ROM 2

Nehukom ju Jenang ha Bahneh Dosa

1Kerana ajeh, engkek de engkeneng nej ha mai kilek, liengkek juga pen pek telas ju nehukom. Bile engkeurok mai kilek naibedosa, engkek juga engkepejatoh hukom nu diri liengkek sendiri kerana liengkek de beurok mai kilek naibedosa, engkek juga engkebeh dosa de sama. 2Dikdij lihik ya hipanei tentang hal adeh: Nehukom Jenang ajeh adel nu mai de bahbeh dosa-dosa ajeh. 3Jadi, bile engkeurok mai kilek naibedosa tapi liengkek juga engkebeh dosa de sama ajeh, engkek juga pen doh pek telas ju nehukom Jenang. 4Engkek mimang engkepemurah ha teninoi bernor sengik Jenang, Imenenghar sengik Kiampon dosa, ru Isenabar sengik. Engkek hodloh engkepaham tentang hal adeh: Jenang Kiperneng Ibernor sengik supaye engkek mong peluang engkeha-betobat ju dosa liengkek. 5Tapi engkek degel ru engkenyek pek engkeha-betobat. Kerana ajeh, liengkek sendiriloh de bahbeh Jenang Kihukom engkek gulebeh nyeh nij ku arik Kek Kihukom manusia ru adel. 6Jenang Kibalas jap-jap mai kena ru bahneh liknai sendiri. 7Jenang doh Kiog sinui de lei ditehjeh nu mai de pek putos-putos naibeh bor kerana naiha-berkep penateh ru nehormat, ru pek naiha-tempeh danan. 8Tapi Jenang doh Kipetimpak Ibengal nu mai de nekpenenteng ha diri liknai sendiri, de nainyek ha neajar de benar, ru de naiha-beh ha jenghat. 9Jap-jap mai de bahbeh jenghat doh naitanggong senusah ru seniksa: Mula-mula nu mai Yahudi ru nu mai pek Yahudi juga. 10Tapi jap-jap mai de naibeh bor doh biog penateh, nehormat, ru neaman: Mula-mula nu mai Yahudi ru nu mai pek Yahudi juga. 11Kerana, Jenang ajeh pek Kipileh kaseh.

12Hukom Taurat pek biog nu mai pek Yahudi, jadi enai de bedosa doh bipebinasa pek bijoi Hukom Taurat. Hukom Taurat biog nu mai Yahudi, jadi enai de bedosa doh bihukom bijoi Hukom Taurat. 13Kerana ku mat Jenang, sengoi de benar ajeh apeka sengoi de kicerngai ha Hukom Taurat tapi sengoi de kitaat ernor Hukom Taurat ajeh. 14Mai pek Yahudi pek mong Hukom Taurat tapi, bile ya heknod liknai sendiri naibeh hal-hal de kena ru Hukom Taurat, heknod enai ajeh kiperneng hal adeh: Enai ya naipanei hal belok de betol ru hal belok de salah hamapen enai pek mong Hukom Taurat. 15Hal ajeh kiperneng ernor ju Hukom Taurat ya mong bicot ku kateh sengik enai. Suara ku sengik enai pen kiperneng Hukom Taurat mong bicot ku kateh sengik enai kerana suara ajeh kipasal hal de naibeh ajeh betolka salah. 16Begei ajehloh doh de tejadi ku arik Jenang Kipeadel dikdij hal de birahsie ya manusia. Kek doh Kipeadel melalui Yesus Kristus. Hal de doh tejadi ajeh kena begei Gah Bor de ngperlei.

Mai Yahudi ru Hukom Taurat

17Engkek de engkeurok diri liengkek mai Yahudi, engkebegantong nu Hukom Taurat, ru engkebelagak kerana engkek mong hubungan de istimewe ru Jenang. 18Engkepanei ha heknod Jenang ru engkepanei ma de betol kerana Hukom Taurat ya biajar nu engkek. 19Engkerasa engkek dapat engkepimpen ha mai buta, ru dapat engkepeterang ha mai de naisui ku kateh kenglap, 20ru dapat engkeajar ha mai de budoh ru mai de pek naipanei ha neajar de benar. Engkerasa begei ajeh kerana engkeyaken engkek mong dikdij penanei ru neajar de benar ku kateh Hukom Taurat. 21Engkeajar ha mai kilek tapi liengkek sendiri pek engkebeh ma de engkeajar ajeh. Engkeajar mai kilek agok siksij tapi liengkek sendiri de siksij. 22Engkeajar mai kilek agok bezinah tapi liengkek sendiri de bezinah. Engkegetek ha behala tapi liengkek sendiri engkesiksij ku deg behala. 23Engkebelagak kerana engkek mong Hukom Taurat tapi engkepeselsel ha Jenang ya nelanggar ha Hukom Taurat ajeh. 24Begei de bicot ku kateh Alkitab, “Ya kerana engkek mai Yahudi, Jenang bihina ya mai pek Yahudi.”#Yes 52:5

25Amen engketaat nu Hukom Taurat, sunat engkek ajeh mong iguna. Tapi amen pek engketaat nu Hukom Taurat, sunat engkek ajeh mahentok iguna. 26Kerana ajeh, mai pek Yahudi de pek besunat tapi naitaat nu Hukom Taurat, Jenang Kianggap enai ajeh sama begei ha mai de besunat. 27Enai de pek besunat tapi naitaat nu Hukom Taurat, enai ajehloh doh de naipeadel ha engkek. Kerana, hamapen engkek besunat ru mong Hukom Taurat, tapi engkelanggar ha iernor. 28Mai Yahudi de sejati ajeh apeka sengoi de kiyos sebegei mai Yahudi ru bisunat ha iberog taleh. 29Tapi mai Yahudi de sejati ajeh sengoi de isengik begei ha mai Yahudi ru de mong bisunat ha isengik. Sunat ajeh bibeh ya Kelog Jenang apeka kijoi ma de bicot ku kateh Hukom Taurat. Sengoi de begei ajeh kikep penateh ju Jenang apeka ju manusia.

Currently Selected:

ROM 2: AEH

Highlight

Copy