Marko 1

Tìløp Yohaní mvshǿl shø̀:nò we

Mat. 3:1-12; Luk. 1:1-18; Yoh. 1:19-30

1Gvray Àngcèpè#1:1 Àngkè kà tiqmaq taq “Gvray Àngcèpè” wa kà mà bá. Yesu Kristuò#1:1 “Kristu” wa kà nø Heleni kà í nø̀ Hebru kàí nø “Meshia” a:lòe. Àng lvjøm nø “Gvrayí rvcv́ngshaq pè” mø̀ínì “yøtìí vdørshaq pè” íe. Yesu nø Gvrayí dvzv́r daqà we Chv́ngshú nv̀ng Kàngpè í rvt, Àng sv̀ng “Kristu” wa tǿò we íe. Dvbùshv̀ngkà mvpv̀ng.

2“Èyà:ngò, Ngàí Ngà dvzv́r Nà vzv̀ngzv̀ng dvzv́r dakngò nø̀,

à:ngí Nà dvpvt tvrà dègǿa dae. #Mal. 3:1; Mat. 11:10; Yoh. 3:28

3Rvgaq mvgung yv́ngø tiqgǿ vkiq we kàshaq nø,

‘Kàngpè dvpvt tvrà dègǿanø̀ng,

Àng dvpvt tvrà mèdónganø̀ng,’”

wa kàdvtutshú Esaya kàru taq vru yà:ngà dø, #Esa. 40:3 4Tìløp Yohan nø rvgaq mvgung yv́ng di nø̀, mvrà chutna lúnlv́m dvpvt, nøt língshì nø̀ tìløpshì rà we mvshǿl dvsha:ngòe. 5Wekvt Yuda gùrwang køp nv̀ng Yerusalem wamà vsv̀ngrì shvngbe nø, Yohan yv́ngsv̀ng di nø̀ àngmaq mvrà vchángshìe. Wekvt Yohaní àngmaq sv̀ng Yordan Tìwàng yv́ng tìløpmaòe. 6Yohan nø golawu møl bèlaq gwashì nø̀ juq taq nø shace juqnv́m nv́mshìe. Àng nø cóngkut nv̀ng zømwàng kwátì vm nø̀ vle. #2Kk. 1:8; Zek. 13:4 7À:ngí mvshǿl dvsha:ngò we taq, “Ngà mvdv̀m jòrnònggùn te pè nø, ngà mèpvng di daqe. Ngà nø ngǿmshø̀ng nø̀ Àng híshvnam svnhǿng pǿna we vshuq wáshìlv́m gø màpǿng. #Dzr. 13:25 8Ngàí nø nàmaq sv̀ng tì taq løpmìe. À:ngí nø Shànshér Pvlàcè taq nàmaq sv̀ng èløpmvtnø̀nge,” a:lòe.

Yesu sv̀ng tiløp zíò we

Mat. 3:13-17; Luk. 3:21-22; Yoh. 1:31-34

9Wenila taq, Galili móng Nazaret mvrìng kèní Yesu dì ráì nø̀, Yordan Tìwàng yv́ng Yohaní Àng sv̀ng tìløpmaòe. 10Tì vdòng kèní kungshì lú:ngì chàng, muqlàng vtáná:mì nø̀, Gvray Pvlàcè nø kaø dø Àng mvdv̀m lashì daqì we À:ngí yv̀ng bǿà. 11Wekvt muqlàng kèní kà shø̀n daqì nø̀, “Nà nø Ngà shóngshø̀ng we Ngàcèpè èíe. Nà sv̀ng Ngà gvzà dvbònge,” wae. #Mak. 9:7; Shz. 2:7; Esa. 42:1

Sataní Yesu dvlø:tnò we

Mat. 4:1-11; Luk. 4:1-13

12Wekvt chàng, Shànshér Pvlàcèí Àng kaq rvgaq mvgung sv̀ng dí dvzá:ròe. 13Rvgaq mvgung yv́ngø vbìcé ni døp Àng sv̀ng Sataní dvlø:tnò nø̀ Àng nø zømwàng nìnàrì nv̀ng tiqdø vle. Wedvgvp muqlàng dvzv́rrìí Àng sv̀ng dvzø:mòe. #Shz. 91:13; Yoh. 1:51

