Mʉkpanganɨa 7
7
Nɔa ɔkumonio amati ɔ ɨngbɔɔ yɛta ɨja
1Tɨa ananɨ, MAKWƆƁƗƗ ɔ꞉sigio Nɔa ɓɔ: «Kumonio amati ɔ ɨngbɔɔ yɛta ɨja, ʉwɛ, nɔ ɨkáá ngɨyɛsɔɔ iɓomu, dɔ ʉwɛ akɛ, nɔnɛnɔ ndʉ wa mombi ata ngbingbii, ati ɔ ɓombi ɓɔ dɔdɔ. 2Wa꞊sɨka ɨhɔ nɔwɛ akɔ migbo yɔ ɓanama ɓaɓomu ngʉɓa ɓangɔmʉ nɔ ɔpɛ, ɓague mɛɗɨanɛka, nɔ ɓoi ɓɔngɔ kʉ mɛɗɨanɛka. Yakamɛngana, akɔ ɓanama ngʉɓa ɓanɔ ɔpɛ, wa꞊sɨka gue nɔ moi ɔngɔ akɔ migbo yɔngɔ ta iɓomu. 3Nɔ ɓata, sɨka ɓague ɓɔ ɓanoi mɛɗɨanɛka nɔ ɓoi ɓɔngɔ kʉ mɛɗɨanɛka akɔ migbo yɔngɔ di di di, akɔɓeyoko migbo yeɓo, tiɗo ambɔ migbo ngɨyeɓo yatɨdʉkamʉ. 4Dɔ, ambise ɔ makwaa mɛɗɨanɛka, na꞊neiso ʉgbaá akɔ dɔdɔ, amati ɔ makwaa ɓatɛkɛɓɛ ɓɔgɨna, naɓutu kʉndʉ ɓisi ɓʉta ɓʉyɛ. Kʉɓanɨ, na꞊dʉka lɨkyɛmʉ liɓomu ngɨlɛ lahomuo, ɨlɛ, na꞉lɨkɨa akɔ dɔdɔ.» 5Kʉdɔ, Nɔa ɔ꞉kɨa ta iɓomu, ngbanga ta ndʉ aka MAKWƆƁƗƗ a꞉mutitio-ɔɔ.
Mipo kɔta maja kɔdʉngɔ akɔ dɔdɔ
6Ɨyɛ mipo kɔta maja kɛ꞉ka jɛnɛ-ɔɔ akɔ dɔdɔ, Nɔa a꞉ɓio tɨa nɔ mago lɨmɨa mɛɗɨa. 7Nɔa ɔ꞉kumonio amati ɔ ɨngbɔɔ ɨhɔ nɔ moi angɔ, nɔ ɓana ɓangɔ, kʉ nɔ ɓanenu ɓangɔ akɔtʉgbʉa mipo kʉta maja ngʉkɔnanɨ. 8Ɓanama ɓɔ ɔpɛ, nɔ ʉɓa ɓangɔmʉ nɔ ɔpɛ, nɔ ɓanoi, nɔ ɨkyɛmʉ iɓomu ngɨyɛ yanaɗa akɔ ɛsɨ, 9ɓɛ꞉ka atɨ Nɔa, nɔ, ɓɔ꞉kumonio amati ɔ ɨngbɔɔ ɓapɨnɨ ɓapɨnɨ, gue nɔ moi ɔngɔ, ngbanga ndʉ aka Asɔɓɨɨ a꞉mutitio-ɔɔ Nɔa. 10Ambise ɔ makwaa mɛɗɨanɛka, mipo kʉta maja, kɛ꞉ka akɔ dɔdɔ.
