Mʉkpanganɨa 35

Yakɔɓɔ ɔhoko anɨsa anɔ Bɛtɛlɛ

1Ya꞉ɓio ɓisi mʉngana, Asɔɓɨɨ a꞉sigio Yakɔɓɔ ɓɔ: «Ɨmɨ, na Asɔɓɨɨ ngɨa na꞉nachwɛanɨa jɛnɛ, angbinga ngɨa wa꞉tʉgbʉa-ɔɔ, akɔkumo mwana ɔ anʉ Esau. Ɔ꞉ngwɨa kyɛnda anɨsa awolo ɨkʉmbʉ anɔ Bɛtɛlɛ, nɔ tɨa inani, wɔ꞊tɔnatuɓokio suo gbɔ́gbɔ ɔ mutebii.»

2Kʉdɔ, Yakɔɓɔ a꞉sigio ɨfananja ngɨangɔ, nɔ ɓombi ɓaɓomu ngʉɓa ɓa꞉ɓio ɨhɔ nayɔ ɓɔ: «Giseni ɓamʉngʉ ɓɔ majɛjɛ ɓɔ ɓɛɛka ngʉɓa nánaɓɔ ta aka. Nɔ gyaɓanakɨeni, nɔ, nécheni lɨpʉkʉ ngɨleno. 3Dɔ, ta꞊nɨsa anɔ Bɛtɛlɛ, aki nabituɓoki-ɛɛ Asɔɓɨɨ, gbɔ́gbɔ ɔ mutebii. Asɔɓɨɨ ngɨananɨ, a꞉nɛkɨa jɛnɛ ɨmɨ isingo akɔ ɓisi ɓɔ ikoko, nɔ, a꞉ɓio ɨhɔ nɛmɨ, aʉmʉa kʉ uɓomu ngʉwa nakyɛndakɔ-ɔɔ.» 4Kʉdɔ, ɓe꞉njo Yakɔɓɔ ɓamʉngʉ ɓɔ majɛjɛ ɓɔ ɓɛɛka, ʉɓa, ɓa꞉ɓio naɓɔ ɓaɓomu, ɨhɔ nɔ lɨkyɛmʉ lɔ machwei ngɨlɛ ɓa꞉ɓio nalɔ amachwei. Yakɔɓɔ ɔ꞉lɨhʉna tinene nɔ Sɛkɛmʉ, asɨ ɔ ɓʉtɨ ɓɔta ɓʉja mʉngana ɓɔ. 5Mbise ɔngɔ, atɨ Yakɔɓɔ nɔ ɓafandɔngɔ, ɓɔ꞉sa ɨɓɔ. Asɔɓɨɨ, ɔ꞉huso ɓombi ɓaɓomu ɓɔ lɨkʉmbʉ ngɨlɛ la꞉ɓio tinetine ananɨ nɔ ʉɓá wɔta ʉja, sɔkɔmʉ adaa ngɨa ɓa꞉ɓʉkpata-ɔɔ.

6Kʉdɔ, atɨ Yakɔɓɔ, ɨhɔ nɔ ɓafandɔngɔ ɓaɓomu, ɓɔ꞉ɓɔya anɔ Luji, ɨya, eno ɓʉɓʉnʉ ɓɔ Bɛtɛlɛ, amati ɔ ɨkʉmbʉ yɔ Kanana. 7Tɨa inani, ɔ꞉tuɓoko gbɔ́gbɔ ɔ mutebii, nɔ, ɔ꞉mʉsʉa ino ɓɔ Asɔɓɨɨ ɔ Bɛtɛlɛ, dɔ, Asɔɓɨɨ a꞉mijeyo ta akɔ ʉmʉa ngʉwɔnanɨ, angbinga ngɨa a꞉ɓio-ɔɔ atʉgbʉa akumo manye. 8Ndʉ, Dɛbɔla ngɨa ɔ꞉ɓɨkyananakɨa Lɛbɛka a꞉wo, ɓɔ꞉mʉhʉna ta inani anɔ Bɛtɛlɛ, nɔ ʉgbaa ngʉwɔ mʉdʉʉ, aɨsɨ ɔ ɓʉtɨ ɓɔta ɓʉja mʉngana ɓɔ. Kʉɓanɨ, Yakɔɓɔ ɔ꞉sʉa ɓʉtɨ ngʉɓɔnanɨ ino ɓɔ, Ɓʉtɨ ɓɔ Didima.

