Marko 10
10
Dø̀ngku vkang mvdaq we
Mat. 19:1-9
1Yesu nø we gùrwang kèní búngá:mì nø̀ Yordan tìwàng kupa, Yuda gùrwang sv̀ng tuqá:mì. Vsv̀ng loksokrì nø vrá tiqkvt Àng yv́ngsv̀ng kø̀m ráì. Àngwà Àng wá yà dø, àngmaq sv̀ng shvngø:tnòe.
2Wekvt Parisirì nø Àng sv̀ng vløtlv́m dì ráì nø̀, “Lvngàré tiqpèí àng chø̀mmè sv̀ng gur daqe má?” wa rø:tnòe.
3À:ngí àngmaq sv̀ng, “Moshií nàmaq sv̀ng kadø dèkv́m yv̀ngshà má?” a:lòe.
4Àngmaqí, “Moshií nø vkang kàru zí dá:ngí, àng chø̀mmè sv̀ng shvlo dv̀ng íe, wa nø vkv́ng zí yà:ngà,” a:lòe. #Drd. 24:1; Mat. 5:31,32
5Yesuí àngmaq sv̀ng, “Nàmaq nøt èzaqnø̀ng rvt à:ngí dvkv́mkà welòng nàrua yv̀ngshà we íe. 6Ínìgø, muqlàng nv̀ng rvgaq nv̀mlat má:nò yv́ngkèní Gvrayí nø àngní sv̀ng svma lvngà shvgøp mv́n yà:ngà. #Nnp. 1:27 7Wedø í rvt lvngàré nø àngpè àngmè kèní rv́lshì nø̀ àng chø̀mmè nv̀ng vzø̀mvme. #Nnp. 2:24 8Weyv́ng kèní àngní nø tiqshing tiqgóng wa ívme. Wekvt kèní àngní nø vnígǿ nø mø̀íá:mì, tiqshing tiqgóng wa íá:mì. 9Wervtnø̀, Gvrayí dvhǿmshaq lòng sv̀ng nø vsàngí laq màdvka:ngò,” a:lòe.
10Àngmaq chø̀m vdòng sv̀ng gòngá:mì mèpvng, coqcv́nrìí vrá Àng sv̀ng wedang rø:tnòe. 11Yesuí àngmaq sv̀ng, “Àng chø̀mmè nv̀ng vkang nø̀ dvgá tiqmè nv̀ng shvzøngshìvm we kagǿ ínìgø, àng chø̀mmè sv̀ng vléò nø̀ dvchap mvrà wàò we íe. #Luk. 16:18 12Vrá svmaréí gø àng chø̀mpè nv̀ng vkang nø̀ dvgá tiqpè nv̀ng shvzøngshìvm nìnø, à:ngí gø dvchap mvrà wàò we íe,” a:lòe.
Cv̀mrécèrì sv̀ng shvmánaò we
Mat. 19:13-15; Luk. 18:15-17
13Cv̀mrécèrì sv̀ng Yesuí laq shupma:tnò wa nø àngmaqí Àng yv́ngsv̀ng shøla:tnà we, coqcv́nrìí nga:nòe. 14Íwe Yesuí yv̀ng bǿà kvt, shv̀mná rí sórí àngmaq sv̀ng, “Cv̀mrécèrì Ngà yv́ng laq di ra, àngmaq sv̀ng mènàgámnø̀ng ni. Kadø íe wani Gvray móngdàn nø yadø í rì dvpvt íaòe. 15Ngàí jø̀ngjǿng vla:tnìni, kagǿ í nìgø cv̀mrécèí vtoò dø ni Gvray móngdàn sv̀ng mènàtonø̀ng nìnø we móngdàn góng mvlúnshì,” a:lòe. #Mat. 18:3 16Wedá:ngí Yesuí cv̀mrécèrì sv̀ng mvguqò nø̀ àngmaq mvdv̀m wur hapshì sórí shvmánaòe.#Mak. 9:36
Gùchàngré mvgàm tiqpè dì ráì we
Mat. 19:16-30; Luk. 18:18-30
17Wekvt rá Yesu nø tvrà dìlv́m búng daqì dvgvp, vsv̀ng tiqpè Àng yv́ng kvlv̀ng ráì nø̀, Àng mv́rdv̀ng pvnciq tushì sórí, “Shvla we svrapèá, dvciqlvpat gø̀nshaq lúnlv́m rvt, ngà kapà wá rànge má?” wa rø:tnòe.
18Yesuí àng sv̀ng, “Nàí Ngà sv̀ng pàwálv́m shvla we èvlà má? Shvla we nø Gvray Àng tiqgǿ wa mø̀í nìnø dvgá màvl. 19Vsv̀ng mèshvtni, mèdèchapni, mèkøni, mvdìng we shvkse mèwáshìni, vsv̀ng dvrè mèyúmani, nvpè nvmè ní sv̀ng nàpǿò, wa we dvkv́mkàrì sv̀ng nàí gø èsháòe,” a:lòe. #Bng. 20:12-17; Drd. 5:16-20
20Wepèí Yesu sv̀ng, “Svrapèá, yadv́ng pv̀n shvngbe nø ngà cv̀mré kèní cv̀nò we íe,” wa vtá:nòe.
