KISAH 27

Paulus Kibelayar nu Itali

1Bile ya lei imase untok jiha-et nu Itali, Paulus ru memerip urag sengoi tahanan kilek biserah nu Yulius. Yulius ajeh numom raknak ku batalion diraja aska Rom. 2Jihuj kapal de kihol ju Adramitium de kaha-belayar nu memerip pelabuhan ku lengrik Asia. Aristarkhus juga kibesama ru jik. Kek ajeh mai Makedonia de kihol ju kote Tesalonika. 3Ku ihuper jilei ku kote Sidon. Yulius kibeh bor nu Paulus. Kek kiog Paulus kisueg ikekawat supaye buleh naiog ma de Paulus kiperlu. 4Ju kenjeh jipeteros ceknip jik. Kerana pinoi kuat kilawan alak kapal jik, jik pen jibelayar ku beg Pulau Cyprus de kikerlag pinoi. 5Telas jilalu laot de rek ru pantei lengrik Kilikia ru lengrik Pamfilia, jilei ku kote Mira ku lengrik Likia. 6Ku pajeh raknak aska ajeh kibakek kapal de kihol ju kote Aleksandria de kituju nu Itali. Kerana ajeh, kek kiperhuj jik nu kapal ajeh.

7Memerip arik jibelayar ihad pelahat. Ihad susah jiha-lei ku kote Knidus. Kerana pinoi ihad kuat, jik pek dapat jipeteros ceknip ju kenjeh. Kerana ajeh, jicip nu selatan Pulau Kreta jilalu Tanjong Salmone supaye telindog ju pinoi. 8Ihad susah jibelayar ku sireg pulau ajeh. Ipenyudah jilei ku nanek tempat imuh Pelabuhan Indah de pek nyak ju kote Lasea.

9Kerana ceknip ajeh ihad susah, ya jeoi mase de tebuang. Ku mase jilei ku Kote Lasea, ya pek selamat jiha-belayar nij kerana Arik Pengamponan Dosa mai Yahudi ya selesei.#27:9 Arik Pengamponan Dosa mai Yahudi ya selesei: Arik ajeh kiselesei kena ku musem sengij. Keadaan laot ku mase ajeh ya pek selamat untok mai naiha-belayar. Tentang Arik Pengamponan Dosa, neng Imamat 23:27-28. Kerana ajeh, Paulus kinasihat ha enai begei adeh: 10“Sesedara, ku peniker eng, ceknip hik ihad bahaye amen hibelayar teros. Apeka arap ru kapal hik taleh de kikena rusak terok tapi nyawe hik pen doh kihilag.” 11Tapi raknak aska ajeh lebeh kipecaya nu kapten kapal ru tuan punya kapal daripade engrok Paulus. 12Pelabuhan ajeh mimang pek sesuei hiha-gei ku musim sengij. Kerana ajeh, jeoi pekerjak kapal naisetuju naiha-belayar teros. Naibeharap dapat nailei ku pelabuhan Feniks ru naigei ku pajeh selame musim sengij. Feniks ajeh pelabuhan ku Pulau Kreta de kingerngar nu alak barat daye ru barat laot.

Pes ku Laot

13Ku mase ajeh, pinoi ju selatan mula kipoi pelahat ru pekerjak kapal naisangka enai buleh naibelayar nij. Kerana ajeh, naiperhuj saoh lalu naibelayar rek beg pantei Pulau Kreta. 14Tapi pek liu ju kenjeh, pinoi de bisebot pinoi Timur Laot kiberikpes ju darat. 15Pes ajeh kipet kapal jik. Bile kapal jik pek dapat kibelayar kaha-lawan pinoi, jik pen jibiar kapal ajeh kijoi nong pinoi. 16-17Jik bipergel lei nu englag selatan Pulau Kauda de macot. Ihad susah pekerjak kapal naiperhuj perahu kecemasan nu kapal. Telas ajeh naibeg cog ku sekelileg kapal ajeh untok naipekuat ha kapal ajeh. Lalu naicerleh layar ru naibiar kapal ajeh kijoi pinoi kerana naisengoh kapal enai kilanggar tebeg paser de mong ku pantei lengrik Libya. 18Pinoi teros kiberikpes ru ihad kuat lei ku ihuper enai mula naipej arap ju kapal ajeh nu laot. 19Ku itemuteh nij pekerjak kapal ajeh juga naipej memerip alat kapal nu laot. 20Bearik-arik jik pek buleh jineng mat arik ru perloi, ru pinoi teros kiberikpes. Ipenyudah walahloh neharap jiha-sui.

