MARKUS 11

Yesus Kimuj nu Kote Yerusalem

(Mat 21:1-11; Luk 19:28-40; Yoh 12:12-19)

1Ku mase Yesus ru Ipengikot-pengikot naiha-merek nu kote Yerusalem, nailei nu kampug Betfage ru kampug Betania ku Lod Zaiton. Ku pajeh Yesus Kior nar mom ju Ipengikot baicip canuk. 2Yesus Kiurok nu ubai, “Etloh nu kampug de mong ku ngar hik adeh. Bile jerkemuj nu majeh, jerkek doh jerkebakek nuikor kenon keldei de biseg ru de pek pernah bitebot ya mai. Terlasloh ru enloh keldei ajeh nu madeh. 3Amen mong mai betanya nu jerkek yama jerketerlas keldei ajeh, urokloh, ‘Bihod ya Tuhan. Doh deras Kiperjog balek.’ ”

4Ubai pen baiet ru baibakek nuikor kenon keldei de biseg ku ngar pintu ku beg nong. Lalu ubai pen baiterlas keldei ajeh. 5Memerip urag sengoi de naijinjeg ku pajeh naitanya nu ubai, “Ma de jerkebeh? Yama jerketerlas keldei ajeh?”

6Ubai baiberlag begei de bior ya Yesus ru enai pen naibiar ubai et ru keldei ajeh. 7Lalu ubai pen baien kenon keldei ajeh nu Yesus ru bailapek kenog keldei ya jubah liubai. Yesus pen Kitebot keldei ajeh. 8Mase Yesus Kicip nu kote Yerusalem, jeoi mai nailai jubah enai ku kemil nong. Mong juga mai kilek de naitelog cag-cag pelepah ku selai ru nailai pelepah ajeh ku kemil nong. 9Mai jengoi de naicip ku ngar Yesus ru mai de naijoi ju Icelod naisurag,

“Semoge TUHAN bipateh!

Semoge Kek de Kihol sebegei wakel TUHAN biberkat!#Mzm 118:25-26

10Semoge Kek de doh Kimemerintah begei ha Raja Daud jenang rak hik biberkat!

Semoge Jenang ku serga bipateh!”

11Yesus Kilei nu kote Yerusalem ru Kimuj nu laman Deg Jenang. Ku pajeh Kek Kiperatik dikdij ma de mong ku pajeh. Tapi kerana iarik ya kaha-dui, Kek kiet nu kampug Betania besama ru 12 Ipengikot.

Yesus Kisumpah Keneng Are

(Mat 21:18-22)

12Ku ihuper nij, mase Yesus ru Ipengikot-pengikot naihol ju kampug Betania, Yesus Kicuag. 13Ju kennyak Kek Kibakek nutarek keneng are de ihad jeoi iselak. Kek Kiperek nu keneng are ajeh Kaha-kek ipelek. Tapi bile Kilei nu keneng jehuk ajeh, Kek Kineng had mong ha iselak taleh kerana mase ajeh pekseg musem pelek are. 14Yesus Kiurok nu keneng are ajeh, “Ju hunen, pek mong numom pen doh de kicak pelek are ju keneng hek adeh!”

Ipengikot-pengikot naicerngai ma de biurok ya Yesus ajeh.

Yesus Kimuj nu Laman Deg Jenang

(Mat 21:12-17; Luk 19:45-48; Yoh 2:13-22)

15Mase Yesus ru Ipengikot-pengikot nailei nu kote Yerusalem, Yesus Kimuj nu laman Deg Jenang lalu Kiperet mai jelwal ru mai bakli ku pajeh. Kek Kipetebalek mije-mije mai de beniaga tenukar duet ru bangku mai jelwal cep merpati. 16Kek Kiget mai naien ma-ma pen nailintas laman Deg Jenang. 17Lalu Kek Kibeajar mai jengoi ku pajeh. Kek Kiurok, “Ku kateh Alkitab, Jenang Kiurok, ‘Deg Eng doh bigelar deg doa ha dikdij bangse.’ Tapi engkepejadi tempat adeh ‘tempat kenumpol mai siksij’!”#Yes 56:7; Yer 7:11

18Raknak-raknak imam agame Yahudi ru guru-guru Hukom Taurat naicerngai tentang hal ajeh, jadi enai mula naikek care naiha-perdat Yesus. Enai naisengoh ha Kek kerana naineng dikdij mai cengang empag enai bile naicerngai ha Ineajar.