21Wekvt Yesuí àng sv̀ng shóngnø:tní dvjaqò nø̀, “Nà taq shini tiqpv̀n ràe. Èlovm nø̀ nàò vl dv́ngte èna:mò dá:ngí, dvshà vsv̀ngrì kaq èzíò. Wekvt muqlàng taqlapmø pø̀yá pø̀nung èv́la dae. Wedá:ngí Ngà mèpvng ècv̀n ra,” a:lòe.#10:21 Àngké kàru tiqmaq taq “Wurgang baqshì nø Ngà mèpvng ècv̀n ra,” wae. #Mak. 8:34; Mat. 10:38
22Wepè nø pø̀ gvzà vdá we tiqpè í rvtnø̀, Yesuí a:lò kà tá bǿà kvt, àng nøt tìná:mì nø̀, nøt yùr sórí loá:mì.
Mvgàmrérì Gvray móngdàn góng rvzaq we
23Yesuí gùrhøm sv̀ng yà:ngò sórí Àng coqcv́nrì sv̀ng, “Mvgàmrérì nø Gvray móngdàn sv̀ng gònglv́m gvzà rvzaqe lé,” a:lòe.
24Àng kà rvt coqcv́nrì nø rìràá:mì. Wervt Yesuí vrá àngmaq sv̀ng, “Cv̀mrérìé, Gvray móngdàn sv̀ng gònglv́m nø rvzaqe.#10:24 Àngké kàru tiqmaq taq “gv̀msùng vshé sv̀ng nøt vdǿnshì rì” wa kà màbá. #Shz. 62:10; 1Tm. 6:17 25Mvgàm tiqgǿ Gvray móngdàn sv̀ng gònglv́m lòng nø, golawu tiqgo sungmè shvni hwáng taq léshìlv́m lòng mvdv̀mø té rvzaqe,” a:lòe.
26Wekvt Àng coqcv́nrì nø gvzà dàá:mì nø̀, “Wedø ínìnø kagǿí chutchv́ng we lún daqe má?” wa tasv̀ng vrùnge.
27Yesuí àngmaq sv̀ng dvjaqò sórí, “Yalòng nø vsv̀ng lap kèní nø bǿn mvdaq. Íwe Gvray lap kèní wa bǿn daqe. Gvrayí nø pàgø wá dá:ngòe,” a:lòe.
#
Nnp. 18:14; Yob. 42:2 28Piterí Àng sv̀ng, “Èyà:ngò, Nà mèpvng cv̀nlv́m rvt, nøngmaqí nø vl dv́ngte làng ráshà,” a:lòe.
29Wekvt Yesuí, “Ngàí jø̀ngjǿng vla:tnìni, Ngà dvpvt gø, Dvbùshv̀ngkà dvpvt gø, vdè chø̀m, àngnvm àngchvngrì, àngpè àngmè, àngcǿ àngcèrì, mø̀íni hv́ng rvmárì la:ngò we kagǿ gø, 30akvt bàn taq gø chø̀mrì nv̀ng àngnvm àngchvngrì, àngmè maq nv̀ng cv̀mrérì, vrá rvmárì taq gø tiqyá dvtv̀ng jø̀ngjǿng lúnlv́m íe. Vrá dvki vrè we gø vhǿmlv́m íe. Tuq ra bàn taq gø dvciqlvpat gø̀nshaq lúnlv́m íe. 31Íwe nv̀mlatrì mvme nø lv̀ngdø̀m ívme. Lv̀ngdø̀mrì mvme nø nv̀mlat ívme,” a:lòe.
Yesu Àng zun long dang dvtáò we
Mat. 20:17-19; Luk. 18:31-34
32Yesuí tvrà cà:lò nø̀ àngmaq nø Yerusalem wamà sv̀ng ngange. Weyv́ng kaq shø:lò rvt coqcv́nrì nø dà nø̀ Àng mèpvng cà:nò rì gø svree. Wekvt coqcv́n Tiqcé Vnípè kaq À:ngí tiqtong sv̀ng vrá shø:lò dá:ngí, À:ngí vhǿmlv́m rì dvtáòe. #Yoh. 11:16; Mak. 9:31 33“Ètánø̀ng, nøngmaq nø Yerusalem sv̀ng nga:ngìe. Vsv̀ng Àngcèpè sv̀ng nø shvrúngshú vjìrì nv̀ng dvrá svrarì wur taq tvle bǿò nø̀, àngmaqí Àng sv̀ng dvshílv́m kàciq ra:tnò dá:ngí wv́ngzàrì wur taq tvle bǿòe. 34Àngmaqí Àng sv̀ng dvshá dvcø wàò nø̀, tølí vpíò nø̀, shi:pmò dá:ngí shvt bǿòe. Ínìgø, vshø̀m ni wani taq Àng vrá zun longe,” a:lòe.
