Maatiyos 17

Anqayaayar

(Markos 9:2-13; Luukas 9:28-36)

1Lixa lellecik sarrah Yeesus Bithroos, Yacqoob kee kaa sacal kin Yohannis isheelih beyeh, sinni ulah wuli dherh koomalle ten yeyyeece. 2Ten afalle lel kaa xibar yinqiyyireyaako, kaa nif ayrotta balih ife, kaa sari lel ifo balih ziffowe. 3Taykinna lel Moosa kee Eliyaas amalle yumbulluynih kaalih waanishen. 4Bithroos lel Yeesusuk: “Maddara, nanu talle nanniyem mecem kinni. Ku farhi yekkemko lel talle adooxa daasa siraaxo kiyo, tiya kottah, tiya Moosah, tiya lel Eliyaasah” akko yerhxe. 5Bithroos kaddih waanishak anih lel, taykinna, ifooko temmeege camburre ten agoogishsheyaako, carsheeko wuli dhaw camburredde: “Tati yinkixxine yi Barha kinni. Anu kaalih xedeneena kiyo. Atin kaa oobbaanta” yerhxe. 6Amaa katattaynit tayim yoobbin gedda, nif gameenih mangum mashshiiten. 7Yeesus laakin yemeeteyaako: “Uguta, mimashshiitina” arhxuk ten dhage. 8Usun intit aganalle kulux-ishen gedda, Yeesusko bextih walaa inketta maballinnooni.

9Amaa koomaako oobak lel Yeesus: “Xiyawti Barhi rabaako ugutandah, ta mablo walaa inkettah miwarishina” yerhxeyaako ten yeemere. 10Amaa katattaynit lel: “Aymih kinni sercat dhiiceenit yookomeh yamaato leti Eliyaas kinni yarhxiinim?” yerhxiinih kaa esseren. 11Usuk: “Yoo, Eliyaas amiituk yane, ummanna yaymaaco kinni. 12Anu laakin, Eliyaas mece geddaakoh yemeeteh yane, usun laakin kaa maarhaginnooni. Sinneh farhinnannim akko aben. Xiyawti Barhi lel amayim balih ten galedde yamcazzabo kinam sinak arhxiyuk ane” yerhxeh alle yedebbe. 13Sarrah amaa katattaynit Yaythimmiqhe Yohannis sabbatah akah warishak yanem yeerhegin.

Jinnetta-le cindhookih urusnan

(Markos 9:14-29; Luukas 9:37-43)

14Amaa mango xiyawalle yemeetin gedda lel, wuli xiyawti kaalle yemeeteyaako, gululluubuweh: 15“Maddara, yi barhalle alle yoh raxmat, cida junuun laxuuh mangum laxuutak yanek. Mangole gedda giradde, mangole gedda lel layedde rada. 16Anu ku katattaynitille kaa baahek lel usun kaa urusoona mirhiicinnooni” akko yerhxe. 17Yeesus lel: “Ko imaan malit kin temxeleelefe ijow! Anu manda fanah sinlih sugo liyo? Manda fanah lel sinalle curo liyo? Talle yolle bah” akko yerhxe. 18Sarrah Yeesus kaa yoskoolofeyaako amaa jinnetti akko yewce, amaa cindhooki lel akkanih ure. 19Sarrah amaa katattaynit ulah Yeesusulle yemeetiinih: “Aymihi nanu kaa nayyaaco tannem?” akko yerhxin. 20Usuk lel: “Tamaa sin imaan dagnah sabbatah. Atin ta adrattot fireh idhdha imaanko teelliinih takkindo, ta koomak: ‘Takkeeko toohille egeecez’ akko tarhxin gedda tagaacazo kinni, sinah akkinnixem lel tannaw maki” akko yerhxe. [21“Ta gina le junuun, salaat kee siyaamko bextih walaa inkimih yawco mirhiica” akko yerhxe.]

Yeesus malammih ishi rabi kee rabaakohi ugut yaakumeh warisha

(Markos 9:30-32; Luukas 9:43-45)

22Usun Galiilalle akattuk Yeesus: “Xiyawti Barhi xiyaw gabadde rado kinni, 23kaa yigdifinyaako lel usuk maddaxit lellec rabaako uguto kinni” akko yerhxe. Usun lel mangum yixzinin.

Maqhdas carih gibre

24Usun Kafarnaxuumulle yemeetin gedda, miirih lamma fiddat tacriifa#17:24 Tayim iggidalle lab Yahuuddi maqhdas carih xatoh axawuk yinem kinni. (Muuca: 30:13-16) yaskatte mari Bithroosulle yemeetiinih: “Sin mudarris miiri miyaxayeh kinniho?” akko yerhxin. 25Usuk lel: “Maalekka haye yaxaye” akko yerhxe. Usun caredde oroben gedda, Yeesus yookomeh aalih waanisheyaako: “Simcoon, aymih kolle higgida? Baarhot nuguusa miyaako kinni gibre kee miiri beyaanam? Sinni cindhamko, woole aki maraako?” akko yerhxe. 26Usuk: “Aki maraako” akko yerhxe gedda, Yeesus: “Amaydo, cindham xur kinon. 27Yakko kibah laakin tena kurrayishnamko, igil fanah tedeyaako caasa akah yabbirhin tiya igilille ciddeh erherhih yandhibbirhe caasatto bee, kaa af fakta gedda lel inki fiddat tacriifa#17:27 Ta fiddat tacriifa affara lellec hi maahiya kuuk tine. geyto kito. Amaa tiyä beyteh lel yotta kee isheh akah uxuu” akko yerhxe.

Currently Selected:

Maatiyos 17: SCC

Highlight

Copy