УблапӀэ 34

ЯщэкӀэнэрэ плӀырэ шъхьэр

Якъубэ ыпхъу Динэ емыкӀу къызэрэрашӀагъэр

1Динэ, Якъубэ Леа фигъотыгъэ пшъашъэр, а чӀыпӀэм щыпсэурэ пшъашъэмэ адэжь кӀуагъэ. 2А хэгъэгум ипщэу хъыу лъэпкъым щыщэу Хъамор ыкъоу Щэхэм пшъашъэр къылъэгъуи, ыубытыгъ, голъи, емыкӀу рихыгъ. 3Ащ ыпсэ Якъубэ ыпхъоу Динэ кӀэрыпкӀагъ, пшъашъэр шӀу ылъэгъугъэу, гущыӀэ ӀэшӀукӀэ дэгущыӀагъ. 4Щэхэм ятэу Хъамор риӀуагъ: «Мы пшъашъэр шъузыкӀэ сэгъаштэ». 5Якъубэ ыпхъу Динэ ынапэ зэрэтырахыгъэр зэхихыгъ. Ау ыкъохэр былымхэм апэтхэу шъофым щыӀагъэхэти, ахэр къэкӀожьыфэхэ Якъуби зи ыӀуагъэп. 6Щэхэм ятэу Хъамор Якъубэ дэжь къыдэгущыӀэнэу къэкӀуагъ. 7Якъубэ ыкъохэр, хъугъэр зызэхахым, шъофым къикӀыжьыгъэх, лъэшэу гукъао лӀымэ ащыхъугъ, губжым къызэкӀигъэнагъэх, сыда пӀомэ Якъубэ ыпхъу лые зэрэрахыгъэр – ИсраилкӀэ емыкӀушху, аущтэу пшӀэ хъущтыгъэп.

8Хъаморэ къыӀуагъ: «Сэ скъо, Щэхэм, ыгукӀэ шъуипшъашъэ кӀэрыпкӀагъ; сышъолъэӀу, шъузкӀэ ар ащ къешъутба. 9Благъэ шъукъытфэхъун; шъуипшъашъэхэр тэ къытэшъутыхэзэ шъушӀын, тэ типшъашъэхэр шъо шъуштэных. 10Шъукъыддэпсэу, тичӀыгу шъуапашъхьэ илъ, шъущыпсэу, шъущылажь, шъуиунаеуи ар зыӀэкӀэжъугъахь». 11Ежь Щэхэм пшъашъэм ятэрэ ышхэмрэ ариӀуагъ: «НэшӀукӀэ шъукъысэплъынэу сшӀэ къодыемэ, зэкӀэ зыфашъуӀорэр къышъостыщт. 12ЗыфашъуӀорэм фэдиз нысэ уасэрэ шӀухьафтынрэ къэжъугъэнаф, къышъостыщт; пшъашъэр шъузкӀэ къысэшъути ары ныӀэп сызыфаер».

13Якъубэ ыкъомэ Щэхэми ащ ятэу Хъамори тхьагъэпцӀыгъэ хэлъэу джэуап аратыжьыгъ, сыда пӀомэ ащ ежьхэм ашыпхъоу Динэ ынапэ тырихыгъ. 14«Ар тфэшӀэщтэп, – аӀуагъ ахэмэ, – цӀыфэу сунэт амышӀыгъэм шъузкӀэ тшыпхъу еттыныр тэркӀэ емыкӀу хъущт. 15Шъо шъуилъэӀу тэ тыкъызезэгъыщт закъор шъори тэщ фэдэ шъухъоу, зэкӀэ шъо хъулъфыгъэу шъуиӀэр сунэт шъушӀыгъэ зыхъукӀэ ары. 16ЕтӀанэ типшъашъэхэр къыжъудэдгъэкӀощтых, шъо шъуипшъашъэхэри тэ шъузкӀэ тштэщтых, тыжъудэпсэущт, зы цӀыф лъэпкъэуи тыхъущт. 17Ау сунэт зяжъугъэшӀынымкӀэ шъукъытэмыдэӀумэ, тэ тшыпхъу тигъусэу тыӀокӀыжьы».

