Fartottit hi Abittot 12
12
Yacqoob yigdifin, Bithroos lel yixbishin
1Amaa waqhtedde Nugus Heerodes kaniisat maraako garo ten yaazawo erherhishe. 2Yohannis sacal kin Yacqoob sefih yigdife. 3Tayim Yahuud xedenishshem yuble gedda lel kataysheyaako Bithroos gantah yixbishe. Tayim lel Cadublat Xabazah cid ayyamadde kuuk yine. 4#Muuca 12:1-27 Kaa yibbirhek sarrah xabshedde kaa hayeyaako, Faasigak sarrah xiyawalle kaa yayyaacoona farheyaako, afaffarah kaa dhawrhoona affara filco caskariyalle kaa yoxoye. 5Amaymih Bithroos xabshedde dhawrhumak yine, amaa kaniisa laakin sinni afcaadooko Yalla akah dhaacimak yinin.
Bithroos xabsheeko yawce
6Heerodes malammit max firdelle kayya akko baaho le kabar, Bithroos lamma katiinah yumudhdhuweh, lamma caskartih fanadde dhiineh yine. Amaa caskar lel xabshe dhawrhoona carafadde yinin. 7Taykinna lel, Maddari malaykatti yemeeteyaako kaa agaagalle daw-yerhxeh, amaa xabshedde ifi iffowe. Amaa malaykatti Bithroos masangaleeko kaa dhageh: “Ugut gaba-lac!” akko yerhxe. Amaa katiinan lel kaa gabaako rade. 8Amaa malaykatti lel: “Ikkitiyaaki kabel hashshit” akko yerhxe. Usuk lel amayim abe. “Ishi natsala ishelle sawalaaki yi kataa” lel akko yerhxe. 9Usuk lel yewceyaako kaa kataye. Mablo abluk yanem ishe yekkelenkah, amaa malaykatti rummah akah ambulluwik yanem maarhago. 10Afti caskarto kee malammaako tillaabeenik sarrah, daafot gabolle xiyaa yayyaace birti baaballe yemeetin. Amaa baab lel isheh akah fakkiteyaako, yewciinih wuli araxalle aduuk anuk lel, akkanih amaa malaykatti kaa xabeh akko yedee. 11Himma alle gaxte gedda lel: “Maddari ishi malaykatto fareh Heerodesti gaba kee amaa inkoh Yahuud aboona ilaalak yiniinimko yi yeyyeecem eerhegeh aniyo” yerhxe.
12Tayim yeerhegek sarrah lel, mango mari yekettiinih dhaaco adde abak yinin tamaa Markosuh yamidhdhige Yohannis ina kin Maryam care fanah yedee. 13Usuk amaa kanshellot maczo yukuxkuxe gedda lel wuli Roda akko yarhxin garuzzö kin barhä akah fakto tedee. 14Ishe Bithroos dhaw kinam teysherheerhege gedda xedenti sabbatah amaa maczo faakekkah terdeh orobteyaako, Bithroos carafalle daw-arhxuk yanem akah warishshe. 15Usun laakin: “Ticbideh tanitoho?” akko yerhxin. Ishi tibbirhekkeeko kayya kinni terhxe, usun lel laklakalle: “Kaa malaykatto kinni!” yerhxin. 16Bithroos laakin laklakalle yukuxkuxe, akah faaken gedda lel kaa yublinyaako cibrah raben. 17Usuk laakin sik-yarhxoona gabah akah kinishak, Maddari aaginah xabsheeko kaa yeyyeecem akah warishe. “Tayim Yacqoob kee saculuh akah warisha” akko yerhxe. Sarrah amakkeeko yewceh aki makaano fanah yedee.
18Baarho maxte gedda, amaa caskar hi fanadde Bithroos ayim geyemhi zacabah mango rocda tekke. 19Heerodes lel Bithroos wagiyeh kaa waye gedda, amaa caskar yimirmireh ten yagdafoona amre yoxoye. Sarrah Bithroos Yahuudiyaako oobeh Qayseeriyalle ayyamishe.
Heerodesti raba
20Kado, Heerodes Tsoor kee Tsiidoon xiyawlih kurrayeh yine. Amaymih, inkidde yekettiinih kaalle yemeetin. Ten xato ciloh lel amaa nugus xattiimeena kin Bilastos yishshiminin. Ten dik hi teelo amaa nugus dikko amiituk tinemhi sabbatah wagareh kaa esseren. 21Amaa yixiggirin lellecidde lel Heerodes ishi nigsinnat sara sariteh nugus-kurselle defeyeyaako amaa xiyaw madare ten yoshshoobbe. 22Amaa xiyaw lel wac-yerhxiinih: “Tayim yallih dhaw kibah, xiyawim maki” arhxuk yinin. 23Akkanih lel usuk Yallah nabne maaxayinnamhi sabbatah Maddari malaykatti akko yootokeh kaa cide, awwuuxuteh lel rabe.
24Yallih waanitta laakin ziyaadeh sasante.
25Barnabas kee Shaa-uul sinni khidma abayshenyaako Markos akko yarhxin Yohannis sinneelih baaheenih Yerusaalem gaxen.
Currently Selected:
Fartottit hi Abittot 12: SCC
Highlight
Share
Copy
Want to have your highlights saved across all your devices? Sign up or sign in
©2024 Wycliffe Ethiopia