9Angbinga ngɨa Yakɔɓɔ a꞉tɔwa-ɔɔ, anɨngwa anɔ Mɛsɔpɔtamɨa, Asɔɓɨɨ ɔ꞉tɔmʉchwɛanɨa ɓata ta chwɛanɨanɨ, nɔ, ɔ꞉mukiokio. 10Kʉdɔ, Asɔɓɨɨ ɔ꞉musigio ɓɔ: «Ʉwɛ, wa ino ɓɔ Yakɔɓɔ. Ɓa꞊ngɔnasoko tii ɓata ɓɔ Yakɔɓɔ, yakamɛngana, wa꞊ɓio ino tɨta ɓɔ Ɨsalaɛlɛ.»#popoko 32:29 Kʉɓanɨ, Asɔɓɨɨ ɔ꞉misoko tɨta nɔ ino yɔ Ɨsalaɛlɛ. 11Ga Asɔɓɨɨ ɓata nayɔ ɓɔ: «Ɨmɨ akɛ na Asɔɓɨɨ ngɨa Angu Nɔgbɛ. Nɔ꞊ta ɓana ɓaja, nɔ wɔ꞊cho. Ɨbaba, nɔ mababa kɔ ɓombi, ka꞊chwɛa sina aɓʉa ngʉɓɔsɔɔ, nɔ ɓangama ɓɔ꞊chwɛa sina kʉ aʉsʉkʉa ngʉwɔsɔɔ. 12Ɨkʉmbʉ ngɨyɛ na꞉panaka jɛnɛ atɨ atʉngwanʉ Abalaama, ɨɓɔ nɔ atɔ Isaka, na꞊nenjo ɨyɔ tɨa ʉwɛ, ɨhɔ nɔ ɓanɔnɔ ɓɔsɔɔ.» 13Anɨngwa ta akɔ ɨda ngɨyɛ ɓayakanaka-ɔɔ nɔ Yakɔɓɔ, ɨyɔ Asɔɓɨɨ ɔ꞉tʉmbanɨa ga fʉa. 14Yakɔɓɔ ɔ꞉chumo ikopi, akɔ ʉmʉa ngʉwa ɓa꞉ɓio-ɔɔ akɔyakanaka nɔ Asɔɓɨɨ ga chu. Ɔ꞉to umbundo, nɔ ʉkyɛpʉ akʉʉ ɔngɔ, akɔbibiso Asɔɓɨɨ. 15Kʉdɔ, Yakɔɓɔ a꞉sʉa ʉmʉa ngʉwɔnanɨ, ɓa꞉ɓio-ɔɔ akɔyakanaka nayɔ, ino ɓɔ Bɛtɛlɛ#35:15 Bɛtɛlɛ: pɔ ɓɔ ɨsɨ yɔngɔ ɓɔ «Ɨkáá yɔ Asɔɓɨɨ».

Nɔtanɨa ngɨyɔ Bɛnjamɛ nɔ ingwo ngɨyɔ Lakeli

16Atɨ Yakɔɓɔ nɔ ɨfananja ngɨangɔ, ɓɔ꞉ngwa anɔ Bɛtɛlɛ. Ɓɛ꞉sɨnganaka nɔ kyɛnda, nɔ, ndʉ ɓa꞉ɓio tɨa tinetine aɓɔya anɔ Ɛfʉlatɨ, ʉnɔtʉ wɔta ɓʉkaɓʉkaɨ wɔ꞉tɔmʉdʉa Lakeli. 17Angbinga ngɨa Lakeli a꞉ɓio-ɔɔ-sɨ ta akɔdyana menu nɔ ʉnɔtʉ, ga moi ngɨa a꞉ɓio nayɔ akɔnotiso ɓɔ: «Watɨkwɔmʉ ʉɓá, dɔ, wɔ꞉nɔtɔ ɓata kʉ gwa ata gue.»#popoko 30:24 18Dɔ, Lakeli a꞉ɓio tɨta tinene aniwo, kʉdɔ, ɔ꞉mʉsʉa mwana ngɨananɨ ino ɓɔ Beni-Oni#35:18 Beni-Oni: pɔ ɓɔ ɨsɨ yɔngɔ ya ɓɔ mwana ngɨa ɔnakɨnganakiso nɔ Ebelenia. Yakamɛngana, ɨsɛ ɔ mwana ɔ꞉mʉnataniso ino tɨa ɓɔ Bɛnjamɛ#35:18 Bɛnjamɛ: pɔ ɓɔ ɨsɨ yɔngɔ ɓɔ mwana ngɨyɔ ɨkɔndɔ yɔ gue ɔngɔ nɔ Ebelenia. 19Mbise ɔngɔ, Lakeli ɔ꞉wo, nɔ, ɓɔ꞉mʉhʉna anambamba ɔ ɨngbaa ngɨyɛ yasa anɔ Ɛfʉlatɨ, ɓʉɓʉnʉ ɓɔ Bɛtɛlɛmʉ. 20Ananɨ akʉʉ ɔ ɓʉnjaʉ ngʉɓɔ Lakeli, Yakɔɓɔ ɛ꞉maiso jɛnɛ ikopi. Ikopi ngɨyɛnɛnɨ, ya sina ta ananɨ, akɔɓɔya kʉndʉ ɓʉɓʉnʉ.