18Хъамори ащ ыкъо Щэхэми а гущыӀэхэр агу рихьыгъэх. 19КӀэлэ ныбжьыкӀэм ащ лъыпытэу сунэт заригъэшӀыгъ – джарэу Якъубэ ыпхъу ащ шӀу ылъэгъущтыгъэ. Ятэ иунэ иунагъокӀэ Щэхэм ары лъытэныгъэ анахьэу зыфашӀыщтыгъэр. 20Хъаморэрэ ащ ыкъо Щэхэмрэ якъалэ икъэлэпчъэ цӀыф зэӀукӀапӀэм къыӀухьэхи, къэлэдэсмэ мырэущтэу араӀуагъ: 21«Мы цӀыфхэр тэркӀэ мамырых, мы чӀыгум щэрэтӀысхи, шъхьафитэу щэрэлажьэх; мары чӀыгур апашъхьэ щыхъоо пщау. Япшъашъэхэр тэ шъузкӀэ къытатхэу, тэ типшъашъэхэри ежьхэм яттыхэу тшӀыщт. 22Мы цӀыфхэр къыддэпсэунхэу, зы цӀыф лъэпкъэуи тыщытынэу къызезэгъыщтхэ закъор – ежьхэр сунэт зэрашӀыгъэхэм фэдэу, тэри зэкӀэ тихъулъфыгъэхэр сунэт тшӀымэ ары. 23ЯӀэхъогъухэри, ямылъкуи, зэкӀэ ябылымхэри тэтые хъущтхэба? Адетэжъугъашти, ахэр къытхэтӀысхьащтых». 24Къэлэдэсхэм Хъаморэрэ ащ ыкъоу Щэхэмрэ адырагъэштагъ; къэлэ хъулъфыгъэхэр зэкӀэ сунэт ашӀыгъэх.

25Ящэнэрэ мафэм, ахэр зыщысымэджагъэхэм, Якъубэ ыкъуитӀу, Динэ ышыхэу ЩымӀонрэ Лэуйрэ, шъхьадж ичатэ къышти, пэрыохъу ямыӀэу къалэм дахьэхи, зэкӀэ хъулъфыгъэхэр аукӀыгъэх. 26Хъамори ащ ыкъоу Щэхэми чатэкӀэ аукӀыгъэх; етӀанэ Щэхэм иунэ Динэ къыращыжьи, къэкӀожьыгъэх. 27Нэужым Якъубэ ыкъохэр укӀыгъэхэм адэжь къэкӀожьхи, ашыпхъу ынапэ зыщытырахыгъэ къалэр ахъункӀагъ. 28Ахэмэ мэл пчэнхэри, былым пӀашъэхэри, щыдхэри, сыд лӀэужыгъоу къалэм дэлъыгъэри, шъофым рагъотагъэри аштагъ. 29ЗэкӀэ ахэмэ ямылъку зыдаштагъ, зэкӀэ ясабыйхэри, яшъузхэри гъэрэу аубытыгъэх, зэкӀэ унэмэ арылъхэри зэрапхъуагъэ.

30Якъубэ ЩымӀонрэ Лэуйрэ ариӀуагъ: «Мы чӀыгум щыпсэухэрэм, къэнаӀан цӀыфхэми пэрыц цӀыфхэми салъэгъу мыхъоу шъушӀи, тхьамыкӀагъо къысфэшъухьыгъ. Сэ цӀыфэу сиӀэр макӀэ; сэ къыспэуцунхэу къэзэрэугъойхэмэ, сэри зэкӀэ тилӀакъуи тагъэкӀодыщт». 31Ау ЩымӀонрэ Лэуйрэ ятэ къыраӀожьыгъ: «Тэ тшыпхъу бзылъфыгъэ хэтакӀом фэдэу удэзекӀо хъущта?»

Currently Selected:

УблапӀэ 34: АдыТГ

Highlight

Copy