УблапӀэ 38

ЯщэкӀэнэрэ ирэ шъхьэр

Ехъудрэ Тамарэрэ

1А лъэхъаным Ехъуд ышымэ ахэкӀыжьи, Ӏадулам къалэм щыщэу Хъырэ зыцӀэм пэмычыжьэу псэунэу щытӀысыгъ. 2Ащ къэнаӀан цӀыф горэу ШыуаӀ зыцӀэм ыпхъу Ехъуд ынаӀэ тыридзагъ. Ехъуд ар къыщагъ, ыдэжь ихьагъ. 3Ар лъэрмыхь хъуи, шъао къыфэхъугъ, Ехъуд ащ Ӏэр фиусыгъ. 4Джыри лъэрмыхьэ хъуи, шъао къыфэхъугъ; ащ ШуаӀ фиусыгъ Онан. 5Джыри шъао къыфэхъугъ, ШуаӀ ащ фиусыгъ Щэлэ. Шъузым кӀалэр къызыфэхъум, Ехъуд Къэзиб щыӀагъ. 6Ехъуд ищыпэлъфэу Ӏэр пае шъуз къыштагъ: ащ ыцӀагъэр Тамар. 7Ехъуд ищыпэлъфэу Ӏэр Зиусхьаным ыпашъхьэ щышӀугъэпти, Зиусхьаным ар ыгъэлӀагъ. 8Ехъуд Онан риӀуагъ#38:8 Ижъырэ джурт хабзэу щыӀагъэмкӀэ, сабый имыӀэу лӀагъэм ишъузыгъэр щымыӀэжьым ыш къыщэжьыщтыгъэ – икӀэн зыӀукӀэжьын щыӀэным пае.: «Пшы ишъуз штэжьыри, ащ ычӀыпӀэ иуцу, иунагъо зэтегъэуцожь».

9Бзылъфыгъэм ышъо хидзэщтыр ежь иеу зэрэмыхъущтыр Онан ышӀэщтыгъэ; ащ пае ыш ишъуз зыдэгъолъкӀэ, ищэпс чӀыгум тырикӀэщтыгъэ, ыш пае сабый къыгъэхъунэу фэмыеу. 10Ар зэрэзекӀощтыгъэр Зиусхьаным игопагъэп, арыти ари Ащ ыгъэлӀагъ. 11Ащ ыуж Ехъуд инысэу Тамарэ риӀуагъ: «Сэ скъоу Шелэ ыныбжь екъуфэ, уятэ иунэ шъузабэу исыгу». Аущтэу зыкӀиӀуагъэр, егупшысагъэшъ ары: «Ари ышымэ афэдэу мылӀэгъагъот». Тамарэ ятэ иунэ кӀожьыгъэ. 12Охътабэ тешӀагъ, Ехъуд ишъузэу ШыуаӀ ыпхъу лӀагъэ. Ехъуд зэрэхьатыжьым, имэлхэр зыупхъухэу, Тымнэ щыӀэхэм адэжь иныбджэгъоу Ӏадулам цӀыфэу Хъырэ игъусэу кӀуагъэ.

13Тамарэ ипщ имэлхэр зыщаупхъухэрэм Тымнэ къызэрэкӀорэр зызэхехым, 14шъузэбэ щыгъынхэр зыщиххи, техъор къызэрихъохыгъ, ынэгуи рихъуи, Тымнэ екӀурэ гъогум Ӏут Ӏэнаим икъэлапчъэ ӀутӀысхьагъ. Шелэ ыныбжь икъугъэми, ежь ащ шъузкӀэ зэрэрамытырэр ылъэгъущтыгъэти ары аущтэу зыкӀишӀыгъэр. 15Ехъуд ар къызелъэгъум, ынэгу ихъогъагъэти, бзылъфыгъэ хэтакӀокӀэ ылъытагъ. 16Ехъуд ащ екӀуалӀи, риӀуагъ: «НекӀо, сыкъыбголъынэу сыфай». Ар ежь инысэу зэрэщытыр ышӀэщтыгъэп! Адрэм къыӀуагъ: «Сыда о къысэптыщтыр, укъызголъмэ?» 17Ехъуд къыӀуагъ: «Ӏэхъогъум щыщ чыцӀ цӀыкӀу къыпфязгъэщэщт». Бзылъфыгъэм къыӀуагъ: «Ар къысфяогъэщэфэ, шэс къысэптыщта?» 18Ехъуд еупчӀыгъ: «Сыд фэдэ шэса къыостыщтыр?» Бзылъфыгъэм къыриӀожьыгъ: «Уимыхъурэу шъодэным пышӀагъэмрэ, бэщэу ӀэкӀэ пӀыгъымрэ ары».

