Yitenda ya Wapostoli 8
8
Saghulusi ghana kukutha‐kutha Ngirishe
1Saghulusi naye gha yi tawire thiwana yifa yaStefanusi. Mudiyuwa di, gha pindukire makuthakuthero ghomakuru kwawambunga homuJerusalema. Hakakutawa wahe, ha pwire kutjidha‐tjidha no ha kuhanyenine mumikunda dhaJudeya no dhaSamaria. 2Hanu wa ha yapire Nyambi, wo ha vumbekire Stefanusi. Ko kukara thidiro thothikuru thoyifa yendi.
3Saghulusi, gha yerekire kuhanyaghura ngirishe. Gha yendire ndhugho tunda ndhugho. No gha kokakokire harume nawakamadi no kuwengeneka mudorongo.
Mbudhi dhodhiwa dhomuSamaria
4Hakakutawa wa ha haran̂anyine, ha yuvithire mbudhi kokuheya ku ha yendaghurire. 5Ho ya hokokire ngeno. Filipusi gha kumine mudighumbo dyaSamaria gha ka yuvithe mo Kristusi. 6Apa ha yuvire hanu yitetukitha yaFilipusi, no kumumona ku ghana kuyitenda, ko kumutegherera thiwana noghukoneka kuyiyaghura yendi. 7Mipepo dhodhimango dha shwaghire mwawanu hohengi, ghu kugherera thikuma. No hengi hakakughara nawayihwere, ha pwire kwirukitha. 8Mudighumbo di, mwa karire yishamberera yoyikuru.
9Mudighumbo dyodyo, mwa karire murume ghodina dyoSimoni, oyu gha tendire Hakasamaria ghupuru-puru, noyidimuka yoghurodhi wendi. Aye gha kutanaghurire eshi, munu waye‐naye. 10Wahe hanuke nawakuru, ha ghovamenine kukwendi. Ha ningire eshi: “Aye ne yoyu twa toya eshi, Ngcamu dhishokuru dhaNyambi.”
11Aye gha wanine maghovameno mumwawo, yoyishi gha wa purupithire nakoghana dhodhire noghurodhi wendi. 12Ene pa gha wa yuvithire Filipusi, mbudhi dhoghufumu waNyambi no kuwayawera Dina dyaJesus Kristusi, ha karire hatawi. Harume nawakamadi ha pwire kuyogha. 13Naye Simoni thinda gha tawire. Gha pwire kuyogha no gha yendaghurire kokuhe naFilipusi. Gha tetukire kuyidimukitho yoyikuru nomangcamu agha gha monine ku ghana kuhokoka.
14Apa ha yuvire hapostoli muJerusalema eshi, hanu homuSamaria ne hana tawa kun̂ando dha Nyambi, ko kutuma ko kwawo haPetrusi naJohannesi. 15Awo ha yendire no ha ka rapererire hanu eshi ha kone kutambura Mupepo ghoKupongoka. 16Yoyishi, Mupepo oku mbadi gheya kwayofotji ghopapawo. Ha pwire kuyogha vene muDina dyaFumu Jesusi. 17Hapostoli ha wa kambekire nyara no ha tamburire Mupepo ghoKupongoka.
18Apa gha monine Simoni eshi hanu ne kutambura Mupepo, pakuwakambeka nyara hapostoli, ko kuhima kwendi kuwapa manyinga, 19no gha ningire eshi: “Mu nipe name ngcamu dhokenge yo eshi, kehe yu ghokukambeka name nyara, gha kone kutambura Mupepo ghoKupongoka.”
20Ene Petrusi gha mu huthire eshi: “Yende kukudhongonoka nomanyinga ghoye keho! Ghuna kughayara eshi, wa kona kughura thitapa thaNyambi nomanyinga? 21Muthirughana thino, mbadimo dyango dyoye. Yoyishi yikara yoye, mbadi ya hungama kwaNyambi. 22Kupirure kumayongarero ghano no ghu rapere kwaFumu, gha kuthigherere yikara yomutjima ghoye. 23Na mono eshi owe ne mughuhungu ghodifurumeko wa kara, no wa ngambwathana nomaharwero.”
