Yaku 5

Mvgàmrérì sv̀ng dvshat dvzi:tnò we

1Mvgàmrérìé, ètánø̀ng. Nàmaq mvdv̀m tuqlvm wa we dvshà mvhøtlv́mrì rvt èngǿnø̀ng nø̀ rv̀ngshvng èwànø̀ng. #Luk. 6:24 2Nàmaq pø̀yá pø̀nungrì nø bøpmá:mì. Nàmaq bèlaq laqtunrì gø mǿ:ní èv́ma bǿshà. #Mat. 6:19 3Nàmaq gv̀msùng vshérì gø shv̀mri:lí v́m bǿà. Wedø shv̀mri:lí v́m bǿà lòng nø nàmaq mvrà vchaqlv́m shvkse íá:mì nø̀, svmií vkat padø nàmaq shingsha sv̀ng gø èkévtnø̀nge. Nàmaq nø lv̀ngdø̀m àngni høqa:tnà nìgø, pø̀yá pø̀nung shøp èmvnshìnø̀nge. 4Ku, nàmaq rvmárì taq bv̀nlì wá dèzv́rnø̀ng we lv̀ngzvngrì sv̀ng màzíshaq èshøpshì bǿshà we zìbèrì vkiq lú:ngì. Shvrvtshúrì àngmaq vkiq kàrì gø #Lew. 19:13; Mal. 3:5; Drd. 24:14-15; Yer. 22:13 Cìldø̀ngrì Àngkàngpè vnà taq gòngá:mì. 5Nàmaq nø rvgaq tø̀mø nøt dèshǿmshìnø̀ng nø̀ vdè nøt wa ècv́nshì bǿshà. Shvtlv́m àngni dvpvt nàmaq vdè nø vdè dètøqshìnø̀ng we íe. #Luk. 16:19,25 6Nàmaqí døngman vsv̀ngrì kaq mvrà shèrinø̀ng nø̀ èshvt bǿshà. Íwe, àngmaq nø nàmaq sv̀ng màtù.

Nøt shvyvngshì rà we

7Wervt vnvm vchvngrìé, Kàngpè vrá tuq daq høq nøt shèyvngshìnø̀ng. Rvmá tvmu wa vsàngí nø shø nv̀mlat dǿng kèní lv̀ngdø̀m dǿng høq, àng rvmá taqò vpǿ we mvzí dvyø̀rì gong long rvtø̀ sv̀ng nøt shvyvngshì nø̀ caò we sv̀ng dèdvmnø̀ng. #Drd. 11:14; Yer. 5:24 8Welòng padø, nàmaq gø nøt shèyvngshìnø̀ng nø̀ nøt shèdøngshìnø̀ng. Kadø íe wani Kàngpè tuqlv́m nø yùl ráì. #Heb. 10:25; 1Te. 3:13 9Vnvm vchvngrìá, nàmaq sv̀ng kàrvt we màhǿmlv́m rvt tasv̀ng mènàzerkénø̀ngni. Ku, Kàngéshú nø bv́ngkà vngám yv́ng ripme. 10Vnvm vchvngrìá, dvshà mvhøt we nv̀ng nøt shvyvngshì we taq nø, Kàngpè bø̀ng taqkèní kà shø̀n yà:ngì we kàdvtutshúrì sv̀ng shèbóng shèmvtshìnø̀ng. #Mat. 5:12 11Darì tøn zánnøt v̀l yà:ngìrì sv̀ng nøngmaqí, ìshøt ìgv̀n lú:nòrì, a:lìe. Yob àng tønshì yà:ngì lòng sv̀ng nàmaqí vtáshaq íe. Vrá, lv̀ngdø̀m yv́ng Kàngpèí kadø wáa daqà we sv̀ng gø èshánø̀nge. Kadø íe wani Kàngpè nø mvkok dvdínøt nv̀ng mvrézanøt dv̀nzø̀ng Pè íe.#Dan. 12:12; Yob. 1:21,22; Shz. 103:8; 111:4

12Vnvm vchvngrìé, shvngbe mvdv̀m vchvk we tiqkà nø, mèdègv́mshìnø̀ngni. Muqlàng, rvgaq chv̀ng nv̀ng dvgá kapà sv̀ng gø shvkse gv̀l nø̀ mèdègv́mshìnø̀ngni. Í lòng nø íe, mø̀í lòng nø mø̀í, wa kà mv̀ng èshø̀nnø̀ng. Mø̀íni, Gvrayí kàngé we nàhǿm lóngnø̀nge.#Mat. 5:34-37

Kv́mnø:tní vjú røt we

13Nàmaq dvhø̀ taq dvshà mvhøt we vsv̀ng vl má? Vjú laq røtshì. Dvbù we vsv̀ng vl má? Àng nø shvring zàywà laq wa. #Shz. 50:15; Kol. 3:16 14Nàmaq dvhø̀ taq za vsv̀ng vl má? Shvngø̀mré roqshúrì sv̀ng laq goò. Àngmaqí Kàngpè bø̀ng taqkèní yøtìí ma:tnò dá:ngí àng dvpvt vjú laq røtnaò. #Mak. 6:13 15Kv́mnø:tní vjú røtnò kvt, za gǿ ban longe. Vrá, Kàngpèí àng sv̀ng dvban daqò nø̀ à:ngí mvrà wàò we la vl nìnø, chutna daqòe. #Mak. 16:18 16Wedø í rvtnø nàmaqí dvban we lúnlv́m dvpvt, tasv̀ng tàle mvrà nàchángshìnø̀ng nø̀, tasv̀ng tàle vjú nàrøtnakénø̀ng. Døngman vsv̀ng vjú røtkà nø jórnònggùn gvzà vle. 17Eliya gø nøngmaq døni vsv̀ng wa í we, shø mvzaqlv́m mvdø̀ng mvdaq vjú røt bǿà nìnø, vshø̀m nǿng tiqka høq shø mvzaq yv̀ng. #1Kk. 17:1; Luk. 4:25 18À:ngí rá vjú røt bǿà nìnø, muqlàng kèní shø dvzaq daqà nø̀ rvmá hv́ng taq mvzí dvyø̀rì àngshí shí lú:ngì.#1Kk. 18:42-45

19Vnvm vchvngrìá, nàmaq dvhø̀ taq tiqgǿgǿ dìnglòng kèní vmànvm kvt, àng sv̀ng tiqgǿgǿí la vwv̀nga:tnò nìnø, #Gal. 6:1 20wegǿí nø vmànvm gǿ sv̀ng à:ngí vlé bǿà lòng kèní vwv́ngshì dvzá:rò we íe. Vmànvm gǿò pvlàcè sv̀ng gø shì yv́ngkèní chá:ngò we nv̀ng mvrà póngràng sv̀ng gø chutna dvzv́r bǿà we à:ngí dvdvm laq rǿ:nò. #Shz. 51:13; Ksh. 10:12; 1Pt. 4:8

Currently Selected:

Yaku 5: GSM

Highlight

Copy