Yesuí Galili móng bv̀nlì pà:ngò we

Mat. 4:12-17; 18-22; Luk. 4:14-15; 5:1-11

14Herodní Yohan sv̀ng róng bǿà mèpvng, Yesu nø Galili móng sv̀ng dì ráì nø̀, 15“Rvtø̀ vhøm ráì, Gvray móngdàn gø tvp níshì daqì. Nøt èlíngshìnø̀ng nø̀, Dvbùshv̀ngkà sv̀ng èkv́m ránø̀ng,” wa Gvray Dvbùshv̀ngkà dvsha:ngòe.

16Yesu nø Galili Tìnúngmè shvnvng di dvgvp, Simon nv̀ng àngnvmpè Anderu nø tìnúngmè taq shǿmgún dvgupke da we À:ngí yv̀ng bǿà. Kadø íe wani àngní nø nga vkwìke vsv̀ng íe. 17Yesuí, “Ngà mèpvng ècv̀n ráshì. Nàní kaq vsv̀ng vkwíshú wáshì dvzv́rlv́m íe,” a:lòe. 18Wekvt chàng, àngníí shǿmgúnrì ca là:ngò nø̀ Àng mèpvng cv̀n bǿà.

19Vzv̀ng kaq tiqramcè dìá:mì dvgvp, kùngshí vdòngø shǿmgúnrì dvceshì we Zebedi àngcè Yaku nv̀ng àngnvmpè Yohan sv̀ng À:ngí yv̀ng bǿà. 20Wekvt À:ngí àngní sv̀ng chàng goò nìnø, àngnínà:mí gø àngpè Zebedi sv̀ng lv̀ngzvngrì nv̀ng tiqdø kùngshí vdòngø ca là:ngò nø̀ Àng mèpvng cv̀n bǿà.

Cáng lù:ngò we

Luk. 4:31-37

21Àngmaq nø Kapernum mvrìng sv̀ng gòngá:mì. Wekvt Narnií#1:21 Yuda Narni nø lvbán pvngwà ni nvm vle rvtø̀ kèní lvbán chuq ni nvm vlé rvtø̀ høq íe. Àng nø júrøt chø̀m sv̀ng chàng di nø̀ shvngø:tnòe. #Mat. 4:13 22À:ngí shvngø:tnò kàrì sv̀ng àngmaq gvzà dae. Kadø íe wani À:ngí nø dvrá svrarì dø mø̀í, vmíng vkv́ng vl we vsv̀ng dø àngmaq sv̀ng shvngø:tnòe. #Mat. 7:28,29 23Àngmaq júrøt chø̀m yv́ng cáng dvchøp we tiqpè vl we, wela:ngí àng vkiq lú:ngì nø̀, 24“Nazaretpè Yesué, Nà nv̀ng nøngmaq pà singlv́m vle má? Nà nø nøngmaq sv̀ng shvmv́nglv́m èdì daqì má? Nà kagǿ èí we ngàí shánge, Gvrayò Shànshérpè lèíni!” a:lòe.

# Mak. 5:7 25Wekvt Yesuí, “Dø màwá èvl! Àng yv́ngkèní èlúshì,” wa nga:nòe. 26Mvmv́ng cá:ngí wepè sv̀ng nipnip vdv́n dvzá:rò dá:ngí, shaqmèí vkiq sórí àng kèní lúshiá:mì. #Mak. 9:26

27Wekvt àngmaq shvngbe tasv̀ng vrøtke høq rìràá:mì nø̀, “Pà í ráì! Vmíng vkv́ng vl we shvngøtkà àngshv́r tiqpv̀n lví dá:rì. Cángrì kaq À:ngí dvká:mò ke, àngmaq nø Àng kà sv̀ng tá dá:rì,” wae. 28Wela:ngí Galili móng køp sv̀ng Àng dang shv̀ngkà dvshvng bǿà.