Nɔa ɛnɔ yaka yɛta ɨmbangɛ
11Ndʉ Nɔa a꞉ɓio tɨa nɔ mago lɨmɨa mɛɗɨa, akɔ ɓisi ɓɔ uyi tɛkɛɓɛ nɔ mɛɗɨanɛka, uyi ngʉwɔ ɓepini, nɔ ɓisi ngʉɓɔnanɨ, ɓambɛna ɓaɓomu ngʉɓa asini ɔ ɨtaka, ɓɔ꞉dʉnga, lɨkʉɓa lɔ ʉgbaá akʉʉ ɓisi lɔ꞉chwanakɨa ɨlɔ tɨa kʉ chwanakɨanɨ. 12Kʉdɔ, ʉgbaá wɔ꞉neyo akɔ dɔdɔ amati ɔ makwaa ɓatɛkɛɓɛ ɓɔgɨna, naɓutu kʉndʉ ɓisi ɓɔta ɓʉyɛ. 13Tɨta nɔ ɓisi ngʉɓɔnanɨ ingainga, Nɔa ɔ꞉kumonio amati ɔ ɨngbɔɔ, ɨyɔ ɨhɔ nɔ ɓana ɓangɔ, atɨ Sɛmʉ, nɔ Hama, nɔ Yafɛtɨ, nɔ moi angɔ kʉ nɔ ɓaneni ɓangɔ ɓaatʉ. 14Inani amati ɔ ɨngbɔɔ, ɓa꞉ɓio kʉ nɔ migbo yɔ ɓayaka ɓaɓomu ngʉɓa ɓahomuo, nɔ ɓanama ngʉɓa ɓɔta ɓakpɔkpɔ, nɔ ʉɓa ɓɔta bele bele, nɔ ɓanoi ɓaɓomu, nɔ lɨkyɛmʉ liɓomu ngɨlɛ labʉmbʉa. 15Lɨkyɛmʉ liɓomu ngɨlɛ lahomuo, ɗepini ɗepini lɛ꞉ka atɨ Nɔa, gue nɔ moi ɔngɔ, nɔ lɔ꞉kumonio amati ɔ ɨngbɔɔ. 16Migbo yɔ ɓanama ɓaɓomu, gue nɔ moi ɔngɔ, ɓa꞉kumonio inani amati, ngbanga ta ndʉ aka Asɔɓɨɨ a꞉mutitio-ɔɔ Nɔa. Kʉdɔ, MAKWƆƁƗƗ ɔ꞉dɨkpa umongu ga kpɛ, iyani ambise ɔ Nɔa.
Mipo kʉta maja kɔdʉkɔ dɔdɔ muɓomu
17Mipo kʉta maja kɛ꞉ka akɔ dɔdɔ, amati ɔ makwaa ɓatɛkɛɓɛ ɓɔgɨna. Ɨyɛ ndʉ mipo ka꞉beluo, kɔ꞉tʉmba ɨngbɔɔ ga ɗaii, nɔ, yɔ꞉pʉnga hɛhɛa tɨa nɔ ɨkʉʉ yɔ dɔdɔ. 18Kʉdɔ, mipo kɛ꞉ka maja, nɔ, kɔ꞉ɗeto nɔ ɨkʉʉ nɔgbɛ akʉʉ ɔ dɔdɔ, nɔ ɨngbɔɔ yɔ꞉hɛhɛa tɨta ananɨ akʉʉ ɔ mipo. 19Dɔ, mipo ka꞉ɓio anɨka tɨa maja nɔgbɛ, lɨkpangba liɓomu ngɨlɛ la ɛsɨ ɔ ɨpá, lɔ꞉jiokio. 20Mipo kɔ꞉nagaaka lɨkpangba nɔ ɓamɛtɛlɛ ndʉ mɛɗɨanɛka, pɔ ɓɛgɨna. 21Lɨkyɛmʉ liɓomu ngɨlɛ lahomuo lɔ꞉dʉka ta dʉka, tɨa atɨ ɓanoi, ɓanama ngʉɓa ɓɔta ɓakpɔkpɔ, nɔ ʉɓɔ iju, nɔ ɓanama ɓaɓomu ngʉɓa ɓanaɗa akɔ ɛsɨ, nɔ ɓombi kʉ ɓaɓomu. 22Ɨkyɛmʉ iɓomu ngɨyɛ yahomuo iyani akɔ dɔdɔ, ya꞉wo. 23Kʉdɔ, Asɔɓɨɨ a꞉dʉka lɨkyɛmʉ liɓomu ngɨlɛ lahomuo akɔ dɔdɔ, anɨngwa ta akɔ ɓombi, ɓanoi nɔ ɓanama ngʉɓa ɓɔta ɓakpɔkpɔ, nɔ ʉɓa ɓɔta bele bele kʉtaa. Ɓaɓomu ɓɔ꞉dʉka ta ɓɔ sɛ akɔ dɔdɔ. Ta Nɔa nangana a꞉tukoo ɨhɔ nɔ ɓombi ngʉɓa a꞉ɓio ɨhɔ naɓɔ amati ɔ ɨngbɔɔ. 24Mipo kʉta maja ngʉkɔnanɨ, ka꞉gbalɨa akʉʉ ɔ dɔdɔ, makwaa mɨa mʉngana nɔ ɓatɛkɛɓɛ ɓɔkʉ.
Currently Selected:
Mʉkpanganɨa 7: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
