УблапӀэ 37
37
ЯщэкӀэнэрэ блырэ шъхьэр
Юсыф ипкӀыхьапӀэхэр
1Ятэ нахьыпэкӀэ хымэу зэрысыгъэ КъэнаӀан хэгъэгум Якъубэ итӀысхьагъ.
2Мары Якъубэрэ ащ къытекӀыгъэхэмрэ якъэбар.
Юсыф илъэс пшӀыкӀубл ыныбжьыгъ. Ышхэм ягъусэу, Билхэрэ Зилпарэ акъохэм, былымхэр ыгъэхъущтыгъэх, ахэмэ яшӀэпхъэджагъэхэр ятэ нигъэсыжьыщтыгъ. 3Исраил адрэ ыкъохэм анахьэу Юсыф шӀу ылъэгъущтыгъэ, сыда пӀомэ ар ижъышъхьэм ыгъотыжьыгъагъ, аужыпкъэм ащ гъуапэ зиӀэ щыгъын кӀыхьэ фаригъэшӀыгъагъ. 4Зэш пстэуми анахьэу ар ятэ шӀу зэрилъэгъурэр ахэмэ залъэгъум, ауджэгъуи, гуфэбэныгъэ зыхэлъ гущыӀи раӀожьын алъэкӀыщтыгъэп.
5Юсыф зэгорэм пкӀыхьапӀэ ылъэгъуи, ар ышымэ къафиӀотагъэти, джыри нахь лъэшэу ахэмэ ар ауджэгъугъ. 6Ащ ахэмэ ариӀуагъ: «ПкӀыхьапӀэу слъэгъугъэм моу шъукъедэӀуба. 7Бганэхэр губгъом щэтэпхы фэд, мары сэ сибганэ занкӀэу къэуцугъ, мары шъо шъуибганэхэр ащ хъураеу къеуцокӀыхи, сэ сибганэ шъхьащэ къыфашӀыгъ».
8Ащ ышымэ къыраӀуагъ: «О тэ пачъыхьэ укъытфэхъу пшӀоигъу, ара? О пӀэ тилъы хъунэуи?» – ИпкӀыхьапӀэхэмрэ игущыӀэхэмрэ апае ар джыри нахь лъэшэу алъэгъу мыхъоу хъугъэ. 9Ежь Юсыф джыри ащ нэмыкӀ пкӀыхьапӀэ ылъэгъуи, ышымэ ар къафиӀотагъ: «Мары сэ пкӀыхьапӀэ слъэгъугъэ, мары тыгъэми, мазэми, жъогъо пшӀыкӀузми сэ шъхьащэ къысфашӀы!»
10Яти ышыхэми а пкӀыхьапӀэр къызафеӀуатэм, ятэ ащ къегыеу къыриӀуагъ: «Сыд пкӀыхьапӀа плъэгъухэрэр? Сэри, уяни, о пшыхэри чӀыгум нэс о шъхьащэ къыпфэтшӀынэу уадэжь тыкъэкӀонэу ара?»
11Ышмэ ащ агу къыфыхэкӀыщтыгъ; ау ятэ а къэбарыр ыгу риубытагъ.
Юсыф ышыхэм зэращагъэр
12Зэгорэм Юсыф ышыхэр ятэ имэлхэр Щэхэм дэжь щагъэхъунэу кӀуагъэх. 13Исраил риӀуагъ Юсыф: «Пшыхэм Щэхэм дэжь мэлхэр щагъэхъухэба? КӀо, ори узгъэкӀон ахэмэ адэжь». Юсыф джэуап къытыжьыгъ: «Мары сэ сыхьазыр».
