Luukas 13

Atoobe kee alaye

1Amaa waqhtedde wuli xiyaw yemeetiinih, amaa Bilaatos ten biilodde ten sadaqha akko yezgelle Galiilaati marih zacabah Yeesusuh warishen. 2Usuk lel taginah radde alle deheye: “Ta Galiilaati mari, taginah waaxelsiiteenimhi sabbatah aki Galiilaati maraako uma zambi-wannun kuuk yinin takkaliini? 3Maale laakin, totoobiinih akke wayemko, atin gantah amaa ginah talawna kitiinim sinak arhxiyuk ane. 4Hido lel, amaa baxxaran kee taman Selihoom agaagalle qobba alle raddeyaako tigdife mari, aki Yerusaalemille marak yine maraako uma zambe abe mara takkaliini? 5Maale, totoobiinih akke wayemko, atin gantah amaa ginah talawna kitiinim sinak arhxiyuk ane”.

Daro hin indacartoh aymassal

6Usuk lel ta aymassal akah warishe: “Wuli xiyawti kaa cinabhi dhagedde tubqule indacartö luuk yine. Daro farheh alle yemeete gedda lel inkim akko waye. 7Cinab dhageh baclaysheenak lel: ‘Taykinna, ta indacartolle darot goronuh amiiteh walaa inkim akko wayemko taahe adooxa iggida liyo. Tee igric. Baarho akah caynishshamah ayim le?’ akko yerhxe. 8Cinab dhageh baclaysheeni lel: ‘Manabotta, tee lamma gale akah akuskuseh gomoo adde hayandah, kaamana gantah tee xab. 9Sarrat zaban daro bahtemko, temce; akke wayemko laakin, amayek sarrah tagraco dhicta’ yerhxeh alle yedebbe.”

Dalkina kin ufaye le numa

10Usuk kado sunagoogitko wuli tiyadde Sambatah aydurusuk yine. 11Amadde lel baxxaran kee tamana iggidiya laxsuusa ufayeh laxutte numa tine. Guddah gaxteh lel meceetih rig-tarhxo dhiicak mitine. 12Yeesus tee yuble gedda akah deecimeh tahe akko yerhxe: “Te numa, ishi laxuuko barii tekkeh tanito”. 13Usuk gaba bukalle akko oobisheh lel amalle anuk rig-terhxeyaako ishi Yalla teynebe. 14Amaa sunagoogeeti manabotti lel Yeesus Sambatah urusemhi sabbatah, kurrayeyaako amaa xiyawakke: “Ciyyo adde takko missil lixa lellec yane. Amaa lellecidde amowantaaki ura kibah, Sambatah maki” akko yerhxe. 15Maddari lel: “Ko munaafiqhiino! Sinko ummanti Sambatah ishi beceera hido ishi okolotta makal makaanooko yaftixeh yaafaco arkishah makiho? 16Ta Abraahim barhä kin numa, Sheethan baxxaran kee taman iggidiya yurhuweh sugeya lel Sambat lellec ta madhdhuwaako tamfattaxo teyah meedda?” yerhxeh alle yedebbe. 17Usuk tayim arhxuk, kaa didde kin mari inkoh xoolashshiiten. Xiyaw lel kayyah tekke nabne le xaajah inkoh xedenen.

Adratto kee ayco

(Maatiyos 13:31-32; Markos 4:30-32)

18Usuk yerhxe lel: “Yallih nigsinna aaginale? Ayimlih lel tee agaagisho kinni? 19Ishe, xiyawti beyeyaako ishi jardiinidde yizriye adratti cayna, tenebeh lel xarha tekkeyaako kimbir sinni care xakukudde akko siraaxitenyah kinni higgidam”.

20Malammih yerhxe: “Yallih nigsinna ayimlih agaagisho kinni? 21Numa beyteyaako aykee inkoh muluxandah tamana sinraa cagun cussedde hayte aycoh kinni higgidam”.

Xeewin caraf

(Maatiyos 7:13-14,21-23)

22Yeesus, daafof kee diikakalle aydurusuk Yerusaalem gabolle safarah ishi gerho katattayshe. 23Wuliti lel tahe akko yerhxe: “Maddara, gargeerimto lem dago mara kinooni?” 24Usuk lel: “Xeewin carafko orobtoona undufula. Mango mari oroboona farhoona kinon, akah takko makinam lel sinak arhxiyuk ane. 25Cari manabotti ugutah caraf alifa gedda, irolle daw-tarhxoona erherhishshaanah: ‘Maddara, noh fak’ arhxitin caraf takuxkuxin. Sarrah usuk: ‘Miya kitiinim kee awlaako kitiinim sin maarhige’ yerhxeh radde sinalle yadabbo kinni. 26Sarrah: ‘Kottaalih benneh noocobe. Atu lel ni shawaaricille tuyduruseh kito’ tarhxoona erherhishshoona kitin. 27Usuk laakin: ‘Awlaako temeetiinim sin maarhigem sinak arhxiyuk ane. Ko umam-abeenito! Mirix yok erhexa’ yarhxo kinni. 28Abraahim, Isxaaq, Yacqoob kee umbuka nobowa Yallih nigsinnadde tablin gedda, atin lel irolle cidditteenih amadde lel weeca kee ikokti xarqam yakko kinni. 29Xiyaw lel ayrommaaxa kee ayrodhdhuma, qilba kee junuubko yemeetiinih, Yallih nigsinnadde maaddille defeyoona kinon. 30Taykinna lel, sarradde tanem afadde gaxoona, afadde tanem lel sarradde gaxoona kinon” akko yerhxe.

Xazan Yerusaalem sabbatah

(Maatiyos 23:37-39)

31Amaa saacadde wuli Faarisiin yemeetiinih: “Heerodes ku yagdafo farhak yanek, takkeeko aduu” akko yerhxin. 32Usuk lel: “Tedeynih amaa wakarik tahe akko erhexa: ‘Taykinna, kaafa kee beera junuun eyyeeceh urusnan abo kiyo, maddaxit lellec lel abaysho kiyo. 33Amaydo, Yerusaalemko akuula nabii rabo mitakkemhi sabbatah, kaafa, beera kee beexa inni araxalle adaw yolle tane.’ 34Yerusaalem, Yerusaalem, nobowa tagdifeh, tamaa alle farritimtemille dhayit cidda tiyawo! Ayidhdhale gedda, atu akko farhinnixitoya, dor-hotta ishi chaaqhut ishi galedde akah taskatteeka balih ku cindham koh askatte dhaarhiyo! 35Taykinna, sin cari xabbiimeh kinni. ‘Maddari migacalle yamiiteti, usuk dhaacole kinni’ #Zaabur 118:26tarhxiinindah yi tabloona makitiinim sinak arhxiyuk ane” akko yerhxe.

Currently Selected:

Luukas 13: SCC

Highlight

Copy