21Ɨsalaɛlɛ ɛ꞉sɨnganaka nɔ kyɛnda anɨsa animaiso gbama ngɨangɔ, achana Edeli. 22Angbinga ngɨa Ɨsalaɛlɛ a꞉ɓio-ɔɔ, amati ɔ ɨkʉmbʉ ngɨyɛnɛnɨ, mwana angɔ Lubeni, ɔ꞉kwaa nɔ Bila, moi ɨsɛ ngɨyɔ mbise. Yaka ngɨyɛnɛnɨ, ɨyɔ, Yakɔɓɔ a꞉kɔ ta ʉkanɨ.

Ɓana ɓegue ngʉɓɔ Yakɔɓɔ

Yakɔɓɔ a꞉nɔta ɓana ɓegue tɛkɛɓɛ nɔ ɓapɨnɨ: 23Lɛa a꞉nɔta ɨyɔ Lubeni, tapio ngɨyɔ ɓana ɓɔ Yakɔɓɔ, nɔ yɔtɛka ananɨ tɨa Simoni, nɔ Lawi, nɔ Yuda, nɔ Isakali, nɔ Jɛbʉlʉnɨ. 24Lakeli a꞉nɔta ɨyɔ Yɛjɛfʉ, nɔ Bɛnjamɛ. 25Bila ngɨa mombi ɔ tɛa ngɨyɔ Lakeli, ɔ꞉tɔnɔta ɨyɔ tɨa Danɨ nɔ Nafʉtalɨ. 26Jɨlɨpa ngɨa mombi ɔ tɛa ngɨyɔ Lɛa, ɔ꞉tɔnɔta ɨyɔ tɨa kʉ Gadɨ, ɨɓɔ nɔ Aseli. Ɓana ɓegue ngʉɓa Yakɔɓɔ a꞉ɓʉnɔta, anɔ Mɛsɔpɔtamɨa ɨɓɔ ɓaɓomu, ʉɓɔnanɨ.

Yakɔɓɔ ɔɓɔyɔ atɨ ɨsɛ anɔ Mamʉlɛ

27Yakɔɓɔ ɔ꞉tɔɓɔya tɨa atɨ ɨsɛ Isaka anɔ Mamʉlɛ, anambamba ɔ Kɨlɨalɨ-Alaba. Ino yɔ ɨkʉmbʉ ngɨyɛnɛnɨ, ya ɓʉɓʉnʉ tɨa ɓɔ Hɛbʉlɔnɨ. Akɔ ɨkʉmbʉ ngɨyɛnɛnɨ, atɨ Abalaama ɨɓɔ nɔ mwana angɔ Isaka, ɓa꞉woloko jɛnɛ kʉɔ ananɨ pɛɨ, ndʉ ɓɛɛka. 28Isaka a꞉kwaa mago mɨya mʉngana, nɔ ɓatɛkɛɓɛ ɓɛgɨna. 29Mbise ɔngɔ, ɔ꞉kio mʉtɨma. A꞉wo ɓɔ ɔɓieni nɔ mago sɔkɔti nembi, kʉdɔ ɔ꞉sa agbʉka ɓɛsɛngʉʉ, ngʉɓa ɓa꞉sio jɛnɛ pɛɨ. Ɓana ɓangɔ atɨ Esau nɔ Yakɔɓɔ, ɓɔ꞉mʉhʉna.

Currently Selected:

Mʉkpanganɨa 35: buuN

Highlight

Copy