasayi, ha tapire diywi eshi, kehe yu ghana dimuka oku gha di, gha yi hokore no ha kone kumukwata.
Currently Selected:
Johannesi 11: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
