Fartottit hi Abittot 14

Bawlos kee Barnabas Ikooniyonille

1Ikooniyonille lel tekke, Bawlos kee Barnabas inkidde Yahuud sunagoogedde orobeenih inkoh Yahuud kee Giriik xiyawko mango mari yaaminiinim fanah waanishen. 2Tamaa taamano xinte Yahuud laakin saculti didde akah yakkiiniikah Aki-marahi qalbe summusen. 3Usun laakin Maddari zacabah yifdibiinih waanishak, dherh waqhte amalle sugen. Maddari lel ishaarar kee bexsishsham ten gabah takko ten dhicshiisheh, ishi nicmahi waanitta yiysibite. 4Amaa daafoh xiyaw laakin lammalle xazziimen, gari Yahuud carha, gari lel fartottitti carha gaxen. 5Yahuud kee Aki-mara lel sinni manabottitlih yekkiinih akah yaamoona kee dhayitih ten yagdafoona farhen. 6Usun lel tayim yeerhegin gedda, Likooniyaati daafof kin Listira kee Derbe, kee amaa wakalih diikalle kudenyaako, 7mece ware warroyshaanam katattayshen.

Bawlos kee Barnabas Listiralle

8Kado Listiralle wuli ibah gerho taana xiyawti defeyak yine. Usuk xankishik akah yoobokeekah caduruh gerho dhiicak miyine. 9Usuk Bawlos waanishak kaa yoobbe. Bawlos macalah kulux adde yerhxeyaako, uro dhiicamhi imaan leyam kaa yuble. 10Wac-yerhxeh lel: “Ishi ibah daw-erhex!” akko yerhxe. Amaa xiyawti lel bidig-ishiteyaako gerho erherhishe. 11Amaa mango xiyaw Bawlos abem yublin gedda, sinni dhaw wac-isheenih Likooniyaati waanih: “Yallit xiyawah yimmingidiinih nolle ooben” arhxuk yinin. 12Barnabasak Zeyus#14:12 Zeyus Giriik naba yalla balih kuuk yine, Hermees lel yallahi luukta balih kuuk yine. akko arhxuk yinin. Bawlosuk lel naba madareena kuuk yinemhi sabbatah Hermees akko arhxuk yinin. 13Zeyusti shekh, kaa maqhdas cari daafot orbeenalle akko yineya, becar kee comboobat citrit carafalle baaheyaako amaa mango xiyawlih sadaqha akah abo farhe. 14Amaa fartottit kin Barnabas kee Bawlos, tayim yoobbin gedda, sinni sara candhisheenih arduk amaa mango xiyawalle yewcinyaako, zeerak: 15#Muuca 20:11; Zaabur 146:6“Ko xiyawo, aymih tayim abak taniini? Nanu gantah xiyaw kinni kinom, sina balih tunkhulluqhem kino! Tagina le amficinnixemko tamaa caran, baarho, badadde kee inkoh tenadde tanem yukhluqheh yane Yallalle gaxtoona ciloh kinni lel mece ware sinah bahnam. 16Tillabte ijolle Aki-mari inkoh sinni-sinni araxalle yadawna ten xabeh yine. 17Taginah lel mecem abak, caranko rob kee orbat waqhte sinah axayik, sin afcaadod lel folo kee mecaanih aylagguk, isheh shaahid abekkah mixabo” akko yerhxin. 18Tayim inkoh waanishen hanuk amaa mango xiyaw sadaqha akah abaanamko xaylah yashshamanoona dhiicen.

Bawlos Listiralle dhaytih yumuttuke

19Yahuud laakin Anthaakiya kee Ikooniyonko yemeetiinih, amaa mango xiyaw yishshimininyaako, Bawlos dhayitih yumuttukeh rabe yekkelinyaako gototeenih amaa daafooko irolle yeyyeecin. 20Amaa katattaynit kaa makaren gedda lel uguteyaako amaa daafodde orobe. Malammit max lel Barnabaslih Derbe fanah yedee. 21Amaa daafolle mece ware warroysheenik sarrah mango katattaynit abeenih Listira, Ikooniyon kee Anthaakiya fanah gaxen. 22“Yallih nigsinnadde orobno nolle tanem mango hadaanoh kinni” arhxuk katattaynitti rooxe yeysheedeynih sinni imaanalle yasbatoona ten aydukumusen. 23Babbarhi kaniisalle naba mara akah dooreenimko sarrah salat kee siyaamah usun akah yeemeniinih yinin Maddaralle ten amaanatishen.

Bawlos kee Barnabas Suuriyaati Anthaakiyalle gaxan

24Usun sarrah Bisidiyaako tillaabeenih Bamfiliyalle yemeetin. 25Usun amaa waanitta Bergelle warroysheenih Attaliya fanah ooben. 26Amakkeeko lel tamaa yiskimilin ciyyoh Yallih nicmah dhawrhumoona dhaaco alle akah aben Anthaakiya fanah badah gaxen. 27Amakke gufeenih lel inkoh kaniisat xiyaw yeskettinyaako, inkoh Yalli akah abem kee Yalli Aki-marah imaan caraf akah faakeh yanem akah warishen. 28Amaa katattaynitlih lel mango waqhte sugen.

Currently Selected:

Fartottit hi Abittot 14: SCC

Highlight

Copy