Yaku 3

Pvlè sv̀ng øpshì rà we

1Vnvm vchvngrìé, shvngøtshúrì nøngmaq nø té vlishì we kàngélv́m lún lú:ngì we èshánø̀ng rvt, shvngøtshú wa mèwáshìnø̀ngni. 2Pàwá wani nøngmaq shvngbe nø mvme kvt vléshàì we dvchǿng íshàe. Kagǿ gø àng shø̀n kà taq màléshì gǿ nø kø̀mgøm gǿ í nø̀, góngkøp sv̀ng øp dv́ngshì gǿ íe. #Yak. 1:26 3Gø̀mrang nø nøngmaq kà lvta ra dø, àng nònggøp taq shv̀mtan shvmør bǿì kvt, gø̀mrang góngkøp sv̀ng gø nøngmaqí kv́ng lú:nì we íe. 4Tìsangpó sv̀ng gø èdaknø̀ng. Gvzà te nø̀ nv̀mbø̀ng mvrùí rvbaqò we í nìgø, gvzà cv̀m we vdv́ngki gø̀mcèí, kv́ngshúpè àng dí mvyǿ dø kv́ng lú:nòe. 5Wedø tiqdvchá, pvlè gø góng taqkèní cv̀m we dvgv̀ngcè í we, gvzà dvshv́ngshìe. Svmi mvyàcèí mvlø̀ng shǿngcá sv̀ng dvgu:mò we èyv̀ngnø̀ng.

6Pvlè nø svmi tiqlòng ni íe. Pvlè nø góng dvgv̀ngrì taqkèní mvgv́m vtvng í nø̀, góngkøp sv̀ng mvmv́ng mvshèr dvcaqòe. Pvlè nø vsv̀ng lvpat shvngbe sv̀ng wá:rò nø̀ zùpvng móng svmií àng vdè gø wv́rshìe. #Mat. 12:36,37; 15:11,18,19 7Zømwàng vsharì, calóng cacøn, ùm we nìnàrì nv̀ng nvmukdvra taq vl rì í dv́ngte sv̀ng nø, vsà:ngí shvnǿ lú:nò nø̀ shvnǿ yà:ngà we gø vle. 8Ínìgø, pvlè yalòng sv̀ng nø, kagǿí gø øp mvdá:ngò. Pvlè nø naqshì v́l mvsháò we mvgvm vnaq tiqpv̀n í nø̀, dvshílv́m pvla dv̀n vdeqe. #Shz. 140:3 9Nøngmaqí nø Kàngpè nv̀ng Vpè Gvray sv̀ng pvlèí shvring shvtàìe. Vrá, Gvray shø̀ngmang nv̀ng vbóng dø mv́n yà:ngà we vsv̀ng kaq pvlè welù:ngí ni mvtá:nìe. #Nnp. 1:27 10Nònggøp tiqlòng kèní ni shvring shvtà kà gø, mvtv́n kà gø bunge. Vnvm vchvngrìá, yadø nø wàlv́m mø̀í. 11Tìbor dùng tiqlòng kèní wa tìzø̀ nv̀ng shvlaqtì tiqdø bor dvre má? 12Vnvm vchvngrìé, nv̀mgwè tø̀ng taq nø zanlúnshí, bìmrøng taq nø nv̀mgwèshí shí lúnshìe má? Wedø shí mvlú:nò døni, shvlaqtì dù:ngí gø tìzø̀ dvbor mvngu:tnò.

Zitnøt vnípv̀n

13Nàmaq dvhø̀ taq zitnøt nv̀ng cíngrálnøt vdá vsv̀ng kagǿ íe? Àng nø zitnøt nv̀ng cíngrálnøt vl we sv̀ng laqyà shvláí laq dvta:nò. Vrá, zitnøt kèní bung we cipshì nø:tní wàò we bv̀nlì shvláí gø laq dvta:nò. #1Pt. 2:12; Eps. 4:31 14Nàmaq nøt taq shǿm nø̀ neza we nv̀ng vdè dvpvt wa nøtshì we èv̀lnø̀ng kvt kèní nø, werì taq mèdèshv́ngshìnø̀ngni. Dìnglòng sv̀ng èponø̀ng nø̀ gø mènàyànø̀ngni. 15Yadø í we zitnøt nø mvdv̀m kèní mø̀í. Rvgaq tø̀mò í nø̀, góngshanøt nv̀ng cáng kèní bung we zitnøt lè íe. #Yak. 1:5,17 16Kadø íe wani shǿm we nv̀ng vdè dvpvt wa nøtshì we vl yv́ng nø, vhaq vjángshì we nv̀ng mvgvm màshvla we bv̀nlì àngpv̀npv̀n gø bung longe. 17Mvdv̀m kèní í daqì we zitnøt nø, mv́ngshèr nø̀ vchvk vtvng lòng íe. Wemèpvng nø vrv́m vrá we, nøt køn we, lin yùl we, mvrézanøt nv̀ng bv̀nlì shvláí dv̀nzø̀ng we, mv̀rshv̀m màrvwìng we nv̀ng dvpéshì nøt màvl we, yadv́ng pv̀n íe. #Heb. 12:11 18Vrá, shvrv́m shvráshúrìí wøn bǿò we mòngzø̀l lòng kèní shí long we nø døngman lòng íe.#Esa. 32:17; Mat. 5:9

Currently Selected:

Yaku 3: GSM

Highlight

Copy