Marko 8
8
Vsv̀ng 4,000 shvá:mò we
Mat. 15:32-39
1Wenila taq vsv̀ng loksok lokga vrá kø̀m ráì nø̀, v́mlv́m pàgø màv́laò rvt, Yesuí coqcv́nrì sv̀ng goò dá:ngí, 2“Vsv̀ng yarì sv̀ng Ngàí mvréngòe. Àngmaq nø Ngà nv̀ng tiqdø vshø̀m ni v̀l daqshà nø̀ v́mlv́m pàgø màv́la bǿà. #Mak. 6:34-44 3Àngmaq màv́mshaq Ngàí shvlongònø̀ng nø, tvrà ramø àngmaq svrí bangvme. Kadø íe wani vrúm kèní dì ráì we gø tiqmaq vle,” a:lòe.
4Àng coqcv́nrìí Àng sv̀ng vtà:ngò nø̀, “Yadø rvgaq mvgung tiqyv́ngø, vsv̀ng yadv́ngte kaq shvv́mlv́m zidòng nø kayv́ng kèní lvlú:nini?” a:lòe.
5Wekvt À:ngí, “Nàmaq yv́ng zidòng kadv́ng chv̀ng vle?” wa rø:tnòe.
Àngmaqí, “Shvngøt chv̀ng vle,” a:lòe.
6Vsv̀ng loksokrì sv̀ng vba tø̀mø rúnglv́m À:ngí dvká:mòe. Zidòng we shvngøt chv̀ng À:ngí lá:ngò sórí, Gvray kaq oqà wa dá:ngí, vmø:tnò nø̀ àngmaq sv̀ng zílv́m Àng coqcv́nrì sv̀ng tvleòe. Àngmaqí rá vsv̀ng loksok kaq túnaòe. 7Ngashi cvmaqcè gø àngmaq yv́ng v́laòe. Yesu nø Gvray kaq oqà wa dá:ngí werì gø àngmaq sv̀ng túnalv́m dvká:mòe. 8Wekvt àngmaqí á:mò nø̀ vgàá:mì. Vchéò rì nø te we jvng shvngøt chvng dv̀n coqcv́nrìí rvku:lòe. 9V́m bǿì we vsv̀ngrì nø vbì kíng dv́ngte íe. À:ngí àngmaq sv̀ng shvloò dá:ngí, 10Àng coqcv́nrì nv̀ng tiqdø kùngshí tiqgø̀m sv̀ng chàng zv́ngshì nø̀, Dalmanuta rvgaq sv̀ng dìá:mì.
Mvshv́lpvrá láò vsv̀ngrì
Mat. 16:1-12
11Parisirì dì ráì nø̀, Yesu nv̀ng vzǿng pv́ngshì nø̀ Àng kaq cip lálv́m, “Muqlàng#8:11 “Gvray kèní” wa gø rø daqe. kèní mvshv́lpvrá tiqlòng dètanshà,” wa rø:tnòe. #Yoh. 6:30 12Yesu nø shaqmè vhéshì sórí, “Pàwálv́m yamvrilcèrìí nø mvshv́lpvrá láòe má? Ngàí jø̀ngjǿng vla:tnìni, yamvril vsv̀ngrì kaq nø mvshv́lpvrá tiqpv̀n gø màdvtanlv́m íe,” a:lòe. 13Wekvt Yesu nø àngmaq yv́ngkèní búng nø̀, kùngshí taq kupa sv̀ng léshìá:mì.
Butdvshi kàshvbóng
14Coqcv́nrìí zidòng màlv́ng vná dárà nø̀, kùngshí vdòngø zidòng tiqchv̀ng wa vle. 15À:ngí àngmaq sv̀ng, “Parisirì butdvshi nv̀ng Herod butdvshi sv̀ng nàyáshìnø̀ng,” a:lòe.#Luk. 12:1
16Wekvt àngmaq nø àngmaq vrùng nø̀, “Nøngmaqí zidòng lv́nglv́m vná dv́rshà rvt wa pà íe,” wae.
17Welòng sv̀ng Yesuí dǿm bǿà nø̀, “Zidòng mèv́lanø̀ng rvt pàwá nàrùngnø̀nge? Akvt høq nàmaqí mèdǿmnø̀ng nø̀ mècíngnø̀ng má? Nàmaq nøt shèngarshìnø̀nge má? #Mak. 6:52 18Nàmaq nø ne nàdánø̀ng nìgø mèyv̀ngnø̀ng má? Vnà nàdánø̀ng nìgø mètánø̀ng má? Ngàí wedv́ngte wv̀ng bǿngà rì mèmèsøngnø̀ng má? #Yer. 5:21; Ezk. 12:2 19Vsv̀ng pungwà kíng dvpvt Ngàí zidòng pungwà chv̀ng wa vmøtnangò ke vché rì kadv́ng jvng dv̀n rèkulvpshà?” a:lò kvt, “Tiqcé vní jvng íe,” wa vtá:nòe.
#
Mak. 6:41-44
20À:ngí rá, “Vsv̀ng vbì kíng dvpvt shvngøt chv̀ng vmøtnangò ke, vché rì kadv́ng jvng dv̀n rèkulvpshà?” a:lò kvt, “Shvngøt jvng íe,” wa vtá:nòe. #Mak. 8:6-9
21Wekvt À:ngí àngmaq sv̀ng, “Íni, akvt høq mècíngnø̀ng má?” wa rø:tnòe.
