MARKUS 9

1Yesus Kiurok nij nu Ipengikot-pengikot ru mai jengoi ajeh, “Cerngailoh abor! Memerip urag ju engkek doh pek engkedat lei engkeneng Jenang Kimemerintah sebegei Raja ya kuasa de entoi.”

Yesus Bipemulie ku Kemil Lod

(Mat 17:1-13; Luk 9:28-36)

2Enam arik ju kenjeh, Yesus Kien Petrus, Yakobus, ru Yohanes ru naiet nu nanek lod de tinggi. Had enai taleh de mong ku pajeh. Mase Ipengikot-pengikot ajeh naineng Yesus, naineng Kek Kibeubah. 3Ileknog kijadi biyeg ru cerengling. Pek mong numom pen ku bumi adeh de dapat kisuj iabat lei biyeg bekuk begei ajeh. 4Aleh-aleh mong Nabi Elia ru Nabi Musa baibelwal ru Yesus. 5Petrus kiurok nu Yesus, “Guru, ihad bor jik mong ku padeh. Biarloh jibeh nik kebek kemah, nanek ha Jen, nanek ha Nabi Musa, ru nanek nij ha Nabi Elia.” 6(Petrus kiurok begei ajeh sebab kek pek kipanei ma de kaha-bual kerana kek ru rimnar ikekawat ihad naisengoh.)

7Lalu sagop kiserkop enai ru naicerngai suara ju sagop ajeh de kiurok, “Adehloh Kenon Eng de Nghok. Cerngailoh engrok Kek!” 8Aleh-aleh nik mom pengikot Yesus ajeh naiceriak nu sekelileg liknai tapi pek naibakek bok-bok pen. Had mong Yesus Kihalei taleh.

9Mase naiceleh ju lod ajeh, Yesus Kibesat nu enai supaye pek naipasal nu bok-bok pen ma de ya naineng. Enai biget pasal hal ajeh lei Ilei Kenon Manusia biberkos ju Idanan.

10Naijoi Iengrok tapi mula naibelwal ratak liknai tentang maksod “kisnos ju danan.”

11Naitanya nu Yesus, “Yama guru-guru Hukom Taurat naiurok Nabi Elia hod kihol lebeh canuk daripade Peselamat de bijanji ya Jenang?”#Mal 4:5

12Yesus Kiurok, “Betol, Nabi Elia mimang kihol lebeh canuk kaha-sedia dikdij hal sebelom Eng Nghol. Tapi ku kateh Alkitab mong juga bicot begei adeh: Eng Kenon Manusia hod Ngkena jeoi seniksa ru bihina ya mai. Pernahka engkepiker ha engrok ajeh? 13Cerngailoh, Nabi Elia mimang ya kihol tapi mai naibeh sesuka sengik enai nu kek. Hal ajeh tejadi kena begei de bicot tentang kek ku kateh Alkitab.”

Yesus Kiperbor Numom Sanget de Bisangrog ya Nyanik

(Mat 17:14-21; Luk 9:37-43)

14Mase Yesus ru rimnik Ipengikot ajeh nailei nu pengikot-pengikot de kilek, naineng mong mai jengoi naikelileg ha pengikot-pengikot Yesus ku pajeh ru memerip urag guru Hukom Taurat tengah naibejawab ru pengikot-pengikot Yesus. 15Bile mai jengoi naibakek Yesus, ihad cengang empag enai lalu naijerjar naisamut Kek. 16Yesus Kitanya, “Ma de engkebejawab ru enai?”

17Numom ju mai jengoi ajeh kiberlag, “Guru, eng ngen kenon eng nu Jen. Kek pek dapat kibelwal kerana bisangrog ya nyanik. 18Bile nyanik kiserag kek, iberog bihempas ku kemil tik ru iempag cekbug. Kisangit ilemunj ru iberog kijadi keras. Eng ya ngsemanj nu pengikot-pengikot Jen supaye naiperet nyanik ajeh tapi pek dapat naibeh.”

19Yesus Kiberlag, “Eng ya cukop liu Nggei ru Ngbesabar ru engkek! Tapi engkek lekat juga pek engkepecaya ru pek dapat engkebeh ma de Ngbeh! Enloh sanget ajeh nu madeh!” 20Enai pen naien sanget ajeh nu Yesus.

Bile nyanik ajeh kineng ha Yesus, ku sarik jijeh juga nyanik kiyoh berog sanget ajeh lei sanget ajeh kiyog ru kibegulek ku kemil tik ru ilihig pen cerekbug. 21Yesus kitanya nu apak sanget ajeh, “Ya liuka kek begei adeh?”

“Sejak kisanget!” berlag iapak. 22“Jeoi kali nyanik ajeh kaha-perdat kek ru kiperjer kek nu kateh os ru teu. Amen Jen mampu, ngsemanj Jenyayak ru Jentulog jik.”

23Yesus Kiberlag, “Hek pek patot haurok ‘amen Jen mampu.’ Dikdij hal buleh jadi nu mai de pecaya!”

24Ku sarik jijeh juga apak sanget ajeh pen kibeseru, “Ngpecaya! Tulogloh eng kerana iman eng gek taleh!”

25Bile Yesus Kineng mai jengoi mula naibekumpol, Yesus Kitengking nyanik ajeh, “Hek nyanik de habeh sengoi jadi bisu ru pekak, hol ju sanget adeh ru agok muj nij!”

