YOHANES 4

Yesus Kibelwal ru Kerdor Samaria

1Mai Farisi naicerngai gah tentang Yesus Kibaptis mai ru Kikep lebeh jeoi pengikot daripade Yohanes Pembaptis. 2(Sebenarnye Yesus pek Kibaptis bok-bok pen tapi Ipengikot-pengikot de naibaptis mai jengoi.) 3Yesus Kipanei mai Farisi ya naicerngai tentang hal ajeh, jadi Kek Kidek lengrik Yudea lalu Kilos nij nu lengrik Galilea. 4Ku kateh Iceknip nu Galilea, Yesus kena Kilalu lengrik Samaria.

5Kek Kilei nu pekan Sikhar ku lengrik Samaria. Pekan ajeh rek ru tik de entem biog nu Yusuf ya iapak Yakub. 6-8Ku pajeh mong nanek perigi de entemjeh hak Yakub. Yesus Kirasa ihad Kileteh kerana Iceknip nyak, jadi Kek Kigei ku perigi ajeh. Mase ajeh kira-kira tengah arik ru Ipengikot-pengikot ya naiet nu pekan naiha-beli caknak.

Ku mase ajehloh mong numom kerdor Samaria kihol kaha-cidok teu ju perigi ajeh. Yesus Kiurok nu kek, “Ogloh Eng teu.”

9Lalu kerdor ajeh kiberlag, “Jen ajeh mai Yahudi tapi eng adeh kerdor mai Samaria. Yama Jensemanj teu ju eng?” (Kerdor ajeh kibual begei ajeh kerana mai Yahudi pek naiha-becampor ru mai Samaria supaye pek naijadi haram.)

10Lalu Yesus Kiberlag, “Amen hapanei tentang kurnie Jenang ru bok de singmanj teu ju hek, tentu hek doh hasemanj teu ju Eng lalu Ngog teu de kiog sinui nu hek.”

11Kerdor ajeh kiurok, “Jen walah pek becenibok ru perigi adeh pen ihad jerek. Ju belok Jenha-berkep teu de kiog sinui? 12Jenang rak jik Yakub kiog perigi adeh nu jik. Kek, ru ikekenon, ru ibinatag daknek naiguna perigi adeh naiha-berkep teu. Enjen lebeh entoi daripade Yakubka?”

13Yesus Kiurok, “Bok de kingut teu ju perigi adeh doh kihaos nij. 14Tapi bok de kingut teu de Ngog ajeh doh pek kihaos lei ditehjeh. Kerana, teu ajeh doh kijadi begei kacoh teu ku kateh idiri de teros-meneros kigel ru kiog sinui de lei ditehjeh.”

15Jadi, kerdor ajeh kiurok, “Jen, ogloh eng teu ajeh supaye pek nghaos nij ru pek nglos nij nu madeh ngha-cibok teu.”

16Yesus Kiberlag, “Etloh cereg gengsir hek ru jerkelos nij nu madeh.”

17Kerdor ajeh kiberlag, “Eng pek ngbegengsir.”

Yesus Kiurok, “Betol engrok lihek ajeh. Hek mimang pek habegengsir. 18Hek pernah habegengsir lei lima kali. Keral de kigei besama ru hek hunen pen apeka gengsir lihek. Mimang betol engrok lihek ajeh.”

19Kerdor ajeh kiurok, “Hunen pai ngpanei Enjen adeh numom nabi. 20Jadi, ngha-tanya nu Jen. Jenang rak jik naisembah Jenang ku lod adeh tapi mai Yahudi naiurok, ‘Had ku kote Yerusalem taleh mai buleh naisembah Jenang.’ Engrok bok de betol?”

21Yesus Kiurok nu kek, “Pecayaloh nu Eng. Imase doh kitiba bile mai buleh naisembah Menek ku belok taleh ru pek payah nij mai naihuj nu lod adeh atao nu Yerusalem. 22Engkek mai Samaria pek engkekenal Jenang de engkesembah tapi jik mai Yahudi jikenal Jenang de jisembah, kerana Jenang Kiguna mai Yahudi Kaha-peselamat dikdij bangse. 23Tapi imase doh kitiba bile mai de betol-betol naiha-sembah Menek doh naisembah Kek ya tenulog Kelog Santen ru naisembah Kek naijoi neajar de benar. Sebenarnye hunenloh imase ajeh. Sengoi-sengoi de naisembah Kek begei ajehloh de Jenang Kihod. 24Jenang ajeh kelog, jadi mai de besembah Kek hodloh naisembah Kek ya tenulog Kelog Santen ru naisembah Kek naijoi neajar de benar.”

25Kerdor ajeh kiurok nu Yesus, “Ngpanei Mesias (de bigelar Peselamat de bijanji ya Jenang) doh Kihol. Bile Kihol, Kek doh Kipasal dikdij heknod Jenang nu jik.”

26Yesus Kiberlag, “Eng de belwal nu hek hunen, Engloh Peselamat de bijanji ya Jenang ajeh.”

