Tito 3
3
Dvshat kà àngpv̀npv̀n
1Àngmaq nø øpshúrì nv̀ng vmíng vkv́ng vl rìí øp we sv̀ng cv̀n nø̀, kà tá rà we nv̀ng bv̀nlì shvlá í dv́ngte wàlv́m dvpvt tvlú dvgǿshìlv́m dèsha:tnò. #1Pt. 2:13 2Vrá, kagǿ sv̀ng gø shvyǿm kà màshǿnshaq, mòngzø̀l dø v̀l ràe. Vsv̀ng kaq nøtna we nv̀ng vsv̀ng shvngbe mvdv̀m køn nøt v́l rà we sv̀ng gø dètúò. #Pil. 4:5 3Pàwá wani, vzv̀ng nø nøngmaq gø dá:lì nø̀ kà mvtá yv̀ngshà. Mapnøt nv̀ng nøt dvshǿmshìlv́m àngpv̀npà:ní èyù:mì nø̀ vshuq èwàv́m yv̀ngshà. Nøt dvgoq we nv̀ng shǿm we taq cúnshàì nø̀, vsa:ngí shèngoì mvdv̀m, nøngmaq gø tasv̀ng tàle shàngoké yv̀ngshà. #Eps. 2:2; 5:8 4Íwe, nøngmaq Chv́ng Kàngpè Gvray Àng mvkok dvdínøt nv̀ng shóngnøt dvtan daqà ke, #Tit. 2:11 5vdèí wàì we døngman bv̀nlìrì rvt mø̀í dø, Àng dvsházanøt taqkèní èchv́ng daqshà. À:ngí nøngmaq mvrà èzv́laì nø̀ Shànshér Pvlàcè taqkèní àngshv́r tiqkvt ègà:lì nø̀ gø̀nshaq àngshv́r èzíìe. #Yoh. 3:5; Eps. 2:8-9; 5:26; 2Tm. 1:9 6-7Àng jejú kèní nøngmaq sv̀ng døngman dvdutlv́m nv̀ng, dvciqlvpat gø̀nshaq zaqshøp lúnlv́m vlǿmrà zílv́m rvt, Gvrayí nøngmaq Chv́ng Kàngpè Yesu Kristu taqkèní, Shànshér Pvlàcè shòshò wa èshúra daqshà. #Yol. 2:28; Rom. 3:24 8Yarì nø kv́mv́m daq we kà íe. Gvray kaq kv́m bǿì rì nø, bv̀nlì shvlá wàlv́m taq dvzaqshìlv́m rvt shvla mvcha shvngøt dvzv́r mvyǿnge. Yarì nø shvla nø̀ vsv̀ng shvngbe dvpvt vjú vle. 9Íwe sv̀ngdál dø vzi vrùng wa we, àngrvp dvcì gùn we, rvzòng we nv̀ng Dvrá dang vzø̀ng we yarì kèní èsarshì. Pàwá wani wedv́ng pv̀n nø vjú màvl, vshø̀ng íe. 10Vgv̀ng vkanglv́m dvbungò rì sv̀ng tiqkvt vníkvt shèdǿ:mò nø̀, mvta nìnø àngmaq nv̀ng bvttut mènàzø̀mni. #Mat. 18:15-16; 2Yh. 1:10 11Àngmaq nø dønglòng kèní vyvpshì nø̀ mvrà vl rì í we nv̀ng vdè mvràí vdè sv̀ng mvrà shvrishì rì í we nàí èsháòe.
Lv̀ngdø̀m kà
12Ngàí Artema mø̀íni Tichiku sv̀ng nà yv́ng dvzv́r dakngò kvt, nà nø Nikopoli wamà yv́ng ngà sv̀ng vhømlv́m dèzaqshì ra. Pàwá wani weyv́ng rv̀ngtúng shvlélv́m nøt rvtshø̀ng bǿngà. #2Tm. 4:12 13Dvrá lànglìpè Zena nv̀ng Apolo ní sv̀ng tvrà dvpvt èlú:nò dv́ngte dèba:ngò. Àngní zǿmdv̀ng rì tiqpv̀n gø màlakéò dø èyv́ngaò. #Dzr. 18:24 14Vsv̀ngrì àngjǿng zǿmdv̀ng yv́ng dvbvng lúnlv́m nv̀ng vjú màvl we vsv̀ng mø̀ílv́m rvt, vnvm vchvngrì nø bv̀nlì shvlá wàlv́m laq cvnshì. #Eps. 4:28; Tit. 2:14
15Ngà nv̀ng vl rì shvngbeí nà sv̀ng pàmvrà wae. Nøngmaq sv̀ng shóngshì we kv́m vsv̀ngrì sv̀ng gø pàmvrà èvlashà. Gvray jejú nø nàmaq shvngbe nv̀ng tiqdø laq vl dvr.
Currently Selected:
Tito 3: GSM
Highlight
Share
Copy
Want to have your highlights saved across all your devices? Sign up or sign in
© 2024, Rvcv́ngcè Kàru Gomidi Kristu Shvngø̀mré. All Rights Reserved.
