LUKAS 2

Yisnos Yesus

(Mat 1:18-25)

1Sekitar mase yisnos Yohanes Pembaptis, raja kerajaan Rom#2:1 Raja kerajaan Rom: Atao, Kaisar. de imuh Agustus kiog perintah supaye dikdij mai ku kerajaan ajeh bibanci. 2Ajehloh benanci de petame sekali bibeh ku kerajaan Rom. Ku mase ajeh, Kirenius ajeh penguasa lengrik Syria. 3Dikdij mai naiet nu pekan liknai maseg-maseg naiha-daptar diri.

4Jadi, ju pekan Nazaret ku lengrik Galilea, Yusuf kiet nu pekan Betlehem ku lengrik Yudea. Pekan Betlehem ajeh tempat yisnos Raja Daud. Kek kiet nu majeh kerana kek ju kenon-cenok Raja Daud. 5Kek kidaptar idiri besama ru Maria itunang de makok ajeh. 6Mase ubai lei ku Betlehem, leiloh imase Maria kaha-perikyos. 7Kek kiperyos numom Kenon keral, iKenon de sulog. Kek kibalot iKenon ajeh ya abat ru kiperdak ku tempat caknak binatag kerana deg tenumpang ya dij tebeg.

Gembale ru Malikat

8Mong memerip urag gembale de naigei ku padag rek beg pekan Betlehem ajeh. Enai naijaga ha dombe enai ku kelem ajeh begei biasa. 9Aleh-aleh mong malikat TUHAN kiperneng idiri nu enai ru cahaya kemuliean TUHAN kisog nu enai ru naijadi sengoh. 10Tapi malikat ajeh kiurok nu enai, “Agok sengoh! Eng ngen gah bor nu engkek ha senuka de entoi nu dikdij mai. 11Ku arik adeh, Peselamat engkek ya yos ku pekan Betlehem, pekan Raja Daud. Ilei ajehloh Tuhan ru Peselamat de bijanji ya Jenang.#2:11 Peselamat de bijanji ya Jenang: Atao, Kristus. 12Adehloh itanda ha engkek: Doh engkebakek Sanget pai yos de bibalot ya abat ru biperdak ku tempat caknak binatag.”

13Aleh-aleh jeoi malikat kilek naihol ju serga. Enai besama ru malikat ajeh ru sama-sama naipateh ha Jenang,

14“Semoge Jenang ku serga de paleng kemil bipemulie!

Ru ku bumi semoge mong damei ku manusia

de bipekenan ya Jenang!”

15Telas malikat-malikat ajeh naijog nu serga, gembale-gembale ajeh naibelwal ratak liknai, “Bei hiet nu pekan Betlehem hiha-neng hal de ya belaku begei de bipasal ya TUHAN nu hik.”

16Jadi, enai bemagij naiet lalu naibakek Maria, Yusuf, ru Sanget pai yos de biperdak ku tempat caknak binatag.

17Telas naineng ha Sanget ajeh, enai naipasal tentang hal de ya naicerngai tentang sanget ajeh nu Maria, Yusuf, ru mai kilek. 18Dikdij mai de naicerngai naikagom ha penasal gembale-gembale ajeh. 19Tapi Maria kidek hal ajeh ku kateh isengik ru lekat kiserngik. 20Telas ajeh gembale-gembale ajeh naijog sambel naipemulie ru naipateh ha Jenang tentang dikdij de ya naineng ru naicerngai kerana dikdij ajeh mimang kena begei de bipasal ya malikat.

Sanget Biog Imuh Yesus

21Mase iumur lapan arik, Sanget ajeh bisunat ru biog Imuh Yesus, muh de ya biog ya malikat nu Kek mase Ikeneng pekseg kimakok.#Im 12:3; Luk 1:31

Yesus Bien nu Deg Jenang

22Bile ya tiba imase ha upacare pembersehan begei de bior ya Hukom Taurat Musa, Yusuf ru Maria baien senanget Yesus nu kote Yerusalem. Ubai baiha-serah Kek nu TUHAN. 23Ku kateh Hukom TUHAN mong bicot, “Dikdij kenon keral de sulog mesti biserah nu TUHAN.”#Kel 13:2, 12 24Ubai juga baiha-og korban begei de bicot kateh Hukom TUHAN, “Nukelamin cep merpati atao nar ikor kenon cep takkukor.”#Im 12:6-8

25Ku mase ajeh, mong numom keral ku kote Yerusalem imuh Simeon. Kek sengoi de benar ru alim. Kek kipoj ha helnol Peselamat mai Israel. Kelog Santen mong besama ru kek. 26Kek biog panei ya Kelog Santen tentang hal adeh: Kek doh pek kidat lei kineng Peselamat de bijanji ya TUHAN. 27Ya penimpen Kelog Santen, Simeon kimuj nu laman Deg Jenang. Ku mase ajeh, Yusuf ru Maria baien senanget Yesus kerana baiha-beh hal de bitetap ya Hukom Taurat ajeh. 28Simeon kikot ru kicedup Sanget ajeh lalu kipateh ha Jenang,

29“TUHAN, Enjen ya Jenpetunei jenanji Jen.