ЗыфиӀуагъэхэр ритыхи, ыдэжь ихьагъ, Тамарэ сабый ышъо хэфагъ. 19ЕтӀанэ къэтэджыжьи, кӀожьыгъэ, техъор зытырихыжьи, ишъузэбэ щыгъынхэр зыщилъэжьыгъэх.

20Ехъуд чыцӀ цӀыкӀур Ӏадулам цӀыфэу иныбджэгъум ригъэщагъ шэсыр бзылъфыгъэм къыӀихыжьынэу, ау иныбджэгъу ар ыгъотыгъэп. 21А чӀыпӀэм щыпсэухэрэм яупчӀыгъ: «Тыдэ щыӀа бзылъфыгъэ хэтакӀоу, Ӏэнаим гъогум дэжь щысыгъэр?»

Ау ахэмэ къыраӀожьыгъ: «Мыщ бзылъфыгъэ хэтакӀо щыӀагъэп».

22Ащ Ехъуд дэжь къыгъэзэжьи, риӀуагъ: «Сэ ар къэзгъотыгъэп. А чӀыпӀэм щыпсэухэрэм бзылъфыгъэ хэтакӀо ащ щымыӀагъэу къысаӀуагъ». 23Ехъуд къыӀуагъ: «КӀо ащ ыдэжь шэсыр къэрэн, тэ къыддэрэмыхьащхыхэри ары ныӀэп. Сэ чыцӀ цӀыкӀур фясэгъащэ; ау о бзылъфыгъэр къэбгъотын плъэкӀырэп».

24Мэзищ фэдиз тешӀагъэу Ехъуд къыраӀуагъ: «Тамарэ, уинысэ, хэукъуагъ, джы мары ар лъэрымыхь хъугъэ». Ехъуд ариӀуагъ: «Дэшъущи, жъугъэсты».

25Ау Тамарэ зыращажьэм, ащ ипщы дэжь ыгъэкӀуагъэх раӀонэу: «Сэ лъэрымыхь сызыфэхъугъэр мы пкъыгъохэр зиехэр ары». ЕтӀани ащ къыӀуагъ: «Моу яплъи, мы мыхъурыр, мы шъодэныр, бэщыр къэошӀэжьыха?» – еупчӀыгъ ар.

26Ехъуд къышӀэжьыгъэх. «Мыр сэщ нахь заф, – къыӀуагъ ащ, – ар Шелэ, скъо, зэресымытыгъэр ары зэкӀэ къызэрыкӀыгъэр».

Ехъуд ащ нахьыбэрэ ащ гохьажьыгъэп.

27Ихъошъэн къызэсым, Тамарэ тӀолъфэныкъохэр ышъо хэлъхэу къычӀэкӀыгъ. 28Къыфэхъухэ зэхъум, язырэм ыӀэ къыгъэлъэгъуагъ; арыти мамыкум Ӏудэнэ плъыжь Ӏэм рипхэкӀи, къыӀуагъ: «Мыр апэу къэхъугъ». 29Ау ащ ыӀэ зэкӀихьажьи, ащ ыш къэхъугъ. «Сыдэущтэу уипэрыохъу ӀубгъэзыкӀыгъа?» – ыӀуагъ ныом. Джащ пае ащ Пэрэц#38:29 Пэрэц – ижъырэ джуртыбзэкӀэ къикӀырэр: пхыритхъугъ. фаусыгъ. 30ЕтӀанэ ащ ыуж ыш къэхъугъ, ыӀэ Ӏудэнэ плъыжьыр къещэкӀыгъэу. Ащ цӀэу Зэрахъ#38:30 Зэрахъ – ижъырэ джуртыбзэкӀэ къикӀырэр: нэфышъагъу, нэфылъэм инэфынэ шэплъ. фаусыгъ.

Currently Selected:

УблапӀэ 38: АдыТГ

Highlight

Copy