14Исраил ащ риӀуагъ: «КӀо, пшыхэр узынчъэхэмэ, былымхэм язытети къеплъ, джэуапи къысфахьыжь». Арыти Хъэурэн кӀэир ыбгыни, Юсыф Щэхэм къэкӀуагъ. 15Юсыф гъощагъэу шъофыр къыкӀухьэзэ, лӀы горэ къыӀукӀи, къеупчӀыгъ: «Сыда узылъыхъурэр?» 16«Сэ сызлъыхъухэрэр сшыхэр арых, – къыӀуагъ Юсыф, – къысаӀу, тыда ахэмэ мэл пчэнхэр зыщагъэхъухэрэр?» 17Адрэм къыриӀожьыгъ: «Ахэр мыщ ӀукӀыжьыгъэх, сэ зэхэсхыгъэ ахэмэ Дотан кӀонхэу зэраӀощтыгъэр». Джащыгъум Юсыф ышымэ ауж ихьи, ахэр Дотан къыщигъотыгъэх. 18Ахэмэ ар чыжьэкӀэ къалъэгъугъ; анэсыфэ нэс ар зэраукӀыщтыр зэхалъхьэу аублагъ. 19Ахэмэ зэраӀожьыгъэ: «Мары пкӀыхьапӀэлъэгъур къэкӀо. 20НекӀох, тыукӀынышъ, псынэ игъукӀыгъэ горэм итыдзэжьын, хьэкӀэ къуакӀэмэ ашхыгъэу тӀощт; теплъын ащ ипкӀыхьапӀэмэ къарыкӀырэм». 21Ау ар Рубэн зэхихи, Юсыф къыгъэнэжьыгъ. «Ыпсэ хэтэшъумыгъэх», – ыӀуагъ ащ. 22ЕтӀани къыӀуагъ: «Лъыр шъумыгъачъэ, шъоф нэкӀым ит псынэ игъукӀыгъэм ишъудз, ау шъуӀэ тешъумыщай». Аущтэу ащ зыкӀиӀуагъэр, ар псэоу къыгъэнэжьынышъ, ятэ ритыжьынэу арыгъэ.
23Юсыф ышымэ адэжь къызэкӀом, ахэмэ ащ гъуапэ зиӀэ щыгъын кӀыхьэу щыгъыгъэр щатхъыгъ. 24Ащ нэужым аубыти, псынэм радзагъ; ар нэкӀыгъэ, псы итыгъэп. 25Зэшыхэр шхэнхэу тӀысыгъэхэ къодыеу зэплъэхэм, алъэгъугъ: исмахьилэ цӀыфхэу сатыушӀэ куп ГъылыӀад къикӀэу къэкӀо, ахэмэ ямахъшэхэм мэ ӀэшӀу къызпихрэ чъыги, Ӏэзэгъу уци, пцантхъи Мысырым ащэ. 26Ехъуд ышымэ ариӀуагъ: «Тшы тыукӀымэ, сыда шӀуагъэу хэлъыр? Ар зэрэтыукӀыгъэр тыушъэфыжьын фаеу хъущт. 27Исмахьилэ цӀыфхэм ятэжъугъащ, тэ тӀэ ащ нэмысыгъэу хъущт. Сыд Ӏо фаеми, ар тэ тшы, зы пкъышъол, зы лъы тыщыщ».
Зэшыхэм ащ дырагъэштагъ. 28Мидиам щыщ сатыушӀэхэр блэкӀыхэ зэхъум, Юсыф псынэм къыралъэшъужьи, исмахьилэ цӀыфмэ тыжьын ахъщэ тӀокӀыкӀэ аращагъ, адрэхэми Юсыф Мысырым ащагъ.
29Рубэн къэкӀожьи, псынэм зеплъэм – Юсыф исыжьэп. Гукъэошхом хэтэу ащ ищыгъынхэр зэӀитхъыгъэх. 30Ышымэ адэжь къыгъэзэжьи, Рубэн ариӀуагъ: «Шъэожъыер щыӀэжьэп! Адэ сэры? Тыдэ сэ сыкӀощта?»
31ЕтӀанэ зэшымэ Юсыф ищыгъын ашти, ачъэ горэ аукӀи, щыгъыныр лъым хагъэуагъ. 32Щыгъын кӀыхьэр ятэ фахьыжьи, раӀуагъ: «Мыр тэ къэдгъотыгъ! Еплъба – о пкъо ищыгъына мыр?»
33Якъубэ еплъи, къэкууагъ: «Мыр скъо ищыгъын! ХьэкӀэ къуакӀэмэ ар ашхыгъ! Ары, Юсыф захацунтхъагъ!»
34Якъубэ ищыгъынхэр зэхицунтхъэхи, дзыопхъэ шэкӀ пхъашэм хэшӀыкӀыгъэ шъыгъо щыгъынхэр зыщилъагъэх, мэфабэрэ ыкъо ыгъэягъ. 35Ыкъохэри, ыпхъухэри ар агъэрэхьатынэу къэзэрэугъоигъэх; ау Якъубэ рэхьатынэу фэягъэп. «Нэшхъэигъэм сыхэтэу, – ыӀуагъ ащ, – скъо дэжь хьадрыхэ сыкӀожьыщт». Аущтэу зэпимыгъэоу Юсыф ыгъаещтыгъэ.
36Мидиам цӀыфхэм Юсыф Мысырым ипачъыхьэ фирхьауным иӀэнэтӀэзехьэмэ ащыщэу, икъэухъумакӀомэ ятхьаматэу Потыфар ращагъ.
Currently Selected:
УблапӀэ 37: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