26Nyanik ajeh kiwig ru kibeh sanget ajeh kekejanj lalu kihol ju sanget ajeh. Sanget ajeh begei mai dat. Kerana ajehloh, dikdij mai ku pajeh naiurok kek ya kidat. 27Tapi Yesus Kicap teg sanget ajeh ru Kiberkos kek. Sanget ajeh pen kijinjeg ru ya kibor.

28Telas ajeh Yesus Kimuj nu kateh deg. Bile mai kilek ya walah ku pajeh, pengikot-pengikot Yesus naitanya nu Kek, “Yama jik pek dapat jiperet nyanik ajeh?”

29Yesus kiberlag, “Nyanik begei ajeh dapat biperet had ya doa taleh.”

Yesus Kipasal tentang Idanan

(Mat 17:22-23; Luk 9:43-45)

30Yesus ru Ipengikot-pengikot naiet ju tempat ajeh lalu naipeteros ceknip enai. Bile nailalu lengrik Galilea, Yesus Kinyek mai kilek naipanei enai mong ku pajeh 31kerana Kek tengah Kiajar Ipengikot-pengikot. Kiurok, “Eng Kenon Manusia doh biserah nu kuasa manusia. Eng doh biperdat tapi telas nik arik Eng doh Ngkos nij ju danan Eng!”

32Enai pek naireti ma de Kiajar ajeh tapi naisengoh naiha-tanya hal ajeh nu Kek.

Bok de Paleng Entoi?

(Mat 18:1-5; Luk 9:46-48)

33Lalu Yesus ru Ipengikot-pengikot nailei ku pekan Kapernaum. Telas enai muj nu madeg, Yesus Kitanya nu Ipengikot-pengikot, “Ma de engkebual ku kateh ceknip nek?”

34Naikerdik kerana ku kateh ceknip enai ajeh naibekelahi bok de paleng entoi ku ratak liknai ajeh.#Luk 22:24 35Yesus Kigei lalu Kicereg 12 urag Ipengikot ru Kiurok nu enai, “Bok de kihod kaha-jadi sengoi de canuk, kek hodloh kijadi de paleng keknit ru kijadi begei ha hambe nu dikdij mai.”#Mat 20:26-27; Mrk 10:43-44; Luk 22:26 36Telas ajeh Kek Kikot numom sanget lalu Kiperjeg sanget ajeh ku ngar dikdij liknai. Yesus Kikawal sanget ajeh ru Kiurok nu enai, 37“Bok imai de kiterima numom sanget kerana sanget ajeh kipecaya nu Eng, kek kiterima Eng. Bok de kiterima Eng, kek pek kiterima Eng taleh tapi kiterima Jenang de Kingeng Eng juga.”

Bok de Pek Kilawan Hik Kibepihak nu Hik

(Luk 9:49-50)

38Yohanes kiurok nu Yesus, “Jik mong jibakek numom sengoi kiperet nyanik-nyanik kiguna muh Enjen. Jik jiget kek kerana kek ajeh pek ju hik.”

39Yesus Kiurok nu enai, “Agok get kek. Mai de bahbeh tanda ajaib kiguna muh Eng doh pek kipersok muh Eng. 40Bok de pek kilawan hik kibepihak nu hik. 41Cerngailoh abor! Bok de kiog teu ngeknut hamapen gek nu engkek kerana engkejoi Kristus, kek doh mesti kikep ibenalas bor.”

Hal-hal de Kibeh Mai Naibedosa

(Mat 18:6-9; Luk 17:1-2)

42Yesus Kiurok nij, “Bok imai de kibeh numom pengikot Eng de bianggap pek penteng begei sanget adeh kibedosa, lebeh bor batu kenisar de entoi bibeg ku itangen ru kek bipej nu laot. 43Amen teg engkek kibeh engkebedosa, tasloh teg ajeh! Lebeh bor engkemuj nu serga pek berteg englag daripade engkek muj nu kateh os nyeng ru rimnar teg. Ku pajeh mong os de pek let lei ditehjeh. [44Ku pajeh berngah pek kidat ru os pen pek kilet.]#9:44 Ayat adeh pek mong ku kateh memerip salinan Alkitab manah.

45Amen jog engkek kibeh engkek bedosa, tasloh jog ajeh! Lebeh bor engkemuj nu serga pek berjog englag daripade engkek ru rimnar jog engkek bipej nu kateh os nyeng. [46Ku pajeh berngah pek kidat ru os pen pek kilet.]#9:46Ayat adeh pek mong ku kateh memerip salinan Alkitab manah. 47Amen mat engkek kibeh engkebedosa, kelogloh mat engkek ajeh! Lebeh bor engkemuj nu serga de biperintah ya Jenang had mong englag mat taleh daripade engkek ru rimnar mat engkek bipej nu kateh os nyeng.#Mat 5:29 48Ku pajeh berngah pek kidat ru os pen pek kilet.

49Jap-jap sengoi doh bipesuci ya os sama begei ennog korban bisuci ya empoj. 50Empoj ihad beguna tapi amen empoj ya kibeloj, empoj ajeh pek dapat bipegerag nij. Hodloh engkesui begei empoj ru hodloh engkesui damei ratak liengkek.”#Mat 5:13; Luk 14:34-35

Currently Selected:

MARKUS 9: AEH

Highlight

Copy