Yitenda ya Wapostoli 3

Merukitho ghamurume ghokughara

1Mudiyuwa dimweya, ko kuyenda haPetrusi naJohannesi kutembeli pathitengeyuwa. 2Kudikorogho dyotembeli edi ha tire eshi, Peya‐peya, kwa karire murume ghothinhwere kutunda kumushamurukero wendi no ha mu dhamunangire. Hendi ha mu turangire ko kehe diyuwa, kukukumbera kwawa hana kwingena mutembeli. 3Apa gha monine haPetrusi naJohannesi oku hana kushana kwingena mutembeli, ko kuwakumbera kwendi thinu. 4Petrusi naJohannesi ha mu kengururire matongorora, ha ningi Petrusi kukwendi eshi: “Tu kenge.”

5Ko kuwakenga murume ghukurupera eshi, gha wane thinu kukwawo. 6Ene Petrusi ha ningi eshi: “Manyinga ne mbadiko me, ethi na wana na kuthikupa. MuDina dyaJesus Kristusi ghoMukanasareti, wimane no ka yende!”

7Ko kukwata kwendi murume padyoko dyorudyo gha mu ghamwene mukwimana. Popo vene ko kutanara mapadhi ghendi nomangongotji ghendi. 8Naye ko kuregha, ho gha ghororokire no gha konine kuyenda. Munyima gha kengenine nawo mutembeli, oku ghana kuyenda ghuregha no ghukugha Nyambi. 9Hanu wahe ha mu monine, oku ghana kuyenda ghukugha Nyambi. 10Ene pa ha mu dimukire eshi, yodiye yu ghana hungumananga kuDikorogho dishaghuwa dyotembeli ghukumbera, ha tetukire thikuma ghuyapa, eyi ya hokokire kukwendi.

Yiyaghura yaPetrusi mumukara ghoMaghundhi ghaSalomo

11Murume ya gha kuthire haPetrusi naJohannesi. No hanu wa ha tutukwire thikuma, nawo ha ghundukire heya kukwawo, mumukara ghoMaghundhi, ghaSalomo, thika di ha gha toyire. 12Apa gha yi monine Petrusi, ko kuwayawera kwendi eshi:

“Mwaisraghelite, nye muna kutetukera kuyinu yi? Yinye yi muna kutukengurwerera, yira mungcamu dhetu nomughuhunga wetu tuna yi tendi eshi, gha yende murume no. 13Nyambi waAbrahamu naIsaka naJakopu, nawakerekandongo wetu, yo ghana yi tendi eshi, ghana‐tapa kwaJesusi ghomupikendi, fuma dhoghunyambi. Oyu mwa tapire noyu mwa nyathire kughutho waPilatusi, apa gha himine kumushutura. 14Aye gha karire mupongoki no muhunga. Ene mwe mwa mu nyathire no mwa kumberire eshi, mu fere n̂eke mupaghi. 15Kemo mwa mu tundithire moyo Mukamiti pakumupagha. Ne Nyambi, gha mu tumunine mwawafu. Eyi ne yatwe twatunonga wayo. 16Pamatawero ghomuDina dyendi, Jesusi, po ghana tanarithera maghuru ghoyu murume muna kumona no kudimuka. Matawero ghokwaJesusi, gho ghana mu pa mdjewa‐ndjewa kughutho wenu mwahe.

17“Pan̂anyi‐n̂anyi mwayendhange, na dimuka eshi mughuthuta mwa yitendire yira hakuru wenu. 18Shemwa Nyambi gha yi yuvithire pakare‐kare patunwa twawaporofeta eshi, Kristusi ne mbo ghana nyanda. Yo ghana yi hokwera popano. 19Yodigho, mu piruke no mu ndhundhe eshi, ghapwe kuthigherera maharwero ghenu. 20Munyima mbo dhi neya nako dhaFumu dhomahengawero, no mbo ghana tumu Jesusi oyu gha mu torwera pakare‐kare eshi Kristusi. 21Aye mbo ghana tungu mudiwiru, kate mbo gha tendurure Nyambi ghupya yoyihe. Eyi ne gha yi ghambire Nyambi, patunwa twawaporofeta wendi hokupongoka. 22Mosesi gha ghambire eshi: ‘Nyambi ghoHekudyenu mbo ghana tumbura muporofeta mumwenu thika me. Mwa kona kumutawa yoyihe eyi mbo gha mu tongwera. 23No kehe yu ghokudhira kutegherera kwamuporofeta yu, mbo ghana pu kutjidha mudiko no kumudhongonona.’ 24No karo haporofeta wahe kutunda kwaSamweli no wa ha mu randire, wahe ha yaghurire ha tongore yomayuwa ghano. 25Yinu yi ha ghambire haporofeta, ya ninga kukwenu eshi, mbo muna yerana kughundambo oghu gha nungire Nyambi nawakerekandongo wenu. Aye gha ningire kwaAbrahamu eshi: ‘Mwawanahoka ghoye, mo mbo gha wana makandadhekero mako ghomahe ghopamuve.’ 26Yo gha tumenine Nyambi Mupikendi mukaye. No gha mu tumine kukwenu pakutanga eshi, mu kare mumakandadhekero, no kehe yu ghopapenu gha tunde mumayira ghendi ghomayi.”

Currently Selected:

Yitenda ya Wapostoli 3: MHW1986

Highlight

Copy