Za rì dvba:nò nø̀ cáng lù:ngò we

Mat. 8:14-16; Luk. 4:38-41

29Àngmaq nø júrøt chø̀m kèní búng daqì weó chàng, Yaku ó Yohan nv̀ng tiqdø, Simon nv̀ng Anderu àngnínvm chø̀m sv̀ng dìá:mì. 30Wedvgvp Simon àngnìmè nø góng vkatshì rvt vyálshìe. Àngmaqí Yesu sv̀ng àng za lòng wekvt ni dvtáòe. 31Yesu dì ráì weí, àng wur zø̀:mò nø̀ kung bǿà nìnø, àng góng vkatshì lòng baná:mì. Wekvt à:ngí àngmaq sv̀ng dvzø:mòe.

32Nv̀m vle nø̀ dø ráì kvt, àngmaqí za rì nv̀ng cáng dvchøp rì shvngbe Àng yv́ng shøla:tnà. 33Mvrìng vsv̀ng shvngbe nø, bv́ngkà chit yv́ng dvkǿmshìe. 34Záyv̀ng àngpv̀npà:ní za vsv̀ng mvme gǿ À:ngí dvban bǿà. Cáng gø mvme lùng bǿà. Àng nø Kristu í we cángrìí sháò rvt, À:ngí àngmaq kaq kà shǿn màdvzá:rò. #Luk. 4:41; Dzr. 16:17,18

Yesuí mvgágá vjúrø:tnò we

Luk. 4:42-44

35Sháng mvgágá maqmà:ní Yesu nø kungshì dv̀ng, chø̀m kèní búngá:mì nø̀ mòngzø̀l we tiqyv́ng sv̀ng dì nø̀ vjúrø:tnòe. 36Simon nv̀ng àng lamboqrìí Àng sv̀ng láa:tnà. 37Àngmaqí Àng sv̀ng yv̀ng bǿà kvt, “Vsv̀ng shvngbeí Nà sv̀ng èláe,” a:lòe.

38Yesuí nø, “Gùrhøm vl we dvgá mvrìngrì sv̀ng gø Ngaí mvshǿl dvshvng lúnlv́m dvpvt dìì. Pàwá wani yalòng rvt ni Ngà dø̀ng dakngà we íe,” wa vtá:nòe. 39Àng nø Galili móng køp sv̀ng di nø̀, àngmaq júrøt chø̀mrì taq mvshǿl dvsha:ngò nø̀ cángrì lù:ngòe.

Mvnggvng dvshè:rò we

Mat. 8:2-4; Luk. 5:12-16

40Mvngga:ngí za we tiqgǿ dì ráì nø̀ Àng mv́rdv̀ngø pvnciq tushì sórí, “Nà èwv́mshì nìnø, ngà sv̀ng dvshér èngutnàe,” wa kórshìe.

41Yesuí mvré lú:ngà. Wekvt wur zúshì nø̀ àng sv̀ng shu:pmò sórí, “Ngà wv́mshø̀nge. Leq shèrvm,” a:lòe. 42Wela:ngí mvnggang vna baná:mì nø̀ àng nø shèrá:mì.

43Wekvt Yesuí gvpnaq dvká:mò nø̀, tiqdvshaqí shvloò sórí, #Mak. 3:12; 7:36 44“Nàyáshì! Kagǿ sv̀ng gø yalòng bvttut dvshvng mvdaq. Íwe èdivm nø̀, shvrúngshúpè sv̀ng nà góng dètánshìvm. Vrá, vsv̀ng mv́rdv̀ng nà èshèrá:mì we shvkse ílv́m dvpvt, Moshií dèkv́m yv̀ngshà we núngpà shèrúngaò,” a:lòe. #Lew. 13; 14:2-32 45Wedø ínìgø, wepè búngá:mì nø̀ yadang kayv́ng màyv́ng dvshvng bǿà. Wervt Yesu nø vsà:ngí sháò dø mvrìng vdòng góng màshvla høq íá:mì nø̀ mvrìng vtv́r vsv̀ng màvl rvgaq yv́ngø vle. Ínìgø vsv̀ngrì nø kakaq màkaq kèní Yesu yv́ngsv̀ng wedøni dí mvnshì ráì.

Currently Selected:

Marko 1: GSM

Highlight

Copy