Yohan nv̀ng Yaku røtshì we
Mat. 20:20-28
35Zebedi àngcè Yaku nv̀ng Yohan nø Yesu yv́ng dì ráì nø̀, “Svrapèá, ngàní nvm dvpvt Nàí tiqpv̀n wáalv́m røtshì mvyǿshìe,” a:lòe.
36À:ngí, “Nàní dvpvt Ngàí pà lvwáashi ni?” a:lòe.
37Àngní nà:mí, “Nà móngdàn taq ngø̀rdvgùng nv̀ng èøp lú:ngò ke, ngànínvm sv̀ng Nà vbàngpa tiqpè, vgwépa tiqpè rúng dezv́rshà,” a:lòe.
38Yesuí, “Nàní pà èrøtshìshì we mèsháshò. Ngàí aq rà we dvshàlv́m gwìn chv̀ng nàní gø aq èlúnshò má? Ngà sv̀ng èløpmvt we tìløp lòng taq løpshi èlúnshò má?” a:lòe.
#
Mak. 14:36; Luk. 12:50; Rom. 6:3 39Àngní nà:mí, “Lúnshòe,” a:lòe.
Wekvt Yesuí, “Ngà aqlv́m gwìn chv̀ng taq nàní gø jø̀ngjǿng ni aq ra longe. Ngà sv̀ng èløpmvt we tìløp lòng taq nàní gø løpshi ra longe. #Dzr. 12:2; Dtn. 1:9 40Íwe Ngà vbàngpa vgwépa taq rúng lúnlv́m lòng nø̀, Ngàí zí mvlúnò. Kagǿ dvpvt dvgǿaò nìnø, we gǿ dvpvt wa íe,” a:lòe.
41Yalòng sv̀ng wádø coqcv́n tiqcépèí tá bǿà kvt, Yaku nv̀ng Yohan sv̀ng shv̀mná ríe. 42Yesuí àngmaq sv̀ng goa:tnà dá:ngí, “Nàmaqí èshánø̀ng dø wv́ngzà dvcì øpshúrì nø bashàrì sv̀ng øp mv̀rshà:mí shvnip shvna:lòe. Du gàmzø̀rìí gø vmíng vkv́ng zø̀:mòe. #Luk. 22:25-27 43Nàmaq nø wedø wáshì mvdaq. Nàmaq dvhø̀ taq shølshú í mvyǿ gǿ nø dvzømshú lè wáshì ràe. #Mak. 9:35 44Nàmaq dvhø̀ taq vgo wáshì mvyǿ gǿ nø, shvngbeò vshuq lè wáshì ràe. 45Kadø íe wani Vsv̀ng Àngcèpè nø vsa:ngí leq dèzømvt wvng dø̀ng dakngà we mø̀í. Vsv̀ng kaq dvzømlv́m dvpvt dø̀ng dakngà. Ngà gø̀nshaq nø mvme gǿ dvpvt chv́nglv́m pø̀ zíshilv́m rvt dø̀ng dakngà,” a:lòe.
Nemàn Bartimiu dvba:nò we
Mat. 20:29-34; Luk. 18:35-43
46Àngmaq nø Yeriko wamà yv́ng tuq ráì. Vrá Yesu nø Àng coqcv́nrì ó vsv̀ng loksok nv̀ng tiqdø Yeriko wamà kèní búngá:mì dvgvp, Timiu àngcè Bartimiu tǿshì we røtnvm vsv̀ng nemàn tiqpè tvrà shvnvngø rung dae. 47Nazaretpè Yesu dì ráì we à:ngí tá bǿà kvt, “Dawi Pvlí Pvlaqpè Yesué, ngà sv̀ng dvshá èzangàé,” wa vkiqe.
48Vsv̀ng mvmeí àng sv̀ng dø màwá làvl dø nga:nòe. Íwe àng nø, “Dawi pvlí pvlaqpèé, ngà sv̀ng dvshá èzangàé,” wa dvshàshà vkiqe.
49Wekvt Yesu rip nø̀, “Àng sv̀ng ègovtnø̀ng,” a:lòe.
Àngmaqí nemàn pè sv̀ng goò nø̀, “Shaqshaqwa èvl, èbúng, À:ngí nà sv̀ng ègoe,” a:lòe. 50Wepè nø àng mvdv̀m bèlaq dùng chut gu:rò dá:ngí tv̀m búng nø̀ Yesu yv́ngsv̀ng dì ráì.
51Wekvt Yesuí nemàn pè sv̀ng, “Ngàí nà sv̀ng pà wv́ngangnø̀ng?” a:lò ke, nemàn pèí, “Rabiá, ngà ne yvngshì mvyǿnge,” a:lòe.
52Wervtnø̀ Yesuí àng sv̀ng, “Èlovm. Nà kv́mnø:tní nà sv̀ng dèzǿm bǿì,” a:lòe. Wela:ngí wepè vne yvngshì lú:ngì nø̀, tvrà yvnggùng Yesu mèpvng cv̀n bǿà.
Currently Selected:
Marko 10: GSM
Highlight
Share
Copy
Want to have your highlights saved across all your devices? Sign up or sign in
© 2024, Rvcv́ngcè Kàru Gomidi Kristu Shvngø̀mré. All Rights Reserved.
