Mʉkpanganɨa 33
33
Yakɔɓɔ ɨnɨanɨɔ nɔ majɨɔ apɛɨ ɔ Esau
1Ɨyɛ ndʉ Yakɔɓɔ a꞉tɨna ajwa ɓɔ, ɔ꞉tɛna tɨa Esau anɨka, nɔ ɓague lɨmɨa ɓɔgɨna ɨhɔ nayɔ. Ɔ꞉nagbonyoko ɓana, akɔ limbika ɗietu, akɔkpatanakɨa nɔ ɓinye ɓeɓo: Lɛa, Lakeli, nɔ ɓombi ɓɔ tɛa ɓapɨnɨ ɓeɓoi. 2Ɔ꞉napɨa ɓoi ɓɔ tɛa ngʉɓɔnanɨ, ɨhɔ nɔ ɓana ɓeɓo apɛɨ. Ananɨ ambise eɓo, yɔtɛka tɨa Lɛa nɔ ɓana ngaɓangɔ. Tɨa Lakeli, nɔ Yɛjɛfʉ ɓɔ꞉pipio ambise ga gbu. 3Kʉdɔ ɨyɔ makwɔngɔ, ɔ꞉tɔchana tɨa apɛɨ, ɔ꞉gbʉkʉmɨa machaa mɛɗɨanɛka akɔɓɔya ta aɨsɨ, pɛɨ ɔ nɨsɨnganɨa manye tinene.
4Nɔ Esau ɔ꞉tʉgbʉa nayɔ akɔtɛtɨa. Ɔ꞉mʉnaputo ga putu, ɔ꞉mʉkpanga akɔ ɨmɨyɔ, nɔ, ɔ꞉mʉmwaka ɨngʉngʉ. Kʉdɔ, ɨɓɔ ɓapɨnɨ ɓaɓomu ɓɔ꞉pʉnga ndɨa#33:4 Pɔ ɓɔ akɔpananiso ɨgyagya. 5Ɨyɛ ndʉ Esau a꞉nguso ajwa nɔ ɨkʉʉ, kʉdɔ, ɛ꞉na ɓoi nɔ ɓana. Ɔ꞉ɓokuo ɓɔ: «Ɓaneni ʉɓɔnanɨ na naɓɔ?» Yakɔɓɔ ɔ꞉mutosio ɓɔ: «Ya ɓana ngʉɓa Asɔɓɨɨ a꞉nenjo ɨmɨ, baya asɔɔ akpatanakɨa nɔ ɨjɨɔ ngɨangɔ.»
6Kʉdɔ, ɓoi ɓɔ tɛa ɓɛ꞉sɨngana, ɨhɔ nɔ ɓana ɓeɓo, nɔ ɓɔ꞉gbʉkʉmakɨa aɨsɨ. 7Lɛa, nɔ ɓana ɓangɔ ɓɔ꞉tɛka tɨa ɨɓɔ akɔ gbʉkʉmakɨa. Mbise ɔngɔ, dɔ tɨa Yɛjɛfʉ ɨɓɔ nɔ Lakeli. 8Esau ɔ꞉ɓokuo ɓɔ: «Ambaja ɔ baneni ɨya tɔ꞉jonokio nayɔ aki?» Ɔ꞉tosio ɓɔ: «Ya apɛpɛ ngɨasɔɔ, ɓɔ dɔ nɨ꞊nɨanɨa nɔ ɨjɨɔ apɛɨ asɔɔ, ʉwɛ makwasɛmɨ.» 9Esau ɔ꞉sugo ɓɔ: «Ɨmɨ aka, nanɔ lɨkyɛmʉ lɨja, mwana ɔ ɨna, sɨka-sɨ ɨlɛsɔɔ ta inani.» 10Ga Yakɔɓɔ ɓɔ: «Haa! Yɔɓieni ɓɔ nɨnɨanɨɔ nɔ ɨjɨɔ apɛɨ asɔɔ, kikiliki asɨkɨa ɓaka apɛpɛ ngɨa sɨkɨanɨ. Dɔ, nujonokio ngɨyeso nɔwɛ, ya ndɨ nujonokio nɔ Asɔɓɨɨ. Ɨnadɔ, wɔ꞉natɛtɨɔ ta iɗo nɔ majɨɔ. 11Kikiliki, sɨka ɓaka-sɨ apɛpɛ ngɨa nɔnɛkɨɔ nayɔ akɛ ta sɨkanɨ. Dɔ, ɨjɨɔ ngɨyɛ Asɔɓɨɨ, ya꞉ɓio akʉʉ asɛmɨ, kʉɓanɨ, nɨnɨanɨa nɔ iɓomu ngɨyɛ nanɔ taa yɔngɔ.» Ɔ꞉mʉkpakpa akɔɓɔya ta aka manye Esau, a꞉baya-ɔɔ.