Hunen, hambe Jen adeh buleh kidat ru aman

30kerana ru mat lieng ya ngneng

Peselamat de ya Jenngeng.

31Ya Jensedia Peselamat adeh ha dikdij bangse.

32Kekloh cahaya de kisog mai pek Yahudi supaye enai bipeselamat

ru Kekloh kemuliean ha mai Israel sengoi-sengoi Jen.”#Yes 42:6; 49:6

33Keneng-menek sanget ajeh baihiran baicerngai tentang hal de biurok tentang sanget ajeh. 34Simeon kiberkat enai ru langsong kiurok nu Maria amek sanget ajeh, “Sanget adeh ya bipileh ya Jenang ha pebinasa ru ha peselamat jeoi mai Israel. Kek doh Kijadi tanda ju Jenang de kipeingat sengoi tentang senalah enai. Tapi enai doh nailawan ha Kek. 35Kek doh Kiperlau peniker ku kateh sengik enai. Ru sengik hek doh pehod begei bicog ya pedang.”

36Ku pajeh juga mong Hana kenon Fanuel ju suku Asyer. Kek ajeh numom nabi kerdor. Kek ya ihad engrak. Kek pernah kibegengsir selame tujoh tahut. 37Telas ajeh kibalu ru hunen iumur ya 84 tahut. Kek pek pernah kidek ju laman Deg Jenang. Kelem yah kibeibadah ya doa ru puase. 38Ku mase ajeh, kek kihol nu enai ru kek pen kibesyukor nu Jenang. Kek kipasal tentang hal sanget ajeh nu dikdij mai de naipimpoj imase Jenang Kitebos kote Yerusalem.

Jeknog nu Pekan Nazaret

39Telas Yusuf ru Maria baiperdij dikdij hal de bitetap ya Hukom TUHAN, baijog nu pekan Nazaret, kampug liubai ku lengrik Galilea. 40Sanget ajeh ya guraknak, ya gukuat, mong cerendeg, ru Jenang Kibekenan nu Kek.

Yesus ku Deg Jenang

41Jap-jap tahut, keneng-menek Yesus baiet nu kote Yerusalem baiha-beraya Arik Raya Paskah.#2:41 Arik Raya Paskah: Mai Yahudi nairaya arik adeh untok naiingat ha kejadian Jenang Kiterlas jenang rak enai de bipehambe ku lengrik Mesir entem. Neng Keluaran 12:1-14.#Ul 16:1-8 42Bile umur Yesus ya 12 tahut, enai naiet beraya nu kote Yerusalem begei biasa. 43Bile Paskah ajeh ya dij, enai naijog tapi Yesus lekat mong ku kote Yerusalem. Ikeneng-menek pek baipanei. 44Ubai baisangka Kek mong besama ru mai kilek de naijog besama ru ubai. Telas ya nuarik baicip, baruloh baikek ha Kek ku engkap pitak sesedara-mara ru kekawat ubai. 45Tapi pek baibakek Kek, jadi bailos nu kote Yerusalem baiha-kek ha Kek. 46Telas ya nik arik baikek, baibakek Kek ku laman Deg Jenang. Kek Kigei ku semakdek mabek guru-guru agame mai Yahudi, Kicerngai ha bengwal enai ru Kibetanya soalan nu enai. 47Dikdij mai de ceringai Kek ihad naikagom ha Icerendeg ru Iberenglag. 48Mase Ikeneng-menek baineng Kek, ubai juga baihiran. Ikeneng kiurok nu Kek, “Bei, yama habeh jar apak begei adeh? Jar cemas jarkek ha Hek.”

49Kek Kiberlag, “Yama jerkekek ha Eng? Pek jerkepaneika Eng mimang patot mong ku Deg Apak Eng?” 50Tapi ubai pek baireti ma imaksod berenglag Yesus ajeh.

51Lalu Kek Kijog besama ru Ikeneng-menek nu pekan Nazaret ru Kitaat nu ubai. Ikeneng kidek dikdij hal ajeh ku kateh isengik. 52Yesus ya guraknak ru cerdeg. Jenang ru dikdij mai naibekenan nu Kek.#1 Sam 2:26

Currently Selected:

LUKAS 2: AEH

Highlight

Copy