Fartottit hi Abittot 4

Bithroos kee Yohannis araballe kab-yarhxin

1Bithroos kee Yohannis amaa xiyawlih waanishak, sheekha, maqhdas carih dhawrheenitti manabotta kee Tsadduuqhiim tenalle yemeetin. 2Amaa xiyaw aydurusuk rabtemhi ugut Yeesusudde yanem warroysheenimhi sabbatah lel mangum kurrayen. 3Amaymih lel ten yibbirhinyaako baarho dhumteh tinemhi sabbatah malammit max fanah ten yixbishin. 4Amaa farto toobbe labhaako mango mari yeemeniinih sittiyadde koona shiix takkem gufen.

5Malammit max ten manabottit, naba mara kee sercat dhiiceenit inkidde Yerusaalemille yekettin. 6Tenlih lel naba shekh kin Hannas, Kayaafas, Yohannis, Aleksaander kee aki mari naba shekhti xawazko kinya yengeliinih yinin. 7Bithroos kee Yohannis sinni fanadde daw-isheenih: “Tayim ayimti xaylah hido ayimti migacalle abteenim kinni?” yerhxiinih ten esseren. 8Sarrah Bithroos Quddus kin Ufayeh yemmeegeh: “Xiyaw manabottit kee naba marak, 9nanu kaafa akah esserimak nanem laxuute xiyawtoh mece abitto abaanam kee usuk aaginah ureh yanem yekkemko, 10ureyaako ta sin afalle daw-yerhxeh yane xiyawti, atin masqalakke takarteenih Yalli rabaako uguse Naazretko kin Yeesus Masiix migacalle ureh yanem, umbuka sin kee Israa-eel xiyawak sinah tamadhdhago. 11#Zaabur 118:22Yeesus, siraaxa marak atin xinten dhaa kinni. Ta dhayitti lel ongolot dhaa lel yekkeh yane. 12Nanu akah gargeerimno dhicna aki migac caranti gerille xiyawah yomxoyeya miyanemhi sabbatah, akettooko garger miyane” akko yerhxe.

13Usun Bithroos kee Yohannis fidbe yublinyaako, adrusinnixe gabbar kinoonim duhen gedda cibrah rabeenih Yeesuslih yine mara kuuk yiniinim yeysherheerhegin. 14Amaa ure xiyawti tenlih daw-yerhxeh yubliinimhi sabbatah tayimhi diddeh yarhxiinim wayen. 15Amaa arabaako mirix-yarhxoona ten yeemerin gedda, inkidde zatteyoona erherhishen. 16“Ta mara ayim ishno? Nanu aluu akko narhxo wayna mudhdhug kin ishaara, umbuka Yerusaalemille marta xiyaw yublinya ten araxah tekkeh tane. 17Ta gondo xiyawalle faax-tarhxemko laakin, tayek sarrah ta migacalle xiyawlih waanishaanamko ten asusno” yerhxin. 18Amaymih akah deecimeenih Yeesus migacalle waanishaanamko hido yaydurusiinimko ten yeemerin. 19Bithroos kee Yohannis laakin: “Yalla yaabbiinim kee sina yaabbiinimko awlihim arax kinam atin sinneh ifrida. 20Amayim lel nanu nublem kee noobbem waanishnam xabno mirhicnamhi sabbatah kinni” yerhxiinih alle yedebbin. 21Gaxenyaako ten mashshiisheenih ten dhirhiyen. Amayim lel tamaa tekkeh tinemih xiyaw Yalla aynabuk yiniinimhi sabbatah, ten yaqhtsacoona mirhiicinnooni. 22Amaa cibra kin ishaara alle tekke labhatti lel cumreh marootomko bukalle kuuk yine.

Kattattaynit fidbe geyoona dhaacitan

23Bithroos kee Yohannis yimfittixin gedda, sinni zooba fanah yedeynih sheekhat manabottit kee naba mari akko yerhxiinim akah warishen. 24#Muuca 20:11; Nexemyaa 9:6; Zaabur 146:6Usun lel tayim yoobbin gedda inki afcaado yekkinyaako sinni dhaw wac-isheenih Yalla taginah dhaacimen: “Caran, baarho, bad kee inkoh tenadde geytimtam yukhluqhe ummanimhi Maddara kito. 25#Zaabur 2:1-2 Ni abba kin Dawuduk Quddus kin Ufayeh abteh tahe terhxe:

‘Aki-mari aymihi xandaadaanam,

ta xiyaw aymih kinni amficinnixem yaxiggiriinim?

26Baarhot nuguusa kee reezon,

Maddara kee kaa Masiix,

diddeh inkidde daw-yerhxin’.

27 # Maatiyos 27:1-2; Markos 15:1; Luukas 23:1,7-11; Yohannis 18:28-29 Rummah lel Heerodes kee Bontiyos Bilaatos, Aki-mara kee Israa-eel xiyawlih yekkiinih quddus kin ku khaddaam Yeesus Masiix, atu doorot assakatah tuskute tiyahi diddeh ta daafolle inkidde yekettiinih yinin. 28Tayim lel, atu isheh tookomeh ishi gabah abayishshe xagara takko ciloh kinni. 29Kado lel, Maddara, ten mashshish ubulaaki ku khaddamte ku waanitta umbuka fidbeelih waanishoona ten dhicshish. 30Quddus kin ku khaddaam kin Yeesus migacalle lel laxuttem uroona, ishaarar kee bexsishsham lel yakkooki ishi gaba iyfiddig” yerhxin. 31Dhaaco bakeenimko sarrah, tamaa yekettiinih alle yinin makaano xumuu-terhxeyaako inkoh Quddus kin Ufayeh yemmeegiinih Yallahi waanitta mashshi hinnim wansiitoona erherhishen.

Ummannim inkidde luuk yinin

32 # Fartottit hi Abittot 2:44-45 Inkoh tamaa yeemene mari inki afcaado kee inki xangal kuuk yinin. Iraaroh luuk yiniinim umman tenhim kuuk yinenkah, tenko: “Tayim yim kinni” yarhxe tiyah walaa inketti miyine. 33Fartottit lel Maddara kin Yeesus rabaakohi ugut naba xaylaalih ashhiduk yinin, umman tenhi bukalle lel naba nicma tine. 34Ten fanadde lel baaxentah walaa inketti miyine. Amayim lel inkoh baarho kee carwa le mari yaabixiinih amaa mibxiiko geyen solaadi baahaanah, 35fartottitti gerille oobishak yinin. Usun lel farhshiisha marah kelak yinin. 36Leewiiti barhi Yoosuf Qobrosulle yoobokeya yine. Fartottit lel “Barnabas” akko yarhxin, (tee macna lel “Aydukumusnan barha” yarhxiinim kinni.) 37Usuk luuk yine dhage yeebexeyaako solaadi baaheh fartottitti gerille oobishe.

Currently Selected:

Fartottit hi Abittot 4: SCC

Highlight

Copy