21Telas memerip arik pek naicakcak, Paulus kijinjeg ku semakdek enai ru kiurok, “Sesedara, amen engkejoi nasihat eng ru pek engkebelayar ju Pulau Kreta, hik pek hikena nerusak ru nerugi begei adeh. 22Tapi hunen pekuatloh sengik engkek kerana pek numom pen doh kidat. Had kapal adeh taleh doh de hancor. 23Eng ngurok begei ajeh kerana kelem-cinek Jenang de ngsembah ru de ngjadi Imilek Kior Imalikat hol nu eng. 24Malikat ajeh kiurok, ‘Agok sengoh Paulus! Hek mesti hahadap raja kerajaan Rom. Dikdij sengoi de naicip besama ru hek doh naiselamat kerana ya bernor Jenang nu hek.’ 25Kerana ajeh, pekuatloh sengik engkek. Eng ngpecaya Jenang. Dikdij ma de biurok ajeh doh kitejadi. 26Tapi hik doh hiseksog ku pantei nanek pulau.”

27Ku kelem ke-14, mase jiterapong ku Laot Adria, ku semakdek kelem, pekerjak-pekerjak kapal naipanei kapal ajeh ya kaha-merek nu darat. 28Kerana ajeh, naicerleh alat pengukor nu laot untok naiukor ijengrek. Ijengrek kira-kira 40 meter. Pek liu ju kenjeh naiukor nij ru naipanei ijengrek ku pajeh 30 meter. 29Enai naisengoh kapal ajeh doh seksog ku batu. Kerana ajeh, naicerleh empat kebek saoh ju kapal lalu naibeharap supaye deras yah. 30Pekerjak kapal ajeh naiha-jar ju kapal. Jadi, naicerleh perahu kecemasan nu laot tapi naibepure-pure begei naiha-cerleh saoh ju ngar kapal. 31Tapi Paulus kiurok nu raknak aska ru aska-aska ku kapal ajeh, “Amen pekerjak kapal pek naigei ku kapal adeh, dikdij liengkek pen pek buleh selamat.” 32Kerana ajeh, aska-aska naitas cog de bibeg ku perahu kecemasan lalu naibiar perahu ajeh kigel.

33Sebelom mat arik kihuj, Paulus kisemanj dikdij liknai naicakcak. Paulus kiurok, “Ya 14 arik engkepimpoj ku kateh bahaye. Selame ajeh pek engkecak ma-ma pen. 34Hunen, ngsemanj engkecakcak supaye engkesui. Dikdij liengkek doh selamat ru pek cedere.” 35Telas ajeh Paulus kikot ruti lalu kiucap syukor nu Jenang ku ngar liknai. Lalu Paulus kiceh ruti ajeh ru mula kicak. 36Semangat enai pen puleh lalu enai juga naicak. 37Ku kapal ajeh mong 276 urag. 38Telas naicakcak lei naibakhek, enai pen naipej gandom nu laot supaye kapal kijadi hayok.

Kapal Kihancor

39Bile mat arik ya kihuj, naibakek darat de pek naikenal tapi ku pajeh mong telok de bepantei. Jadi, naikot keputusan naiha-langgar kapal ajeh nu pantei. 40Kerana ajeh, naitas cog-cog saoh ru naibiar dikdij saoh ajeh karap ku laot. Enai juga naibuka cog de ku istereng. Lalu naiperhuj layar ku kapal supaye pinoi kipoi kapal ajeh nu ngar ru kituju nu pantei. 41Tapi kapal ajeh kilanggar tebeg paser. Ingar kapal ajeh kiseksog lalu pek dapat kibegerak. Kenog kapal ajeh mula hancor bipet ya umbak de kuat.

42Aska-aska ku kapal naibecadang naiha-perdat dikdij sengoi tahanan supaye enai pek buleh nailoi nu darat lalu naijar. 43Tapi raknak aska ajeh kaha-peselamat ha Paulus, jadi kek kiget aska-aska naibeh hal ajeh. Kek kior dikdij sengoi de buleh naililoi naitau canuk ru nailoi nu pantei. 44Mai kilek de naijoi keknit naikakog ku papat atao ku cengeh kapal ajeh. Ju care begei ajehloh dikdij lijik selamat jilei nu darat.

Currently Selected:

KISAH 27: AEH

Highlight

Copy