27Ku mase ajeh, pengikot-pengikot Yesus pen naijog ju benglik caknak. Enai naihiran bile naineng Yesus Kibelwal ru numom kerdor Samaria. Tapi pek numom pen de betanya ma de kerdor ajeh kihod ru yama Yesus Kibelwal ru kek.

28Telas ajeh kerdor ajeh pen kiwes itakar teu lalu kijog nu pekan ru kipasal nu mai de mong ku pajeh, 29“Beiloh neng ha numom Sengoi de Kipasal tentang dikdij hal de pernah ngbeh! Enggamak Kek ajeh Peselamat de bijanji ya Jenang.” 30Jadi, enai pen naihol ju pekan ajeh naiha-terbuk nu Yesus.

31Sebelom mai jengoi naitiba, pengikot-pengikot Yesus naipakat Kek cakcak.

32Tapi Yesus Kiberlag, “Eng mong caknak de pek engkepanei.”

33Ipengikot-pengikot pen mula naibetanya ratak liknai, “Mong mai de engen caknak ha Kekka?”

34Yesus Kiberlag, “Ngbeh heknod Jenang de Kingeng Eng nu dunia adeh ru Ngperdij tugas de Kiog nu Eng. Bahneh-bahneh ajehloh caknak Eng. 35Telas engkesepag mat beneh, biasajeh engkeurok lekat mong empat gecek nij lei musem kiknej. Tapi Ngurok nu engkek, nengloh nu selai de ya nep de kipoj baha-kej! 36Hunen musem kiknej ru mai de kikkej kikep iupah. Kerjak enai ajeh kibeh mai naikep sinui de lei ditehjeh. Mai de kisepag mat beneh ru mai de kikej doh baikerakmik besama. 37Betolloh bengwal adeh: ‘Mong mai de sekpag ru mong mai kilek de kikkej.’ 38Eng Ngngeng engkek supaye engkekej kiknej de pek engkecet ru pek engkejaga. Mong mai de cekcet ru jaga, ru engkek de kikkej hasel kerjak enai.”

39Jeoi mai Samaria ku pekan ajeh naipecaya nu Yesus kerana bengwal kerdor ajeh. Kerdor ajeh kiurok, “Sengoi ajeh Kipasal tentang dikdij hal de pernah ngbeh.” 40Kerana ajeh, bile mai Samaria naiterbuk nu Yesus, naisemanj Kigei besama ru enai. Jadi, Kek pen Kigei ku pajeh nar arik.

41Ya gujengoi mai naipecaya nu Yesus kerana Ineajar. 42Naiurok nu kerdor ajeh, “Canukjeh jipecaya kerana hapasal nu jik tapi hunen bile jicerngai Ineajar, jipanei Kekloh betol-betol Peselamat dunia.”

Yesus Kiperbor Kenon Keral Pegawei Kerajaan Rom

43Telas nar arik Yesus Kigei ku pekan Sikhar, Kek Kiet nu lengrik Galilea. 44Entem Yesus pernah Kiurok, “Numom nabi pek bihormat ku kampug ilei sendiri.” 45Tapi, bile Yesus Kilei nu lengrik Galilea Ikampug ajeh, mai ku pajeh naisamut Kek kerana ya naineng dikdij ma de bibeh ya Yesus bile enai mong ku kote Yerusalem ku mase Arik Raya Paskah.

46Kek Kilos nukali nij nu pekan Kana ku lengrik Galilea. Ku pajehloh Kek pernah Kibeh teu kijadi teu wain. Ku pajeh mong numom pegawei kerajaan Rom de ikenon keral tengah kinyik ku pekan Kapernaum. 47Bile kek kicerngai gah tentang Yesus Kihol nu lengrik Galilea ju lengrik Yudea, kek kiterbuk nu Yesus ru kimerayu Yesus Kiet nu pekan Kapernaum ru Kiperbor ikenon de kaha-dat ajeh. 48Tapi Yesus Kiurok nu kek, “Engkek pek engkepecaya nu Eng amen pek engkeneng tanda-tanda ajaib ru hal-hal de luar biasa.”

49Pegawei ajeh kiberlag, “Jen, beiloh joi eng hunen sebelom kenon eng kidat.”

50Tapi Yesus Kiurok, “Jogloh, kenon hek ya kibor.” Sengoi ajeh kipecaya nu bengwal Yesus lalu kijog. 51Ku kateh iceknip nu imadeg, ihambe-hambe naiterbuk nu kek ru naipasal ikenon ya bor.

52Lalu pegawei ajeh kitanya pukol merip ikenon ajeh kibor. Naiberlag inyaknik kibor ku pukol satu dijis kelem nek. 53Apak sanget ajeh kisedar tentang hal adeh: Ku pukol satu dijis ajehloh Yesus Kiurok, “Kenon hek ya kibor.” Jadi, pegawei ajeh ru dikdij iperingak naipecaya nu Yesus.

54Ajehloh tanda ajaib kedue de bibeh ya Yesus ku lengrik Galilea telas Kihol ju lengrik Yudea.

Currently Selected:

YOHANES 4: AEH

Highlight

Copy