Maatiyos 11

Farto Yaythimmiqhe Yohannisko

(Luukas 7:18-35)

1Yeesus ishi lamman kee taman katattayniya yaamirem abayshe gedda, ten daafofulle yaydaraso kee mece ware warroysho amakkeeko tillaabe.

2Kado Yohannis amaa Masiix abittot hi sabbatah xabshedde yoobbe gedda ishi katattaynit fareh: 3“Amaa yamaato leti kotta kinni woole aketto ilalno nolle tane?” akko yerhxe. 4Yeesus lel: “Aduwantaaki Yohannisih taabbiinim kee tabliinim akah warisha: 5inti-malit yablin, xankiishinam yadiin, saknittem yamsiffiin, cokka-malit lel yaabbin, rabtem ugutan, baaxentit Mece Ware yambissirin. 6Yi sabbatah xoolashshiitinnixeti lel baraka-letiya kinni” akko yerhxe.

7Yohannis luuktit yedeyin gedda, Yeesus amaa mango xiyawlih Yohannis zacabah waanisho erherhishe: “Ayim tabloona zibolle tewciini? Xaaxatti waxwax-isha shambuqqo? 8Laakin ayim tabloona tewciini? Carha mece sara sarite xiyawto? Taykinna, amaa carha mece sara sarite mari nuguusat carwadde yanin. 9Amaydo, ayim tabloona zibolle tewciini? Nabii? Yoo, usuk rummah nabiiko aganalle kinam sinak arhxiyuk ane.

10‘Taykinna, ku basolle ku arax yasqarrabo le

inni luukta ku nifidde dhirhiyak aniyo’#Mal-aakhi 3:1

yarhxiinim kaa sabbatah akko tunkuttubeti kayya kinni.

11Saymaraako toobokemidde Yaythimmiqhe Yohannisko nabati adde maamaatinnam, rummah sinak arhxiyuk ane. Yakko kibah, carshi nigsinnadde ummannimko cindhati kaako naba. 12Yaythimmiqhe Yohannis maxko kado fanah carshi nigsinna umaatih tane, amaa xayla-le mari lel tee simbaacak yanin. 13Amayim lel inkoh Nobowa kee Sercat Yohannis fanah Yallih farto akah baaheeniikah, 14amayim lel kabbattoona fadhdheenimko, usuk tamaa yamaato yaarhige Eliyaas kinni. 15Yaabbe cokkak leti yaabboo!

16Ta ijo laakin miyaalih aybalaalawo liyo? Cadaagalle defeyeenih sinni carkitih deecima irroh kinni higgidam.

17‘Machambara sinah nootoke, margaditiini,

xazanah sinah zerne, mizeeritiini.’

18Yohannis beetak hido aacubuk maamaatinna, usun lel: ‘Jinnetta leya’ yarhxin. 19Xiyawti Barhi beetak kee aacubuk yemeete, usun lel: ‘Kaa ubula! Beeteena, sakraan, miiri yaskattit kee zambi-wannunhi carke’ yarhxin. Xikma laakin ishi ciyyoh titxiqqiqhe.”

Atoobinnixe daafofuk sin careyta!

(Luukas 10:13-15)

20Amaymik sarrah, maataabinnoonimhi sabbatah tamaa kaa xayla-le abittot mangih alle tekke daafof taginah ten cadalo erherhishe: 21“Korazin ku careyta! Beet-sayda ku careyta! Amayim lel ta sinalle yekke xayla-le abittot Tsoor kee Tsiidoonulle yekkeh yineh yakkeedo, mece geddaakoh toobat ishaarah guula sariteenih mombots sinnelle hayenyaako yotoobiinih anniye dhaarhen. 22Laakin amaa firdi max sinko ziyaada Tsoor kee Tsiidoonuh yar-haw kinam sinah warisha. 23Atu lel Kafarnaxuumo, carshe fanah korto kito? Hadeesadde kinni guballe cidditto kitom. Amayim lel kottalle yekke xayla-le abittot Sodomulle yekkeh yineh yakkeedo, kaafa fanah anniye dhadhdhe. 24Laakin amaa firdi max sinko ziyaada Sodom baarhoh yar-haw kinam sinah warisha.”

Curfen sinah axawo kiyok yottalle amowa

(Luukas 10:21-22)

25Yeesus amaa waqhtedde: “Abba, carshe kee baarhoh Maddara, ta xaajuj xikma-le mara kee maarhagitko sucusseh cindhaa cindham tiyshidhdhigemih, koh axmuduk aniyo. 26Yoo Abba, tayim lel ku mece farhi kinamhi sabbatah kinni! 27Yi Abbaako ummanna yoh tomxowweh tane, Abbaako bextih Barha yaarhigeti miyane. Barha kee Barhi yayshadhdhago doorime tiyaako bextih Abba yaarhigeti miyane. 28Xawala mara kee cuuki akko yiclishe marak curfen sinah axawo kinnik yottalle amowa. 29Yi arcot uqhuca, yottaako lel udrusa, anu sabre-le tiya kee addaako amnanabbinnixe tiya kiyomhi sabbatah, sinni nabseh curfen geytoona kitin. 30Amayim lel yi arcot yaaqhacoona sahiila, yi cuuki lel sissik tiya kinamhi sabbatah kinni” yerhxe.

Currently Selected:

Maatiyos 11: SCC

Highlight

Copy