Yitenda ya Wapostoli 17

Didhongera dyomuTesalonika

1HaPaghulusi ha tjinaghanine Amufipolisi naApoloniya, ha yende kuTesalonika, oku dha karire sinagoge dhaWajuda. 2No thika di wa karire muhingo waPaghulusi, ha yendi ko. MumaSabata mahatu, gha ghambaghurire naWajuda yoYitjanga. 3Gha tjwathanithire yo Yitjanga eshi, Kristusi ne gha nyande, no mbo ghana vumbuka mwawafu. “Oyu Jesusi na kumuyuvitha,” gha ningire eshi: “Aye ne yoKristusi.”

4Hamweya hopaWajuda ha yi nongononine, no ha kunungire kwaPaghulusi naSilasi. Ho dha kuwedhererire ko karo mbunga dhodhikuru dhaWahirika, wa ha yapa Nyambi, nawangongokadhi hohengi.

5Ene Hajuda ha karire nonya. No ha wanine makwatitho kwawava hohayero, ha wa tende mbunga no ha wa yedhaghurire, ha tende didhongera mbara. Ko kuhomokera kwawo ndhugho dhaJasoni ha shane haPaghulusi naSilasi, eshi ha wa tware kughutho ghodiko. 6Apa ha dhirire kuwawana. Hajuda, ko kuparanya kwawo Jasoni nawatawi hamweya, no ha wa twarire kwamuyendithi ghombara ghukugherera eshi: “Hanu wa hana tendanga kokuhe maghukukutu, mo ha di muno mumbara dhetu pan̂anyi‐n̂anyi. 7Jasoni ne ghana wapa maturo wano hanu wa kara non̂anani nomuragho wafumu shokuru. No ha ninga eshi, koghadi fumu ghumweya Jesusi!”

8Apa ha yi yuvire hanu namuyendithi ghombara, ha tokotire. 9Ene pa ha wanine ghushemwa kwaJasoni no kwawatawi hamweya, ko kuwashutura kwawo.

Paghulusi naSilasi muBeregha

10Eyi kwa karire makokore, hatawi ha tumine haPaghulusi naSilasi kuBeregha. Pa ka kuma ko, ko kayenda kwawo musinagoge waWajuda.

11Nawanu waya, ha wa tamburire kupiterera Hakatesalonika. Awo ha tokomenine thikuma kutegherera kun̂ando. No ha shanashanine kehe diyuwa muYitjanga, ha mone eshi thika di ghana kughamba Paghulusi. 12Wingi wawo Hajuda ha tawire, nothingi thawo Hahirika nawangongokadhi karo kemo.

13Apa ha yi yuvire Hajuda homuTesalonika eshi, Paghulusi ne kuna kuyuvitha n̂ando dhaNyambi muBeregha, ko kuyenda ko ha ka thundawedhe didhongera no kuhongaghura hanu. 14Hatawi, ko kutjiritha wangu Paghulusi kurungengera. Ene haSilasi naTimoteghusi ne, ha thigharire munyima. 15Hanu wa ha mu thindekedhire Paghulusi, ha mu twarire kate kuAtene. Pakahuka kwawo, ha keyire noyiragha yaPaghulusi yokwaSilasi naTimoteghusi eshi ha tambuke wangu kukwendi.

Paghulusi muAtene

16Oku shime Paghulusi muAtene, pakutaterera Silasi naTimoteghusi, wa yumbukire thikuma mutjima wendi, pakumona kuyitjwandjo yoyingi yawanyambi hombango, edi yina yara mudighumbo. 17Aye gha ghambangire naWajuda nawa ha yapa Nyambi kehe diyuwa pamaghurero, nawa ha yendangire ko. 18Hakamuragho hamweya homaghano waWakaepikuriyerisi naWakasitoyisene, ha kukananine nendi. Hamweya ha ningire eshi: “Nye ghana kushana kughamba yu thiyavingeri?” Nohamweya ha ningire eshi: “Pakuyimona ne yira mukamushongwe wawanyambi hawonawo.” Yoyishi Paghulusi ne gha yuvithire mbudhi dhaJesusi nomuvumbukero wendi.

19Awo ha mu twarire kuAreghopagusi, no ha ningire eshi: “Ku kona kutudimukitha natwe yihonga yoyipya yi ghuna kuyuvitha ndi? 20Yinu yimweya yi ghuna kughamba, mumatwi ghetu ne kuyiyuva yayo‐nayo. Ene tuna shana kuyidimuka edi ya ninga.”

21Wingi wawo HakaAtene nawanumaghana wa ha tungire mo, mbadi ha wanine nako kuyayo‐nayo, shimengwa kughamba no kuyuva yoyipya keho.

22Paghulusi hemana pakatji kawaAreghopagusi ghuninga eshi: “MwakaAtene, na mu mono muyoyiheya eshi, mwakakukarera Nyambi thikuma. 23Yoyishi apa na yendaghura mumbara dhenu, no kukenga kumango gha muna kandereranga, na ka wana thinyaku ethi thapwa kutjanga eshi: ‘Kwanyambi waye‐naye.’

“Yodigho oyu mwa kanderera mukudhira kumudimuka, ame ne na kuyimuyuvitha. 24Nyambi yu gha tendire kaye, noyoyiheya yi ya kara po, yoFumu ghodiwiru nomuve. No mbadi gha tunga mutembeli yu ha tenda hanu. 25Karo mbadi gha nyanda eshi nyara dhawanu ne dhi mu ghamwene. 26Mwamunu yofotji mo gha tendire marudhi ghomahe, no gha wa pire matungo pamuve ghoghuheya. Gha rikanyithire pakutanga eshi, rure munye mbo ha para no kupi mbo ha ka tunga. 27Ghuhunga ne awo ha shane Nyambi, ngambi kenge mbo ha papatera mukumuwana. Shemwa mbadi gha kara kayenda nayomuhe ghopapetu. 28Yoyishi papendi twa para no twa kunyunga‐nyunga, nopapendi twa kara. Ngambi kenge gha ningire ghumweya ghopawatjangi wenu eshi: ‘Natwe karo twakadiko dyendi.’ 29Ene thika di twa kara twathinda eshi, twakadiko dyaNyambi, twa ghayara eshi, Ghunyambi ne wa pitura yira mangondo, endi yira thikuvo ngambi yira diwe. Eyi ne yinu yonyara‐nyara vene, ha paka po hanu hathinda muyighayara yawo.

30“Nyambi gha mana kumona kare manako ghohuthuta. Ene pan̂anyi‐n̂anyi, kwitha ghana kwitha hanu wahe kumapirukero. 31Yoyishi gha rikanyitha diyuwa edi mbo gha pangura kaye mughuhunga, paMurume oyu gha tororire. Mukudimukitha waheya ne, gha mu tumunine mwawafu.”

32Apa ha yuvire yomuvumbukero ghomwawafu, gho ha tangire hamweya kumyheka. Ene hamweya ha ningire eshi: “Yinu, yino tuna shana eshi mbo tu yi yuve karo mumoye.”

33Munyima Paghulusi gha wa tundire gha ka yende. 34Hapu hamweya ha tawire no ha kunungire kukwendi. Mukatji kawo gha karire mo Dighonisighusi, mukamuragho ghomuAreghopagusi. Namukamadi ghodina dyoDamarisi nohamweya karo pofotji nawo.

Currently Selected:

Yitenda ya Wapostoli 17: MHW1986

Highlight

Copy