19Bile iarik ya kelem, Yesus ru Ipengikot-pengikot naiet ju kote ajeh.

Bengsat Yesus tentang Hal Doa

20Ku ipegelap huper, mase Yesus ru Ipengikot-pengikot naiha-et nij nu kote Yerusalem, enai nailalu beg keneng jehuk are ajeh. Enai naineng keneng jehuk ajeh ya dat lei nu ireis. 21Petrus kiteingat ma de ya Yesus Kiurok lalu kiurok nu Yesus, “Guru, nengloh, keneng are de Jensumpah ajeh ya dat!”

22Yesus Kiberlag, “Pecayaloh nu Jenang. 23Cerngailoh abor! Amen engkeor lod adeh, ‘Kosloh ru pikrejloh nu kateh laot!’ hal ajeh doh kitejadi. Tapi engkek hod pek engkeragu-ragu ru betol-betol engkepecaya hal ajeh doh kitejadi.#Mat 17:20 24Kerana ajeh, cerngailoh! Bile engkebedoa ru engkesemanj ma-ma pen, pecayaloh ya engkekep ma de engkesemanj ajeh. Amen engkebeh begei ajeh, ma de engkesemanj ajeh doh biog nu engkek. 25Bile engkeha-bedoa, amen engkek nyik sengik nu mai kilek, hodloh engkeampon senalah mai ajeh canuk supaye Menek engkek de mong ku serga Kiampon dosa engkek juga. [26Tapi, amen pek engkeampon mai kilek, Menek engkek de mong ku serga juga doh pek Kiampon dosa engkek.]”#11:26 Ayat adeh pek mong ku kateh memerip salinan Alkitab manah.#Mat 6:14-15

Tenanya tentang Kuasa Yesus

(Mat 21:23-27; Luk 20:1-8)

27Yesus ru Ipengikot-pengikot nailos nij nu kote Yerusalem. Mase Yesus Kicekcip ku kateh laman Deg Jenang, raknak-raknak imam agame Yahudi, guru-guru Hukom Taurat, ru raknak-raknak mai Yahudi naiterbuk nu Yesus. 28Naitanya nu Kek, “Ya kuasa ma Hek Habeh dikdij ajeh? Bokka de engog kuasa nu Hek Habeh ajeh?” 29Yesus Kiberlag, “Eng juga Ngha-tanya nu engkek. Eng doh Ngpasal ya kuasa bok Ngbeh dikdij ajeh amen engkeberlag tenanya Eng adeh. 30Ya kuasa bokka Yohanes Pembaptis kibaptis sengoi? Ya kuasa Jenangka manusia? Pasalloh!”

31Enai mula naibebincang ratak liknai, “Ma de hiha-urok? Amen hiberlag, ‘Yohanes Pembaptis kibaptis sengoi ya kuasa Jenang,’ Kek doh Kiurok, ‘Yama pek engkepecaya nu Yohanes Pembaptis?’ 32Hik pek buleh hiurok juga, ‘Kek kibaptis sengoi ya kuasa manusia.’ ” (Naisengoh ma de mai jengoi naibeh doh kerana dikdij mai naipecaya Yohanes Pembaptis ajeh numom nabi.) 33Kerana ajeh, naiberlag, “Jik pek jipanei.” Lalu Yesus Kiberlag, “Amen begei ajeh, Eng pen pek Ngha-pasal ya kuasa bok Eng Ngbeh hal-hal ajeh.”

Currently Selected:

MARKUS 11: AEH

Highlight

Copy