12Ga Esau nayɔ ɓɔ: «Tɨsa, tɨkyɛndaka tɨta ɨhɔ, ɨmɨ, na꞊ɓio apɛɨ.» 13Yakamɛngana, Yakɔɓɔ ɔ꞉mutosio ɓɔ: «Makwasɛmɨ, wanɨmbɨa ɓɔ ɓana ɓangɔmʉ nɔ mʉndʉmɛ, nɔ yɛtɔ kʉɔ pɛmakɨa ɓakɔndɔlɔ, nɔ ɓangɔmbɛ ngʉɓa ɓanimwiso ɓana ɓɔngɔ maɓɛɨ. Ɓɔɓukyendiseni nɔgbɛ, akɔ iti yɔ ɓisi mɛngana, ɓakɔndɔlɔ ɓaɓomu, ɓadʉka dʉkanɨ. 14Ambɔ makwasɛmɨ, ɨsa-gɔ pɛngɛ pɔ ɨyɔ apɛɨ ɔ baya angɔ. Ngbinga ngɨa ɨmɨ, nɔgbʉkɔ-ɔɔ tɨa ɨgyɛtɛ akpatanakɨa nɔ mʉkyɛndakɨa wɔ mutunduga wɔ ɓanama ngʉwa wa꞊ɓio apɛɨ asɛmɨ, nɔ akɔ mʉkyɛndakɨa wɔ ɓana, akɔɓɔya ta aka nabijoo-ɔɔ, atɨ makwasɛmɨ anɔ Sɛɨlɨ.»
15Esau ɔ꞉sugo ɓɔ: «Ndʉ ya gɔ ɓanɨ, na꞊nasɨa ʉwɛ, nɔ mikpekpe yɔ ɓombi ngʉɓɔsɛmɨ ɓɔmɔ.» Yakɔɓɔ ɔ꞉mutosio ɓɔ: «Watiwomʉ angu. Nɨnɨanɨa gɔ pɛngɛ ta nɔ ɨjɨɔ apɛɨ ɔ makwasɛmɨ.» 16Kʉ nɔ ɓisi ngʉɓɔ ta ɓʉnanɨ, Esau ɔ꞉ngwɨa kyɛnda atɔwa anɔ Sɛɨlɨ.
Yakɔɓɔ ɔwolo ɨkʉmbʉ anɔ Sʉkɔtɨ
17Ɨnadɔ, Yakɔɓɔ ɔ꞉sa yangɔ anɔ Sʉkɔtɨ. Tɨa inani, ɔ꞉tuɓoko ɨkáá, nɔ, ɔ꞉tuɓoko tɨa kʉ nɔ likumba akɔ ɓanama ngʉɓangɔ. Kʉɓanɨ, yaka ngɨyɛ ɓa꞉sʉa-ɔɔ ʉmʉa ngʉwɔnanɨ ino ɓɔ Sʉkɔtɨ#33:17 Sʉkɔtɨ: pɔ ɓɔ ɨsɨ yɔngɔ ɓɔ «Ikumba» nɔ Ebelenia ya꞉kwa ɓanɨ.
18Yakɔɓɔ a꞉ɓɔya ta nɔ majɨɔ, anɔ Sɛkɛmʉ amati ɔ ɨkʉmbʉ yɔ Kanana. Ɛ꞉maiso gbama tɨta tinene nɔ gʉlʉ ngɨananɨ. 19Ɨkʉmbʉ ngɨyɛnɛnɨ, ɛ꞉maiso-ɔɔ ɨhɛma ngɨangɔ, a꞉ɨkaya nɔ ɓanɔnɔ ɓɔ Hamoli#33:19 Hamoli: pɔ ɓɔ Hamoli akɛ a꞉chwa ɨkʉmbʉ yɔ Sɛkɛmʉ, nɔ ɓagyɛgyɛ mɨa mʉngana. 20Kʉdɔ, a꞉tuɓoko gbɔ́gbɔ ɔ mutebii akɔbibiso Asɔɓɨɨ akɔ ʉmʉa ngʉwɔnanɨ. Ɔ꞉ʉsʉa ino ɓɔ: Eli-Eloe-Ɨsalaɛlɛ#33:20 Eli-Eloe-Ɨsalaɛlɛ: pɔ ɓɔ ɨsɨ yɔngɔ ɓɔ «Asɔɓɨɨ ngɨyɔ Ɨsalaɛlɛ» nɔ Ebelenia.
Currently Selected:
Mʉkpanganɨa 33: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