24Ko kuninga Simoni kwawapostoli eshi: “Mu ni raperere me kwaFumu eshi, ni pire thi sho thi ni shinge koyi muna ghamba.”
25Kemo ha tapire hapostoli ghunongononi ghongcamu, no ha yuvithire n̂ando dhaNyambi. Ko kuhuka kwawo kuJerusalema, no kuyenda ghuyuvitha mumaghumbo ghomengi ghomuSamaria.
Filipusi naMukaAntiyopiya
26Muengeli waFumu gha tongwerire Filipusi eshi: “Kuroghithe no ghuyende pamutwekatji, mundhira dhokutunda kuJerusalema dhi tambe ku Gasa. Edhi ne ndhira dhothipore.”
27Filipusi gha rongerire no gha yendire.
Mukadikuto ghomuAntiyopiya, oyu gha karire mudyango dyodikuru murombe waKandake, fumu ghomukadhi ghomuAntiyopiya noyu gha ghungurire manyinga ghendi, gha yendire kuJerusalema gha ka kanderere. 28Gha karire mundhira dhokuhuka, no gha hungumanine muditemba dyendi ghutoya mumbapira dhaMuporofeta Jesaya. 29Ko kuninga Mupepo kwaFilipusi eshi: “Ka yende pepi noditemba diya.”
30Filipusi gha dhondokire ko no gha yuvire eshi, murume yu ne kuna kutoya murukwaro rwamuporofeta Jesaya. Ha mwipura kwendi eshi: “Yo yi ghutjwathana eyi ghuna kutoya ndi?”
31MukaAntiyopiya gha mu huthire eshi: “Ngepi di sho ni yi kone ngeshi mbadiko mukakuyinipathwerera?”
Ko kwitha kwendi Filipusi gha perame no gha hungumane kughunyowendi. 32Thipindhi thoyitjanga thi gha toyire ne thino:
“Thika ndjwi dyo hana kumutwara kukumupagha,
no thika ndjwighana yu ghana kuporera pakumukurura,
Naye mbadi gha yahukire kanwa kendi.
33Mumamushwanhwero,
mbadi ya rikanyine kukwendi.
Yidye ghopawanahoka wendi yu mbo gha kona kuthimwetwedha?
Yoyishi moyo wendi ghopamuve mbo ghuna huru.”
34Mukadikuto, ko kwipura kwaFilipusi eshi: “Ni tongwere na kanderera eshi, kwadye ghana kughamba muporofeta pano. Kukwendi thinda ndi, endi kwaghumweya waye?”
35Filipusi ko kutanga kumutongwera yoyitjanga yi no mbudhi dhokwaJesusi. 36Oku shime ha yendi, ko kukuma kwawo kumeyu. Ha ningi mukadikuto eshi: “Meyu ne ghano. Nye sho yi ni shinge kukuniyogha?” 37Ko kuninga Filipusi eshi: “Ngeshi ghuna tawa nomutjima ghoye ghoghuhe, yina kurikanya.”
Aye gha huthire eshi: “Na tawa eshi Jesus Kristusi ne Mwana Nyambi.”
38Ko kwimeka kwendi ditemba. Munyima Filipusi namukarombe yu ko kuhwera waheya mumeyu, no gha mu yoghire. 39Apa ha kandukire mumeyu, ko kumushimba po Filipusi Mupepo waFumu. Mukadikuto, mbadi gha mu monine karo. Gho gha rundururire ruyendo rwendi noyishamberera. 40Filipusi ko ka mu wana munyima muAsidodi. Kutunda po, kokutjinaghana kwendi maghumbo ghomahe, kate ka kuma Musesareya. No kokuhe gha yuvithire mbudhi dhodhitowi.
Currently Selected:
Yitenda ya Wapostoli 8: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