Nemàn tiqpè dvba:nò we
22Àngmaq nø Betseda mvrìng sv̀ng tuq ráì nìnø, vsv̀ngrìí nemàn tiqpè shøla:tnà nø̀, àng sv̀ng lvshupma:tnò dø Yesu sv̀ng kórshìe. #Mak. 6:56 23Wekvt À:ngí nemàn pè wur zø̀:mò nø̀, mvrìng vtv́ng lap sv̀ng shøl bǿà. Àng ne sv̀ng tølí dvshaqò dá:ngí, àng mvdv̀mø Àng wur hapshì nø̀, “Nàí pà èyà:ngòe?” wa rø:tnòe. #Mak. 7:32,33; Yoh. 9:6
24Àng kang ngángshì nø̀ dvjaq sórí, “Ngàí vsv̀ngrì yv̀ngòe. Shǿngtø̀ng dø vshv́m nø̀ tvrà die,” a:lòe.
25Wekvtrá Yesuí àng vne sv̀ng wu:rí shu:pmòe. À:ngí dvjaqò nìnø, àng ne baná:mì nø̀, shvngbe shàn wa yv̀ng bǿà. 26Wekvt Yesuí àng sv̀ng, “Mvrìng rv́m sv̀ng mègòngni,” a:lò nø̀ àng chø̀m sv̀ng shvloòe. #Mak. 7:36
Piterí Kristu vchà:ngò we
27Weyv́ng kèní Yesu nø Àng coqcv́nrì nv̀ng búngá:mì nø̀, Kesaria Pilipi rvgaq rvwárì sv̀ng gòngá:mì. Tvrà ram À:ngí Àng coqcv́nrì sv̀ng, “Ngà kagǿ ǿngà we vsv̀ngrì kadø wae má?” wa rø:tnòe.
#
Mat. 16:13-28; Luk. 9:18-27 28Àngmaqí, “Tiqmaq nø, ‘Tiløp Yohan íe,’ wae. Dvgárì nø, ‘Eliya íe,’ gø wae. Dvgá tiqmaq nø, ‘Kàdvtutshúrì kèní tiqgǿ íe,’ gø wae,” a:lòe. #Mak. 6:15
29À:ngí àngmaq sv̀ng, “Íni, nàmaqí nà? Ngà sv̀ng kagǿ íe, èwànø̀nge má?” wa rø:tnòe.
Piterí Àng sv̀ng, “Nà nø Kristu ni èíe,” wa vtá:nòe. #Yoh. 6:67-69
30Wekvt Yesuí Àng nø Kristu í we#8:30 Àngké kà taq “Yesuí Àng dang kagǿ sv̀ng gø” wae. kagǿ sv̀ng gø mvshø̀nlvm àngmaq sv̀ng mvgvmkaq dvká:mòe.#Mak. 9:9
Yesu shì nø rá zun long we
31Wekvt À:ngí coqcv́nrì sv̀ng, “Vsv̀ng Àngcèpè nø, dvshàlv́m mvme pv̀n tønshì ra longe. Shaqré shaqtvng mvdò nv̀ng shvrúngshú vjìrì nv̀ng dvrá svrarìí èngál longe. Ngà sv̀ng èshvt bønge. Ínìgø vshø̀m ni wa ni taq#8:31 Àngké kà taq “vshø̀m ni mèpvng” wa nø vrue. vrá zun longe,” wa shvngøt pà:ngòe. 32Yesuí yadø chaqdvp shø̀n bǿà kvt Piterí Yesu sv̀ng tiqtong shø:lò nø̀ nga:nòe.
33Ínìgø, Yesu lv́m poshì nø̀ àng coqcv́nrì sv̀ng dvjaqò sórí Piter sv̀ng, “Satané, Ngà yv́ngkèní èsarshì! Kadø íe wani nà nø Gvray nøt sv̀ng mènàdǿnshì, vsv̀ng shòng lòng taq wa nàdǿnshìe,” wa nga:nòe.
34Wekvt vsv̀ng loksokrì nv̀ng Àng coqcv́nrì sv̀ng goò nø̀, Yesuí, “Ngà coqcv́n wáshì mvyǿ we kagǿ gø, vdè sv̀ng ngálshì nø̀, vdè wurgang baqshì sórí Ngà mèpvng cv́n ràe. 35Pàwá wani vdè gø̀nshaq shvlutshì mvyǿ we kagǿ gø, gø̀nshaq vmvngvme. Íwe Ngà rvt gø, Dvbùshv̀ngkà rvt gø, vdè gø̀nshaq vmvng we kagǿ gø gø̀nshaq lutshì longe. #Mat. 10:39 36Vsv̀ng tiqgǿ nø mònggàng køp washì lú:nò nìgø, àng gø̀nshaq vmvngvm nìnø à:ngí kapà vjú lú:nòe má? 37Vsv̀ng tiqgǿ nø àng gø̀nshaq sv̀ng kapà tiqpà:ní chv́ngshì lúnò má? 38Kv́mnøt màvl we, mvrà wàò we yamvril dvhø̀ø, Ngà nv̀ng Ngà kàrì sv̀ng shvraqshì we kagǿ sv̀ng gø, Vpè pòngbàng ngø̀r we vdòng taq, shànshér we muqlàng dvzv́rrì nv̀ng tiqdø Vsv̀ng Àngcèpè langshø̀ng dak dvgvp, wegǿ sv̀ng Ngà gø shvraqshìlv́m í longe,” a:lòe.#Mat. 10:33
Currently Selected:
Marko 8: GSM
Highlight
Share
Copy
Want to have your highlights saved across all your devices? Sign up or sign in
© 2024, Rvcv́ngcè Kàru Gomidi Kristu Shvngø̀mré. All Rights Reserved.
