Luukas 17

Zambedde sayishsham

(Maatiyos 18:6-7,21-22; Markos 9:42)

1Yeesus ishi katattaynitik lel: “Zambedde sayishsham amiitekkah racto maki, amayim kaa sabbatah akko takko leti lel kaa careyta! 2Ta cindhaa maraako inketta zambedde sayishshamko, naba marhxan filladde akko tumudhdhuweh badadde cidditam akah ashshe dhadhdhe. 3Atin sinneh selita! Sin sacal zambe abemko kaa oskoolofa, yotoobemko lel alle xaba. 4Lellecidde malxina gedda zambe sinak abeh, malxina gedda: ‘Otoobe’ yerhxeh sinalle gaxemko lel, alle xabtoona sinalle tane” akko yerhxe.

Ni imaan noh ziyaadish

5 Fartottit lel Maddarak: “Ni imaan noh ziyaadish” akko yerhxin. 6Maddari lel: “Imaanko adrattot fireh idhdha taalliinim yakkeedo, ta naba xarhak: ‘Bukkutaaki badadde imtikkil’ akko tarhxindo, sin aabbe dhadhdhe.

Amficinnixe garuuza

7Sinko, yaxruse hido loyna kin garuzzo leyaako usuk dhageeko oroba gedda: ‘Amo iba lacaaki maaddille defee’ akko yarhxo leti miyatto kinni? 8Amayim hidhdhah: ‘Dirar yoh isqirribaaki meceetih saritteyaako, anu beetak kee aacubuk yoh eyseese, amayek sarrah lel atu isheh betteh taacabo kito’ makini akko yarhxo lem? 9Akah kaa yeemerem abem hi sabbatah amaa garuzzo kaa yashkure? 10Amaydo atin yakkeedo, inkoh akah sin yeemeriinim abtan gedda: ‘Nanu amficinnixe garuuza kino, abno noh eeddam bisa kinni abnem’ erhexa” akko yerhxe.

Yeesus saknittemko taman yaysiffiye

11Usuk Samaariya kee Galiilaati fantaako Yerusaalem fanah tillaabak yine. 12Dikidde orobak lel saknittemko taman akah sugen. Waacinalle lel daw-yerhxiinih yinin. 13Sinni dhaw xaf-isheenih: “Yeesus, Mucallimo, nolle raxmat” yerhxin. 14Ten yuble gedda: “Aduwantaaki sheekha sinne uybulluwa” akko yerhxe. Usun lel aduuk yamsiffiin. 15Tenko wuliti lel urem ishe yuble gedda, caazalle yufkuneh, wac-yerhxeyaako Yalla yeynebe. 16Kaa cawwatoyshitak lel nifih Yeesus iballe rade. Samaariyatto lel kuuk yine. 17Amayek sarrah lel Yeesus: “Timsiffiyem taman kuuk miyineho? Sagal awla yaniini? 18Ta godobottaako bextih gaxeyaako Yalla yaynabeti adde miyane?” yerhxeh radde yoxoye. 19“Ku imaan ku gargeereh yanek ugutaaki ishi araxalle aduu” lel akko yerhxe.

Nigsinnat mumut

(Maatiyos 24:23-28,37-41)

20Yallih nigsinna manda tamaato lem Faarisiinih esserime gedda lel: “Yallih nigsinna amiituk xiyaw tee yabloona maki. 21‘Ubula taykinna’, hido ‘toohikinna’ akko yarhxeti miyane, taykinna, Yallih nigsinna sin fanadde tane” yerhxeh radde akah yoxoye.

22Katattaynitik lel: “Xiyawti Barha adde tabloona fadhdhan maaxi, wuli maxko tiyah amiituk yane. Tabloona lel makitiini. 23‘Ubula, tolle!’ hido ‘Ubula talle!’ sinak yarhxoona kinon. Maadayna, adde mikatayna. 24Xankarhi ifishayaako caran wuli wasanko wuli wasan fanah akah ifishaaka balih, Xiyawti Barhi lel ishi maxadde amay balih yakko kinni. 25Erherhih laakin mangum umaatih geyo kee kadit ijoh xinnitimo laazim kinni. 26Nuux waqhtedde akah tekkeh tineeka balih lel, Xiyawti Barhih waqhtedde takko kinni. 27Nuux yemeeteh naba doonikidde orobe max fanah, amaa xiyaw beetak, aacubuk, marcishitak kee marcah amxawuk yinin. Cilish weeci yemeeteh lel inkoh ten yeylee. 28Luuth waqhtedde lel amayim balih tekke, usun beetak kee aacubuk, dhaamak kee aabixuk, azruuk kee siraaxak yinin. 29Luuth Sodomko yewce max laakin, gira kee kirbit caranko radeh inkoh ten yeylee. 30Xiyawti Barhi adde yamidhdhige maxadde lel amaa ginah takko kinni. 31Amaa maxadde, ishi nuwaa caredde leyaako cari amok yaneti, bishshiito oobe wayo, amayim balih lel dhagelle yaneti caazalle afkune wayo. 32Luuth numa izzikkira. 33Ishi aniina naggoysho farhinnanti tee yaylawo kinni, ishi aniina aylayinnanti laakin tee dhawrho kinni. 34Amaa bar inki caratalle lamma yannawna kinoonim sinak arhxiyuk ane. Wuli tiya beyan gedda lel wuliti amalle raaco kinni. 35Lamma numa inkidde arhxinuk yannawna kinon. Wuli tiya beyan gedda lel wuli tiya amalle racto kinni” akko yerhxe. [36Wuli dhagelle yane lamma xiyawtooko wuli tiya akko beyan gedda, wuliti amalle raaco kinni.] 37Katattaynit lel: “Awla, Maddara?” akko yerhxin. Usuk: “Batki alle yanelle guuma takatto kinni” akko yerhxe.

Currently Selected:

Luukas 17: SCC

Highlight

Copy