Maatiyos 23

Yeesus Sercat dhiiceenit kee Faarisiinko xiyaw asuusa

(Markos 12:38-39; Luukas 11:43-46; 20:45-46)

1Sarrah Yeesus, amaa mango xiyaw kee ishi katattaynitik: 2“Sercat dhiiceenit kee Faarisiin Moosat kursek xiyaw yaydarasoona defeyeenih yanin, 3amaydo, usun sinak arhxinnanim abteenih dhawrha kibah, usun aban abittot maabina. Amayim lel usun xiyaw yaydurusiinim sinneh maabaanamhi sabbatah kinni. 4Xaf-arhxinnixe cuuka yarhuynih, xiyaw sunkukke hayan, sinneh laakin amaa cuuka inki ferah minkix-ishoona mifarhaana. 5Inkoh usun aban ciyyo xiyaw akah tablo aban. Amayim lel Kitaab shathrit yibbirhe xirze#23:5 Kitaab shathrit yibbirhe xirze Kalxit Cahdehi shathrit yibbirhe cindhaa qarbat care kinni. Yahuud lel yassilliin gedda xaraa kee dambarakke hashshiitan. yaynabin, sinni sarih zirifraf#23:5 Zirifraf Yahuud Yallah yacbadoona sinni natsalah affara nukuruk hayan zirifraf kinni. lel yayrheerhiinimhi sabbatah kinni. 6Ciidodulle naba cara, sunagoogitidde lel mece defeenan, 7cadaagalle salaam akko yarhxiinim kee ‘mudarris’ yarhxiinih akah deecimaanam kixinon. 8Atin laakin inki mudarris litiinimhi sabbatah, ‘mudarris’ sinak arhxe wayoona, inkoh lel sacul kitin. 9Atin inki Abba carshelle yaneya, litiinimhi sabbatah, baarholle walaa inkettak ‘abba’ marhxina. 10Atin inki santisheena, Masiix, litiinimhi sabbatah walaa inkettak ‘santisheena’ marhxina. 11Sinadde nabati sin khaddaam yakkoo. 12Amayim lel ishe xaf-ishinnanti sam-yarhxo, ishe sam-ishinnanti lel xaf-yarhxo kinamhi sabbatah kinni.

13Ko munaafiqhiin kin sercat dhiiceenit kee Faarisiinik, carshi nigsinna xiyaw nifidde aliftaanah, atin sinneh moorobtaana, orobo farha mara lel mixabtaanamhi sabbatah, sin careyta! [ 14Ko munaafiqhiin kin sercat dhiiceenit kee Faarisiinik, gubonti carwa tandhucinyaako takaleh salat tayrheerhin. Taymih atin sirii firde geytoona kitin.] 15Ko munaafiqhiin kin sercat dhiiceenit kee Faarisiinik, inki xiyawto sinni diinidde sayishshoona ciloh bad kee baarho takluliinih, sin diinidde saya gedda lel, sinko durrubuh uma jahannab barha akko abtaanamhi sabbatah, sin careyta!

16‘Akkinnanti macbadah dhiiwitemko inkim male, macbad dahabah dhiiwitinnanti laakin, ishi dhiiwah yandhibbirhe’ tarhxe inti-malit kin santisheenitik sin careyta! 17Inti-malit kin duudito! Awlihti naba? Dahaba, woole amaa dahab yaqhiddise macbada? 18‘Akkinnanti mazbaxah dhiiwitemko inkim male, mazbaxalle tane muttuxuwah dhiiwitemko laakin, ishi dhiiwah yandhibbirhe’ lel tarhxin. 19Inti-malit kin xiyawo! Awlihti naba? Amaa muttuxuwa, woole amaa muttuxuwa yaqhiddise mazbaxa? 20Amaydo, mazbaxah dhiiwitinnanti, amaa mazbax kee inkoh amalle anniinnanimih dhiiwita. 21Amaa macbadah dhiiwitinnanti lel, amaa macbad kee inkoh amadde siga Yallah dhiiwita. 22Carsheh dhiiwitinnanti lel Yallih naba nugus-kurseh kee amalle defeya kayyah dhiiwita.

23Ko munaafiqhiin kin sercat dhiiceenit kee Faarisiinik, nacnac, cheenaddaam kee kammuunko taman-ya af tayyaaciinih, sercatadde geytimta naba xaaja: xaqqe, raxma kee imaan xabtaanamhi sabbatah, sin careyta! Akim xabekkah, tayim abtoona sinalle tanem kinni. 24Cindhaa qacatta yachchiriyeh, gaalatto yandhuce, inti-malit kin santisheenito!

25Ko munaafiqhiin kin sercat dhiiceenit kee Faarisiinik, addaako hirfe kee nabsi farhiiko yemmeegeh yane hanuk, kobbaaya kee shaxan irooko qarcoyishshaanamhi sabbatah, sin careyta! 26Ko inti-male kin Faarisiita, amaa kobbaaya kee shaxan irooko koh qarcowo kinnik, tookomeh addaako qarcoyish.

27Ko munaafiqhiin kin sercat dhiiceenit kee Faarisiinik, irooko bilcittah tambulluwe qabaara, addaako laakin rabtemhi lafuf kee abaxte caleeko yemmeegeyah higgiditiinimhi sabbatah, sin careyta! 28Amaydo atin gantah irooko aki maralle xaqqi-wannunuh higgiditin, sin adda laakin nifaaq kee sercat-maliinooko temmeegiinih tanin.

29Ko munaafiqhiin kin sercat dhiiceenit kee Faarisiino! Sin careyta! Nobowat qabaara siraxtaanah, xaqqi-wannunhi waydal bilcishshan! 30‘Ninni abbubhi geddadde nineh nakkeedo, nobowat biilohi xarhnanadde tenlih angale mirhaarhino’ lel tarhxin. 31Amaymih, nobowa yigdife marih cindham kitiinimih sinneh sinnelle tashhidin. 32Amaydo, sin abbub erherhisheenim abaysha. 33Ko caroro, ko datalitti zarawo, jahannab firdeeko aaginah kuddoona kitiini? 34Amaydo, atin garo akko tagdafoona kee masqalakke akko takartoona, garo lel sinni sunagoogitidde akko sabactoona kee daafooko daafo fanah hadantoona litin nobowa, kas-le mara kee sercat dhiiceenit sinalle farak aniyo. 35Amayim lel xaqqi-wanna kin Abeel biilooko, aykee tamaa atin macbad kee mazbax hi fanalle tigdifin Beraakhit barha kin Zakariyyaati biilo fanah, inkoh xaqqi-wannunti biili baarholle xarhiteya sinalle takko ciloh kinni. 36Tayim inkoh ta ijolle takko kinam rummah sinak arhxiyuk ane.

Xazan Yerusaalem Sabbatah

(Luukas 13:34-35)

37Yerusaalem, Yerusaalem, nobowa tagdifeh, tamaa alle farritimtemille dhayit cidda tiyawo! Ayidhdhale gedda, atu akko farhinnixitoya, dor-hotta ishi chaaqhut ishi galedde akah taskatteeka balih ku cindham koh askatte dhaarhiyo! 38Taykinna, sin cari coona yakkeh raaco kinni. 39‘Maddari migacalle yamiiteti dhaacole kinni’ #Zaabur 118:26 tarhxiinindah, yi tabloona makitiinim sinak arhxiyuk ane” akko yerhxe.

Currently Selected:

Maatiyos 23: SCC

Highlight

Copy